Ko Te Lavakiʼi ʼo He Tahi ʼe Ko He Fakaʼiloga ʼo Te ʼu Temi Fakaʼosi!

“Ke aua naa mavae ia koe te agalelei mo te agatonu.”—TAAG. 3:3.

KOTOU FAKAKAUKAUʼI TE ʼU MANATU TĀFITO ʼAENĪ:

․․․․․

Koteā te ʼu fakatokaga ʼe feala ke tou ako mai te aga kākā ʼo Talila, mo Apesalone, pea mo Sutasi Isekaliote?

․․․․․

ʼE tou lava faʼifaʼitakiʼi feafeaʼi te nofo agatonu ʼa Sonatane pea mo Petelo?

․․․․․

Koteā ʼaē ʼe feala ke tou fai ke tou nofo agatonu ai ki totatou ʼohoana pea mo Sehova?

1-3. (a) Koteā he fakaʼiloga ʼo te ʼu temi fakaʼosi, pea koteā tona fakaʼuhiga? (b) Koteā te ʼu fehuʼi e tolu ʼe tou tali anai kiai?

 KOTEĀ ʼaē ʼe tatau ai ia Talila, mo Apesalone, pea mo Sutasi Isekaliote? Neʼe natou heʼe agatonu fuli. Ko Talila neʼe heʼe agatonu ki te Tuʼi Fakamāu ko Samisoni, te tagata ʼaē neʼe ʼofa kiā ia; ko Apesalone neʼe heʼe agatonu ki tana Tamai, ia te Hau ko Tavite; pea ko Sutasi neʼe heʼe agatonu ki tona Pule, ia Sesu Kilisito. Ko tanatou aga ʼaia neʼe fua kovi ki ʼihi atu. He koʼē ʼe lelei ke tou vakaʼi te ʼu faʼahi ʼaia?

² Ko te aga ʼaē ko te lavakiʼi ʼo he tahi kua lahi tona fai iā ʼaho nei. ʼE ko he faʼahi ia ʼe tonu ke hoko, he neʼe ʼui fēnei e Sesu ʼo ʼuhiga mo te fakaʼiloga ʼo “te fakaosi o te malamanei”: “Toko lahi . . . e natou fekakaaki anai ia natou.” (Mat. 24:3, 10) ʼE fakaʼuhiga te kupu lavakiʼi ki te tuku ʼo he tahi ki ʼona fili ʼaki he aga kākā pe heʼe agatonu. Ko te heʼe agatonu ʼaia ʼe ina fakamoʼoni ʼe tou māʼuʼuli ʼi “te u aho fakamuli” pea neʼe fakakikite e Paulo ko te hahaʼi ʼe natou “kaka” anai. (2 Tim. 3:1, 4) Ko te hahaʼi faitohi pea mo te hahaʼi ʼaē ʼe natou tohi te ʼu hisitolia ʼo te ʼu ʼata, ʼe natou fakalotomālohiʼi te aga ʼaia, ohagē ko he aga ʼe lelei tona fai. Kae ʼi tona fakahagatonu, ko te heʼe agatonu pea mo te lavakiʼi ʼo he tahi ʼe fakatupu lotomamahi. ʼE ko he fakaʼiloga ʼaia ʼo te ʼu temi fakaʼosi!

³ Koteā te ʼu ako ʼe tou lava tāʼofi mai te Tohi-Tapu ʼo ʼuhiga mo nātou ʼaē neʼe heʼe agatonu ʼi te temi muʼa? Ko ai nātou ʼaē ʼe feala ke tou faʼifaʼitakiʼi tanatou nonofo agatonu? Pea ʼe tonu ke tou nonofo agatonu kiā ai? Tou vakaʼi te ʼu faʼahi ʼaia.

