Kotou Fakalogo Ki Te ʼAtua Pea Mo Kotou Maʼu Te ʼu Lelei ʼo ʼAna Fakapapau

“Nee mole feala [ki te ʼAtua] ke fakamooni ia i he tahi ae e lahi age ia ia, koia nee fakamooni leva [ʼaki] ia ia totonu.”—HEP. 6:13.

ʼE KOTOU TALI FEAFEAʼI ANAI:

He koʼē ʼe feala ke tou tui papau ʼe hoko moʼoni anai te fakatuʼutuʼu ʼa te ʼAtua?

Koteā ia te fakapapau ʼaē neʼe fai e te ʼAtua ʼi te hili ʼo te agahala ʼa Atama mo Eva?

ʼE tou maʼu feafeaʼi ia te ʼu fua lelei ʼo te fakapapau maʼuhiga ʼaē neʼe fai e te ʼAtua kiā Apalahamo?

1. Koteā ʼaē ʼe kehekehe ai ia te ʼu fakapapau ʼa Sehova pea mo ʼaē ʼa te tagata?

 KO SEHOVA ko te “Atua o te mooni.” (Pes. 31:6) Mai tona ʼaluʼaga ʼaē ʼe agahala te tagata, ʼe mole feala ke tou tuku kātoa ia tatatou falala ki te ʼu meʼa ʼaē ʼe palalau kiai. Kae “e mole feala ke loi . . . te Atua.” (Hep. 6:18; lau ia Numelo 23:19.) ʼE fakahoko tuʼumaʼu e te ʼAtua ia meʼa fuli ʼaē neʼe ina fakapapauʼi ki te tagata. Ohagē lā, neʼe fakatupu e te ʼAtua ia meʼa fuli ʼi te kele lolotoga ʼaho e ono. ʼI te kamataʼaga ʼo te ʼu ʼaho fakatupu takitahi, neʼe ina fakahā ai peʼe koteā ʼaē kā ina fai anai ʼi te ʼaho ʼaia. Pea neʼe ina fakahoko kātoa ia te faʼahi ʼaē neʼe kua fakatuʼutuʼu ke ina fai. ʼI te hili ʼo te ono ʼaho, “nee sio leva te Atua ki te u mea fuli ae nee ina fakatupu, pea koeni nee lelei tukupau te mea aia.”—Sen. 1:6, 7, 30, 31.

2. Koteā te ʼaho mālōlō ʼo te ʼAtua? He koʼē neʼe ina faka makehe ia te ʼaho ʼaia?

² ʼI te hili ʼo te fakahā e Sehova ʼAtua neʼe lelei tana fakatupu, neʼe ina fakahā ia te kamataʼaga ʼo te fitu ʼaho. Ko te ʼaho mālōlō ʼaia ʼo te ʼAtua. ʼE mole ko he ʼaho e hola 24, kae ʼe ko he temi loaloaga ʼe mole fakatupu ai e te ʼAtua ia he meʼa ʼi te kele. (Sen. 2:2) Heʼeki ʼosi ia te ʼaho mālōlō ʼo te ʼAtua. (Hep. 4:9, 10) ʼE mole fakahā mai ʼi te Tohi-Tapu pe neʼe kamata ʼanafea ia te ʼaho ʼaia. Kae ʼe tou ʼiloʼi, neʼe kamata ʼi te hili pē ʼo te fakatupu ʼo Eva, ia te ʼohoana ʼo Atama, kua hili kiai taʼu e 6 000. Kua vave kamata ia te ʼafio ʼa Kilisito lolotoga taʼu e afe, pea lolotoga te temi ʼaia, ʼe fakahoko anai e te ʼAtua ia tana fakatuʼutuʼu ki te kele. ʼE loto e te ʼAtua ke liliu ia te kele ko he palatiso ke māʼuʼuli ai te hahaʼi haohaoa ʼo heʼegata. (Sen. 1:27, 28; Apk. 20:6) ʼE mahino ia ʼe feala ke kotou maʼu he kā haʼu fiafia. “Nee tapuaki leva te Atua ki te fitu aho, pea nee ina [faka makehe] leva te aho aia.” ʼAki tana fakapapau ʼaia, neʼe fakahā lelei ai e te ʼAtua ʼe hoko moʼoni anai tana fakatuʼutuʼu ʼi muʼa pē ʼo te fakaʼosi ʼo tona ʼaho mālōlō.—Sen. 2:3.

