ʼI te potu esite ʼo te Tai ʼo Kalilea, neʼe fafaga fakamilakulo e Sesu te toko lauʼi afe hahaʼi pea neʼe hola leva ʼi te temi ʼae neʼe natou fia fakanofo ai ia ia ko he hau. ʼI te po ʼaia, neʼe haʼele ʼi te fuga ʼo te tai neʼe tokakovi pea neʼe ina haofaki ia Petelo, ʼae neʼe toe haʼele foki mo ia ʼi te fuga tai kaʼe neʼe kamata mou ʼi te temi ʼae neʼe vaivai ai tana tui. Neʼe toe fakagona e Sesu te matagi, ʼo lagi ina haofaki ai ʼana tisipulo he neʼe feala pe ke mou te vaka.

Neʼe toe liliu leva ia Sesu ki te potu uesite ʼo te Tai ʼo Kalilea, ʼi te ʼu tafaʼaki ʼo Kapenaume. Neʼe maʼu ia ia e natou ʼae neʼe ina fafaga fakamilakulo pea neʼe natou ui fenei age: “Neʼe ke haʼu ʼanafea ki heni?” Neʼe fakatonutonuʼi natou e Sesu, ʼo ina ui ʼe natou kumi la ia ia he ʼe natou loto ke ina toe fafaga natou. Neʼe ina fakalotomalohiʼi ai natou ke “ ʼaua naʼa [natou] gaue ki te meʼa kai ʼae ʼe pala, kaʼe ki te meʼa kai ʼae ʼe tologa pea mo ina taki ki te maʼuli heʼe gata.” Koia neʼe natou fehuʼi fenei kia te ia: “Kotea ʼae ʼe tonu ke matou fai moʼo fakahoko te ʼu gaue ʼa te ʼAtua?”—Soane 6:25-28.

Neʼe lagi natou manatu ki te ʼu gaue ʼae neʼe tuʼu ʼi te Lao, kaʼe neʼe talanoa ia Sesu ki he gaue ʼe maʼuhiga age, ʼo ina ui fenei: “Koʼeni te gaue ʼa te ʼAtua, ke kotou tui kia ia ʼae neʼe ina fekauʼi mai.” Logo la te ʼu meʼa fuli ʼae neʼe fai e Sesu, kaʼe neʼe mole tui te hahaʼi kia te ia. Neʼe natou kole age ke ina fai he milakulo ke feala ai hanatou tui kia te ia. Neʼe natou fehuʼi fenei age: “Kotea ʼae ka ke fakahoko anai?” Pea neʼe natou hoko atu fenei: “Neʼe kai e ʼamatou kui te mane ʼi te toafa, ohage ko tona tohi fenei: ‘Neʼe ina foaki kia natou te pane mai te lagi ke natou kai.’ ”—Soane 6:29-31; Pesalemo 78:24.

ʼO ʼuhiga mo tanatou kole ʼae ke ina fai he milakulo, neʼe fakaha fakahagatonu age e Sesu pe ko ai moʼoni ʼae ʼe ina foaki fakamilakulo ia te meʼa ʼae ʼe ʼaoga ki te hahaʼi, ʼo ina ui fenei: “ ʼE au tala moʼoni atu kia koutou, neʼe mole foaki e Moisese kia koutou te pane mai te lagi, kaʼe ʼe ko taku Tamai ʼae ʼe ina foaki atu kia koutou te pane moʼoni mai te lagi. Koteʼuhi ko te pane ʼa te ʼAtua, ʼe ko ia ʼae ʼe hifo mai selo ʼo foaki te maʼuli ki te malamanei.” ʼI tanatou mole mahino ki tana manatu, neʼe natou kole fenei age: “ ʼAliki, foaki tuʼumaʼu mai te pane ʼaia kia matou.” (Soane 6:32-34) Kaʼe kotea koa “te pane” ʼae neʼe talanoa ki ai ia Sesu?

