ʼE ui ʼi te Tohi-Tapu ko te pateliaka ko Sopo ‘neʼe mole hana lakahala pea neʼe agatonu.’ (Sopo 1:1) Ko Lote neʼe ko te “tagata agatonu.” (2 Petelo 2:8) Pea neʼe ui ko Tavite neʼe ina “fai te mea ae e tonu” ia mata ʼo te ʼAtua. (1 Hau 14:8) Kaʼe, tou vakaʼi ia te maʼuli ʼo te ʼu tagata takitahi ʼaia ʼo te Tohi-Tapu. Pea ʼe tou talanoa anai ki te ʼu faʼahi ʼaeni ʼe tolu: (1) Neʼe natou fai ni lakahala, (2) ʼe feala ke lahi te ʼu ako ʼe tou maʼu mai ʼanatou faʼifaʼitaki, pea (3) ʼe feala ki he ʼu hahaʼi agahala ke leleiʼia natou e te ʼAtua.

Neʼe felaveʼi ia Sopo mo te ʼu ʼahiʼahi kehekehe ʼe mole faitotonu. Pea neʼe ina maʼu ai he manatu hala, ʼo ui ʼe mole tokagaʼi e te ʼAtua pe ʼe kei ina maʼu tana tui kia te Ia peʼe kailoa. (Sopo 9:20-22) Kia mata ʼo Sopo neʼe faitotonu age ʼi te ʼAtua.—Sopo 32:1, 2; 35:1, 2.

Ko Lote neʼe fakatuatuai ʼi tana toʼo he tonu fakavilivili. Neʼe lotomamahi ʼi te ʼu aga heʼe ʼaoga ʼae neʼe fai e te hahaʼi ʼo Sotoma mo Komola ʼo tupu ai te  “fakamamahii tona laumalie [peʼe maʼuli] agatonu” ʼuhi ko ʼanatou aga. (2 Petelo 2:8) Neʼe fakaha e te ʼAtua tana fakatuʼutuʼu ʼae ke ina pulihi te ʼu kolo aga fakalialia ʼaia, kaʼe neʼe ina tuku ia te fealagia ʼae kia Lote mo tona famili ke haofaki natou. ʼE lagi neʼe kotou manatu neʼe mavae atu aipe ia Lote ʼi te ʼu koga meʼa ʼaia. Kaʼe ʼi te lakaga maʼuhiga ʼaia, neʼe fakatuatuai ia Lote. Ko te ʼu ʼaselo ʼae neʼe ʼomai ʼo haofaki Lote mo tona famili, neʼe natou puke ʼonatou nima ke natou mavae mai te kolo. Pea mo taki natou ki he koga meʼa ʼe natou hao ai.—Senesi 19:15, 16.

Ko Tavite neʼe mole kei ina maʼu ia te loto lolomi pea neʼe tono mo he fafine ʼohoana. Pea neʼe ina toe fai ia he meʼa ʼe kovi age ʼi tana fekauʼi ke matehi te ʼohoana ʼo te fafine ke mole iloʼi ai te aga ʼae neʼe ina fai. (2 Samuele kapite 11) ʼE ui fenei ʼi te Tohi-Tapu: “Nee kovi osi te mea ae nee fai e Tavite [kia Sehova].”—2 Samuele 11:27.

Ko Sopo, mo Lote pea mo Tavite neʼe natou fai ni lakahala pea ko ʼihi ʼo ʼanatou lakahala neʼe kovi age. Kaʼe, neʼe natou fia fakalogo ki te ʼAtua ʼaki ʼonatou loto katoa pea ʼe tou vakaʼi anai te faʼahi ʼaia. Neʼe natou lotolelei ke natou fakahemala moʼoni pea mo fetogi tonatou faʼahiga maʼuli. Ki muli age, neʼe tokoni te ʼAtua kia natou ʼi te u aluʼaga fuli ʼae neʼe tau mo natou. ʼE talanoa ia te Tohi-Tapu ʼo ʼuhiga mo natou ko he ʼu tagata agatonu.

ʼI totatou ʼuhiga agahala, ʼe feala ke tou fai he ʼu lakahala. (Loma 3:23) Kaʼe kapau ʼe hoko te faʼahi ʼaia, ʼe tonu ke tou fakaha ʼe tou fakahemala pea ʼe tou fai anai ia meʼa fuli ʼe tou lavaʼi moʼo fakatokatoka ʼatatou lakahala.

