PELESEPETO FAKATOHI-TAPU: “Kapau e mamahi he tahi ki he tahi i he mea, ke kotou fefakamolemoleaki. Ke kotou fakamolemole foki o hage ko [Sehova] ae nee fakamolemole kia koutou.”—Kolose 3:13.

Kotea tona fakaʼuhiga? ʼI te Tohi-Tapu, ko te agahala ʼe fakatatau ki he maʼua pea ko te fakamolemole ʼe fakatatau ki he mole toe huʼi mai ʼo he maʼua. (Luka 11:4) ʼE ui ʼi te tohi ko te kupu Fakakeleka ʼae neʼe fakaliliu ʼi te Tohi-Tapu ʼaki te kupu “fakamolemole,” ʼe fakaʼuhiga ki he “fakaalu noa ʼo he maʼua pea ke mole toe huʼi mai.” Koia, ka tou fakamolemole ki he tahi neʼe ina fai he meʼa ʼe kovi, ʼe hage pe ʼe tou ui age ki ai ʼe mole tou loto ke ina toe liufaki mai he meʼa. Ko tatatou fakamolemole ki he tahi, ʼe mole fakaʼuhiga leva ʼe tou leleiʼia te aga ʼae ʼe kovi. Kaʼe, neʼe tou fakatotonu ke mole tou nonofo mo he loto ita tatau aipe pe ʼe ko tatou ʼae neʼe mole hala.

ʼE kei ʼaoga koa ia ʼaho nei? ʼI totatou ʼuhiga heʼe haohaoa, ʼe tou agahala fuli. (Loma 3:23) Koia, ka tou fakamolemole ki ʼihi, ʼe ha ai tatatou agafakapotopoto. Koteʼuhi ʼe toe ʼaoga foki anai ke fakamolemole mai ʼihi kia tatou. Pea tahi, ka tou fakamolemole, ʼe toe fua lelei anai kia tatou totonu. ʼO feafeaʼi?

Ka tou taupau ia he loto ita mo he lotokovi pea mole tou fia fakamolemole, ʼe tou fakamamahiʼi pe ia tatou totonu. ʼE feala ki te ʼu manatu ʼaia ʼe mole lelei ke puli ai totatou fiafia, mo tou mahahaki pea mo lotomamahi. ʼE toe feala foki ke tupu ai hotatou mahaki kovi. ʼI te ʼu sivi neʼe fai e te Toketa ko Yoichi Chida pea mo te Tagata Faiako ko Andrew Steptoe ʼe tou maʼu ʼi te Journal of the American College of Cardiology, ʼe ui fenei ai: “Ko te ʼu fekumi neʼe maʼu ʼe ha ai ko te ita mo te lotokovi pea mo te mahaki mafu ʼe ʼi ai tonatou pikipikiga.”

Koia, tou vakaʼi te ʼu lelei ʼe feala ke tou maʼu ʼi tatatou fakamolemole. Ka tou fakamolemole ki ʼihi, ʼe tou taupau maʼu ai te logo tahi mo te tokalelei pea mo ʼatatou felogoʼi lelei. Kaʼe ko te tahi faʼahi ʼe toe maʼuhiga age, ʼe ko tatatou fakamoʼoni ʼae ʼe tou faʼifaʼitakiʼi te ʼAtua. Mai tona aluʼaga ʼae ko te ʼAtua ʼe lotofakamolemole ki te kau agahala fuli ʼae ʼe fakahemala pea ʼe ina loto ke tou toe faʼifaʼitakiʼi tana lotofakamolemole.—Maleko 11:25; Efeso 4:32; 5:1.