KO TE ʼU FAKATOKAGA ʼO TE TEMI MUʼA

4. Neʼe lavakiʼi feafeaʼi e Talila ia Samisoni, pea he koʼē neʼe ko he toe aga fakalialia?

⁴ Tou vakaʼi age muʼa ia te fafine aga kākā ko Talila, ʼaē  neʼe manako ki ai te Tuʼi Fakamāu ko Samisoni. Neʼe fakatotonu e Samisoni ke ina tauʼi te kau Filisitini moʼo haofaki te hahaʼi ʼa te ʼAtua. Neʼe lagi ʼiloʼi e te kau ʼaliki Filisitini e toko nima te mole ʼofa moʼoni ʼa Talila kiā Samisoni. Koia neʼe natou foaki kiā ia he toe totogi lahi ke ina kumi peʼe haʼu mai fea te toe mālohi ʼa Samisoni, ke feala ai hanatou matehi ia ia. Ko Talila, ʼaē neʼe mānumānu, neʼe ina tali te totogi ʼaia kae neʼe mole he fua ʼo tana faiga tuʼa tolu ʼaē ke ina ʼiloʼi peʼe haʼu mai fea te mālohi ʼa Samisoni. “Nee fakamamahii [ai] e Talila te loto o Samisoni i te aho fuli aki ana palalau.” Ki muli age “nee fiu leva tona laumalie [ia Samisoni] o kaku ki te mate.” Koia neʼe fakahā age leva e Samisoni neʼe mole heʼeki kosi tona lauʼulu, pea kapau ʼe kosi, pea ʼe mavae anai iā ia tona mālohi. * ʼI te kua ʼiloʼi e Talila te faʼahi ʼaia, neʼe ina fakatotonu ke kosi te lauʼulu ʼo Samisoni ʼaē neʼe moe ʼi ʼona kauaga, pea neʼe ina tuku leva ia ia ki ʼona fili ke natou faʼitaliha ki ai. (Tfm. 16:4, 5, 15-21) ʼI toe aga fakalialia leva neʼe ina fai! Neʼe lavakiʼi e Talila te tagata ʼaē neʼe ʼofa kiā ia, ʼuhi pē ko tana mānumānu.

5. (a) Neʼe heʼe agatonu feafeaʼi ia Apesalone kiā Tavite, pea koteā ʼaē neʼe hā ai ʼo ʼuhiga mo ia? (b) Neʼe feafeaʼi ia Tavite ʼo ʼuhiga mo te aga kākā ʼaē ʼa Asitofele?

⁵ Tou vakaʼi leva ia te tagata kākā ko Apesalone. ʼI te lahi ʼo tana fia maʼu tuʼulaga, neʼe faiga ia ke ina faʼao te tuʼulaga ʼo tana tamai, te Hau ko Tavite. Neʼe haga muʼa ia Apesalone ʼo fakamaliu te loto ʼo te hahaʼi ʼo Iselaele ke natou ʼoʼofa iā ia, ʼaki ni fakapapau loi pea mo fakahā ʼi tana aga ʼe ʼofa ia nātou. Neʼe fāʼufua ia pea mo ʼuma kiā nātou, ohagē ko hana fia tokaga moʼoni kiā nātou pea mo te ʼu meʼa ʼaē neʼe ʼaoga kiā nātou. (2 Sam. 15:2-6) Neʼe toe maʼu foki e Apesalone te lagolago ʼo Asitofele, te tagata ʼaē neʼe falala ki ai Tavite. Ko he tagata neʼe aga kākā pea neʼe kau kiā Apesalone moʼo faʼao te tuʼulaga hau. (2 Sam. 15:31) Iā Pesalemo 3 pea mo 55, ʼe fakamatala ai e Tavite tona lotomamahi ʼi te aga heʼe agatonu ʼaia. (Pes. 3:1-9 [Pes. 3:1-8, MN]; lau ia Pesalemo 55:13-15 [Pes. 55:12-14, MN].) Neʼe fakahā e Apesalone tana fehiʼa ʼaē ki te pule faʼitaliha ʼa Sehova ʼi tana fakatuʼutuʼu ʼaē ke ina toʼo te tuʼulaga ʼo te hau ʼaē neʼe fakanofo e Sehova. (1 Klk. 28:5) Ko te agatuʼu ʼaia neʼe mole iku ia ki he meʼa pea neʼe toe hoko atu pē te pule ʼa Tavite ʼi tona ʼuhiga fakanofo ʼa Sehova.