3. (1) Koteā ʼaē neʼe hoko ʼi te temi ʼaē neʼe kamata ai te ʼaho mālōlō ʼo te ʼAtua? (2) Neʼe fakamahino feafeaʼi e Sehova ia tana faʼahiga fakatokatoka ia te fihifihia ʼaia?

 ³ ʼI te hili ʼo te kamata ʼo te ʼaho mālōlō ʼo te ʼAtua, neʼe talagataʼa ʼihi kiā te ia. Ko Satana, ʼaē neʼe ko he ʼāselo ʼi te lagi, neʼe ina faigaʼi ke fai age he ʼatolasio kiā te ia kae tuku te ʼAtua ia. Ko Satana ʼaē neʼe ʼuluaki loi, he neʼe ina kākāʼi ia Eva ke talagataʼa kiā Sehova. (1 Tim. 2:14) Hili te faʼahi ʼaia, neʼe uga e Eva ia tona ʼohoana ke talagataʼa kiā Sehova. (Sen. 3:1-6) Ko te agatuʼu ʼaia neʼe ko he ʼaluʼaga neʼe kovi ʼaupitō ʼe mole hona fakatatau. Tatau aipē pe neʼe tukugākoviʼi e Satana ia Sehova ʼo ina ʼui ʼe gutuloi, neʼe mole ʼaoga ki te ʼAtua ke ina fai he fakamoʼoni ʼe hoko moʼoni anai tana fakatuʼutuʼu ʼo ʼuhiga mo te kele. Kae, neʼe ina fai ia te fakapapau neʼe hoki feala ke mahino kiai te hahaʼi ki muli age. Neʼe ina fakahā pē ia peʼe feafeaʼi anai tana fakatokatoka ia te fihifihia ʼaia. ʼE ina tuku anai he “fehia” iā Satana pea mo te fafine, pea ʼi te hākoga ʼo Satana pea mo ʼaē ʼo te fafine. ʼE malaki anai e te Hako ʼaē neʼe fakapapauʼi, ia te “ulu” ʼo Satana pea ʼe “uusi anai tona mulivae” e Satana.—Sen. 3:15; Apk. 12:9.

KO TE FAKAMOʼONI ʼE FAKAHĀ AI ʼE MOʼONI HE ʼALUʼAGA

4, 5. Koteā ʼaē neʼe fai e Apalahamo moʼo fakahā ʼe ina fakahoko moʼoni anai tana fakapapau?

⁴ ʼI muʼa ʼo te agahala, neʼe mole ʼaoga ki he tahi ke ina fai he fakamoʼoni ʼo ʼuhiga mo he ʼaluʼaga. ʼE mole ʼaoga ki te ʼu fakatupu haohaoa ʼaē ʼe ʼoʼofa ki te ʼAtua pea mo natou faʼifaʼitakiʼi ia ia ke natou fai he fakamoʼoni. ʼE natou palalau tuʼumaʼu ʼi te moʼoni, pea ʼe natou fefalalaʼaki. Kae talu mai te agahala ʼo te ʼuluaki taumātuʼa pea mo tanā heʼe haohaoa, kua liliu ko he agamāhani ki te hahaʼi hanatou loi. Koia ki muli age, neʼe ʼaoga ai ki te hahaʼi ke natou fai he ʼu fakamoʼoni moʼo fakahā ʼaki ai ʼe moʼoni he ʼaluʼaga.

⁵ Neʼe fakamoʼoni tuʼa tolu ia Apalahamo. (Sen. 21:22-24; 24:2-4, 9) Ohagē lā, neʼe ina fai he fakamoʼoni ʼi tana liliu mālo mai te hau ʼo Elame pea mo te ʼu hau fuli neʼe natou tau ʼo fakafeagai kiā te ia. Neʼe felāveʼi ia Apalahamo mo te ʼu hau ʼo Salemi pea mo Sotoma. Ko Melekiseteke, te hau ʼo Salemi, pea mo “pelepitelo” ʼo te ʼAtua Māʼoluga, neʼe ina tapuakiʼi ia Apalahamo pea mo fakavikiviki ki te ʼAtua ʼi te tokoni age ʼa Apalahamo ke mālo ʼi ʼona fili. (Sen. 14:17-20) Pea ʼi te loto ʼaē e te hau ʼo Sotoma ke ina fakapale ia Apalahamo ʼi tana haofaki tana hahaʼi, neʼe fakamoʼoni fēnei e Apalahamo: “E au hiki toku nima [kiā Sehova], ko te Atua Maoluga, ko te pule o te lagi mo te kele: e mole anai au too he mea i au mea fuli, tatau aipe pe ko he filo e tahi, pe ko he kaui uka hai sulie e tahi, o tupu ke aua naa ke ui: Kua au fakakoloa ia Apalamo.”—Sen. 14:21-23.

