ʼE faigaʼi e he ʼu kaumeʼa lelei ke nā felogoʼi tuʼumaʼu ʼi te telefoni, peʼe ʼi te Neti, peʼe nā fefaitohiʼaki. Koia ʼe maʼua ke tou felogoʼi tuʼumaʼu mo te ʼAtua mo kapau ʼe tou loto ke tou nonofo ovi kia te ia. ʼO feafeaʼi?

ʼE feala ke tou felogoʼi mo te ʼAtua ʼi te faikole. Kaʼe, ʼe mole tonu ke tou faikole ki te ʼAtua ohage pe ko hatatou faipalalau mo he tahi. ʼE tonu ke mahino kia tatou ka tou faikole ki te ʼAtua ʼe tou palalau ki totatou Tupuʼaga, ia te Maʼoluga ʼAupito ʼo te ʼatulaulau. ʼE tou faikole ʼaki he fakaʼapaʼapa lahi. Ke tali ʼatatou faikole e te ʼAtua, ʼe tonu ke tou mulimuli ki te ʼu faʼahi ʼae ʼe ina kole mai. Tou vakaʼi ia faʼahi ʼe tolu.

ʼUluaki, ʼe tonu ke tou faikole ʼateaina pe kia Sehova ʼAtua, kaʼe mole kia Sesu, peʼe ki he sagato, peʼe ki he fakatata. (Ekesote 20:4, 5) ʼE ui fenei ʼi te Tohi-Tapu: “Kae koutou fakaha ki te Atua te u mea ae e aoga kia koutou aki ni kole, mo ni kolekole, pea mo ni fakafetai.” (Filipe 4:6) Lua, ʼe tonu ke tou momoli ʼatatou faikole ʼi te huafa ʼo te ʼAlo ʼo te ʼAtua, ia Sesu Kilisito. Neʼe fakamahino fenei e Sesu totonu: “E mole he tahi e hau ki te Tamai kae ia au pe.” (Soane 14:6) Tolu, ʼe tonu ke alu tahi ʼatatou kole pea mo te finegalo ʼo te ʼAtua. ʼE ui fenei ʼi te Tohi-Tapu: “Kapau e tou kole he mea o mulimuli ki tona finegalo, e fakalogo mai ia kia tatou.” *—1 Soane 5:14.

ʼE moʼoni, ʼe mole tonu pe ke palalau he tokotahi ke felogoʼi lelei ai he ʼu kaumeʼa. Ohage pe ko he ʼu kaumeʼa ʼe nā fiafia ʼi te faipalalau, ʼe tonu ke tou tuku ia Sehova ke palalau mai kia tatou pea mo tou fakalogo ki ai. ʼE kotou iloʼi pe ʼe palalau feafeaʼi mai ia te ʼAtua?

Ia ʼaho nei, ʼe palalau mai ia Sehova ʼaki ia tana Folafola, te Tohi-Tapu. (2 Timoteo 3:16, 17) He koʼe ʼe tou ui ia te faʼahi ʼaia? Tou toʼo ia he faʼifaʼitaki: Ohage la, ʼe kotou maʼu he tohi neʼe momoli atu ʼe hokotou kaumeʼa. Hili takotou lau ia te tohi ʼaia, neʼe hage pe neʼe palalau atu tokotou kaumeʼa logo la neʼe mole nofo mo koutou. Koia neʼe nā felogoʼi, he neʼe mole palalau age kaʼe neʼe faitohi age. ʼO toe feia pe, ʼaki tatatou lau ia te Tohi-Tapu ʼe tou tuku ia Sehova ke palalau mai kia tatou. Neʼe ui fenei e Gina, ʼae neʼe tou palalau ki ai ʼi te ʼuluaki alatike: “Kapau ʼe au loto ke au liliu ko he kaumeʼa ʼo te ʼAtua, ʼe tonu ke au lau ia tana ‘tohi’ ʼae neʼe ina fai mai, ia te Tohi-Tapu.” ʼE ina toe ui fenei: “ ʼAki taku lau ia te Tohi-Tapu ʼi te ʼaho fuli, ʼe au fakaovi ai ki te ʼAtua.” ʼE kotou tuku koa ia Sehova ke palalau atu, ʼaki takotou lau ia te Tohi-Tapu ʼi te ʼaho fuli? Kapau ʼe kotou fai ia te faʼahi ʼaia, ʼe kotou logoʼi ai takotou nonofo ovi ʼae ki te ʼAtua.