Te Evaselio ʼa Maleko 1:1-45
-
ʼE faifakamafola ia Soane Patita (1-8)
-
Te papitema ʼa Sesu (9-11)
-
ʼE faiga ia Satana ke ina fakahalaʼi ia Sesu (12, 13)
-
ʼE kamata faifakamafola ia Sesu ʼi Kalilea (14, 15)
-
ʼE pauʼi e Sesu ʼana ʼuluaki tisipulo (16-20)
-
ʼE ina kapu he laumalie kovi (21-28)
-
ʼE fakamalolo e Sesu te tokolahi ʼi Kapenaume (29-34)
-
ʼE faikole ia Sesu ʼi he koga meʼa lavaki (35-39)
-
Te fakamalolo ʼo te tagata kilia (40-45)
1 Ko te kamataʼaga ʼaeni ʼo te logo lelei ʼo ʼuhiga mo Sesu Kilisito,* te ʼAlo ʼo te ʼAtua:
2 Ohage ko tona tuʼu ʼi te tohi ʼa te polofeta ko Esaia: “(ʼE au fekauʼi taku tagata ʼave logo ke muʼamuʼa ia koe, ke ina teuteuʼi tou ala.)+
3 ʼE kalaga he tahi ʼi te toafa: ‘Kotou teuteuʼi te ala ʼo Sehova!* Kotou fakatokatoka ʼona ala.’ ”+
4 Neʼe faifakamafola ia Soane Patita ʼi te toafa ki te hahaʼi ke natou papitema, ke natou fakaha ai kua natou fakahemala ʼo ʼuhiga mo ʼanatou agahala pea mo natou kumi te fakamolemole ʼa te ʼAtua.+
5 Neʼe olo kia ia te hahaʼi fuli ʼo Sutea mo Selusalemi, pea neʼe ina papitemaʼi* natou ʼi te Vai Tafe ʼo Solotane, ʼo natou vetevete fakahaha ai ʼanatou agahala.+
6 Neʼe tui e Soane ia he teu fuluʼi kamelo pea neʼe ina ʼai he kiliʼi pipi ʼi tona koga loto.+ Neʼe kai ki te ʼu heʼe pea mo te meli.+
7 Pea neʼe ina fakamafola: “ ʼE muli mai he tahi ʼe malohi age ia ia au, pea ʼe mole tuha mo au ke au veteki te ʼu haʼi ʼo ʼona sulie.+
8 Neʼe au papitemaʼi koutou ʼaki te vai, kae ʼe ina papitemaʼi anai koutou ʼaki te laumalie maʼoniʼoni.”+
9 ʼI te ʼu ʼaho ʼaia, neʼe haʼu ia Sesu mai te kolo ko Nasaleti ʼae ʼi Kalilea pea neʼe papitemaʼi ia ia e Soane ʼi te Solotane.+
10 Pea ʼi te temi pe ʼae neʼe hake ake ai mai te vai, neʼe sio ia ki te ava ʼo te lagi, pea neʼe hifo ifo kia te ia te laumalie ʼo te ʼAtua ohage ko he lupe.+
11 Pea neʼe logo ki he leʼo mai te lagi, neʼe ina ui: “Ko koe toku ʼAlo, toku ʼofaina, ʼae ʼe au fiafia ai.”+
12 Pea neʼe uga atu aipe e te laumalie ʼo te ʼAtua ia Sesu ke alu ki te toafa.
13 Pea neʼe nofo ʼi te toafa ia ʼaho ʼe 40, ʼo faiga ai ia Satana ke ina fakahalaʼi.+ Neʼe nofo mo te ʼu manu fekai, kae neʼe ʼomai te kau ʼaselo ʼo foaki age te ʼu meʼa ʼae neʼe ʼaoga kia te ia.+
14 ʼI te ʼosi puke ʼo Soane, neʼe alu leva ia Sesu ki Kalilea+ ʼo fakamafola ai te logo lelei ʼo te ʼAtua,+
15 ʼo ina ui: “Kua hoko te temi ʼae neʼe kua fakatuʼutuʼu, pea kua ovi mai te Puleʼaga ʼo te ʼAtua. Kotou fakahemala+ mo tui ki te logo lelei.”
16 ʼI tana haʼele ʼi te matatai ʼo Kalilea, neʼe sio ai kia Simone pea mo tona tehina ko Atelea.+ Neʼe nā lolotoga ʼaʼau ʼonā kupega+ koteʼuhi neʼe ko he ʼu tagata tautai.+
17 Pea neʼe ui e Sesu kia naua: “Kolua muli mai ia te au, pea ʼe au fakaliliu anai koulua ko he ʼu tautai tagata.”+
18 Neʼe nā tuku atu aipe ʼonā kupega kae nā mulimuli ia te ia.+
19 Pea neʼe hoko atu tana haʼele ʼo sio kia Sakopo te foha ʼo Sepeteo pea mo tona tehina ko Soane. Neʼe nā ʼonoʼono ʼonā kupega ʼi te vaka+
20 pea ina pauʼi atu aipe ia naua. Neʼe nā tuku ai tanā tamai ko Sepeteo ʼi te vaka pea mo te kau gaue kae nā mulimuli ia te ia.
