ʼE loto e Sehova ke ke iloʼi ia ia. Kotea tona tupuʼaga? He ʼe ina loto ke ke liliu ko hona kaumeʼa. Koia ʼe ina loto ai ke lahi age te ʼu faʼahi ʼe ke ako ʼo ʼuhiga mo tona ʼuluagaaga, mo ʼana gaue pea mo tana fakatuʼutuʼu. Kae ʼe feala koa ke ke kaumeʼa moʼoni mo te ʼAtua? (Lau ia Pesalemo 25:14.) ʼE feafeaʼi hau kaumeʼa mo ia? ʼE maʼu tona tali ʼi te Tohi-Tapu. Pea ʼe fakamahino ai pe koʼe ʼe makehe age tau fakakaumeʼa ʼaia mo Sehova.

1. Kotea ʼae ʼe kole atu e Sehova ke ke fai?

“Kotou fakaovi ki te ʼAtua, pea ʼe fakaovi atu anai kia koutou.” (Sakopo 4:8) Kotea tona fakaʼuhiga? ʼE loto e Sehova ke ke kaumeʼa mo ia. ʼE faigataʼa ki ʼihi tanatou tui ki te faʼahi ʼaia he ʼe mole natou sisio ki te ʼAtua. Kae ʼe fakaha mai e Sehova ʼi tana Folafola ia faʼahi fuli ʼo tona ʼuluagaaga ke feala ai hatatou ‘fakaovi kia te ia.’ Ko te Tohi-Tapu ʼe ko he tohi neʼe fai e Sehova maʼa tatou. Koia, ka tou lau tuʼumaʼu te Tohi-Tapu pea ʼe malohi age anai ʼatatou felogoi mo ia logo la ʼe mole tou sisio ki ai.

2. He koʼe ʼe feala ke ke falala kia Sehova?

ʼE mole he tahi ʼe hage ko Sehova. Kotea tona tupuʼaga? He ʼe ʼofa mamahi ia koe. ʼE ina loto ke ke fiafia pea mo ke kole tuʼumaʼu tana tokoni. ʼE feala ke ke ‘tuku kia te ia ʼau tuʼania fuli, he ʼe tokaga ia kia koe.’ (1 Petelo 5:7) ʼEi, ʼe tokoni tuʼumaʼu ia Sehova ki ʼona kaumeʼa, mo ina fakalotofimalieʼi pea ʼe fagono kia natou.—Lau ia Pesalemo 94:18, 19.

3. Kotea ʼe tonu ke ke fai?

ʼE ʼofa ia Sehova ki te hahaʼi fuli ‘kae ʼe kaumeʼa ia mo te hahaʼi faitotonu.’ (Taʼaga Lea 3:32) Kapau ʼe ke fia kaumeʼa mo te ʼAtua, ʼe tonu ke ke fai te meʼa ʼae ʼe ina leleiʼia pea mo fehiʼa ki te meʼa ʼae ʼe fehiʼa ki ai. ʼE manatu ʼihi ʼe mole feala ke natou fakalogo ki te ʼu pelesepeto fuli ʼa Sehova. Kae ʼe manavaʼofa ia Sehova. ʼE ʼofa ia natou fuli ʼae ʼe ʼoʼofa moʼoni kia te ia pea mo natou fai ia meʼa fuli moʼo fakafiafiaʼi tona loto.—Pesalemo 147:11; Gaue 10:34, 35.

TA FAKALOLOTO

4. Neʼe kaumeʼa ia Apalahamo mo Sehova

ʼAki te hisitolia ʼo Apalahamo, (ʼae neʼe toe higoa ko Apalamo) ʼe tou mahino ai pe kotea te fakaʼuhiga ʼo hakita kaumeʼa mo te ʼAtua. Lau ia Senesi 12:1-4, pea fai te ʼu fehuʼi ʼaeni:

• Kotea ʼae neʼe kole age e Sehova kia Apalahamo ke ina fai?

• Kotea ʼae neʼe fakapapauʼi age e Sehova?

• Kotea ʼae neʼe fai e Apalahamo?

5. Te meʼa ʼae ʼe loto ʼe Sehova ke fai e ʼona kaumeʼa

ʼE mahino ia ʼe ʼi ai ʼihi meʼa ʼe ke loto ke fai e ʼou kaumeʼa.

• Kotea ʼe ke loto ke natou fai?

Lau ia 1 Soane 5:3, pea fai te fehuʼi ʼaeni:

• Kotea ʼe loto e Sehova ke fai e ʼona kaumeʼa?

Kapau ʼe ke fia fakalogo kia Sehova, ʼe tonu anai ke ke fetogi tau aga peʼe ko ʼihi aluʼaga ʼo tou maʼuli. Lau ia Esaia 48:17, 18, pea fai te fehuʼi ʼaeni:

• He koʼe ʼe loto e Sehova ke fai e ʼona kaumeʼa ni fetogi?

6. Te meʼa ʼe fai e Sehova ki ʼona kaumeʼa

 MANATU TAFITO

ʼE loto e Sehova ke ke kaumeʼa mo ia pea ʼe tokoni atu anai.

Fehuʼi Fakamanatu

• ʼE tokoni feafeaʼi ia Sehova ki ʼona kaumeʼa?

• He koʼe ʼe loto e Sehova ke fai e ʼona kaumeʼa ni fetogi?

• ʼI tau manatu la, ʼe lahi fau koa te ʼu meʼa ʼae ʼe loto e Sehova ke fai e ona kaumeʼa? Kotea tona tupuʼaga?