Niꞌwa aima ĩtsawi pe e nimahã na ma tô aiꞌutõ. Taha na tô robdzeiꞌõ tsi, taha wa ãté ꞌröwi te ĩrotsaꞌra: ‘E marĩ te dza watobro dadöꞌö wamhã. E nimahã bötö na wa dza tsõpẽtẽ dzahu ĩ̱ma ĩtsawi pe hã.’ Ãhã romnhoré na duré ĩhöiba amo na, wa dza ꞌmadöꞌö dzaꞌra ni Ropotoꞌwai mreme te te ĩtsadaꞌöbödzé hã te te ĩwapẽꞌẽ nomri dzaꞌra na hã.

1. E marĩ te dza dadzô watobro dadöꞌö wamhã.

Jesus ma tô ãma tsimiréꞌé dadö hã danhotõ petse ne hã. E marĩ wa. Niꞌwa tsõtõ petse ré hã te te tsaꞌretse õ di ĩꞌrata ĩwatobrodzé. Ãne duré, niꞌwa döꞌö parimhã te te dame rotsaꞌretse mono õ di oto, daꞌãma pẽꞌẽdzé õ di oto, duré te te robdzépata õ di oto. E marĩ wa. Eclesiastes 9:5 (TNM) ãma, Ropotoꞌwai mreme te tinha ãne: “Adöꞌö norĩ ma hã, marĩ tãma waihuꞌu dzaꞌra õ di . . . uburé ãma ꞌre ĩdatsipoꞌre puꞌu dzaꞌra mono dzé hã baba di oto.”

2. E marĩ wa, wẽ di wa te waihuꞌu dzaꞌra da tô tsena hã dadöꞌö ãma hã.

Daꞌahö na dapahi di dadöꞌö ma duré adöꞌö norĩ ma hã! Aipahi wamhã duré a hã, te dza atsima ĩrowẽ Ropotoꞌwai mreme te te ĩrowahutudzém na hã dadöꞌö ãma. Jesus te tinha: ‘Te dza tô tsena Re ĩhöimana uꞌötsi mono nhimiroti hã. . .atsani dzaꞌra waꞌwa.’ (João 8:32) Nimahã danhimidzadzedzém norĩ te rowahutu dzaꞌra dahöiba ĩtsãmriꞌõ dahöiba hawi dza ĩwatobro na hã dadöꞌö parimhã nimame ꞌre höimana uꞌötsi mono da. Tadzahã Ropotoꞌwai mreme ãne te te rowahutu õ di. Ãne mono hã, niꞌwa te te robdzépata õ di döꞌö parimhã. Duré adöꞌö norĩ ma, marĩ tãma waihuꞌu dzaꞌra õ wa, te te wama robꞌmanharĩ watsété dzaꞌra õ di. Tawamhã, waihuꞌu õ di marĩ wa te ĩꞌmanharĩ dzaꞌra da hã adöꞌö norĩ ma rowẽ da, duré wa te ãma ĩrowaptẽrẽ dzaꞌra da hã waihuꞌu õ di höibaré dzaꞌra newa.

Niꞌwam norĩ te tsiwatsuꞌu dzaꞌra adöꞌö norĩ ma te te ĩrobdzanhamri waihuꞌu petse dzaꞌra na hã. Tadzahã, tahã tsadai õ di. Wa te ĩwaihuꞌu dzaꞌra pari dzarina, “adöꞌö norĩ ma hã, marĩ tãma waihuꞌu dzaꞌra õ di”. Niꞌwa tsiwatsuꞌu wamhã tãma ĩtsawi pe ĩdöꞌö ma te te ĩrobdzanhamri na hã, ĩꞌuptabi na hã te robdzanha waꞌuburé norĩ ma tãma ĩtsawi pe ĩdöꞌö ma newa. Taha wa, wa te waihuꞌu dzaꞌra wamhã rowahutu uptabi hã dadöꞌö ãma hã, wa dza watsiꞌmadöꞌö dzaꞌra ni waꞌuburé norĩ wi. Jeová ma waihuꞌu petse di waꞌuburé norĩ hã ĩpipa dzaꞌra na hã. Taha wa, te wapoꞌre puꞌu dzaꞌra wa te tãma robdzanhamri pibu dzaꞌra tõ da. — Tsõré na Deuteronômio 18:10-12 TNM.

