ROMNHORÉ 44
E uburé mara dzaꞌẽne duré dato Ropotoꞌwai ma te tãma rowẽ
Jeová te tsima wẽ wa te watsima robdze dzaꞌra da duré nimahã na hã wato dzaꞌra da. Tadzahã, e uburé mara dzaꞌẽne duré dato Ropotoꞌwai ma te tãma rowẽ. E niha wa dza höiꞌré dzaꞌra ni wanhimidzawidzé Jeová ãma duré ĩtsimirotsaꞌrada hã wama ĩpire na hã.
1. E marĩ wa, mara dzaꞌẽne duré dato ahö na Jeová ma te te rowẽ õ di.
Ãté te dza atobꞌudzu waihuꞌu wamhã mara dzaꞌẽne duré dato ĩꞌahö norĩ ĩhöimana dzaꞌra hã rowahutu norĩ dzarina Ropotoꞌwai mreme nhimiroti dzada niwamhã ĩhöimana dzaꞌra na hã danhimidzadze ĩꞌuptabi õ hawi. Ãté romhõtsi pipa te ãma tihöimana dzaꞌra, niwamhã te dama ãma ropé dzaꞌra rotsaꞌrada hã dahöiba uptabi hã ĩdöꞌö waihuꞌuꞌõ na. Nimahã dato norĩ ma wairé danhimidzadze ĩböiꞌõ hawi niwamhã date ĩrotsiromodzém hawi. (Isaías 65:11 TNM) Jeová te poꞌre puru tãma ĩromhuriꞌwa norĩ ma: ‘Dapoꞌre ãna ꞌre ĩdanomro mono norĩ hã, te dza oto atsiwi ꞌre ĩrẽme dzaꞌra waꞌaba mo, ta norĩ höimana watsété dzém nhiti, ꞌre aihöimana dzaꞌra waꞌaba mono da oto. Dapoꞌreꞌõ norĩ hã uburé marĩ hã te te tsiwi ꞌre ĩꞌmanharĩ watsété dzaꞌra mono dzé hã, tiwi ꞌre upi dzahu dzaꞌra waꞌaba mono õ di dza oto.’ — 2 Coríntios 6:17. a
2. E niha Jeová te rotsaꞌrata mara dzaꞌẽne duré dato ĩböiꞌõ na.
Jeová te wama roti dzaꞌra ĩpipa na hã ‘taré wa te daꞌumnhatsi dzaꞌra da’. (Tsõré na Jeremias 17:5 TNM.) Nimahã mara dzaꞌẽtẽ norĩ, ma pitsutu dzaꞌra ni da te ĩꞌumnhatsi dzaꞌra norĩ ãma hã dawatadzéb da hã, ãma ĩtsimiré, datsiꞌwapé ꞌmanharĩꞌwa norĩ ãma niwamhã dama ĩpire norĩ ãma. Ĩhöiba amo norĩ, ma pitsutu dzaꞌra ni daro ãma ꞌre ĩdahöimana dzaꞌra mono dzéb ãma hã dawatadzéb da hã. (1 João 5:21) Duré nimahã mara dzaꞌẽtẽ norĩ, te ãma tihöimana dzaꞌra rotsaꞌrata na política na niwamhã danhimiꞌubumro nhimirotsaꞌrata na. Ta norĩ hã te dama ãma ropé dzaꞌra rotsaꞌrada Jeová te te tsima ĩwẽdzéb dzada. Aima hã, e niha Jeová te aré tihöiba dame wahöimana dzaꞌra ꞌwaꞌöhã mara dzaꞌẽtẽ na ta norĩ ãma niwamhã ĩböiꞌõ na daꞌãma dawatadzéb da.
3. E Ropotoꞌwa te wẽꞌõ mara dzaꞌẽne duré dato nimahã dahöimanadzém norĩ uꞌöbö.
Ropotoꞌwai mreme te te wẽtsãmri õ di ‘ödzé na datsiꞌrãiwamnarĩ duré dato ĩwẽꞌõ na duré tsiwaꞌru marĩ na da te datsima ꞌre rowẽ dzaꞌra mono da, ꞌre ĩdatsiꞌrãꞌõtõ mono dzé.’ (1 Pedro 4:3) Nimahã mara dzaꞌẽtẽ duré dato norĩ ãma datsitété waihuꞌu dzaꞌra õ di duré dahöimana nhitsébꞌõ na te ꞌre dahöimana dzaꞌra. Jeová ãma watsiwaihuꞌu dzaꞌra da, ãhã dahöimana watsété nhiti wa dza wahöimana dzaꞌra ni.