NEʼE FAI E SEHOVA HE FAKAPAPAU KIĀ APALAHAMO ʼAKI HE FAKAMOʼONI

6. (1) Koteā te faʼifaʼitaki ʼe tuku mai e Apalahamo? (2) ʼE tou lava maʼu feafeaʼi anai ia he ʼu fua lelei ʼo te ʼaluʼaga ʼaē neʼe fakahoko e Apalahamo?

⁶ Neʼe toe fakaʼaogaʼi e Sehova he ʼu fakamoʼoni ke falala ai te hahaʼi heʼe haohaoa ki ʼana fakapapau. Neʼe fai e Sehova he ʼu fakamoʼoni ʼaki tana fakaʼaogaʼi te ʼu kupu ʼaenī: “E ui e te Aliki, [e Sehova]: E au mauli!” (Esk. 17:16) ʼE fakahā mai ʼi te Tohi-Tapu neʼe fai e Sehova he ʼu fakamoʼoni e tuʼa 40 tupu. Ko te ʼaluʼaga ʼe tou ʼiloʼi lelei, ʼe ko te fakamoʼoni ʼaē neʼe fai e Sehova kiā Apalahamo. Neʼe fai e Sehova ia te ʼu fuakava peʼe ko he ʼu fakapapau ʼi te temi maʼuli ʼo Apalahamo. ʼAki te ʼu fuakava ʼaia, neʼe mahino ai kiā Apalahamo ko te Hako ʼaē neʼe fakapapauʼi ʼe haʼu anai mai tona fāmili, ʼaki tona foha ko Isaake. (Sen. 12:1-3, 7; 13:14-17; 15:5, 18; 21:12) Neʼe fai e Sehova ia he ʼahiʼahi ʼe faigataʼa kiā Apalahamo. Neʼe ina fakatotonu ki ai ke ina sākilifisioʼi tona foha ʼofaina. Neʼe mulimuli atu aipē ia Apalahamo ki te fakatotonu ʼaia. Kae ʼi te temi pē ʼaē neʼe ina ʼamanaki sākilifisioʼi ai ia Isaake, neʼe tāʼofi ia ia e te ʼāselo. Koia neʼe fai ai e te ʼAtua ia he fakamoʼoni, ʼo ina ʼui fēnei: “E au  fakapapau ia au totonu, folafola a [Sehova]! Koteuhi nee ke fai te mea aia, pea nee mole ke fakafisi mai kia au tou foha, tau ulutokotahi. E au tapuaki anai kia koe, pea e au liuliuga anai tou hakoga o hage ko te u fetuu o te lagi, mo te one o te matatai; pea e mau anai e tou hakoga te matapa o ona fili. E tapuakina anai te u puleaga fuli o te kele i tou hakoga, koteuhi nee ke fakalogo ki toku leo.”—Sen. 22:1-3, 9-12, 15-18.

7, 8. (1) He koʼē neʼe fai e Sehova ia he fakamoʼoni kiā Apalahamo? (2) ʼE lava maʼu feafeaʼi anai e te tahi ʼu ovi ʼa Kilisito ia te ʼu fua lelei ʼo te fakapapau pea mo te fakamoʼoni ʼaē neʼe fai e te ʼAtua kiā Apalahamo?

