ʼI tana kai ʼi te ʼapi ʼo he pule ʼo te kau Faliseo, neʼe akoʼi e Sesu te ʼu manatu maʼuhiga. Neʼe hoko atu leva e Sesu tana faifagona ki Selusalemi, pea neʼe olo mo ia te hahaʼi kaugā malie. Kotea tona tupuʼaga? Neʼe natou fia liliu moʼoni koa ko hana ʼu tisipulo, tatau aipe pe kotea ʼae neʼe feala ke fakamaʼua age ke natou fai?

ʼI tanatou faifagona ʼaia, neʼe fai e Sesu he ʼu palalau neʼe lagi punamaʼuli ai ʼihi. Neʼe ina ui fenei: “Kapau ʼe haʼu he tahi kia te au kaʼe ʼe mole fehiʼa ki tana tamai, mo tana faʼe, mo tona ʼohoana, mo tana fanau, mo ʼona tehina, mo ʼona tuagaʼane, ʼo feia mo tona maʼuli, ʼe mole feala ia ke liliu ko haku tisipulo.” (Luka 14:26) Kaʼe neʼe kotea te fakaʼuhiga ʼo ʼana palalau ʼaia?

Neʼe mole ui e Sesu ko natou fuli ʼae ʼe liliu ko ʼana tisipulo neʼe tonu ke natou fehihiʼa moʼoni ki ʼonatou kaiga. Kaʼe ko tanatou fehihiʼa kia natou, ko tona fakaʼuhiga ke veliveli age tonatou ʼoʼofa ia natou ʼi tonatou ʼoʼofa ia Sesu, ʼo mole hage ko te tagata ʼae neʼe talanoa ki ai ʼi tana lea fakatata ʼo te kaitahi, ʼae neʼe fakafisi ki te fakaafe maʼuhiga ʼuhi he neʼe hoki ʼohoana pe. (Luka 14:20) Neʼe ui ʼo ʼuhiga mo Sakopo, te kui ʼa te kau Sutea, neʼe “fehiʼa” ia Lea kaʼe neʼe ʼofa ia Lasele, ko tona fakaʼuhiga neʼe veliveli age tona ʼofa ia Lea ʼi tona ʼofa ki tona kiʼi tehina ko Lasele.—Senesi 29:31, MN.

Neʼe ke tokagaʼi neʼe ui e Sesu neʼe tonu ke fehiʼa he tisipulo ki “tona maʼuli.” Ko tona fakaʼuhiga, ko he tisipulo moʼoni neʼe tonu ke lahi age tona ʼofa ia Sesu ʼi tona maʼuli, ʼo ina tali ke mate mo kapau ʼe ʼaoga. ʼE ha lelei mai ai, ko te liliu ʼae ko he tisipulo ʼa Kilisito neʼe ko he tonu maʼuhiga. Neʼe mole tonu ke meʼa noaʼi te faʼahi ʼaia, kaʼe ke fakakaukauʼi fakalelei.

Ko he tahi ʼe liliu ko he tisipulo ʼa Sesu ʼe feala ke tau mo he ʼu faigataʼaʼia pea mo he ʼu fakataga, he neʼe ui fenei e Sesu: “Ko ʼae ʼe mole ina ʼamo tona pou fakamamahi pea mo mulimuli mai ia te au ʼe mole feala ia ke liliu ko haku tisipulo.” (Luka 14:27) ʼEi, ko he tisipulo moʼoni ʼa Sesu ʼe tonu ke ina tali ke mamahi ohage pe ko Sesu. Neʼe ui pe la e Sesu ʼe matehi anai ia ia e ʼona fili.

Koia, ko te hahaʼi kaugā malie ʼae neʼe faifagona mo Sesu, neʼe tonu ke natou vakavakaʼi fakalelei te fakaʼuhiga ʼo te liliu ko he tisipulo ʼa Kilisito. Neʼe fai e Sesu te lea fakatata moʼo fakaha lelei te manatu ʼaia. Neʼe ina ui fenei: “Ohage la, ko ai koa ia koutou ʼe ina fia laga he tule ʼe mole nofo ifo muʼa ki lalo ʼo fakafuafua tona totogi pe ʼe feʼauga te paʼaga moʼona fakaʼosi? Naʼa ina fakatuʼu ʼona fakatafito kaʼe ʼe mole feala ke ina fakaʼosi.” (Luka 14:28, 29) Koia, ʼi muʼa ʼo hanatou liliu ko he ʼu tisipulo ʼa Sesu, ko natou ʼae neʼe faifagona mo Sesu ki Selusalemi, neʼe tonu ke natou fakatotonu ke natou fakahoko katoa te ʼu maʼua ʼo he tisipulo. Neʼe ina fakamaʼuhigaʼi te manatu ʼaia ʼi tana fai te tahi lea fakatata ʼaeni:

