Provébiu 19:1-29
19 Danhimarĩ õ na sena na iꞌuwaibaba na si ꞌre idahâimana zaꞌra mono zé hã wẽ uptabi di, sadawa nhipese na isimizaꞌreseꞌõ ꞌre ihâimana mono zém nhipai u hã.
2 Niꞌwai ma hã marĩ tãma waihuꞌu õ nherẽ, te te sima ꞌre iwẽ mono te te ꞌre iꞌmanharĩ mono da hã wẽ õ di. Duré niꞌwa wara sina marĩ te te ꞌmanharĩ wamhã, te za ãma upa.
3 Danhimizaꞌreseꞌõ na niha na ꞌre idanomro mono zéb zarina, te za dahâimanazé hã da te dasiwi ꞌre wasété pese zaꞌra. Duré dapẽꞌẽ ꞌre te za Uburé Danhibꞌapito da hã ꞌre danhitiꞌru zaꞌra, ta hã te te upa newa.
4 Isibro pe hã te za tisiwaihu, ahâ na te te sitẽme ꞌre aꞌwani. Tane nherẽ, isimarĩꞌõ siwaihuꞌu si te za te te ꞌre arẽme.
5 Daꞌãma rowairébézéb ãma sena na dawasuꞌuꞌõꞌwa hã, isimihâzé wi ꞌre isimani mono da hã mare di za.
6 Dama ipire na ꞌre ihâimana zaꞌra mono norĩ, te te ꞌre dawẽsãmri zaꞌra mono da hã, te za uburé dasima ꞌre danhopré. Duré sapaꞌabâ isibzari ze siwaihuꞌu norĩ hã ahâ uptabi di.
7 Isimarĩꞌõ, isisãnawã uptabi te te siwi ꞌre wẽꞌõ mono nherẽ, e te aré bété isiwaihuꞌu norĩ hã te te sina ꞌre tété zaꞌra. Mare di. Aiwa te za tô te te siwi ꞌre wẽꞌõ pese zaꞌra. Tahawa isiwaihuꞌu norĩ te te ꞌre pawaptob zaꞌra mono da, duré sô ꞌre rĩtĩ zaꞌra mono nherẽ, nimame te te iꞌmanhopẽtẽ da hã mare di za.
8 Niꞌwa tiꞌrãi waihuꞌu wẽ zô sima ꞌre rĩtĩ mono wamhã, te tihâimanazé hã te te sima ꞌre sawi. Duré niꞌwa ꞌrãi waihuꞌu wẽ na ꞌre hâimana mono wamhã, te za tãma ꞌre irowẽ mono zé hã te te sina ꞌre uwaimrami.
9 Daꞌãma rowairébézéb ãma senaiꞌõ na dawasuꞌuꞌwa hã, danhimihâzé wi ꞌre isimani mono da hã mare di. Te za duré isadawa nhipese zarina ihâiba hã aiꞌutõ.
10 Isimizaꞌreseꞌõ norĩ, sima sipese na ꞌre ihâimana zaꞌra mono da hã ibâi õ di. Pawaꞌâbâ ãna te te dama ꞌre iromhuri zaꞌra mono norĩ hã bété. Dama iꞌrãnhoꞌõmo norĩ upana te te ꞌre idaꞌaꞌmadâꞌâ mono da hã ibâi õ di duré.
11 Iꞌrãi waihuꞌu wẽ norĩ hã dame ꞌre siꞌrãi waꞌro suꞌu zaꞌra mono õ di. Duré dawasédé, da te tãma ꞌre ꞌmanharĩ mono nherẽ, te te daꞌãma ꞌre iꞌaꞌmadâꞌâ mono õ zarina te za dasiwi da te ꞌre wazé pese.
12 Apito ꞌre isahi mono zé hã aiwa huꞌu zérépa wairõ ne te ꞌre hâimana. Tane nherẽ, isimizawizé hã aiwa atébré rowarã na du te te ꞌre iwaihi zaꞌra mono ne hã.
13 Daꞌra isimizaꞌreseꞌõ te za timama wi tihâimanazém na hã tiwi rowamna. Duré damro piꞌõ timreme na isimiwati pe hã aiwa â ꞌre itoptõrĩ nhimizahâri zaꞌra mono õ ne hã.
14 Daꞌra norĩ te za timama uirĩ na isimarĩ hã ꞌri hã duré robꞌuiprazé hã te te sima ꞌre waibu zaꞌra. Tane nherẽ, Uburé Danhibꞌapito si te za damro piꞌõ isimizaꞌrese wẽ hã te te dama ꞌre anhomri.
