ROMNHIHÖDÖ 3
Ta norĩ Romahörö Wẽ hã e Tô Tsena Höimanaꞌuꞌö Hawimhã.
1. E ꞌwa hã Bíblia ꞌManharĩꞌwa.
Romahörö wẽ hã dza ꞌre ĩdahöimana uꞌötsi dzaꞌra mono na Tiꞌai ãma, Bíblia na te tihöiba. (Apocalipse 21: 3,4) Bíblia hã 66 na ĩhöiwarobo norĩ ꞌmanharĩ. Höimanaꞌuꞌö ma pitsutu 40 ꞌre aibö ĩtsimidzadzei petse norĩ te te tsihötö dzaꞌra da. Moisés ma tsihötö 5 na ĩpo ĩmorĩꞌrata na Bíblia ꞌremhã 3.500 na aré wahu wanaré. Ĩhöiwarobo ĩꞌrãtsudu hã apóstolo João ma tô tsihötö 1.900 nhipai u aré wahu wanaré. E ꞌwa nhimirotsaꞌrada ma tsihötö ni Bíblia na. Höimanaꞌuꞌö ma tô Tipẽꞌẽdzani na tsiwatsuꞌu Bíblia na robꞌuiꞌéréꞌwa norĩ ma hã. (Marcos 12:36) Õ norĩ hã, ma tô ãma tsihötö dzaꞌra Höimanaꞌuꞌö nhimirotsaꞌrada hã, tite dzaꞌra hã mare di.Ãne, Jeová hã Bíblia ꞌManharĩꞌwa.—Tsõré na 2 Timóteo 3:16; 2 Pedro 1:20, 21.
ꞌMadöꞌö ĩropodo E ꞌwa hã Bíblia ꞌManharĩꞌwa.
2. E wa dza tsadzei petse dzaꞌra ni Bíblia hã tô Höimanaꞌuꞌö nhimiꞌmanharĩ na hã.
Wama waihuꞌu petse dzaꞌra di Bíblia hã Höimanaꞌuꞌö nhimiꞌmanharĩ na hã, dza aptoꞌoré ĩwatobro hã ĩbö na tsi te te watsuꞌu wa. Niꞌwa aꞌuwẽ te te ꞌmanharĩ waihuꞌu õ di ta hã. (João 17:17) Höimanaꞌuꞌö tsi Uburé Ĩwaihuꞌupe te te watsuꞌu waihuꞌu petse di, dza dadzô ĩwatobro hã aptoꞌoré hã.—Tsõré na Isaías 42:9; 46:10.
Bíblia hã Höimanaꞌuꞌö hawimhã, ãne ta hã ĩhöiwarobo danhipai u ĩꞌuptabi hã ĩhöimana hã. Bíblia norĩ hã, 2 bilhões nhipai u ma tô dama ropé dzaꞌra ni 450 nhipai u damreme na. ꞌRata nherẽ, Bíblia te tihöiba romnhoré nhipetse ꞌwa norĩ hã te te ĩnharĩ dzaꞌra dzéb dzarina. Duré, 40 na Bíblia na robꞌuiꞌéréꞌwa norĩ hã romnhihötö na te ãma tsitsadze dzaꞌra. * Taha nhipai u, taha ꞌremhã Höimanaꞌuꞌö tinhimidzawidzé ma tô höiꞌré duré ta hã te te ãma tsaprĩ waihuꞌu petse di dahöimanadzé ĩwẽ na. Ãne na hã, daꞌahö na ma tô tsadzei petse dzaꞌra ni Bíblia na Höimanaꞌuꞌö Mreme na. —Tsõré na 1 Tessalonicenses 2:13.
ꞌMadöꞌö ĩropodo E niha wama waihuꞌu petse dzaꞌra di Bíblia tô tsena ĩꞌuptabi na hã.
3. E marĩ na Bíblia te rowatsuꞌu.
Robdzanhamri hã marĩ na danhipai u ĩpire Bíblia na, Höimanaꞌuꞌö nhimirotsaꞌrada hã daꞌãma. Te ãma rowatsuꞌu e niha robnaꞌrata hawimhã, aibö ma tsimini dahöimana uꞌötsi dzé hã Tiꞌa ĩwẽ uptabi ãma duré te tinha e niha Ro Ĩwẽ hã apö te dza ꞌmanha. —Tsõré na Apocalipse 21:4, 5.
Höimanaꞌuꞌö Mreme ꞌremhã, ĩré hã roti, rowahudu duré dapoꞌre puꞌu norĩ rowẽ na ꞌre wahöimana dzaꞌra mono da oto. Duré, Bíblia te rowatsuꞌu e niha Höimanaꞌuꞌö nhimirotsaꞌrada daꞌãma hã — ta hã te watsuꞌu ĩhöimanadzé hã.Ãne, Bíblia hã te dza aipawapto waihuꞌu da hã.Ta hã, te tinha e niha a hã dza ĩtsiwaihu.—Tsõré na Romanos 15:4; Tiago 2:23; 4:8.
4. E niha te dza ĩwaihu Bíblia.
Te te dama waihuꞌu da Bíblia hã, Jesus ma tô te te ꞌre watsuꞌu nimahã Bíblia na romnhihödö duré taha pari, te te ãma ꞌre rowatsuꞌu. Ã hã ĩtsõrédzé hã te dza aipawapto waihuꞌu da Bíblia ãne, Jesus te te ꞌre ĩꞌmanharĩ mono ne hã.—Tsõré na Lucas 24:27, 45, 46.
Tô tsena, aima robdzei uptabi di dza romahörö wẽ norĩ Höimanaꞌuꞌö hawi awaihuꞌu petse wamhã. Tane nherẽ, niꞌwam norĩ hã te te ãma rotsaꞌrata dzaꞌra õ di duré ĩhöiba amo norĩ hã te natsi wẽꞌõ dzaꞌra. Tadzahã, aiwi robdzeiꞌõ tõ. Te dza tô ꞌre aihöimana uꞌötsi mo Höimanaꞌuꞌö waihu petse wamhã.—Tsõré na 1 João 2:17.
^ romnhihötö waˈõno 3 ꞌMadöꞌö ĩhöiwarobo hã A Bíblia – Palavra de Deus ou de Homem? waradzu mreme na.
