Lua Samuele 18:1-33
18 Neʼe lau leva e Tavite te hahaʼi tagata ʼae neʼe fakatahi mo ia, pea neʼe ina fakanofo he kau pule ʼo he toko afe mo he kau pule ʼo he toko teau.+
2 Pea neʼe vae tolu e Tavite te hahaʼi ʼae neʼe fakatahi mo ia: neʼe ina tuku te tahi kutuga ke takitaki e* Soape,+ pea neʼe takitaki e te tehina ʼo Soape, ko Apisai,+ te tama ʼa Teselusa+ te tahi kutuga, pea neʼe takitaki leva e Itai,+ te tagata Kiete te tahi age kutuga. Neʼe ui leva e te hau ki te hahaʼi tagata ʼaia: “ ʼE au alu anai mo koutou.”
3 Kae neʼe natou tali age ki ai: “ ʼE mole tonu ke ke alu mo matou,+ koteʼuhi kapau ʼe matou feholaki, ʼe mole natou tokagaʼi anai* matou. Pea kapau ʼe mamate te vaelua ʼo matou, ʼe mole natou tokagaʼi anai matou, koteʼuhi ʼe ke maʼuhiga age koe ʼi te toko 10 000 ʼo matou.+ Koia ʼe lelei age ke ke nofo ʼi te kolo ʼo ke fekauʼi niʼihi ke olo age ʼo tokoni kia matou.”
4 Neʼe ui leva e te hau kia natou: “ ʼE au fai pe anai te meʼa ʼae ʼe kotou manatu ʼe lelei.” Neʼe tuʼu ai te hau ia tafa ʼo te matapa ʼo te kolo, kae olo te hahaʼi tagata fuli, taki toko teau mo taki toko afe.
5 Neʼe fai leva e te hau te fakatotonu ʼaeni kia Soape, mo Apisai pea mo Itai: “Kotou gaohi fakaleleiʼi siʼoku foha ko Apesalone ʼuhi ko au.”+ Pea neʼe logo te hahaʼi tagata fuli ki te fakatotonu ʼae neʼe fai e te hau ki te kau takitaki fuli ʼo ʼuhiga mo Apesalone.
6 Neʼe mavae te hahaʼi tagata mai te kolo, ʼo natou olo ai ʼo tauʼi ia Iselaele, pea neʼe fai te tau ʼi te vao matuʼa ʼo Efalaimi.+
7 Neʼe malo te hahaʼi faifekau ʼa Tavite+ ʼi te hahaʼi ʼa Iselaele,+ pea neʼe lahi ai te mātea ʼi te ʼaho ʼaia, neʼe ko tagata ʼe toko 20 000.
8 Neʼe mafola te tau ʼi te fenua katoa. Pea ʼi te ʼaho ʼaia, neʼe lahi age te hahaʼi ʼae neʼe mamate ʼi te vao matuʼa ʼi te hahaʼi ʼae neʼe matehi ʼaki te heleta.
9 Neʼe fetaulaki leva ia Apesalone mo te ʼu tagata faifekau ʼa Tavite. Neʼe heka ia Apesalone ʼi he asino lahi, pea neʼe fakalaka leva te asino ʼi te ʼu lalo vaʼa ʼakau lalahi ʼo he fuʼu ʼakau ʼe lahi ʼaupito. Pea neʼe ʼefihia tona ʼulu ʼi te fuʼu ʼakau lahi ʼaia, ʼo tautau ai, kae alu te asino ia.
10 Neʼe sio he tahi ki ai pea neʼe alu ʼo fakaha kia Soape:+ “Koʼeni neʼe au sio ʼe tautau ia Apesalone ʼi he toe fuʼu ʼakau.”
11 Neʼe ui e Soape ki te tagata ʼae neʼe ina fakaha age te logo: “Kapau neʼe ke sio ki ai, he koʼe neʼe mole ke haga ʼo matehi ʼi te moʼi temi pe ʼaia? Ka na ʼaua la, ʼe au fiafia ʼi te foaki atu he ʼu foʼi piesi siliva ʼe hogofulu pea mo he kiliʼi pipi.”
