Neʼe au lahilahi ake ʼi Ancram, ko te kiʼi kolo ʼo New York ʼi Amelika. ʼI te kolo ʼaia, neʼe lahi te ʼu fale tauhi manu ʼae neʼe fai ai te huʼa pipi. ʼI tona fakahagatonu, neʼe lahi age te ʼu pipi ʼi te hahaʼi ʼo te kolo ʼaia.

Neʼe olo toku famili ki te ʼekelesia pe ʼe tahi ʼo te fenua ʼaia. ʼI te ʼahotapu uhu, neʼe fakamaʼa ʼoku sulie e taku kui tagata pea neʼe au alu ki te ʼu kapite mo te kiʼi Tohi-Tapu hina ʼae neʼe foaki mai e taku kui fafine. Ko au mo toku kiʼi tokolua pea mo toku kiʼi tehina, neʼe matou gaue kinakina. Pea neʼe matou fakaʼapaʼapa mo tokoni ki ʼomatou vahaʼa fale pea mo lotofakafetaʼi ki te ʼu tapuakina neʼe matou maʼu.

ʼI te temi ʼae neʼe kua au lahi ai, neʼe au mavae ʼi toku ʼapi pea neʼe au faiako. Neʼe lahi ʼaku fehuʼi ʼo ʼuhiga mo te ʼAtua pea mo te maʼuli. Ko ʼihi ʼo taku kau ako neʼe natou ʼatamai. Pea ko ʼihi neʼe mole natou ʼatamai kaʼe neʼe natou gaue kinakina. Neʼe ʼi ai ʼihi neʼe maʼimoa kaʼe ko ʼihi neʼe mole ʼi ai honatou mahaki. ʼI taku sio, neʼe mole ko he ʼu aluʼaga ʼaia ʼe faitotonu. ʼI ʼihi temi, neʼe ui fenei e te ʼu matuʼā ʼa te ʼu fanau ʼae neʼe mole ʼatamai ʼi ʼihi age kau ako: “Neʼe ko te maʼuli ʼaia neʼe loto ki ai te ʼAtua.” Neʼe au feʼekeʼaki pe koʼe ʼe fakagafua e te ʼAtua ke tupu maʼimoa ʼihi tamaliki. Pea tahi, neʼe mole fai e te tamasiʼi ia he meʼa ʼe kovi.

Neʼe au toe feʼekeʼaki fenei: ‘Kotea ia te faʼahi maʼuhiga ʼe tonu ke au fai ʼi toku maʼuli?’ Neʼe au tokagaʼi ai te alu vave ʼo te temi. Neʼe au lahilahi ake ʼi he famili agalelei, neʼe au alu ʼo ako ʼi te ʼu fale ako lelei pea ʼi te temi nei neʼe au maʼu ia he gaue ʼe au leleiʼia. Kaʼe neʼe hage kia au neʼe mole he ʼuhiga ʼo toku maʼuli. Neʼe toe feala pe ke au fakaʼamu ke au ʼohoana, mo maʼu hoku ʼapi matalelei, mo maʼu fanau, mo hoko atu taku gaue ʼo kaku ki taku letelete, ʼosi ʼaia pea au alu leva ʼo nofo ʼi te ʼu fale taupau ʼo te hahaʼi matutuʼa. Kaʼe neʼe au feʼekeʼaki pe neʼe ʼi ai he tahi age faʼahi ʼi te maʼuli.

ʼI te tahi ʼaho, neʼe au alu ki Eulopa mo ʼihi ʼo ʼoku kaugā gaue. Neʼe matou olo ki te ʼekelesia ko Westminster Abbey, mo Notre-Dame de Paris ʼo toe feia pe mo te Vatikano, pea mo ʼihi atu kiʼi ʼekelesia. ʼI te ʼu koga meʼa fuli ʼae neʼe au fakalaka ai, neʼe au fai ʼaku fehuʼi. Pea ʼi taku  toe liliu mai ki toku ʼapi ki Sloatsburg, ʼi New York, neʼe au alu ʼo mamata te tahi ʼu kiʼi ʼekelesia. Kaʼe neʼe mole ʼi ai he tahi neʼe feala ke ina tali mai ki ʼaku fehuʼi.