WAIHUꞌU DURÉ
Te dza ĩꞌuptsibi me e niha Jeová ma, te dza ĩrowẽ duré e niha te dza ĩpitsutu wẽ nimahã mara dzaꞌẽne duré dato norĩ ãma dza dame aihöimana dzô.
4. Dame aihöimana tõ mara dzaꞌẽne duré dato Jeová te te ĩwadzébꞌõ ãma hã
Atsiré tsõré aba Efésios 5:10. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E marĩ na wa dza ꞌröwi rotsaꞌrata dzaꞌra ni wa te pitsutu dzaꞌra da wamhã mara dzaꞌẽne duré datoi ãma dza dame wahöimana dzaꞌra dzô.
-
E mahã mara dzaꞌẽne duré dato norĩ ĩré hã airob ãma hã.
-
Aima hã, e ãhã mara dzaꞌẽne duré dato norĩ Jeová ma te tãma rowẽ dzaꞌra.
E nimahã na ma tô ĩrotsaꞌra dawaptãꞌãdzém na dato Ropotoꞌwai ma te te rowẽ dzô. Ropotoꞌwai mreme nimame te te nharĩ õ di niꞌwa Jeová ma romhuriꞌwa dama ĩhöimana na dawaptãꞌãdzém na datoi ãma. Duré maparane dawaptãꞌãdzém na dato Ropotoꞌwai mreme te te ĩwatsuꞌu hã Ropotoꞌwai ma romhuriꞌõꞌwa norĩ te hã. Atsiré tsõré aba Gênesis 40:20-22 duré Mateus 14:6-10. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E marĩ aiwa ma watobro ãhã dawaptãꞌãdzém na dato norĩ ãma.
-
Ãhã romnhihötö norĩ dzarina, aima hã e niha Jeová te rotsaꞌrata dawaptãꞌãdzém na dato norĩ ãma.
Tadzahã, ãté ꞌröwi te ĩrotsaꞌra: ‘E tô tsena Jeová ma te te rowẽ õ di dame ĩ̱höimana wamhã dawaptãꞌãdzém na datoi ãma niwamhã dato ĩ̱höimana ãma Ropotoꞌwa nhimiroti dzada.’ Atsiré tsõré aba Êxodo 32:1-8. Taha parimhã, ꞌmadöꞌö aba ĨROPODO hã atsima robdzanhamri aba ãhã dadzadanharĩ norĩ ãma piꞌrebamhã.
-
E marĩ wa, wa dza watsima waihuꞌu dzaꞌra ni marĩ Jeová ma te te rowẽ dzô.
-
E niha tahã wa dza ꞌmanharĩ dzaꞌra ni.
E niha te dza ĩwaihu mara dzaꞌẽne niwamhã dato Ropotoꞌwai ma te te rowẽ õ dzô.
-
E tahã te tihöiba rowahudu Ropotoꞌwai mreme te te ĩwẽꞌõ dzarina. Tsô airĩtĩ waihuꞌu da dato naꞌratadzé watsuꞌu dzô.
-
E tahã ĩböiꞌõ na daꞌãma, darob ãma niwamhã danhimiꞌuptsãtãdzéb ãma dawatadzéb da hã. Wa wawata dzaꞌra ni Jeová ãma uburé nhipai u duré wa umnhatsi dzaꞌra ni õhõ tsi dza te te ĩꞌuprotsi na hã ropire norĩ dama ĩhöimana dzaꞌra hã.
-
ꞌRe ĩdahöimana dzaꞌra mono dzé hã taha ãma, e Ropotoꞌwai mreme nhimiroti dzada te tihöiba. Wa watsima wẽ dzaꞌra ni ĩpetse na ꞌre wanomro mono da.
5. Dapawapto na atsimidzadze da te wadzéb da
Ãté pire di tsada atsiptete da da te aiwati dzahi dzaꞌra wamhã dame aihöimana da mara dzaꞌẽne niwamhã dato Jeová ma te te ĩrowẽ õ ãma. Atãma na duré atsimiwadzép tsina atsimipitsudu hã dama ãma rowatsuꞌu na. Waihuꞌu aba da niꞌwa ãne te te ĩꞌmanharĩdzé watsuꞌu, ꞌmadöꞌö aba ĨROPODO.
Atsiré tsõré aba Mateus 7:12. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
Ãhã romnhihötö dzarina, e a hã te dza ĩꞌrudzahi atsitsãnawã norĩ ma mara dzaꞌẽne niwamhã datoi ãma dame höimana dzaꞌra tõ da.
-
E niha te dza ĩhöiꞌré atsitsãnawã norĩ ma aima ĩtsawi petse dzaꞌra na mara dzaꞌẽne niwamhã datoi ãma ĩme aihöimana dzaꞌra õ nherẽ.