⁷ He koʼē neʼe fakamoʼoni e te ʼAtua kiā Apalahamo ʼe hoko moʼoni anai ʼAna fakapapau? Neʼe ina fai he fakamoʼoni moʼo fakalotomālohiʼi pea mo fakamālohiʼi te tui ʼo nātou ʼaē kā liliu anai ko te lua koga ʼo te “hakoga” ʼaē neʼe fakapapauʼi pea mo natou kaugā hau mo Kilisito. (Lau ia Hepeleo 6:13-18; Kal. 3:29) Ohagē ko tona fakamahino e te ʼapositolo ko Paulo, neʼe fai e Sehova he “fakamooni leva ia aki he hai.” Ko faʼahi e lua ʼe mole feala ke fetogi kae ʼe ina foaki he fakalotomālohi ki te kau Kilisitiano fakanofo ke natou taupau maʼu ia te ʼamanaki ʼaē neʼe foaki age. Ko te ʼu meʼa ʼaia ʼe ko te fakapapau ʼa te ʼAtua pea mo tana fakamoʼoni, ko te ʼu ʼaluʼaga ʼaia e lua “e mole feala ke loi ai te Atua.”

⁸ ʼE mole gata pē ki te kau Kilisitiano fakanofo ʼe natou maʼu ia te ʼu fua lelei ʼo te fakamoʼoni ʼaē neʼe fai e te ʼAtua kiā Apalahamo. Kae neʼe fai e Sehova ia te fakamoʼoni ʼaki ia te “hakoga” ʼo Apalahamo, ʼe tapuakina anai “te u puleaga fuli o te kele.” (Sen. 22:18) ʼE kau ki “te u puleaga fuli” ʼaia “ni ihi ovi” peʼe ko te tahi ʼu ovi ʼe fakalogo kiā Kilisito ʼaē ʼe natou maʼu anai ia te ʼamanaki ki te maʼuli heʼegata ʼi te Palatiso ʼi te kele. (Soa. 10:16) Tatau aipē peʼe kotou kau ki te kau Kilisitiano fakanofo peʼe ki te tahi ʼu ovi, kotou taupau maʼu takotou ʼamanaki. Ko tona fakaʼuhiga, kotou gāue kinakina ke kotou maʼu takotou ʼamanaki, ʼo kotou haga fakalogo ki te ʼAtua iā meʼa fuli.—Lau ia Hepeleo 6:11, 12.

KO ʼIHI FAKAMOʼONI NEʼE FAI E TE ʼATUA ʼO ʼUHIGA MO TANA FAKAPAPAU KIĀ APALAHAMO

9. Koteā ʼaē neʼe fakamoʼoni kiai te ʼAtua ʼi te temi ʼaē neʼe maʼuli pōpula ai te kau Iselaele ʼi te fenua ʼo Esipito?

⁹ ʼI te ʼu taʼu e lauʼi teau talu mai te temi ʼo Apalahamo, neʼe toe fai e Sehova ia he fakamoʼoni ʼe ina fakahoko anai ʼana fakapapau ʼaē neʼe ina fai ki ai. Neʼe hoko ia te faʼahi ʼaia ʼi te temi ʼaē neʼe palalau ai ia Moisese ki te hōloga ʼo Apalahamo, ʼaē neʼe maʼuli pōpula ʼi te fenua ʼo Esipito. (Eke. 6:6-8) Neʼe fakamahino ki muli age e te ʼAtua neʼe ina fai te fakamoʼoni ʼi te temi ʼaia. Neʼe ina ʼui fēnei: “Nee au hiki toku nima kia natou, o fakamavae natou i te fenua o Esipito ki he fenua ae nee au kumi kia natou, fenua e tafe ai te hua [pipi] mo te meli.”—Esk. 20:5, 6.

10. Koteā ia te fakapapau ʼaē neʼe fai e te ʼAtua ki te kau Iselaele ʼi te hili ʼo tanatou mavae mai Esipito?

 ¹⁰ ʼI te hili ʼo te fakaʼāteaina e Sehova ia te puleʼaga ʼo Iselaele mai Esipito, neʼe ina fai ia te tahi age fakapapau kiā nātou: “Kapau e kotou fakalogo mai ki toku leo, pea kapau e kotou tauhi taku fakapapau, e kotou liliu anai kia au ko he hahai mauhiga kehe age i te hahai fuli, koteuhi ko te kele katoa a aku; e kotou liliu anai kia au ko he puleaga o te u [pelepitelō], ko he puleaga maonioni ke tauhi mai kia au.” (Eke. 19:5, 6) Neʼe ko he fakapapau maʼuhiga ki te puleʼaga ʼo Iselaele! Ko tona fakaʼuhiga, kapau ʼe natou fakalogo kiā Sehova, ʼe ina fakaliliu anai nātou ko he puleʼaga fakapelepitelō kā ina foaki anai he ʼu tapuakina ki te mālamanei. Ki muli age, ʼe fakamahino anai e Sehova ʼi te temi ʼaē neʼe ina fai ia te fakapapau ʼaia, neʼe ina fai ai he fakamoʼoni.—Esk. 16:8.