“Ko te hau fea ka ina fia tauʼi he tahi age hau ʼe mole nofo ifo muʼa ʼo kumi tokoni pe ʼe ina lava tauʼi he toko 20 000 solia ʼaki pe te toko 10 000? Pea kapau leva ʼe mole ina lavaʼi, ʼe ina fekauʼi anai he kau fakafofoga, ʼi te kei mamaʼo ʼa te hau ʼae, ke natou  olo ʼo kumi te tokalelei.” Neʼe hoko atu fenei e Sesu: “ ʼO toe feia pe, ko ʼae ia koutou ʼe mole tauʼine ki ʼona koloa fuli, ʼe mahino papau ia, ʼe mole feala ia ke liliu ko haku tisipulo.”—Luka 14:31-33.

ʼE mahino ia, neʼe mole fai pe e Sesu te ʼu palalau ʼaia maʼa te hahaʼi kaugā malie ʼae neʼe mulimuli ia te ia. Ko natou fuli ʼae kua natou iloʼi ia Kilisito, ʼe tonu ke natou tali ke natou fai te ʼu meʼa ʼae neʼe ui e Sesu. Ko tona fakaʼuhiga, kapau ʼe natou fia liliu ko he ʼu tisipulo ʼa Sesu, ʼe tonu ke natou lotolelei ʼo tuku te ʼu meʼa fuli ʼae ʼe natou maʼu, ʼonatou koloa ʼo feia mo ʼonatou maʼuli. ʼE tonu ke natou fakakaukauʼi pea mo faikole ʼo ʼuhiga mo te faʼahi ʼaia.

Neʼe palalau leva ia Sesu ki he faʼahi neʼe talanoa ki ai ʼi tana Akonaki ’i Te Moʼuga, ʼi tana ui ʼae ko ʼana tisipulo ʼe ko “te masima ʼo te kele.” (Mateo 5:13) Ko tona fakaʼuhiga, ohage pe ko te fakatologa e te masima he kanoʼi manu, ʼo toe feia aipe ʼe tokoni ʼana tisipulo ki te hahaʼi ke natou maʼa ʼi te faʼahi fakalaumalie pea mo ʼanatou aga, peʼe ʼi hona aluʼaga fakata, ke mole natou popo peʼe pala. ʼI te vave ʼosi leva ʼaeni ʼo tona minisitelio, neʼe ina ui fenei: “ ʼE mahino ia, ʼe lelei te masima, kaʼe kapau ʼe puli tona kona, pea ʼe feafeaʼi anai hana toe kona?” (Luka 14:34) Neʼe iloʼi e te hahaʼi ʼae neʼe fagono kia te ia, neʼe ʼi ai te masima neʼe mole maʼa he neʼe fio ʼaki te kele, ʼo mole feala ai ke fakaʼaogaʼi.

Koia, neʼe fakaha e Sesu, maʼia mo natou ʼae kua fualoa tanatou liliu ko hana ʼu tisipulo, neʼe mole tonu ke natou liliu ʼo lotovaivai. Kapau ʼe hoko te faʼahi ʼaia, ʼe mole kei ʼi ai anai honatou ʼaoga, ohage ko te masima ʼae kua puli tona kona. Pea ʼe feala ke nukinukiʼi natou e te hahaʼi. Ko te meʼa ʼae ʼe kovi age, ʼe feala ke mole kei ʼofa te ʼAtua ia natou, ʼuhi ko te laukoviʼi ʼo tona huafa. Neʼe fakaha e Sesu te maʼuhiga ʼae ke mole hoko te faʼahi ʼaia, ʼi tana ui fenei: “Ko ʼae ʼe ʼi ai ʼona taliga ke fakalogo.”—Luka 14:35.