KAPITE 26
He Koʼe ʼe Lahi Te Agakovi Mo Te Mamahi?
Ka tau he tahi mo he mamahi, ʼe ina tau ui ‘he koʼe ʼe hoko kia au te mamahi ʼaeni?’ ʼEi ko he fehuʼi ia ʼe tou fai fuli, kae ʼe tou fiafia he ʼe tou maʼu tona tali ʼi te Tohi-Tapu.
1. Ko ai neʼe tupu ai te agakovi?
Neʼe agatuʼu ia Satana ki te ʼAtua. Neʼe ina fia puleʼi ʼihi. Koia neʼe ina fakahalaʼi ai te ʼuluaki taumatuʼa, ia Atama mo Eva ke nā toe agatuʼu ki te ʼAtua. Neʼe ina kakaʼi ia Eva. (Senesi 3:1-5) Neʼe ina ui age ʼe mole loto e Sehova ke ina maʼu he ʼu meʼa lelei. Neʼe hage pe neʼe ina ui age kia Eva ʼe fiafia anai te tagata moka mole fakalogo ki te ʼAtua. Neʼe tala e Satana ia te ʼuluaki loi ʼi tana ui age kia Eva ʼe mole mate anai. Koia ʼae ʼe ui ʼi te Tohi-Tapu ko Satana “ʼe gutuloi pea ʼe ko te tamai ʼo te loi.”—Soane 8:44.
2. Kotea ʼae neʼe filifili e Atama mo Eva?
Neʼe agalelei ʼosi ia Sehova kia Atama mo Eva. Neʼe ina ui age ʼe feala takolua kai ki te ʼu fuʼu ʼakau fuli ʼi te ʼoloto ʼo Eteni, gata pe ki te fuʼu ʼakau ʼe tahi. (Senesi 2:15-17) Kae neʼe mole nā fakalogo. ‘Neʼe toliʼi leva e Eva he fuaʼi ʼakau ʼo kai.’ Ki muli age, neʼe toe ‘kai ki ai’ ia Atama. (Senesi 3:6) Neʼe haohaoa ia Atama mo Eva, koia neʼe faigafua ai kia naua te fai ʼo te meʼa ʼae ʼe lelei. Kae neʼe nā filifili ke nā talagataʼa ki te ʼAtua. ʼI tana fai te faʼahi ʼaia, neʼe nā agahala ai pea neʼe mole nā loto ke puleʼi naua e te ʼAtua. Neʼe nā maʼuli mamahi ʼuhi ko te tonu ʼaia neʼe nā fai.—Senesi 3:16-19.
3. Neʼe kotea ʼona nunuʼa kia tatou?
Neʼe agahala ia Atama mo Eva, koia neʼe nā tuku holo ai te agahala ki tonā hologa. ʼE ui ʼi te Tohi-Tapu ʼo ʼuhiga mo Atama: “ʼAki te tagata pe ʼe tahi neʼe hu ai te agahala ki te malamanei, pea ʼaki te agahala ia te mate, ʼo mafola ai te mate ki te tagata fuli pe.”—Loma 5:12.
ʼE lahi te ʼu tupuʼaga ʼe tou mamahi ai. ʼI ʼihi temi, ʼe tou mamahi ʼuhi neʼe tou toʼo he tonu ʼe mole lelei, pe neʼe fai e he tahi he tonu ʼe kovi, pe neʼe hoko kia tatou he aluʼaga fakafokifa.—Lau ia Ekelesiasi 9:11.
TA FAKALOLOTO
Ta vakaʼi pe koʼe ʼe mole ko te ʼAtua ʼae ʼe tupu ai te agakovi mo te ʼu mamahi ia ʼaho nei pea kotea ʼe ina logoʼi moka tou mamahi.
4. Ko ai ʼae ʼe tupu ai ʼotatou mamahi?
Tokolahi ʼe natou tui ko te ʼAtua ʼae ʼe ina puleʼi te malamanei. Kae ʼe moʼoni koa? Vakaʼi te ʼATA VITEO.
Lau ia Sakopo 1:13 mo 1 Soane 5:19, pea fai te fehuʼi ʼaeni:
-
Ko te ʼAtua koa ʼae ʼe tupu ai te agakovi mo te ʼu mamahi?
5. Te ʼu fua kovi ʼo te pule ʼa Satana
Lau ia Senesi 3:1-6, pea fai teʼ u fehuʼi ʼaeni:
-
Kotea te loi ʼae neʼe ui e Satana?—Vakaʼi te vaega 4 mo 5.
-
Neʼe kakaʼi feafeaʼi e Satana ia Eva?
