ROMNHORÉ 34

E niha wa dza höiꞌré dzaꞌra ni Jeová ma õ hã wama ĩtsawi petse dzaꞌra na hã.

RURUꞌU

Bíblia na romnhoré na ãma tsãnaꞌrata parimhã e Ropotoꞌwa aima tsawi di danhipai u. E te atsima ĩwẽ ꞌre tsiptete mono da atsiwaihuꞌudzé hã õhõ ãma. Tane wamhã, aipoꞌre puꞌu Jeová te te ꞌmadöꞌö wamhã atsimidzawidzé hã õhõ ãma ꞌre ĩtsiptete uꞌötsi mono na hã, danhipai u dza te te ꞌre ĩꞌatsawi mono na hã duré dza te te ꞌre ĩꞌaiꞌmadöꞌö wẽ mono na hã. E niha bété te dza tãma ĩhöiꞌré ĩtsawi petse na hã.

1. E niha wa dza höiꞌré dzaꞌra ni Jeová ma õ hã wama ĩtsawi petse dzaꞌra na hã.

Jeová ma wa dza höiꞌré dzaꞌra ni wama ꞌre ĩtsawi petse dzaꞌra mono na hã wa te ꞌre tsadawa dzamarĩ dzaꞌra mono wamhã. (Tsõré na 1 João 5:3.) Tadzahã, niꞌwai ma te te ꞌrudzahi õ di te te tsadawa dzamarĩ da. Taha waꞌrãmimhã, te wama rẽme dzaꞌra watsiꞌuihö na wa te pitsutu dzaꞌra da dza wa te tsadawa dzamarĩ dzaꞌra dzô. E marĩ wa. Jeová te tsima wẽ ‘ꞌröwi wapẽꞌẽ na wa te ꞌre wapari dzaꞌra mono da’. (Romanos 6:17 TNM) Tahã te watsuꞌu te te tsima ĩwẽ na hã tsadawa dzamarĩ da ĩtsawi dzarina hã mare di ĩꞌrudzahi dzarina. Ĩwaꞌõno 3 duré 4 ãhã ĩhöiwarobo na te dza aipawaptob dzahuré atsimidzawidzé Jeová ãma tãma höiꞌré da maparane marĩ ꞌmanharĩ na: tãma ĩrowẽ ꞌmanharĩ na duré te te tãma ĩrowẽꞌõ ĩwẽꞌõ mono na.

2. E marĩ wa wanhimidzawidzé Jeová ãma ãté wa te tãma höiꞌré pire dzaꞌra di.

‘Wẽ na ꞌre ĩnomro mono norĩ hã, te tô ropire na te te ꞌre robdzépata dzaꞌra.’ (Salmo 34:19) Wa norĩ hã aihĩni, wa ꞌwapé dzaꞌra ni wawatsétédzé hã duré ãté wa robdzépata dzaꞌra ni robꞌuipradzé tsuru wamhã, ĩböiꞌõ na wama ꞌre dahöimana dzaꞌra mono wamhã, niwamhã ropire ĩhöiba amo na. Ropire wama höimana dzaꞌra wamhã ãté Jeová wa te tsadawa dzamarĩ pire dzaꞌra di. Ãté danhipai u wapu di dza Jeová tsadawa rẽme wamhã. Tadzahã tsada ꞌre atsiptete mono wamhã Jeová ꞌre tsadawa dzamarĩ mono da te dza tãma ĩhöiꞌré uburé nhipai u aima ĩtsawi petse na hã. Ãne te dza ĩhöiꞌré atsimirẽmeꞌõ na tãma ꞌre ĩꞌaihöimana mono na hã duré te dza atsa tsimirẽme ãna aima ꞌre höimana. Niwa te te airẽme õ di dza. — Tsõré na Salmo 4:3.

WAIHUꞌU DURÉ

Te dza ĩꞌmadö, e marĩ wa Jeová ma robdze ti tsadawa dzamarĩ wamhã duré e niha õ hã te dza aipawapto ãhã ꞌmanharĩ da.