11. Koteā ʼaē neʼe fai e te kau Iselaele ʼi te temi ʼaē neʼe fai age e te ʼAtua ia te fakapapau maʼuhiga?

¹¹ Neʼe mole fakamālohiʼi e Sehova ia te kau Iselaele ke natou fai he fakamoʼoni ʼe natou fakalogo anai kiā te ia. Neʼe mole ina toe fakakinauʼi nātou ke natou tali ia te fakapapau maʼuhiga ʼaia. Kae neʼe natou fia fai ʼe nātou totonu he fakamoʼoni ʼe natou fakalogo anai. Neʼe natou ʼui fēnei: “E matou fai ki te u mea fuli ae kua fakatotonu e [Sehova].” (Eke. 19:8) Hili kiai ʼaho e tolu, neʼe fakahā e Sehova ʼAtua ki te kau Iselaele, ia te puleʼaga ʼaē neʼe ina filifili, ia te meʼa ʼaē neʼe ina loto ke natou fai. ʼUluaki, neʼe ina foaki age kiā nātou te ʼu Lao e Hogofulu, pea mo ina ʼui age kiā Moisese ke ina fakahā kiā nātou ia te tahi ʼu lao ʼaē ʼe tuʼu iā Ekesote 20:22 ʼo kaku kiā Ekesote 23:33. Koteā ʼaē neʼe ʼui e te kau Iselaele ʼi te hili ʼo tanatou fakalogo ki te ʼu lao ʼaia? “Nee tali fakatahi leva e te hahai katoa: E matou fai anai te u mea fuli ae kua lea ki ai [ia Sehova].” (Eke. 24:3) Pea neʼe tohi e Moisese ia te ʼu lao ʼaia ki “te tohi o te hai” peʼe ko te fuakava pea neʼe lau leʼo lahi ke logoʼi e te kau Iselaele. Hili kiai, neʼe natou fai he fakapapau, ko tona tuʼa tolu ʼaia: “E matou fai te u mea fuli ae kua lea ki ai [ia Sehova], pea e matou fakalogo anai ki ana folafola.”—Eke. 24:4, 7, 8.

12. Koteā ʼaē neʼe fai e Sehova ʼi te hili ʼo tana fai ia tana fakapapau ke ina fakaliliu ia Iselaele ko tana hahaʼi? Koteā ʼaē neʼe fai e te hahaʼi ʼi te hili ʼo tanatou fai ia tanatou fakapapau ki te ʼAtua?

¹² Neʼe kamata fakahoko atu aipē e Sehova ia te meʼa ʼaē neʼe ina fakapapauʼi ʼi tana fuakava mo Iselaele. Neʼe ina filifili ia he kau pelepitelō ke natou gāue ʼi tona tapenakulo. ʼE tokoni anai ia te gāue fakapelepitelō ki te hahaʼi heʼe haohaoa ke natou maʼu he ʼu felōgoi lelei mo te ʼAtua. Tatau aipē pe neʼe kua foaki e te kau Iselaele ia tonatou maʼuli ki te ʼAtua, kae neʼe natou talagataʼa atu aipē kiā te ia. Neʼe mole natou fakahoko ia te meʼa ʼaē neʼe natou fakapapau kiai pea mo natou “fakatupu te hauhau o te Sagato o Iselaele.” (Pes. 78:41) Ohagē lā, ʼi te temi ʼaē neʼe tuʼu ai ia Moisese ʼi te Moʼuga ʼo Sinai pea neʼe foaki age ai e Sehova ʼAtua ia te tahi ʼu fakatotonu, neʼe natou pipiko ʼi te fakaʼatalitali pea neʼe mole kei natou tui ki te ʼAtua. Neʼe natou manatu neʼe liʼaki nātou e Moisese. Koia, neʼe natou fai ai ia te fakatātā ʼo te pipi ʼaulo pea mo natou ʼui ki te hahaʼi: “Iselaele! Koeni tou atua, ae nee ina fakamavae koe mai te fenua o Esipito.” (Eke. 32:1, 4) Pea neʼe natou kamata tulolo pea mo natou fai sākilifisio ki te fakatātā ʼaē neʼe natou faʼu ʼo natou ʼui ʼe natou ʼatolasio kiā Sehova. ʼI te sio ʼaē ʼa Sehova neʼe natou tauhi ki te fakatātā, neʼe ina ʼui fēnei age kiā Moisese: “Kua natou maliu fakavilivili mai te ala ae nee au fakaha kia natou.” (Eke. 32:5, 6, 8) ʼI te ʼu taʼu ʼaē neʼe hoa mai kiai, neʼe fai e Iselaele ia te tahi ʼu fakapapau, kae neʼe mole natou fakahoko tuʼumaʼu.—Num. 30:2.

