ʼUluaki Kolonito 3:1-23
3 Koia ʼu tehina, neʼe mole feala ke au palalau atu ohage ko haku palalau ki he ʼu tagata ʼe takitaki e te laumalie ʼo te ʼAtua,+ kae ohage ko he ʼu tagata ʼe natou maʼu te ʼu manatu fakamalama, ohage ko he ʼu kihiʼi tamaliki+ ia Kilisito.*
2 Neʼe au fafaga koutou ʼaki te huʼa pipi kae mole ʼaki he meʼa kai fefeka, koteʼuhi neʼe heʼeki feʼauga tokotou malohi. Kae maʼiape la ʼi te temi nei, ʼe heʼeki kotou malolohi,+
3 he ʼe kei kotou maʼu pe te ʼu manatu fakamalama.+ ʼE maʼu ia koutou te maheka pea mo te ʼu kē, koia ʼe mole koa la kotou maʼu te ʼu manatu fakamalama+ mo kotou haʼele ohage ko te hahaʼi ʼo te malama?
4 Koteʼuhi ka ui e he tahi: “ ʼE au kau mo Paulo,” kae ui e he tahi age: “ ʼE au kau au mo Apolose,”+ ʼe mole kotou hage koa la ko te hahaʼi ʼo te malama?
5 Kae ko ai koa ia Apolose? Pea ko ai koa ia Paulo? Ko maua ʼe ko he ʼu tagata faifekau,+ neʼe ma fakahoko ia te gaue ʼae neʼe foaki mai e te ʼAliki, pea neʼe kotou liliu ai ʼo tui.
6 Neʼe au to,+ pea neʼe fakavai e Apolose,+ kae neʼe haga fakatuputupu e te ʼAtua.
7 Koia ʼe mole ko ʼae ʼe ina to ʼae ʼe maʼuhiga peʼe ko ʼae ʼe ina fakavai, kae ʼe ko te ʼAtua ʼae ʼe ina haga fakatuputupu.+
8 Pea ko ʼae ʼe ina to pea mo ʼae ʼe ina fakavai ʼe nā gaue fakatahi,* kae ʼe nā tahi maʼu pe anai tona fakapale ʼo mulimuli ki tana gaue.+
9 Koteʼuhi ʼe ma kaugā gaue mo te ʼAtua. Pea ko koutou ko te gaueʼaga ʼa te ʼAtua, te fale ʼae ʼe laga e te ʼAtua.+
10 Neʼe au gaue ohage ko he tagata tufuga faifale faiva ʼo mulimuli ki te ʼofa makehe ʼae neʼe fakaha mai kia au e te ʼAtua,* ʼo au hili te fakatafito+ kae laga e he tahi age. Kae ke tahi tokaga ki tana faʼahiga laga ʼi te fakatafito ʼaia.
11 Koteʼuhi ʼe mole feala ki he tahi ke ina hili he tahi age fakatafito ʼe kehe mo ʼae kua hili, ia Sesu Kilisito.+
12 Kapau ʼe laga e he tahi ʼi te fakatafito ʼaia he fale ʼaki ia te aulo, peʼe ko te siliva, peʼe ko te ʼu maka maʼuhiga, peʼe ko te ʼakau, peʼe ko te vao moamoa,
13 pea ʼe ha anai ia te faʼahiga gaue ʼa te tagata takitokotahi, koteʼuhi ʼe fakaha anai ʼi te ʼaho ʼae ka ʼahiʼahiʼi ai ʼaki te afi.+ Pea ko te afi ʼaia ʼe ina fakamoʼoni anai ia te faʼahiga gaue ʼa te tagata takitokotahi.
14 Kapau ʼe kei tuʼu ia te gaue ʼa he tahi ʼi te fakatafito ʼaia, ʼe ina maʼu anai ia he fakapale.
15 Kapau ʼe vela te gaue ʼa he tahi, ʼe ko he toe puli lahi ia kia ia, kae ʼe haofaki anai ia, pea ʼe hage anai ko te fakalaka ʼi te afi.
16 ʼE mole kotou iloʼi koa la ʼe ko koutou te fale lotu ʼa te ʼAtua,+ pea ʼe nofo te laumalie ʼo te ʼAtua ia koutou?+
17 Kapau ʼe maumauʼi e he tahi te fale lotu ʼa te ʼAtua, ʼe maumauʼi anai ia ia e te ʼAtua, koteʼuhi ʼe maʼoniʼoni ia te fale lotu ʼa te ʼAtua pea ʼe ko koutou te fale lotu ʼaia.+
18 Ke ʼaua naʼa kakaʼi e he tahi ia ia totonu: Kapau ʼe manatu e he tahi ia koutou ʼe poto ʼi te malama* ʼaeni, ke liliu ia ʼo vale, ke feala hana liliu ʼo poto.
19 Koteʼuhi ko te poto ʼo te malamanei ʼe vale ia ia muʼa ʼo te ʼAtua, he neʼe tohi: “ ʼE ina maʼutoka te kau popoto ʼi ʼanatou puleʼaki kaka.”+
20 Pea ʼe toe tohi: “ ʼE iloʼi e Sehova* ʼe vaʼiganoa te ʼu fakakaukau ʼa te kau popoto.”+
21 Koia ke ʼaua naʼa fiameʼameʼa he tahi ʼo ʼuhiga mo te gaue ʼa te tagata, he ʼe ʼa koutou ia meʼa fuli,
22 tatau aipe pe ʼe ko Paulo, peʼe ko Apolose, peʼe ko Sefasi,*+ peʼe ko te malamanei, peʼe ko te maʼuli, peʼe ko te mate, peʼe ko te ʼu meʼa ʼo te temi nei, peʼe ko te ʼu meʼa ka hoko mai, ʼe ʼa koutou ia meʼa fuli.
23 Kae ko koutou ko he ʼu kaugana ʼa Kilisito,+ pea ʼe kaugana ia Kilisito ki te ʼAtua.
Nota
^ Vakaʼi Te ʼu Kupu.
^ Peʼe “ ʼe ʼi ai tanā fakatuʼutuʼu ʼe tahi.”
^ Peʼe “tagata takitaki gaue poto.”
^ Peʼe “tuʼu ʼo te ʼu faʼahiga meʼa.” Vakaʼi te kupu “Tuʼu ʼo te ʼu faʼahiga meʼa” ʼi Te ʼu Kupu.
^ Vakaʼi Te ʼu Fakamahino 1.5.
^ ʼE toe higoa ko Petelo.