-
Neʼe ui e Satana ʼe mole ʼaoga ke takitaki te tagata e Sehova ke fiafia ai. Kae ʼe moʼoni koa te faʼahi? Kotea tau manatu?
Lau ia Ekelesiasi 8:9, pea fai te fehuʼi ʼaeni:
-
Kotea ʼae kua hoko ʼi te malamanei, talu te liʼaki e te tagata te takitaki ʼa Sehova?
-
Neʼe haohaoa ia Atama mo Eva pea mo maʼuʼuli ʼi he palatiso. Kae neʼe nā fakalogo kia Satana mo agatuʼu kia Sehova
-
Hili tanā agatuʼu, neʼe mafola te agahala, mo te mamahi pea mo te mate ʼi te malamanei
-
ʼE pulihi anai e Sehova te agahala, mo te ʼu mamahi pea mo te mate. ʼE toe haohaoa anai te tagata pea mo maʼuli anai ʼi he palatiso
6. ʼE mamahi ia Sehova moka tou mamahi
ʼE tokagaʼi koa e Sehova ʼotatou mamahi? Ta vakaʼi te meʼa ʼae neʼe tohi e te Hau ko Tavite pea mo te apositolo ko Petelo. Lau ia Pesalemo 31:7 mo 1 Petelo 5:7, pea fai te fehuʼi ʼaeni:
-
Kotea ʼe ke logoʼi ʼi tau iloʼi ʼae ʼe tokagaʼi e Sehova ʼotatou fihifihia pea ʼe tokaga ia kia tatou?
7. ʼE fakagata anai e te ʼAtua te ʼu mamahi fuli
Lau ia Esaia 65:17 mo Apokalipesi 21:3, 4, pea fai te fehuʼi ʼaeni:
-
He koʼe ʼe fakalotofimalie te ʼu palalau ʼaeni ʼe tuʼu ʼi te ʼu vaega?
Kua ke iloʼi koa?
Neʼe fasituʼu ia Satana kia Sehova ʼi tana tala te ʼuluaki loi. Ko tona fakaʼuhiga neʼe ina uga te hahaʼi ke natou maʼu ni manatu kovi ʼo ʼuhiga mo Sehova ʼo ina ui ʼe mole ko he Pule faitotonu mo ʼofa. Ka pulihi e Sehova te ʼu mamahi, pea ʼe ina fakalakatonuʼi anai tana Pule faʼitaliha mo fakaha ʼe ko tana Pule pe ʼae ʼe lelei tokotahi. Koia ʼe maʼuhiga ʼaupito ia te fakalakatonuʼi ʼo te huafa ʼo Sehova.—Mateo 6:9, 10.
ʼE UI E ʼIHI: “ʼE ʼahiʼahiʼi tatatou tui e te ʼAtua koia ʼae ʼe ina fakamamahiʼi ai tatou.”
-
Kotea anai tau manatu?
MANATU TAFITO
ʼE tupu tafito te ʼu mamahi ʼae ʼi te malamanei ko Satana te Tevolo pea mo te ʼuluaki taumatuʼa. ʼE tokaga moʼoni ia Sehova kia tatou pea kua ina vave pulihi pe ʼotatou mamahi.
Fehuʼi Fakamanatu
-
Kotea te loi ʼae neʼe ui e Satana te Tevolo kia Eva?
-
Kotea te ʼu nunuʼa ʼo te agatuʼu ʼa Atama mo Eva?
-
ʼE tou iloʼi feafeaʼi e mamahi ia Sehova moka tou mamahi?
TE TAHI ʼU MANATU
ʼE fakamahino feafeaʼi ʼi te Tohi-Tapu te kupu agahala?
Ko he tahi ʼu manatu ʼo ʼuhiga mo te fehuʼi ʼae neʼe lagaʼi e Satana te Tevolo ʼi te ʼoloto ʼo Eteni.
“Pourquoi Dieu permet-il les souffrances?” (Ko Te Tule Leʼo (Fakafalani) ʼaho 1 ʼo Sanualio 2014)
He ʼu tali fakalotofimalie ki he fehuʼi faigataʼa.
“He Koʼe Neʼe Hoko Te Shoah? He Koʼe Neʼe Mole Fai e Te ʼAtua He Meʼa?” (Alatike ʼi te jw.org)
Ko te hisitolia ʼa he tagata neʼe mahino pe koʼe neʼe maʼuli mamahi feia.
Te Tahi ʼu Manatu
FEHUʼI ʼE FAI TUʼUMAʼU
Kotea Te Ako Tohi-Tapu?
Kotou ma’u te ’u tali ki te ’u fehu’i ’o ’uhiga mo he ako Tohi-Tapu ’e mole totogi.