6. Neʼe lavakiʼi feafeaʼi e Sutasi ia Sesu, pea kua tou fakaʼaogaʼi feafeaʼi te higoa ʼo Sutasi?

⁶ Tou fakakaukauʼi leva te meʼa ʼaē neʼe fai e te tagata kākā ko Sutasi Isekaliote kiā Kilisito. ʼI te Pāsikate fakamuli ʼaē neʼe fai e Sesu mo tana toko 12 kau ʼapositolo, neʼe ina ʼui fēnei kiā nātou: “E au ui mooni atu kia koutou, ko he tahi o koutou e ina lavakii anai au.” (Mat. 26:21) ʼI te pō ʼaia, ʼi te ʼōloto ʼo Setesemane, neʼe ʼui fēnei e Sesu kiā Petelo, mo Sakopo pea mo Soane: “Koeni, ko ia ae e ina fakatau au e fakaovi mai.” ʼI te temi pē ʼaia, neʼe hā leva Sutasi ʼi te ʼōloto pea mo te hahaʼi ʼaē neʼe felōgoi mo ia, pea “nee fakaovi age leva ia Sutasi kia Sesu, o ui: Malo, Pule! Pea nee uma leva ia kia ia.” (Mat. 26:46-50; Luka 22:47, 52) Ko Sutasi neʼe ina “fakatau te toto maa” pea ina tuku Sesu kiā nātou ʼaē neʼe natou fia matehi ia ia. Koteā te totogi neʼe tali e Sutasi, ia te tagata ʼaē neʼe manako ki te paʼaga, moʼo fai te faʼahi ʼaia? Ko foʼi paʼaga siliva pē e 30! (Mat. 27:3-5) Talu mai ai, kua tou fakaʼaogaʼi te higoa ʼo Sutasi ki he tahi ʼe aga kākā, tāfito lā mokā neʼe ina kākāʼi hona kaumeʼa. *

7. Koteā te ʼu ako ʼe tou tāʼofi mai (a) iā Apesalone mo Sutasi pea mo (b) Talila?

 ⁷ Koteā te ʼu ako ʼe tou tāʼofi mai te ʼu fakatokaga ʼaia? Ko te mate ʼo Apesalone pea mo Sutasi neʼe fakaufiufi he neʼe nā aga kākā ki te ʼu tagata ʼaē neʼe fakanofo e Sehova. (2 Sam. 18:9, 14-17; Gaue 1:18-20) ʼE tou manatuʼi anai ʼo talu ai te higoa ʼo Talila ko he fafine neʼe mole ʼofa moʼoni pea mo kākā. (Pes. 119:158) ʼE maʼuhiga ke tou liʼaki te holi ki te fia maʼu tuʼulaga peʼe ko te mānumānu, heʼe feala ai anai ke mole kei ʼofainaʼi tātou e Sehova. Ko te ʼu ako lelei ʼaenī ʼe tokoni mai ke tou liʼaki te aga ʼaē ko te heʼe agatonu.

TOU FAʼIFAʼITAKIʼI NĀTOU ʼAĒ NEʼE AGATONU

8, 9. (a) He koʼē neʼe fakapapau e Sonatane ʼe nofo agatonu anai kiā Tavite? (b) ʼE tou lava faʼifaʼitakiʼi feafeaʼi ia Sonatane?

⁸ ʼE toe maʼu ʼi te Tohi-Tapu te ʼu fakamatala ʼo te hahaʼi neʼe agatonu. Tou vakaʼi te faʼifaʼitaki ʼo te foʼi toko lua iā nātou ʼaia pea mo te ako ʼe feala ke tou tāʼofi mai ai. Tou kamata mo Sonatane, te ʼuluaki foha ʼo te Hau ko Saulo pea neʼe nofo agatonu kiā Tavite. Neʼe tonu ʼe ko ia ʼaē kā liliu ko te Hau ʼo Iselaele, kae neʼe filifili e Sehova ia Tavite. Neʼe fakaʼapaʼapa Sonatane ki te tonu ʼaē neʼe fai e Sehova. Neʼe mole maheka ia kiā Tavite. Kae “nee pipiki leva te laumalie o Sonatane ki te laumalie o Tavite” pea neʼe ina fakapapau kiā Tavite ʼe nofo agatonu anai kiā ia. Neʼe ina toe tuku age foki kiā Tavite ʼona kofu, mo tana heletā, mo tana nahau pea mo tona kiliʼi pipi, ko tana fakahā ʼaia te fakaʼapaʼapa ki tona ʼuhiga hau. (1 Sam. 18:1-4) Neʼe tokoni Sonatane kiā Tavite, ʼo ina fia foaki tona maʼuli moʼo puipui ʼaki ʼo ia mai te ʼu nima ʼo Saulo. Neʼe agatonu Sonatane kiā Tavite, ʼo ina ʼui fēnei kiā ia: “E ke pule anai ki Iselaele, pea ko au, e au nofo anai i te tuulaga lua i ou tafa.” (1 Sam. 20:30-34; 23:16, 17) Koia, ʼi te mate ʼo Sonatane ʼe mole tou punamaʼuli ai ki te fakahā e Tavite tona lotomamahi pea mo tona ʼofa kiā ia ʼi te hiva mate ʼaē neʼe ina tohi.—2 Sam. 1:17, 26.

