Provébiu 18:1-24
18 Niꞌwa dasiré ꞌre hâimana mono da, te te sima ꞌre iwẽ mono õ hã te za tihâimanazém na si ꞌre siꞌmadâꞌâ. Te za duré uburé roti iwẽ hã te te siwi ꞌre awẽꞌõ.
2 Isimizaꞌreseꞌõ marĩ te te iwaihuꞌu da hã te te sima ꞌre wẽ mono õ di. Taré te za tinhimirosaꞌrata si te te dama ꞌre anhamra.
3 Dawasété zarina, danhisi wasédé. Duré dawazéb õ zarina, danhisi upto.
4 Daꞌrãi waihuꞌu wẽ zarina, damreme hã aiwa â ꞌrehâ ne hã te ꞌre hâimana. Duré rowaihuꞌu pese ꞌwai mreme hã â ꞌre ipraba uꞌâsi mono ne, ꞌré waihuꞌu õ di.
5 Iꞌuwaibaba õ di, marĩ ꞌmanharĩ wasété ꞌwa norĩ niwĩ, daꞌãma rowairébéꞌwa ꞌre ihâimana mono da hã, duré marĩ ꞌmanharĩ wasété õ ꞌwa norĩ ma, ibâ na rowairébé te te iꞌmanharĩ õ na ihâiba hã.
6 Isimizaꞌreseꞌõ, timreme zahi zarina, te za dasiꞌwapé hã te te ꞌre azani. Te za duré tiꞌahârizé hã te te sisada ãma ꞌre azani.
7 Isimizaꞌreseꞌõ nhimirobzanhamrizéb zarina te za tiꞌuprosizé hã te te sima ãma ꞌre sani. Duré timreme na te za sisõwada, abaze mramizém na.
8 Dabâsi zeiꞌwa norĩ mreme hã aiwa dasai waꞌõtõre ise, dapẽꞌẽ u ꞌre isisisi mono ne hã te ꞌre hâimana.
9 Niꞌwa isimiromhuri ꞌwamnhaꞌa hã aiwa dawi marĩ wamnarĩꞌwa ne hã te ꞌre hâimana.
10 Uburé Danhibꞌapito nhisi hã aiwa ꞌri ꞌrãihâ dasimapazé isiptete ne hã te ꞌre hâimana. Taha tẽme te sena na iꞌuwaibaba na si ꞌre ihâimana zaꞌra mono norĩ hã ꞌre nomro, sima iwẽ na iwa ꞌre hâimana zaꞌra mono da hã.
11 Isimarĩ pese norĩ hã te te ꞌre rosaꞌrata zaꞌra, isimarĩ iꞌwawib zaꞌra ꞌre isimapa zaꞌra mono na hã, aiwa ꞌri nhoꞌõmo ꞌwawi waꞌra ꞌrãihâ isiptede ꞌre ihâimana zaꞌra mono ne.
12 ꞌRâwi ꞌre idasiꞌmadâꞌâ ze zaꞌra mono na hã te za ãma ꞌre dasiwamnarĩ zaꞌra. Tane nherẽ, niꞌwa dama wapu na ꞌre isiꞌmadâꞌâ mono zarina, te za da te dasiwi ꞌre wazé pese.
13 Niꞌwa te te dawapari ꞌrãiwaꞌõmo õ ré, timreme na õne haré te te ãma dazadaꞌâbâ wamhã, te za tinhimizaꞌreseꞌõ na hã sihâiꞌré. Te za duré tiwi tirowazé.
14 Dapẽꞌẽ ꞌre rowẽzém na danhiptede hã te za dahâzé wamhã, te te ꞌre daꞌaꞌupari. Tane nherẽ, dapẽꞌẽ ꞌre dawi ꞌre irobzeiꞌõ zaꞌra mono wi hã niꞌwa tiwi ꞌre simaꞌwara waihuꞌu mono õ di.
15 Iꞌrãiwaihuꞌu wẽ ꞌre ihâimana mono hã te õne uꞌâ tipẽꞌẽ na marĩ te te ꞌre iwaihuꞌu mono da hã sô ꞌre siꞌwapé.
16 Dama ipire ma nharĩ da, asima wẽ wamhã, asibzari taré tãma âri, sitẽme te te aiꞌâri suꞌu da.
17 Niꞌwa hã imorĩꞌrata na siꞌwawi simapa da isiwasuꞌu na hã te za sena newa ãma rosaꞌrata zaꞌra ni. Tane nherẽ, isiré ihâiba amo te te oto sadanharĩ wamhã, te za niha hã aimawi hã ãma waihuꞌu zaꞌra ni.
18 Te te dama ꞌre irowairébé zaꞌra mono ꞌri ꞌremhã isiptete norĩ sisada simaꞌwara wamhã, te za ẽtẽre uiꞌéré ré iwazéb zahi hã da te ꞌre wabzuri, taha zarina te te tãma ãma ꞌre rowairébé zahuré mono da hã.
19 ꞌRi nhoꞌõmo ꞌwawi waꞌra isiptete na da te ãma ꞌre iꞌaiꞌuté zaꞌra mono nhipai u pire uptabi di, dasiwaihuꞌu me da te dasima ꞌre pẽtẽ zaꞌra mono wa, apâ dasina ꞌre idasihâibatob zaꞌra mono da hã. Damreme na dasiꞌwapé hã ꞌri nhoꞌõmo tẽme danhisisizé ꞌridawa zaꞌẽne da te dawi ꞌre itété tete zaꞌra mono ne hã te ꞌre hâimana.
20 Uburé marĩ na ꞌre inharĩ mono zéb zarina, te za marĩ hã asô ꞌre pusi, iwẽ hã duré iwasété zama.
21 Danhoto na damreme hã siptete di, isiminhoꞌreptu zarina, ãma ꞌre idahâimana zaꞌra mono zéb da hã. Duré ãma dapãrĩ da hã tô siptete di. Tahawa, damreme zarina te za tô niha hã da te dasima ꞌre sani zaꞌra, iwẽ hã.
22 Niꞌwa timro da, piꞌõ te te ꞌmanhopẽtẽ wamhã, tãma irowẽ uptabi zép si, te za sõpẽtẽ. Ta hã, Uburé Danhibꞌapito, aibâ te te iwẽsãmrizé te wasuꞌu.
23 Isimarĩꞌõ norĩ hã te za wapu na dawi rowaptẽ. Tane nherẽ, isimarĩ pe hã te za timreme tete na hã ãma sadaꞌâ.
24 Marĩ uꞌâbâ si dasisawizé hã, õne uꞌâsi ãma ꞌre dasisawi zaꞌra mono õ di. Tane nherẽ, dasiwaihuꞌu uptabi te dama ꞌre hâimana, dasisãnawã ꞌrâwi nhipai u hã.