ʼI te tahi ʼaho, neʼe fakaovi mai ia he kiʼi taʼahine kei ako ʼe taʼu 12 pea neʼe ina fai mai kia au ia te ʼu fehuʼi ʼe tolu. ʼUluaki, neʼe ina fehuʼi mai pe neʼe au iloʼi ko ia ko te Fakamoʼoni ʼa Sehova. Neʼe au tali fenei age: “ʼEi.” Lua, neʼe ina fehuʼi mai pe ʼe au fia iloʼi lahi age ʼo ʼuhiga mo te kau Fakamoʼoni ʼa Sehova. Pea neʼe au toe tali fenei age: “ʼEi.” Pea tolu, neʼe ina fehuʼi mai pe neʼe au nofo ʼifea. Pea ʼi taku foaki age toku tuʼasila, neʼe au iloʼi ai ʼe au nofo ovi pe ki tona famili. Neʼe mole heʼeki au iloʼi ko te ʼu fehuʼi ʼaia ʼe tolu ʼa te kiʼi finemui, ʼe ina fetogi anai toku maʼuli ʼo talu ai.

Mole heʼeki faʼa fualoa ki ai, neʼe haʼu ki toku ʼapi ʼi tana lelue aka pea neʼe ina kamata ia taku ako Tohi-Tapu. Neʼe au fai age te ʼu fehuʼi ʼae neʼe au fai ki te kau takitaki lotu. Kaʼe neʼe kehekehe mo natou koteʼuhi neʼe ina fakaha lelei mai he ʼu tali ʼe tasilo ʼi tana Tohi-Tapu, pea neʼe ko te ʼu tali ʼaia neʼe mole heʼeki au iloʼi ʼi muʼa atu.

Neʼe au fiafia ʼo ʼuhiga mo te ʼu aluʼaga ʼae neʼe au ako mai te Tohi-Tapu. Neʼe malave kia au ia taku lau ia 1 Soane 5:19, ʼae ʼe ui fenei ai: “E malolo te malamanei katoa i te malohi o te kovi.” Neʼe au fiafia ʼi taku iloʼi ʼae ʼe ko Satana ʼe tupu ai te ʼu mamahi ʼae ʼe tou sisio ki ai ʼi ʼotatou tafaʼaki kaʼe ʼe mole ko te ʼAtua, pea ʼe kua vave fakatokatoka anai e Sehova ia te ʼu fihifihia ʼaia. (Apokalipisi 21:3, 4) Neʼe au mahino ai ʼe ʼi ai te ʼuhiga moʼoni ʼo te Tohi-Tapu mo kapau neʼe fakamahino leleiʼi. Logo la neʼe kei taʼu 12 pe ia te Fakamoʼoni ʼa Sehova ʼae neʼe ina fai taku ako, kaʼe neʼe au iloʼi ʼe ko te moʼoni ʼaia tatau aipe pe ko ai ʼae ʼe ina fakaha ia te faʼahi ʼaia.

Kaʼe neʼe au fia iloʼi pe neʼe maʼuliʼi e te kau Fakamoʼoni ia te ʼu faʼahi ʼae neʼe natou fakamafola. Ohage la, neʼe fakaha age e te kiʼi finemui ʼe tonu ki te kau Kilisitiano moʼoni ke natou fakaha ia te ʼu kalitate ʼae ko te kataki pea mo te agalelei. (Kalate 5:22, 23) Neʼe au fia ʼahiʼahiʼi muʼa ia ia pe neʼe ina fakaha te ʼu kalitate ʼaia. ʼI te tahi ʼaho, neʼe au fakatuʼutuʼu ke au haʼu tauhala ki te fai ʼo taku ako. Neʼe au feʼekeʼaki fenei: ‘ʼE fakatalitali mai anai koa? Pea kapau koia, ʼe ita anai koa ʼi taku tauhala age?’ ʼI taku tau atu ki toku ʼapi, neʼe au sio neʼe fakatalitali ʼi toku muʼa ʼapi. Neʼe lele mai ki taku motoka pea mo ui fenei: “Neʼe meʼa pe ke au alu ki toku ʼapi pea mo ui age ki taku faʼe ʼe tonu ke ma pauʼi ki te ʼu lopitali pea mo te kau polisi pe neʼe hoko he meʼa kia koe koteʼuhi ʼe mole ʼi ai he temi ʼe ke haʼu tauhala ai ki te fai ʼo tau ako. Neʼe au tuʼania ʼo ʼuhiga mo koe.”