12 Kae neʼe ui e te tagata kia Soape: “Tatau aipe pe neʼe foaki mai* he ʼu foʼi piesi siliva ʼe 1 000, kae neʼe mole feala ke au hiki toku nima ki te foha ʼo te hau, he neʼe matou logo ki te fakatotonu ʼaeni ʼa te hau kia koe, mo Apisai pea mo Itai: ‘Kotou tokakaga fakalelei ki siʼoku foha ko Apesalone.’+
13 Kapau neʼe mole au fakalogo kae au matehi ia ia,* neʼe feala pe ke iloʼi e te hau, pea ʼe mole ke puipui anai koe ia au.”
14 Pea neʼe ui age e Soape: “ ʼE pulinoa ʼosi toku temi ʼi te palalau mo koe!” Neʼe ina toʼo ai te ʼu koga ʼakau* ʼe tolu ʼo alu ʼo hukiʼi ʼaki te mafu ʼo Apesalone ʼi tana tautau maʼuli ʼi te fuʼu ʼakau lahi ʼaia.
15 Pea neʼe olo leva te ʼu tagata toʼo mahafu ʼa Soape ʼe toko hogofulu ʼo matehi ia Apesalone.+
16 Neʼe pupuhi leva e Soape te fakatagi pupuhi, pea neʼe toe liliu mai te hahaʼi tagata mai tanatou tuli ia Iselaele. Neʼe fakagata ai e Soape ia te tau.
17 Neʼe natou toʼo leva te sino ʼo Apesalone ʼo li ki he foʼi luo ʼi te vao matuʼa pea neʼe natou laku ki ai he tuʼuga maka.+ Pea neʼe feholaki te kau Iselaele fuli ki ʼonatou ʼapi.
18 ʼI te kei maʼuli ʼa Apesalone, neʼe ina fakatuʼu maʼa ia he pou ʼi te Potu Fenua Laulelei ʼo Te Hau,+ koteʼuhi neʼe ina ui: “ ʼE mole hoku foha ke manatuʼi ai e te hahaʼi toku higoa.”+ Koia, neʼe ina fakahigoaʼi ai te pou kia ia, pea ʼe kei higoa pe ko te Pou ʼo Apesalone ʼo kaku mai ki te ʼaho nei.
19 Neʼe ui e Asimaate,+ te foha ʼo Satoke: “Fakalelei siʼou loto, fakagafua mai ke au lele ʼo fakaha te logo ki te hau, he neʼe fakahoko e Sehova te faitotonu ʼo ina fakaʼateainaʼi ia ia mai ʼona fili.”+
20 Kae neʼe ui e Soape ki ai: “Kailoa, ʼe hoki ke fakaha anai he ʼu logo ʼi he tahi age ʼaho, kae ʼi te ʼaho nei ʼe mole ke fakaha anai he ʼu logo, he ʼe ko te foha totonu ʼo te hau ʼae kua mate.”+
21 Pea neʼe ui e Soape ki he tagata Kusi:+ “Alu ʼo fakaha age ki te hau te ʼu meʼa ʼae neʼe ke sio ki ai.” Neʼe tulolo te tagata Kusi ia muʼa ʼo Soape, pea neʼe lele ai.
22 Neʼe toe ui e Asimaate, te foha ʼo Satoke kia Soape: “Fakalelei siʼou loto, tuku ke au toe lele mo au ʼo muliʼi te tagata Kusi, tatau aipe pe kotea te meʼa ʼae ʼe feala ke hoko.” Kae neʼe ui e Soape: “Siʼoku foha, he koʼe ʼe ke lele anai kae ʼe mole he tahi logo ke ke alu ʼo fakaha?”
23 Neʼe ina toe tali: “Fakagafua mai ke au lele, tatau aipe pe kotea te meʼa ʼae ʼe feala ke hoko.” Neʼe ui leva e Soape ki ai: “Lele!” Pea neʼe lele ia Asimaate ʼo alu ʼi te ala ʼae ʼe fakalaka ʼi te koga fenua ʼo te Solotane,* pea neʼe ina mulihi leva ia te tagata Kusi.