 Neʼe faiga feafeaʼi ia Sopo, mo Lote pea mo Tavite ke natou fakatokatoka ʼonatou lakahala? Ko Sopo neʼe ko he tagata agatonu. Hili te fakaha age e te ʼAtua te hala ʼo ʼana manatu, neʼe fetogi ai e Sopo tana faʼahiga manatu pea neʼe fakahemala ʼo ʼuhiga mo ʼana palalau. (Sopo 42:6) Neʼe alu tahi te ʼu lao ʼa te ʼAtua mo te aluʼaga ʼae neʼe tokagaʼi e Lote ʼo ʼuhiga mo te aga heʼe ʼaoga ʼa te hahaʼi ʼo Sotoma mo Komola. Neʼe mole ina tokagaʼi ia te meʼa ʼae kua vave hoko mai. Kaʼe, neʼe hola mai te ʼu kolo ʼae neʼe tauteaʼi ke hao mai te tautea ʼa te ʼAtua. ʼUhi ko tana fakalogo neʼe mole sio ai ki muli. Logo la neʼe fai e Tavite he hala mamafa ʼaki tana maumauʼi te lao ʼa te ʼAtua kaʼe neʼe ina fakaha moʼoni te meʼa ʼae ʼi tona loto ʼaki tana fakahemala moʼoni. Pea neʼe ina kole ai ki te ʼAtua ke fakamolemole age.—Pesalemo 51.

Neʼe maʼu e Sehova ia he manatu ʼe lelei ʼo ʼuhiga mo te ʼu tagata ʼaia pea ʼe alu tahi mo te manatu ʼaeni: ʼE aga fakapotopoto ʼo ʼuhiga mo te ʼu meʼa ʼae ʼe fealagia e te hahaʼi agahala. Ko te ʼAtua “e ina iloi te mea ae nee fau tatou ki ai, e ina manatui ko tatou ko te efu.” (Pesalemo 103:14) Koia, kapau ʼe iloʼi e te ʼAtua ʼe tou fai he ʼu lakahala, kotea tana fakaʼamu ʼo ʼuhiga mo tatou?

ʼE ha ʼi te tokoni ʼaeni neʼe foaki e Tavite ki tona foha ko Salomone pe ʼe leleiʼia feafeaʼi tatou e te ʼAtua: “Pea ko koe, Salomone, toku foha, ke ke iloi e koe te Atua o tau tamai, pea ke ke tauhi kia ia i tou loto katoa.” (1 Koloniko 28:9) Kotea te fakaʼuhiga ʼo he “loto katoa?” Ko he tahi ʼe ina maʼu he loto ʼe katoa, ʼe ʼofa ki te ʼAtua pea ʼe ina fakatotonu ke ina fai tona finegalo mo ʼana fakatotonu. Ko te maʼu ʼo he loto katoa ʼe mole fakaʼuhiga leva ke tou haohaoa kaʼe ke tou fia fakalogo ki te ʼAtua pea mo tali te fakatonutonu. Kia mata ʼo te ʼAtua, neʼe ‘mole he lakahala’ ʼa Sopo, neʼe “agatonu” ia Lote pea neʼe fai e Tavite ia “te mea ae e tonu.” Kotea tona tupuʼaga? Koteʼuhi neʼe natou ʼoʼofa ki te ʼAtua pea mo fia fakalogo kia te ia. Logo la ʼanatou lakahala kaʼe neʼe leleiʼia natou e te ʼAtua.

Kapau ʼe tou maʼu he ʼu manatu ʼe mole lelei kaʼe neʼe mole tou loto ki ai, peʼe tou fai he palalau ʼe mole tou fiafia ai, peʼe fai he ʼu meʼa ʼe tou fakahemala ai ki ʼamuli, ʼe tokoni mai anai te ʼu faʼifaʼitaki ʼae neʼe tou vakaʼi ke tou lotomalohi. ʼE iloʼi e te ʼAtua ʼe mole heʼeki tou haohaoa. Kaʼe ʼe fakaʼamu ke tou ʼoʼofa pea mo faiga ke tou fakalogo kia te ia. Kapau ʼe katoa totatou loto, ʼe tou tui papau ai ʼe feala ke leleiʼia tatou e te ʼAtua.