21 Pea neʼe natou olo ai ki Kapenaume.
ʼI te ʼaho ʼo te Sapato, neʼe hu leva ia Sesu ki te sinakoka ʼo kamata faiakonaki ai.+
22 Pea neʼe natou punamaʼuli ʼi tana faʼahiga faiakonaki, koteʼuhi neʼe ina akoʼi natou ohage ko he tahi ʼe ina maʼu te pule,* kae mole ohage ko te kau sekelipa.*+
23 Pea neʼe ʼi ai te tagata ʼi tonatou sinakoka neʼe ulu sino ai te laumalie kovi, neʼe kalaga:
24 “Sesu mai Nasaleti, kotea ʼae ʼe ke fai ʼi heni?+ Neʼe ke haʼu koa ʼo fakaʼauha matou? ʼE au iloʼi lelei pe ko koe te Maʼoniʼoni ʼa Te ʼAtua!”+
25 Kae neʼe pupulaʼi ia e Sesu, ʼo ina ui: “Fakalogologo, pea ke mavae ia ia.”
26 Neʼe luluʼi e te laumalie kovi te tagata mo kalaga pea neʼe mavae ai.
27 Koia, neʼe punamaʼuli fuli ai te hahaʼi ʼo natou kamata feuiʼaki: “Kotea te meʼa ʼaeni? Ko he akonaki foʼou! ʼE ina toe maʼu te malohi moʼo puleʼi te ʼu laumalie kovi, pea ʼe natou fakalogo kia te ia.”
28 Neʼe mafola atu aipe te fakamatala ʼo ʼuhiga mo Sesu ʼi te potu fenua katoa ʼo Kalilea.
29 Neʼe natou mavae mai leva ʼi te sinakoka, ʼo natou olo mo Sakopo mo Soane ki te ʼapi ʼo Simone mo Atelea.+
30 Neʼe takoto te faʼe ʼo te ʼohoana ʼo Simone+ he neʼe fiva, pea neʼe natou palalau age kia Sesu ʼo ʼuhiga mo te fafine.
31 Neʼe fakaovi age kia ia, ʼo ina puke tona nima pea mo ina fakatuʼuake. Neʼe puli ai tona fiva ʼo tauhi ai leva ia natou.
32 ʼI te afiafi, ʼi te ʼosi to ʼo te laʼa, neʼe ʼaumai kia te ia ia natou fuli ʼae neʼe mahahaki pea mo natou ʼae neʼe ulu sino ai te ʼu temonio.+
33 Neʼe fakatahitahi mai te kolo katoa ki te muʼa matapa.
34 Pea neʼe ina fakamalolo te tokolahi neʼe natou maʼu te ʼu mahaki kehekehe,+ pea tokolahi te ʼu temonio neʼe ina kapu. Kae neʼe mole ina fakagafua ke palalau te ʼu temonio he neʼe natou iloʼi ʼe ko ia ia Kilisito.*
35 ʼI te kei hegihegi, kae kei fakapoʼuli, neʼe tuʼu ake leva ʼo alu ki he koga meʼa lavaki, pea neʼe faikole ai.+
36 Kae neʼe olo leva ia Simone pea mo natou ʼae neʼe fakatahi mo ia ʼo kumi ia ia.
37 ʼI tanatou maʼu, neʼe natou ui age: “ ʼE kumi koe e te hahaʼi fuli.”
38 Kae neʼe ina tali age: “Tou olo ki he tahi age koga meʼa, ki he ʼu kolo ʼe ovi mai, ke au toe faifakamafola ai, he ʼe ko te tupuʼaga ʼaia ʼo taku haʼu.”+
39 Pea neʼe alu ai ʼo faifakamafola ʼi te ʼu sinakoka ʼo te potu fenua katoa ʼo Kalilea pea mo kapu te ʼu temonio.+
40 Neʼe haʼu leva kia te ia te tagata kilia, ʼo tuʼutuli ifo pea mo kole mamahi: “Kapau ʼe ke loto ki ai, ʼe feala ke ke fakamaʼa au.”+
41 Neʼe ʼofa mamahi ai ia Sesu kia ia. Neʼe ina faoʼi leva tona nima pea mo fa ki ai, ʼo ina ui: “ ʼE au loto ki ai! Ke ke maʼa.”+
42 Neʼe puli atu aipe tona kilia, pea neʼe liliu ai ʼo maʼa.
43 Neʼe fekauʼi atu aipe e Sesu ke alu ʼo ina fakatotonu age:
44 “ ʼAua naʼa ke fakamatala ki he tahi, kae ke ke alu ʼo ha ki te pelepitelo. Pea ke momoli te molaga ʼae neʼe fakatotonu e Moisese ʼo ʼuhiga mo te fakamaʼa ʼo he tagata kilia.+ Ko he fakamoʼoni anai kia natou.”+
45 Kae ʼi te ʼosi mavae ʼa te tagata, neʼe ina fakamatala atu aipe ki te hahaʼi fuli te meʼa ʼae neʼe hoko. Koia neʼe mole kei feala ke hu fakahaha ia Sesu ki he kolo. Neʼe nofo ia ʼi te ʼu koga meʼa lavaki. Kae neʼe haga ʼomai pe te hahaʼi kia te ia mai te ʼu potu kehekehe.+
Nota
^ Vakaʼi Te ʼu Kupu.
^ Vakaʼi Te ʼu Fakamahino 1.5.
^ Peʼe “fakauku.”
^ Vakaʼi Te ʼu Kupu.
^ Peʼe lagi “neʼe natou iloʼi pe ko ai ia ia.”