6. Jeová te tsima wẽ wama ꞌre robdze dzaꞌra mono da
Jeová te tsima wẽ, wẽ na wato dzaꞌra da watsitsãnawã norĩ me duré watsiwaihuꞌu norĩ me. Atsiré tsõré aba Eclesiastes 8:15 TNM. Taha parimhã atsima robdzanhamri aba ãhã dadzadanharĩ ãma piꞌrebamhã:
-
E niha ãhã romnhihödö te höiꞌré Jeová te te tsima ĩwẽ na hã wama ꞌre robdze dzaꞌra mono da.
Jeová te tsima wẽ tinhibꞌaꞌuwẽ norĩ wẽ na to dzaꞌra da duré tsiré te te tsima ꞌre robdze dzaꞌra mono da. ꞌMadöꞌö aba ĨROPODO waihuꞌu da tahã tô tsena ĩwatobro na hã watsiꞌrãꞌõtõ dzaꞌẽtẽ norĩ ãma daro aimawi hawi ĩwairébé norĩ ré.
Atsiré tsõré aba Gálatas 6:10. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
Mara dzaꞌẽne niwamhã datoi ãma e dame ĩwahöimana dzaꞌra da tsi ‘marĩ ĩwẽ na wa te ꞌre dapawaptob dzaꞌra mono da’.
-
E marĩ na aima danhipai u robdze ti: E aima ꞌrudzahi wamhã dama atsibdzari da mara dzaꞌẽne niwamhã datoi uꞌöbö, e dama atsibdzari da atsima ĩwẽ dzarina.
-
Jeová Watsuꞌuꞌwa norĩ ahö na nimahã na tsiwaꞌru bötö na te tsiꞌrãꞌõtõ to dzaꞌra da duré tiꞌra norĩ ma tsibdzari dzaꞌra da. Aiꞌra norĩ ĩré wamhã e marĩ ĩwẽ te dza tãma ĩꞌmanharĩ dzaꞌra.
NIꞌWAM NORĨ TE NHARĨ DZAꞌRA ÃNE: “Marĩ õ di mara dzaꞌẽne niwamhã dato naꞌratadzé watsuꞌu. Tahã taré watsitsãnawã norĩ me duré watsiwaihuꞌu norĩ me wa te watsima robdze dzaꞌra da.”
-
E marĩ te aré ĩnha.
ĨWAIHUꞌUDZÉ HÃ
Jeová te tsima wẽ, wẽ na wato dzaꞌra da watsitsãnawã norĩ me duré watsiwaihuꞌu norĩ me. Tadzahã te te tsima wẽ õ di dame wahöimana dzaꞌra da mara dzaꞌẽne niwamhã dato te te tãma ĩrowẽ õ na.
Ãma aipoꞌre puꞌu
-
E marĩ na wa dza ꞌröwi watsitsadanharĩ dzaꞌra ni wa te tsadaihuꞌu dzaꞌra da dato Jeová ma te te rowẽ õ dzô.
-
E niha wa dza ãma rowatsuꞌu dzaꞌra ni watsitsãnawã norĩ ma duré watsiwaihuꞌu norĩ ma nimahã mara dzaꞌẽne niwamhã dato norĩ ãma dame ĩwahöimana dzaꞌra õ na hã.
-
E niha wama waihuꞌu petse dzaꞌra di Jeová te te tsima ĩwẽ na hã wa te watsima robdze dzaꞌra da duré wato dzaꞌra da.
TSÔ AIRĨTĨ DURÉ
Waihuꞌu nimahã mara dzaꞌẽne duré dato norĩ Jesus dzadawa dzamarĩꞌwa norĩ dame ãma ĩhöimana dzaꞌra õ.
ꞌMadöꞌö maparane tsiꞌuiwana te te ĩhöiꞌré dzaꞌra Ropotoꞌwai ma te te ĩrowẽ õ na dawaptãꞌãdzém na dato.
ꞌMadöꞌö e niha ĩhöibatém norĩ Jeová dzawiꞌwa te tãma rowẽ dzaꞌra dato höimana wamhã.
Jesus dzadawa dzamarĩꞌwa ahö uptabi na ma tô tsima pitsutu dzaꞌra Natal na dame höimana dzaꞌra tõ da. E niha tinhimipitsutu na te rotsaꞌrata dzaꞌra.
“Marĩ ĩwaꞌöbö dzaꞌẽne ma tô tsõpẽtẽ dzaꞌra” (Roꞌmadöꞌöꞌwa, 1.° dezembro na, 2012 na)
a ꞌMadöꞌö Ãma Ĩrowatsuꞌudzé 5 waihuꞌu da e niha te dza ꞌre aihöimana mara dzaꞌẽne duré dato na dame ꞌre ĩhöimana dzaꞌra mono norĩ ma.