TE TAHI AGE ʼU FAKAMOʼONI E LUA

13. Koteā ia te fakamoʼoni ʼaē neʼe fai e Sehova kiā Tavite? Pea ʼe tou ʼiloʼi feafeaʼi neʼe talanoa ia te fakamoʼoni ʼaia ʼo ʼuhiga mo te Hako ʼaē neʼe fakapapauʼi?

¹³ ʼI te temi ʼaē neʼe nofo hau ai ia Tavite ʼi Iselaele, neʼe fai e Sehova ia te tahi age ʼu fakamoʼoni  e lua ʼe fua lelei anai kiā nātou ʼaē kā fakalogo age. ʼUluaki, neʼe ina fai he fakamoʼoni kiā Tavite ʼe fakahoahoa anai ia tona hōloga ʼi tona hekaʼaga fakahau ʼo talu ai. (Pes. 89:36, 37; 132:11, 12) Ko te Hako ʼaē neʼe fakapapauʼi, ia Kilisito, ʼe tonu anai ke haʼu mai te hōloga ʼo Tavite pea ʼe fakahigoaʼi anai ko “te Foha o Tavite.” (Mat. 1:1; 21:9) ʼAki he agavaivai, neʼe fakahigoaʼi e Tavite ia te Hako ʼaia ko tona “Aliki” koteʼuhi neʼe māʼoluga age iā te ia.—Mat. 22:42-44.

14. Koteā ia te fakamoʼoni neʼe fai e Sehova ʼo ʼuhiga mo te Hako ʼaē neʼe fakapapauʼi? ʼE tou lava maʼu feafeaʼi ia te ʼu fua lelei ʼo te fakamoʼoni ʼaia neʼe fai e te ʼAtua?

¹⁴ Lua, neʼe fakahā e Sehova kiā Tavite ko te Hako ʼaē neʼe fakapapauʼi, ʼe mole ko he Hau pē, kae ʼe toe Pelepitelō Lahi anai maʼa te mālamanei. Neʼe ko he ʼaluʼaga makehe. ʼO fakaʼalutahi mo te Lao ʼaē neʼe foaki e te ʼAtua ki te kau Iselaele, neʼe tonu ke filifili ia te kau pelepitelō mai te telepī ʼo Levi, pea ko te ʼu hau mai te telepī ʼo Suta. Koia ʼi te temi ʼaia, neʼe mole feala ki he tahi ke hau pea mo pelepitelō. Kae neʼe ʼui fēnei e Tavite ʼo ʼuhiga mo te Hau ʼi te kā haʼu: “Folafola a [Sehova] ki toku Aliki: Nofo ia koe i toku fahai matau, o kaku ki taku fai ki ou fili tou hiliaga vae. Nee fakapapau te mea aena e [Sehova], pea e mole toe fakahemala ia ia ki ai: Ko te [pelepitelō] koe o heegata, i te faahiga o Melekiseteke.” (Pes. 110:1, 4) Ohagē ko tona ʼui e Tavite, ʼe ko Sesu Kilisito ia te Hako ʼaē neʼe fakapapauʼi, pea kua ʼafio Hau nei ʼi te lagi. Pea ʼe ko ia te Pelepitelō Lahi maʼa te mālamanei pea ʼe tokoni ki te hahaʼi ʼaē ʼe fakahemala ke natou maʼu he ʼu felōgoi lelei mo te ʼAtua.—Lau ia Hepeleo 7:21, 25, 26.