24 Neʼe heka ia Tavite ʼi te vaha ʼo te ʼu matapa ʼe lua ʼo te kolo,+ pea neʼe hake te tagata leʼo+ ki te fuga ʼato ʼo te fale ʼae neʼe laga ʼi te kaupa pea ko te huʼaga ʼaia ʼo te kolo. Neʼe sio leva ki te lele tokotahi mai ʼa he tagata.
25 Pea neʼe kalaga ia te tagata leʼo ʼo ina fakaha ki te hau. Neʼe ui e te hau: “Kapau ʼe ko ia tokotahi, pea ʼe haʼu ia mo he ʼu logo.” ʼI tana lele mai ʼaia ʼo fakaoviovi mai,
26 neʼe sio ia te tagata leʼo ki he tahi age tagata neʼe lele mai. Neʼe kalaga te tagata leʼo ki te tagata leʼo matapa, ʼo ina ui: “Sio, koʼeni te tahi tagata ʼe lele tokotahi mai!” Neʼe ui e te hau: “ ʼE toe haʼu te tagata ʼaia mo he ʼu logo.”
27 Neʼe ui e te tagata leʼo: “ ʼE au tokagaʼi, ʼe lele te ʼuluaki tagata ohage ko Asimaate,+ te foha ʼo Satoke.” Neʼe ui e te hau: “ ʼE ko he tagata lelei ia, pea ʼe haʼu mo he ʼu logo ʼe lelei.”
28 Pea neʼe kalaga leva ia Asimaate ki te hau: “ ʼE lelei pe ia meʼa fuli.” Pea neʼe tulolo ki te kele ia muʼa ʼo te hau. Neʼe ina ui leva: “Siʼoku ʼaliki te hau, ke vikiʼi ia Sehova tou ʼAtua, ʼae neʼe ina tuku atu ki ʼou nima te ʼu tagata ʼae neʼe agatuʼu* kia koe!”+
29 Kae neʼe fehuʼi age e te hau: “ ʼE lelei pe koa te tama ko Apesalone?” Neʼe tali e Asimaate: “Neʼe au sio ki he toe maveuveu lahi ʼi te temi ʼae neʼe fekauʼi mai ai e Soape ia au pea mo tau tagata faifekau kae neʼe mole au iloʼi te meʼa ʼae neʼe hoko.”+
30 Neʼe ui e te hau ki ai: “Alu age ki te faʼahi ʼae, ʼo tuʼu ai.” Neʼe alu ai ki te faʼahi ʼaia, ʼo tuʼu ai.
31 Neʼe tau mai leva te tagata Kusi,+ pea neʼe ina ui: “Siʼoku ʼaliki te hau, ke ke tali te logo ʼaeni ʼe au haʼu mo ia: ʼI te ʼaho nei, neʼe fakahoko e Sehova te faitotonu, ʼi tana fakaʼateainaʼi koe mai te ʼu nima ʼo natou fuli ʼae neʼe agatuʼu kia koe.”+
32 Kae neʼe fehuʼi age e te hau ki te tagata Kusi: “ ʼE lelei pe koa te tama ko Apesalone?” Neʼe tali age e te tagata Kusi: “Siʼoku ʼaliki te hau, ke liliu ʼou fili fuli ohage ko te tama ʼaia, ʼo feia mo natou fuli ʼae neʼe agatuʼu ke natou fai he meʼa ʼe kovi kia koe!”+
33 Neʼe lotomamahi ai te hau. Neʼe hake ki te koga fale fata ʼae neʼe ʼi ʼoluga ʼo te huʼaga ʼo te kolo pea neʼe tagi. Neʼe ina ui ʼi tana alu ʼaia: “Siʼoku foha ko Apesalone, siʼoku foha, siʼoku foha ko Apesalone! He koʼe neʼe mole au mate au kae ke maʼuli koe? Apesalone, siʼoku foha, siʼoku foha!”+
Nota
^ Hep. “ki te ʼu nima ʼo.”
^ Hep. “tuku anai ʼonatou loto kia.”
^ Hep. “neʼe au fua ʼi ʼoku ʼalofi nima.”
^ Peʼe “Kapau neʼe au agakaka ki ai.”
^ Peʼe lagi “kauʼi nahau,” peʼe “tao.”
^ Hep. “ ʼi te koga fenua.”
^ Hep. “neʼe hiki ʼonatou nima.”