⁹ Neʼe ʼiloʼi lelei e Sonatane pe ko ai ʼaē neʼe tonu ke agatonu ki ai. Neʼe fakalogo kātoa ia kiā Sehova te Tuʼi ʼAliki, pea mo lagolago kātoa kiā Tavite, ʼaē neʼe fakanofo e te ʼAtua. ʼO toe fēia iā ʼaho nei, tatau aipē pe neʼe mole tuku mai he pilivilēsio makehe ʼi te kōkelekāsio, kae ʼe tou fia lagolago ki te ʼu tehina ʼaē neʼe hinoʼi ke natou takitaki tātou.—1 Tes. 5:12, 13; Hep. 13:17, 24.

10, 11. (a) He koʼē neʼe lagolago agatonu Petelo kiā Sesu? (b) ʼE tou lava faʼifaʼitakiʼi feafeaʼi ia Petelo?

¹⁰ Ko te tahi faʼifaʼitaki lelei kā tou vakaʼi ʼe ko ʼaē ʼa te ʼapositolo ko Petelo, ʼaē neʼe ina fakahā tana nofo agatonu ʼaē kiā Sesu. Tokolahi ʼi te ʼu tisipulo ʼa Sesu neʼe natou punamaʼuli pea mo natou liʼaki ia ia he neʼe ina fai te lea fakatā moʼo fakahā te maʼuhiga ʼaē ke natou tui ki tona taʼataʼa pea mo tona sino ʼaē  kā ina momoli. (Soa. 6:53-60, 66) Pea neʼe haga Sesu ki tana toko 12 kau ʼapositolo pea ina fehuʼi fēnei: “Pea ko koutou, pe e mole fia olo foki mo kotou?” Neʼe tali fēnei e Petelo: “Aliki, ke motou olo anai kia ai? E ke mau te u folafola o te mauli heegata. Pea nee matou tui, pea nee matou iloi ko te Kilisito ia koe, ko te Maonioni a te Atua.” (Soa. 6:67-69) ʼE hā ai koa neʼe mahino kātoa Petelo ki te ʼu folafola fuli ʼaē neʼe hoki fai age e Sesu ʼo ʼuhiga mo tana momoli anai ia ia totonu ohagē ko he sākilifisio? Neʼe lagi mole mahino kātoa kiai Petelo. Kae neʼe ina fakatotonu ke agatonu kiā Sesu, te ʼAlo ʼaē neʼe fakanofo e te ʼAtua.

¹¹ Neʼe mole manatu Petelo neʼe lagi faihala ia Sesu pea ʼaki te temi, ʼe mahino anai kiai Sesu pea ina toe fetogi anai ʼana folafola. Kae ʼaki he agavaivai, neʼe fakamoʼoni ia Petelo ko Sesu ʼe ina maʼu “te u folafola o te mauli heegata.” ʼE toe fēia iā ʼaho nei, ʼe tou feafeaʼi mo kapau ʼe faigataʼa hatatou mahino ki he faʼahi ʼi ʼatatou tohi mai “te tagata faikoloa agatonu” peʼe mokā ʼe mole ʼalutahi mo tatatou manatu? ʼE lelei ke tou faiga mālohi ke tou mahino ki te faʼahi ