NEʼE tohi fēnei e te fafine e taʼu 25: “ ʼI te taʼu 1981, neʼe mate taku faʼe ʼaē neʼe ina vaheʼi ʼau ʼi te kosea. Neʼe faigataʼa ʼaupito tona mate kia māua tau tuagāʼane. Neʼe ko toku taʼu 17 ʼaia, pea ko toku kiʼi tokolua neʼe ko tona taʼu 11. Neʼe lahi ʼaupito taku manatu ʼaē ki ai. ʼI te ʼui mai ʼaē ʼe nofo ia ʼi te lagi, neʼe ʼau fia fakamate ke feala ai haku ʼalu ʼo nofo mo ia. Neʼe ko toku kaumeʼa lelei.”

ʼE hage ia ʼe mole ko he meʼa ʼe totonu ia te toʼo ʼaē e te mate he tahi ʼe koutou ʼofa ai. Pea ka hoko mai te meʼa ʼaia, ko te manatu ʼaē, ʼe mole feala takotou toe palalau, mo kata, peʼe ko te fāʼufua kia ia ʼaē ʼe koutou ʼofa ai, ʼe feala ke mata faigataʼa age ia kia koutou tona tauʼi. ʼE mole feala ke pulihi te mamahi ʼaia, mokā ʼe ʼui atu, kua ʼalu ia ia ʼaē ʼe koutou ʼofa mamahi ai ki te lagi.

Kae, ʼe fakahā mai e te Tohi-Tapu te ʼamanaki makehe ʼaupito. Ohage ko tatatou vakaʼi ʼi te ʼu alatike kua hili, ʼe fakahā mai e te Tohi-Tapu, ʼe feala takotou toe fakatahi mo he tahi kua mate ʼe koutou ʼofa mamahi ai ʼi he temi kua ōvi mai, ʼo mole ʼi te lagi kae ʼi te kele ʼi te ʼu ʼaluʼaga faitotonu pea mo tokalelei. Pea ʼi te temi ʼaia, ʼe maʼu anai e te hahaʼi ia te maʼuli haohaoa, pea ʼe mole toe feala anai ke nātou toe mamate. ‘Kae ko te faʼahi ʼaia e lagi ko he manatu pe ia!’ ko te lagi ʼui ʼaia ʼa ʼihi.

Koteā koa he meʼa ʼe feala ai ke koutou tui ko te ʼamanaki ʼaenī ʼe moʼoni? Moʼo faka tui ki he fakapapau, ʼe ʼaoga ke koutou ʼiloʼi ko ia ʼaē neʼe ina fai te fakapapau ʼaia, ʼe lotolelei ia ke hoko pea ʼe feala ia tana fakahoko. Kae, ko ai koa ʼaē neʼe ina fakapapau mai ʼe toe fakatuʼuake anai te kau mate?

ʼI te taʼu 31 ʼo totatou temi, neʼe fai e Sesu Kilisito te fakapapau fakamālohi ʼaenī: “Ohage ko te toe fakatuʼu e te Tāmai te ʼu mate mo foaki age kia nātou te maʼuli, ʼe toe feiā mo te ʼAlo ʼe ina foaki te maʼuli kia nātou ʼaē ʼe loto ia ia ki ai. ʼAua naʼa koutou punamaʼuli ki te meʼa ʼaenī, ʼe hoko mai te hola ʼaē ʼe ko nātou fuli ʼe nonofo ʼi te loto faitoka ʼe nātou logo anai ki tona leʼo [ʼo Sesu] pea nātou hū mai anai ki tuʼa.” (Soane 5:21, 28, 29) ʼIo, neʼe fakapapau mai e Sesu Kilisito ko te lauʼi miliona hahaʼi ʼaē ʼe mamate ʼi te temi ʼaenī ʼe nātou toe maʼuʼuli anai ʼi te kele ʼaenī, pea ʼe nātou maʼu anai te maʼuli heʼegata ʼo nātou maʼuʼuli ʼi he ʼu ʼaluʼaga faka palatiso pea mo tokalelei. (Luka 23:43; Soane 3:16; 17:3; vakaʼi ia Pesalemo 37:29 pea mo Mateo 5:5.) Koteʼuhi neʼe fai e Sesu te fakapapau ʼaia, ʼe ko he manatu fakapotopoto tatatou faka tui ʼe ina fakahoko katoa ia te fakapapau ʼaia. Kae ʼe feala koa tana fai ia te faʼahi ʼaia?

Mole heʼeki ʼosi te ʼu taʼu e lua ki tana fai te fakapapau ʼaia, neʼe fakahā e Sesu ʼaki tana fai he milakulo, tona lotolelei ʼaē ke ina fai te faʼahi ʼaia, pea ʼe feala ke ina fakahoko te fakatuʼuake..

Neʼe ko he faʼahiga meʼa fakalave loto. Neʼe kovi ʼaupito te mahaki ʼo Lasalo. Ko tona ʼu tuagaʼane e lua, ia Malia pea mo Maleta, neʼe nā fakahā te logo ʼaia kia Sesu, ʼaē ʼe nofo ʼi tuʼa atu ʼo te Vaitafe ko Solotane: “ ʼAliki, koʼeni! ia ia ʼaē e ke ʼofa ai ʼe mahaki.” (Soane 11:3) Neʼe nā ʼiloʼi ʼe ʼofa ia Sesu kia Lasalo. ʼE mole fia ʼalu koa la ia ʼo sio ki tona kaumeʼa ʼaē ʼe mahaki? ʼI meʼa faikehe foki, neʼe mole ʼalu fakavilivili atu aipe ia Sesu ki Petania, neʼe toe nofo ia ʼi te ʼu ʼaho e lua ʼi te faʼahi pe ʼaē neʼe nofo ai.—Soane 11:5, 6.

Neʼe mate ia Lasalo ʼi he temi ki muli age, ʼi te ʼosi pe ʼaē ʼo te logologo ʼo tona mahaki. Neʼe ʼiloʼi e Sesu te temi ʼaē neʼe mate ai ia Lasalo, pea neʼe ina fakatuʼutuʼu ke ina fai he meʼa. ʼI te temi neʼe tau mai ai ia Sesu ki Petania, neʼe kua mate tona kaumeʼa ʼaē ʼe ʼofa ai, kua hili kiai ʼaho e fā. (Soane 11:17, 39) Neʼe feala koa te toe fakamaʼuli ake e Sesu ia he tahi neʼe kua fualoa tona mate?

ʼI tana logo ʼaē kua kaku mai ia Sesu, ko Maleta ʼaē ko te fafine faʼa gāue neʼe lele ia ʼo faka felāveʼi ki ai. (Vakaʼi ia Luka 10:38-42.) ʼI te malave ki ai te mamahi ʼo Maleta, neʼe ʼui age e Sesu: “Ko tou tuagaʼane ʼe toe tuʼuake anai.” ʼI tana fakahā age ʼaē ʼo tana tui ki te toe fakatuʼuake, neʼe ʼui age e Sesu: “Ko ʼau ko te toe tuʼuake pea mo te maʼuli. Ko ʼaē ʼe haga tui kia te ʼau, tatau aipe peʼe mate, ʼe toe tuʼuake anai ia.”—Soane 11:20-25.

ʼI tana kaku ʼaē ki te falemaka fakamanatu, neʼe fakatotonu age e Sesu ke toʼo ia te maka ʼaē ʼe pupunu ʼaki te hūʼaga ki te loto falemaka. Pea, ʼi te ʼosi ʼo tana faikole leʼolahi, neʼe ina fakatotonuʼi fēnei age: “Lasalo, haʼu ki tuʼa!”—Soane 11:38-43.

Ko nātou fuli ʼaē neʼe ʼi ai neʼe nātou sisio ki te falemaka. ʼOsi ʼaia, pea hū mai ia ki tuʼa, neʼe haʼihaʼi katoa tona sino. Ko tona ʼu vaʼe pea mo tona ʼu nima neʼe haʼihaʼi, pea ko tona fofoga neʼe tākai ʼaki te kie. “Koutou vevete ia ia pea koutou tuku age ia ia ke ʼalu,” ko te fakatotonu ʼaia ʼa Sesu. Kua tō ki lalo te  moʼi kie fakaʼosi. ʼIo, ko Lasalo totonu, ia te tagata ʼaē neʼe mate kua hili kiai ʼaho e fā!—Soane 11:44.

Ko te fakamatala ʼo te fakatuʼuake ʼaē ʼo Lasalo neʼe fakamatala ʼi te Evaselio ʼa Soane, ʼe ko te hisitolia neʼe hoko moʼoni. Ko te hisitolia ʼaia ʼe ʼi ai tona ʼu fakamatala ʼe moʼoni, ʼe mole feala ia ke tou ʼui ko he fagana. Ko te fakafihiʼi ʼo tona moʼoni ʼe ko te fakafihiʼi ia ʼo te ʼu milakulo fuli ʼaē ʼo te Tohi-Tapu, ʼo kau ai mo te fakatuʼuake ʼo Sesu Kilisito totonu. Pea ko te fakafisi ki te fakatuʼuake ʼaē ʼo Sesu, ʼe ko te fakafisi ia ki te tui faka Kilisitiano katoa.—1 Kolonito 15:13-15.

Koia, kapau ʼe koutou ʼiloʼi te ʼuhiga moʼoni ʼo te ʼAtua, ʼe mole faigataʼa anai takotou tui ki te toe fakatuʼuake. Ohage la: ʼE feala ke puke e he tahi he foʼi fime viteo ʼo te ʼu meʼa ʼaē ʼe loto ia kiai, pea mo ina fai he tohi ʼo ʼuhiga mo tona ʼu koloā, pea ʼi tona mate ʼe feala leva ke toe sisio pea mo fakalogo tona ʼu kāiga pea mo tona ʼu kaumeʼa ki ai, ʼio, ʼo ina fakamahino ai peʼe feafeaʼi te vaevae ʼo tona ʼu koloā. ʼI te ʼu taʼu e teau ki muʼa atu, neʼe mole feala ia te fai ʼo te faʼahi ʼaia. Pea ki te ʼu hahaʼi ʼe maʼuʼuli ʼi te temi nei ʼi te ʼu potu ʼe mamaʼo ʼo te kele, ko te poto fakatagata ʼo ʼuhiga mo te puke fime viteo ʼe mahino gataʼa, ʼe hage ia ko he meʼa faka milakulo. Kapau ʼe feala ia te fakaʼaogaʼi e te tagata te ʼu lao ʼo te poto ʼaē neʼe fakatupu e te Tupuʼaga moʼo faʼu ʼo he paki pea mo te puke ʼo te leʼo, ʼe mole ko he manatu fakapotopoto koa la te ʼui ʼaē ʼe feala te fai e te Tupuʼaga ia te faʼahi ʼaia ʼo lahi ake? Koia, ʼe mole ko he aga fakapotopoto koa la te faka tui ko Ia ʼaē neʼe ina fakatupu te maʼuli, ʼe feala foki hana toe fakatupu ake?

Ko te milakulo ʼo te fakatuʼuake ʼo Lasalo neʼe ʼaoga moʼo fakatuputupu ʼo te tui ʼaē kia Sesu pea mo te fakatuʼuake. (Soane 11:41, 42; 12:9-11, 17-19) ʼE hā ʼaki mai te faʼahi fakalave loto ʼaia, ia te lotolelei ʼaē ʼo Sehova pea mo tona ʼAlo ke nā fakatuʼuake ia te kau mate.

Ko te aga ʼaē ʼa Sesu ʼi te mate ʼo Lasalo ʼe ʼasi mai ai te loloto ʼo te ʼu meʼa ʼaē ʼi te loto ʼo te ʼAlo ʼo te ʼAtua. Ko te loloto ʼo te ʼu meʼa ʼaē ʼi tona loto ʼaē neʼe ina fakahā fakalelei ʼi te temi ʼaia ʼe hā ai tona holi mālohi ʼaē ke fakatuʼuake te kau mate. ʼE tou lau: “ ʼI tana kaku atu kia Sesu, neʼe fakatō ia Malia ki ʼona vaʼe mo tagi pea mo ina ʼui age: ‘ ʼAliki, ka na neʼe ke ʼi henī la, neʼe mole mate toku tuagaʼane!’ Neʼe loloto te ʼofa ʼo Sesu ʼi tana sio ʼaē ki tana tagi pea mo te kau Sutea ʼaē neʼe ʼōmai mo ia, neʼe mamahi ia ʼi tona loto pea neʼe hoha ia; pea neʼe ina fehuʼi age: ‘Neʼe koutou tuku ia ia kifea?’ Neʼe nātou ʼui age ki ai: ‘ ʼAliki, haʼu pea ke sio.’ Neʼe tagi foki mo Sesu. Koia neʼe ʼui ai e te kau Sutea: ‘Koutou sisio muʼa ki te lahi ʼaē ʼo tona ʼofa ki ai!’ ”—Soane 11:32-36.

Ko te loloto ʼo te manavaʼofa ʼo Sesu neʼe hā ia ʼi te ʼu kupu ʼaenī e tolu: “hoi lahi,” “lotohoha,” pea mo te “tagi loʼimata.” Ko te ʼu kupu ʼaē neʼe fakaʼaogaʼi ʼo ʼuhiga mo te meʼa fakalave loto ʼaia ʼe hā mai ai neʼe loloto te ʼofa ʼo Sesu, ʼi te mate ʼo tona kaumeʼa ʼofaina ʼaē ko Lasalo pea mo tana sio ʼaē ki te fetāgihi ʼo te ʼu tuagaʼane ʼo Lasalo, ʼo fonu ai tona ʼu mata ko te ʼu loʼimata. *

Ko te meʼa ʼaē ʼe fakaofoofo ʼaupito, ʼi muʼa atu neʼe kua fakatuʼuake e Sesu te toko lua mai te mate. Pea ʼe ina fakatuʼutuʼu nei ke ina toe fai katoa te meʼa ʼaia  kia Lasalo. (Soane 11:11, 23, 25) Kae, neʼe “tagi loʼimata ia.” Koia ko te fakatuʼuake ʼo te hahaʼi ki te maʼuli, ʼe mole ko he meʼa neʼe mole hona maʼuhiga kia Sesu. Ko te loloto ʼo te ʼu meʼa ʼaē ʼi tona loto ʼaē neʼe hā ʼi te lakaga ʼaia, ʼe hā mai ai tana holi mālohi ʼaē ke pulihi te ʼu mamahi ʼaē ʼe fakatupu e te mate.

ʼUhi ko Sesu ‘ko te paki totonu ʼo te ʼuhiga moʼoni ʼo Sehova ʼAtua,’ ʼe totonu tatatou fakaʼamu ki te meʼa ka fai anai e tatatou Tāmai ʼaē ʼi selo. (Hepeleo 1:3) ʼO ʼuhiga mo te finegalo ʼo Sehova ʼaē ko te fakatuʼuake ʼo te kau mate, neʼe ʼui e te tagata agatonu ko Sopo: “Ka mate he tagata mālohi, ʼe feala hana toe tuʼuake? . . . ʼE ke pāui anai pea ʼe ʼau tali atu anai. Ki te gāue ʼo tou ʼu nima, ʼe ke toe fia sio anai kiai.” (Sopo 14:14, 15) Ko te kupu ʼaē ʼe fakaliliu “ ʼe ke toe fia sio anai” ʼe faka ʼuhiga ki he toe fia sio ʼaupito ʼa te ʼAtua. (Senesi 31:30; Pesalemo 84:2) ʼE hā lelei mai ai, e lagi ʼe fakafiafia fakatomuʼa ia Sehova ki te fakatuʼuake.