3. Tsadaihuꞌu petse tô tsena dadzô ĩwatobrodzé dadöꞌö parimhã

Tiꞌai mono bö, danhimirotsaꞌrada hã ahö di dadzô ĩwatobrodzém na hã dadöꞌö parimhã. Tsena na tsadai õ di uburé danhimirotsaꞌrada hã ĩbö na hã.

• ꞌRe aihöimana mono dzém ãma, e niha te natsi rotsaꞌrata dzaꞌra ni dadzô ĩwatobrodzém na hã dadöꞌö parimhã.

 4. Rowahutu uptabi hã dadöꞌö ãma te wadzani dzaꞌra

Rowahutu uptabi hã dadöꞌö ãma te wadzani dzaꞌra dapahi wi adöꞌö norĩ ma hã. Atsiré tsõré aba Salmo 104:29. Taha parimhã atsima robdzanhamri aba ãhã dadzadanharĩ ãma piꞌrebamhã:

• Adöꞌö norĩ hã e te te wama robꞌmanharĩ watsété waihuꞌu petse dzaꞌra di.

Ropotoꞌwai mreme nhimirowahutu uptabi wa te waihuꞌu dzaꞌra wamhã, wa te tsadze dzaꞌra õ di dza dadzadawa nhipetse na hã adöꞌö norĩ ma wa te tãma ĩrowẽ dzaꞌra da hã duré ãma ĩwawata dzaꞌra da hã. Atsiré tsõré aba Isaías 8:19 TNM duré Apocalipse 4:11. Taha parimhã atsima robdzanhamri aba ãhã dadzadanharĩ ãma piꞌrebamhã:

• Aima hã e niha Jeová te tihöiba niꞌwa adöꞌö ãma wata wamhã niwamhã adöꞌö nhimipawaptobdzéb dzô tsô rĩtĩ wamhã.

5. Rowahutu uptabi hã dadöꞌö ãma te wapẽꞌẽ nomri dzaꞌra

Daꞌahö na ma tô waihuꞌu dzaꞌra ni dadöꞌö parimhã dza da te ꞌre ĩrobdzépata dzaꞌra mono na hã marĩ watsédé da te ꞌre ĩꞌmanharĩ dzaꞌra dzéb uꞌöbö dahöiba ré. Tadzahã wama rowẽ dzaꞌra di wa te waihuꞌu dzaꞌra wa, dza wa te ꞌre ĩrobdzépata dzaꞌra mono õ na hã wadöꞌö dzaꞌra parimhã marĩ watsédé wa te ꞌmanharĩ dzaꞌra nherẽ. Romanos 6:7 (TNM) te tinha ãne: “Niꞌwa döꞌö parimhã, ĩwatsédé ma tô tãma pari ni.” Taha dzarina atsima robdzanhamri aba ãhã dadzadanharĩ ãma piꞌrebamhã:

• Ropotoꞌwai mreme dzarina, niꞌwa döꞌö parimhã ĩwatsédé te dza tãma pari ni. Ãne wa, Ropotoꞌwai ma hã ĩwatsédé hã baba di oto. Taha dzarina, aima hã e niꞌwa te dza robdzépata döꞌö parimhã tiwatsété uꞌöbö.

Jeová ãma wa te ꞌre romnhoré dzaꞌra mono tsidöpötsi, wa wa te tsadaihuꞌu petse dzaꞌra mono, õ hã niwa te te ꞌre ĩrobꞌmanharĩ watsété mono õ na adöꞌö norĩ ma hã. Atsiré tsõré aba 1 João 4:8 duré Apocalipse 15:4. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

• Ropotoꞌwa hã romnhihötö norĩ dzarina ãne ꞌre höimana mono nherẽ, e te dza te te dama ꞌre robꞌmanharĩ watsété dadöꞌö parimhã.

• E aima rowẽ di waihuꞌu parimhã rowahutu uptabi hã dadöꞌö ãma. E marĩ wa.

 ĨWAIHUꞌUDZÉ HÃ

Niꞌwa döꞌö wamhã, marĩ tãma waihuꞌu õ di oto. Adöꞌö norĩ hã te te robdzépata dzaꞌra õ di duré te te dama robꞌmanharĩ watsété waihuꞌu dzaꞌra õ di.

Ãma aipoꞌre puꞌu

• E marĩ te dza dadzô watobro dadöꞌö parimhã.

• E marĩ wi rowahutu uptabi hã dadöꞌö ãma te wadzani dzaꞌra.

• E marĩ wa, wẽ di wa te waihuꞌu dzaꞌra da rowahutu uptabi hã dadöꞌö ãma.