Neʼe ina fakamahino fenei: “Ko au ia te pane ʼo te maʼuli. Ko ʼae ʼe haʼu kia te au ʼe mole toe fia kai anai, pea ko ʼae ʼe tui kia te au ʼe mole toe fia inu anai. Kaʼe ohage pe ko taku ui atu, ʼe kotou sisio kia te au kaʼe ʼe mole kotou tui. . . . Koteʼuhi neʼe mole au hifo mai selo ʼo fai toku finegalo, kaʼe ko te finegalo ʼo ia ʼae neʼe ina fekauʼi mai au. Koʼeni te finegalo ʼo ia ʼae neʼe ina fekauʼi mai au, ke mole puli he tahi ia natou fuli ʼae neʼe ina foaki mai, kaʼe ke au fakatuʼuake natou ʼi te ʼaho fakamuli. He ʼe koʼeni te finegalo ʼo taku Tamai, ke maʼu te maʼuli heʼe gata e ia ʼae ʼe fakamoʼoni ki te ʼAlo pea mo tui kia te ia.”—Soane 6:35-40.

Neʼe iita ai te kau Sutea pea natou kamata muhumuhu ʼo ʼuhiga mo ia. Pe ʼe lava feafeaʼi koa hana ui ko ia “te pane ʼae neʼe hifo mai selo”? (Soane 6:41) Kia natou, ko Sesu neʼe ko te tama pe ia ʼa te taumatuʼa mai te kolo ko Nasaleti, ʼi Kalilea. He neʼe natou fehuʼi fenei: “ ʼE mole ko Sesu koa ʼaena, te foha ʼo Sosefo? ʼE mole tou iloʼi koa la ia tana tamai mo tana faʼe?”—Soane 6:42.

Neʼe tali fenei e Sesu kia natou: “Tuku takotou muhumuhu. ʼE mole he tahi ʼe feala ke haʼu kia te au mo ka na pau la neʼe mole taki mai ia ia e taku Tamai, ʼae neʼe ina fekauʼi mai au, pea ʼe au fakatuʼuake anai ia ia ʼi te ʼaho fakamuli. ʼE tohi fenei ʼi te ʼu tohi ʼa te kau Polofeta: ‘ ʼE akoʼi fuli anai natou e Sehova.’ Ko ʼae neʼe fagono ki te Tamai pea mo ina tali tana akonaki, ʼe haʼu ia kia te au. Heʼeki sio he tagata ki te Tamai, gata pe kia ia ʼae neʼe haʼu mai te ʼAtua, ko ia ʼaia kua sio ki te Tamai. ʼE au tala moʼoni atu kia koutou, ko ʼae ʼe tui, ʼe ina maʼu ia te maʼuli heʼe gata.”—Soane 6:43-47; Esaia 54:13, MN.

ʼI muʼa atu, ʼi tana palalau mo Nikotemo, neʼe fakaha ai e Sesu te aluʼaga ʼe tahi ʼo te maʼuli heʼe gata mo te tui ʼae ki te Foha ʼo te tagata, ʼi tana ui fenei: “Ko ʼae ʼe tui kia te ia [te ʼAlo ʼulu tokotahi ʼo te ʼAtua]  ʼe mole mate anai kaʼe ʼe ina maʼu anai te maʼuli heʼe gata.” (Soane 3:15, 16) Kaʼe neʼe palalau leva ia Sesu ki he hahaʼi neʼe kaugā malie age, ʼo ina fakaha age ʼe feala ke natou maʼu te maʼuli heʼe gata ʼaki ia ia. ʼE ko he faʼahi neʼe mole feala ke natou maʼu ʼaki tanatou kai ki te mane peʼe ki te pane ʼae neʼe maʼu ʼi Kalilea. Koia ʼe lava maʼu feafeaʼi ia te maʼuli heʼe gata? Neʼe toe ui fenei e Sesu: “Ko au ia te pane ʼo te maʼuli.”—Soane 6:48.

Neʼe hoko atu te faipalalau ʼaia ʼo ʼuhiga mo te pane mai te lagi, ʼo ʼasili iita ai te hahaʼi ʼi te faiakonaki ʼa Sesu ʼi te sinakoka ʼi Kapenaume.