ʼE feala koa hatatou tui moʼoni ki te fakapapau ʼaē ʼo te fakatuʼuake? Ei, ʼe mole fai he mahalohalo ia kiai, heʼe ko Sehova pea mo tona ʼAlo ʼe nā lotolelei ke hoko ia te faʼahi ʼaia pea ʼe feala tanā fakahoko katoa te fakapapau ʼaia. Koteā koa tona faka ʼuhiga kia koutou? ʼE koutou maʼu ia te ʼamanaki ʼaē ke koutou toe fakatahitahi mo te hahaʼi ʼaē ʼe koutou ʼoʼofa ai ʼaē kua mamate, ʼi henī ʼi te kele, ʼo koutou maʼuʼuli mo nātou ʼi he ʼu ʼaluʼaga ʼe kehe age ia!

Ko Sehova ʼAtua, ʼaē neʼe ina tuku te tagata ki te ʼōloto taulekaleka, neʼe ina fakapapau ʼe ina fakatuʼu ia te Palatiso ʼi te kele ʼaenī, ʼo mulimuli ki te pule ʼo Tona Puleʼaga ʼaē neʼe tuku kia Sesu Kilisito ʼaē kua faka kolōliaʼi ʼi te temi nei. (Senesi 2:7-9; Mateo 6:10; Luka 23:42, 43) ʼI te Palatiso ʼaia kua toe fakatuʼu, ʼe maʼu anai e te famili fakatagata te ʼamanaki fakafiafia ʼaē ko te maʼuli heʼegata, ʼo nātou ʼāteaina mai te agakovi pea mo te mahaki fuli. (Fakahā 21:1-4; vakaʼi ia Sopo 33:25; Isaia 35:5-7.) ʼE pulihi anai te fehiʼa fuli, te fakapalatahi ʼa te ʼu fenua, te agamālohi ʼa te ʼu lanu pea mo te pule faka ekonomike. ʼE fakatuʼuake anai e Sehova te kau mate ʼaki ia Sesu Kilisito ʼi he kele feiā.

ʼI te temi nei, ʼe ko te ʼamanaki ʼaia ʼa te fafine Kilisitiano ʼaē neʼe talanoa ki ai ʼi te kamataʼaga ʼo te alatike ʼaenī. ʼI te hili ʼo te ʼu taʼu ki te mate ʼaē ʼo tana faʼe, neʼe tokoni ki ai te kau Fakamoʼoni ʼa Sehova ke ina ako fakalelei te Tohi-Tapu. ʼE ina manatuʼi: “ ʼI te ʼosi ʼo taku ʼiloʼi ia te ʼamanaki ʼaē ki te fakatuʼuake, neʼe ʼau tagi. ʼI meʼa fakaofoofo leva taku ʼiloʼi ʼaē ʼe feala taku toe sio ki taku faʼe.”

Kapau ʼe koutou fakaʼamu ke koutou toe sio ki he tahi neʼe koutou ʼofa ai, ʼe fiafia ia te kau Fakamoʼoni ʼa Sehova ʼi te tokoni kia koutou ke koutou ʼiloʼi pe koteā te meʼa ke koutou fai ke koutou maʼu ai te ʼamanaki moʼoni ʼaia. He koʼe koa ʼe mole koutou faka felāveʼi mo nātou ʼi he Fale ʼo te Puleʼaga ʼe ōvi atu ki ʼokoutou, peʼe koutou faitohi ki he tuʼasila ʼi te ʼu tuʼasila ʼaē ʼe tuʼu ʼi te pasina 32.