15 Dawaꞌa hã te za aptâꞌâ si te te dama ꞌre sõmri zaꞌra. Duré iwaꞌa hã te za mra hã te te ꞌre sépata.
16 Niꞌwa ꞌRe ihâimana uꞌâsi mono nhimiroti te te ꞌre wapari pese mono wamhã, te za ꞌre hâimana hâ. Duré niꞌwa isimiroti te te siwi ꞌre wẽꞌõ mono wamhã, ꞌre hâimana hutu mono di za.
17 Niꞌwa isimarĩꞌõ ma, te te ꞌre robꞌmanharĩ wẽ mono wamhã, Uburé Danhibꞌapito ma, marĩ te te aꞌâ taré tãma isõmri ne hã. Tahawa te za isimiꞌmanharĩ wẽ zé waꞌrãmi iwẽ hã tãma tisõ.
18 Aiꞌra norĩ hã zahadu prédub õ ré, te za tãma ꞌre iropipa zaꞌra waꞌaba mo. Ãnei õ wamhã, te za tihâimanazé hã te te siwi ꞌre uprosi zaꞌra, ꞌrâwi.
19 Niꞌwa hã ihâimana waꞌro su nimahã na te te robzépata tõ da, pawaptom nherẽ, sisãmri dai õ di. Duré pawaptob zahu nherẽ, isisãmri da hã mare di. Tahawa, ihâimana waꞌro suꞌu norĩ te te tô ꞌre robzépata zaꞌra mono.
20 Maꞌãpé danhimiroti hã ꞌre wapari pese mono, duré asima ꞌre wẽ mono. Ãne wamhã, nimahã na te za aiꞌrãi waihuꞌu wẽ na oto ꞌre aimo.
21 Dapẽꞌẽ ꞌre, da te ꞌre irowaꞌõtõ zaꞌra mono zé hã ahâ di. Tane nherẽ, Uburé Danhibꞌapito te te dama ꞌre iꞌapisutu mono zéb zarina si te za tô dama ꞌre wairébé.
22 Niꞌwa tinhimizawi pese zém na ꞌre hâimana mono wamhã, ãma ꞌruiwapari zaꞌẽtẽ di. Duré danhimarĩꞌõ na ꞌre idahâimana zaꞌra mono da hã wẽ uptabi di, dazadawa nhipese na ꞌre idahâimana zaꞌra mono zém nhipai u hã.
23 Niꞌwa, Uburé Danhibꞌapito te te ꞌre wazé mono wamhã, te za rowẽ na si ꞌre hâimana hâ pese, sima iwẽ na.
24 Sima iwaꞌa, tizadawa u tisa hã te te sima ꞌre zai waihuꞌu mono õ di, waꞌa uptabi wa.
25 ꞌRâwi ꞌre isiꞌmadâꞌâ ze zaꞌra mono ma, te za da te tãma ꞌre robꞌmanharĩ zaꞌra, simirosaꞌrata waihuꞌu prã na ꞌre ihâimana zaꞌra mono norĩ hã sina ꞌre iwata zaꞌra mono õ zé te te ãma ꞌre waihuꞌu zaꞌra mono da. Duré niꞌwa, iꞌrãi waihuꞌu wẽ ma hã da te tãma ꞌre ipẽtẽ mono zarina, te za rowaihu iwẽ na hã te te sima ãma ꞌre saꞌẽtẽ uꞌâsi.
26 Niꞌwa timama ma, te te robꞌmanharĩ wasété wamhã, duré tina ꞌri hawi te te wazere wamhã, te za timama norĩ hã ãma sisém nomri zahuré.
27 Ĩꞌra, danhimiroti ꞌmanharĩ waparizé rẽme wamhã, te za ꞌre iꞌawaihuꞌu mono zé ma hã ꞌre asimirẽme mo.
28 Daꞌãma rowairébézéb ãma, dasiwasuꞌu na da te ꞌre uwaimrami zaꞌra mono õ wamhã, te za daꞌãma ꞌre dawaꞌẽ zaꞌra, robꞌuwaibaba na za te te daꞌãma ꞌre rowairébé mono õ wa. Iwasété norĩ ma, uburé marĩ iwasédé hã tãma ise.
29 Daꞌãma ꞌre idawaꞌẽ zaꞌra mono norĩ da hã te iꞌahârizéb da hã da te sada ꞌre saꞌra zaꞌra. Duré isimizaꞌreseꞌõ norĩ da zama, te za iba wi da te ꞌre ipréꞌé zaꞌra mono da hã da te sada ꞌre saꞌra zaꞌra.