ʼI te tahi ʼaho, neʼe au fai age he fehuʼi kaʼe neʼe au iloʼi ʼe faigataʼa anai ki he tamasiʼi kei taʼu 12 ia tana tali ki ai. Neʼe au fia iloʼi pe ʼe kotea anai tana tali. ʼI taku fai age ia te fehuʼi neʼe ina sioʼi au pea mo ina ui fenei mai: “ ʼE ko he fehuʼi faigataʼa. ʼE au tohi anai te fehuʼi pea ʼe au fehuʼi anai ki ʼaku matuʼā.” Pea neʼe ina fai te faʼahi ʼaia, ʼi tana toe liliu mai ʼo fai taku ako, neʼe ina fakaha mai ia te fehuʼi ʼi Te Tule Leʼo ʼae neʼe maʼu ai te tali ki taku fehuʼi. Neʼe ko te faʼahi ʼaia ʼae neʼe tupu ai taku fia faipalalau mo te kau Fakamoʼoni koteʼuhi neʼe maʼu ʼi ʼanatou nusipepa he ʼu tali ʼe fakatafito ki te Tohi-Tapu pea neʼe tali ai ki ʼaku fehuʼi fuli. Neʼe hoko atu pe taku ako mo te finemui ʼaia, pea hili ki ai te taʼu katoa neʼe au papitema ʼo au liliu ai ko te Fakamoʼoni ʼa Sehova. *

ʼI temi leva ʼae kua au maʼu ai te ʼu tali ki ʼaku fehuʼi, neʼe au fia vaevae mo te hahaʼi fuli. (Mateo 12:35) ʼI te kamata, neʼe fakafeagai toku famili ki te ʼu aluʼaga foʼou ʼae neʼe au tui ki ai. Kaʼe ʼaki te alu ʼo te temi, neʼe fetogi leva tanatou aga. ʼI muʼa ʼo te mate ʼo taku faʼe, neʼe ina kamata ako ia te Tohi-Tapu. Logo la neʼe mole maʼuli fualoa ke papitema kaʼe neʼe au tui papau neʼe kua ina fakatotonu ke tauhi kia Sehova.

ʼI te taʼu 1978, neʼe au ʼohoana mo te Fakamoʼoni neʼe higoa ko Elias Kazan. Pea ʼi te taʼu 1981, neʼe fakaafe maua ke ma kau ki te famili ʼo te Petele ʼi Amelika. * Kaʼe hili pe ki ai taʼu ʼe fa mo tama gaue ʼi te Petele, neʼe mate ia Elias. Logo la neʼe ko au ko he fafine vitua, kaʼe neʼe au nofo pe ʼi te Petele ʼo hoko atu ia taku gaue ʼae neʼe tokoni mai ke au tokaga ʼateaina pe ki ai pea neʼe au maʼu ai he fakalotofimalie.

ʼI te taʼu 2006, neʼe au ʼohoana mo Richard Eldred ʼae neʼe kau ki te famili ʼo te Petele. Neʼe ma fiafia ʼi te hoko atu ia te pilivilesio ʼae ke ma gaue ʼi te Petele. ʼI taku iloʼi te moʼoni ʼo ʼuhiga mo te ʼAtua, neʼe au logoʼi moʼoni neʼe mole au maʼu pe te ʼu tali ki te fehuʼi ʼae neʼe au kumi kaʼe kua au toe maʼu he fakatuʼutuʼu moʼoni ʼi toku maʼuli pea neʼe kamata ia te faʼahi ʼaia ʼaki pe te ʼu fehuʼi ʼe tolu ʼae neʼe fai e te finemui.