3. Waꞌuburé hã aiwatsuꞌu na te tidzadawa nhipetse

Jó watsuꞌu dzarina Ropotoꞌwai mreme ꞌremhã, Waꞌuburé te watsuꞌu nhipetse Jó duré aihĩni te te tsima ĩwẽ dzaꞌra norĩ Jeová ma te te romhuri dzaꞌra da. Atsiré tsõré aba Jó 1:1, 6–2:10 TNM. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

Waꞌuburé te te ĩnharĩdzéb dzarina, e marĩ wa Jó te te ꞌre tsadawa dzamarĩ Jeová. — ꞌMadöꞌö aba Jó 1:9-11.
E marĩ Waꞌuburé te tinha aihĩni norĩ ãma duré aiꞌãma. — ꞌMadöꞌö aba Jó 2:4.

Atsiré tsõré aba Jó 27:5b TNM. Taha parimhã atsima robdzanhamri aba ãhã dadzadanharĩ ãma piꞌrebamhã:

E niha Jó ma tô höiꞌré Jeová tãma ĩtsawi uptabi na hã.

Jó ma tô höiꞌré Jeová tãma ĩtsawi na hã tinhimirẽmeꞌõ na tãma ꞌre höimana mono wamhã

Wa dza höiꞌré dzaꞌra ni Jeová wama ĩtsawi petse dzaꞌra na hã wanhimirẽmeꞌõ na tãma ꞌre wahöimana dzaꞌra mono wamhã

4. Jeová pẽꞌẽ ma rowẽ na

Atsiré tsõré aba Provérbios 27:11. Taha parimhã atsima robdzanhamri aba ãhã dadzadanharĩ ãma piꞌrebamhã:

E niha Jeová te tihöiba aiꞌrãi waihuꞌu wẽ na aihöimana wamhã duré tsadawa dzamarĩ wamhã.

5. Tsada hã Jeová ãma atsimirẽmeꞌõ na aihöimana da

Wanhimidzawidzé hã Jeová ãma te warétsi dzaꞌra dama ãma wamreme dzaꞌra da. Wanhimirẽmeꞌõ hã õhõ ãma te warétsi dzaꞌra ãhã wa te ꞌmanharĩ dzaꞌra da pire nherẽ. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

ĨROPODO: Atsimidzadzedzé ꞌwawi ꞌre aimapa mono atsada dahöimana nherẽ (5:09)

Aima hã e dama robdzanhamri pire di Jeová ãma.
Ĩropoto na, e marĩ ma pawapto Õmoꞌre te te tipahi ãma aiꞌuté da.

Danhipai u wapu di Jeová ãma wanhimirẽme ãna ꞌre wahöimana dzaꞌra mono da wa te ꞌre tsawi dzaꞌra mono wamhã marĩ tãma ĩtsawi, duré wa te ꞌruiwapari dzaꞌra wamhã marĩ tãma ĩꞌru hã. Atsiré tsõré aba Romanos 12:9. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

Oto ĩromnhorédzéb dzarina, watsuꞌu na e marĩ norĩ Jeová ma ĩtsawi duré nimahã marĩ norĩ tãma ĩꞌru hã.
E marĩ te dza aipawapto ĩwẽ ꞌre tsawi mono da duré ĩwatsédé ꞌre ꞌruiwapari mono da.

6. Jeová dzadawa dzamarĩ wama rowẽdzé

Jeová wa te ꞌre tsadawa dzamarĩ dzaꞌra mono wamhã wama ꞌre rowẽ dzaꞌra mono di. Atsiré tsõré aba Lucas 11:28. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

Aima hã e tsada hã wa te umnhatsi dzaꞌra da Jeová ma ĩwaihuꞌu petse na hã wama ĩrowẽdzéb da hã. E marĩ wa, ãne te ĩrotsaꞌra.
E niha atsimiromnhoré Bíblia ãma duré Ropotoꞌwa ĩꞌuptabi ãma, Jeová ãma, te te ꞌre aipawapto.

NIꞌWAM NORĨ TE NHARĨ DZAꞌRA ÃNE: “Ropotoꞌwa te te ꞌmadöꞌö õ di wa hã te ꞌre ĩꞌmanharĩ mono dzé hã.”

E mahã romnhihödö Ropotoꞌwai mreme ꞌremhã te aré dama ĩhöiꞌré dama waihuꞌu da Jeová robdze na niwamhã robdzeiꞌõ na dza ĩhöimana na hã wa te ꞌre ĩꞌmanharĩ dzaꞌra mono dzéb dzarina.