ʼUluaki Kolonito 4:1-21
4 ʼE tonu ke fakaʼuhiga matou e te tagata ko he ʼu tagata faifekau ʼa Kilisito* pea mo he ʼu tagata tauhi ʼo te ʼu meʼa fakalilo tapu* ʼa te ʼAtua.+
2 Ko te meʼa ʼae ʼe kumi ʼi he ʼu tagata tauhi, ke natou agatonu ʼi tanatou gaue.
3 ʼE mole maʼuhiga kia au mo kapau ʼe kotou fakamauʼi au, peʼe fakamauʼi au ʼi he fakamauʼaga. Pea ʼe mole au fakamauʼi ia au totonu.
4 Koteʼuhi ʼe mole vevele toku loto ʼo ʼuhiga mo he meʼa neʼe au fai. Kae ʼe mole fakaʼuhiga leva ʼe au faitotonu. Ko ʼae ʼe ina sivisivi au ʼe ko Sehova.*+
5 Koia ʼaua naʼa kotou fakamauʼi+ he tahi ʼi muʼa ʼo tona temi totonu, ʼo kaku ki te haʼu ʼa te ʼAliki. ʼE ina fakaha anai te ʼu gaue ʼae ʼe ʼūgia ʼi te fakapoʼuli pea mo te ʼu manatu ʼo te loto, pea ʼe tahi maʼu ai anai tona fakavikiviki mai te ʼAtua.+
6 ʼU tehina, neʼe au fakaʼuhiga kia au pea mo Apolose+ te ʼu meʼa ʼae neʼe au palalau atu ki ai, ke fua lelei kia koutou, ke feala ʼaki ia maua ke kotou ako te lekula ʼaeni: “ ʼAua naʼa kotou fakalaka ʼi te ʼu meʼa ʼae kua ʼosi tohi,” ke ʼaua naʼa kotou fiameʼalahi+ pea mo kotou fakamaʼuhigaʼi he tahi ʼi he tahi age.
7 Koteʼuhi kotea ʼae ʼe ina fakakeheʼi koe mai he tahi age? Neʼe mole foaki atu koa la te ʼu meʼa ʼae ʼe ke maʼu?+ Pea kapau neʼe foaki atu, he koʼe ʼe ke fiameʼameʼa ohage neʼe mole foaki atu?
8 Kua kotou maʼu fuli koa te ʼu meʼa ʼae ʼe kotou loto ki ai? Kua kotou maʼu koloa koa? Kua kotou kamata ʼafio+ koa kae mole matou kau ai? ʼE au fakaʼamu lahi kua kotou kamata ʼafio, ke feala foki ke tou ʼafio fakatahi.+
9 Koteʼuhi ʼe hage kia au neʼe tuku e te ʼAtua ia matou, te kau apositolo, ke matou ha fakamuli ʼi he malaʼe faigaoʼi ohage ko he ʼu tagata neʼe fakatuʼā ki te mate,+ ke sioʼi matou e te malamanei,+ mo te kau ʼaselo pea mo te tagata.
10 ʼE matou vavale+ ʼuhi ko Kilisito kae ʼe kotou popoto ʼi takotou fakatahi ʼae mo Kilisito. ʼE matou vaivai kae ʼe kotou malolohi. ʼE fakaʼapaʼapaʼi koutou kae ʼe fakalainoaʼi matou.
11 Pea ʼo kaku mai ki te temi nei, ʼe matou fia kakai,+ mo fia iinu,+ mo masiva ʼi te meʼa laofi,* ʼe gaohi koviʼi*+ matou, ʼe mole homatou ʼapi,
12 pea ʼe matou gaue kinakina.+ Ka leakoviʼi matou e te hahaʼi ʼe matou tapuakiʼi+ natou, ka fakatagaʼi matou ʼe matou ʼutakiʼi,+
13 pea ka fai he ʼu fasituʼu ʼo ʼuhiga mo matou, ʼe matou tali ʼaki he agamalū.*+ Kua matou liliu ko te ʼu ʼotaʼota ʼo te malamanei, ko te ʼu meʼa fakalialia ʼo kaku mai ki te temi nei.
14 ʼE mole au tohi atu te ʼu faʼahi ʼaia ke kotou ufiufi ai, kae ʼe ko haku fakatokaga kia koutou ohage ko ʼaku fanau ʼofaina.
15 Koteʼuhi tatau aipe pe ʼe kotou maʼu he ʼu hahaʼi faiako ʼe toko 10 000 ʼi te ʼu tisipulo ʼa Kilisito, kae ʼe mahino ia ʼe mole lahi ʼakotou tamai. ʼE au fakatahi mo Kilisito Sesu, koia neʼe au liliu ai ko takotou tamai ʼi taku akoʼi atu te logo lelei.+
16 Koia ʼe au fakalotomalohiʼi koutou ke kotou faʼifaʼitakiʼi au.+
17 Ko te tupuʼaga la ʼaia ʼo taku fekauʼi atu ia Timoteo, he ʼe ko taku fanau ʼofaina pea mo agatonu ʼi te ʼAliki. ʼE ina fakamanatuʼi atu anai ʼaku faʼahiga gaue maʼa Kilisito Sesu,+ ohage pe ko taku fai ʼi te ʼu kokelekasio fuli.
18 ʼE fiameʼalahi ʼihi ʼi tanatou manatu ʼae ʼe mole au alu atu anai.
19 Kae kua vave pe taku alu atu, mo kapau ʼe ko te finegalo ʼaia ʼo Sehova,* pea ʼe au iloʼi ai anai te malohi ʼo natou ʼae ʼe fiameʼalahi, kae mole ko ʼanatou palalau.
20 Koteʼuhi ʼe mole fakatafito te Puleʼaga ʼo te ʼAtua ki te ʼu palalau kae ki te malohi.
21 Kotea ʼae ʼe kotou leleiʼia age? Ke au alu atu mo he koga ʼakau+ peʼe ko te ʼofa pea mo te agamalū?
Nota
^ Vakaʼi Te ʼu Kupu.
^ Vakaʼi Te ʼu Kupu.
^ Vakaʼi Te ʼu Fakamahino 1.5.
^ Klka. “mo telefua.”
^ Klka. “hokaʼi.”
^ Klka. “ ʼe matou kole mamahi.”
^ Vakaʼi Te ʼu Fakamahino 1.5.