TE ISELAELE FOʼOU ʼA TE ʼATUA

15, 16. (1) Koteā ia te ʼu Iselaele e lua ʼaē ʼe talanoa kiai te Tohi-Tapu? Ko te Iselaele fea ʼaē ʼe tali e te ʼAtua iā ʼaho nei? (2) Koteā ia te fakatotonu ʼaē neʼe foaki e Sesu ki tana kau tisipulo ʼo ʼuhiga mo te fai ʼo he ʼu fakamoʼoni?

¹⁵ Koteʼuhi ʼaē neʼe lītuʼa ia te puleʼaga ʼo Iselaele kiā Sesu Kilisito, neʼe toe lītuʼa ia Sehova kiā nātou ʼo mole kei feala ai ke natou liliu ko “he puleaga o te u [pelepitelō].” Neʼe ʼui fēnei e Sesu ki te kau takitaki lotu Sutea: “E too anai te puleaga o te Atua maia koutou, o tuku ki he puleaga ae e ina fakatupu anai ni fua.” (Mat. 21:43) Neʼe fakatuʼu ia te puleʼaga foʼou ʼaia ʼi te Penikositē ʼo te taʼu 33. ʼI te lakaga ʼaia, neʼe foaki ai e te ʼAtua ia tona laumālie ki te toko 120 ʼo te kau tisipulo ʼa Sesu neʼe fakatahitahi ʼi Selusalemi. Neʼe fakahigoaʼi ia te “puleaga” foʼou ʼaia ko “te Iselaele a te Atua.” Ki muli age pē, neʼe kau ia te toko lauʼi afe hahaʼi mai te tahi ʼu fenua ki te Iselaele ʼa te ʼAtua.—Kal. 6:16.

¹⁶ ʼO kehekehe ia mo te puleʼaga ʼo Iselaele ʼo te temi muʼa, ʼaē neʼe talagataʼa, ʼe haga fakalogo ia te Iselaele foʼou ʼa te ʼAtua kiā te ia. Neʼe foaki ia he fakatotonu ki te Iselaele ʼa te ʼAtua ʼo ʼuhiga mo te fai ʼo he ʼu fakamoʼoni. ʼI te temi ʼaē neʼe maʼuli ai Sesu ʼi te kele, neʼe fakamoʼoni ia te hahaʼi ʼo ʼuhiga mo te ʼu loi peʼe ki te ʼu meʼa ʼe mole hona ʼaoga. (Mat. 23:16-22) Neʼe akoʼi e Sesu ki tana kau tisipulo ke ʼaua naʼa natou hoko fakamoʼoni ki he meʼa. Neʼe ina ʼui fēnei: “Ko takotou io ke io, pea ko takotou kailoa ke kailoa; ko te mea ae e ina fakalahi ia ia e hau mai te pule kovi.”—Mat. 5:34, 37.

17. Koteā te ʼu fehuʼi ʼaē kā tou tali anai kiai ʼi te ʼalatike ʼaē kā hoa mai?

¹⁷ Ko tona fakaʼuhiga koa ʼe mole lelei hakita fai he fakamoʼoni? Ko te tahi faʼahi ʼe maʼuhiga age, koteā ia te fakaʼuhiga ʼo “takotou io ke io”? ʼE tou maʼu anai tona tali ʼi te ʼalatike ʼaē kā hoa mai. Koteʼuhi ʼaē ʼe tou haga metitāsioʼi ia te Folafola ʼa te ʼAtua, ʼe tou lotomālohi ke tou fakalogo kiā Sehova ʼo talu ai. Pea ʼe ina tapuakinaʼi anai tātou ʼo talu ai, koteʼuhi neʼe ina fakapapauʼi pea mo fakamoʼoni mai kiā tātou.

[ʼU fehuʼi ʼo te ako]

[Fakamatala ʼo te pāsina 27]

ʼE hoko tuʼumaʼu ia te ʼu fakapapau ʼa Sehova

[Paki ʼo te pāsina 25]

Kua vave sio pē ia Apalahamo ki te hoko moʼoni ʼo te ʼu fakapapau ʼa Sehova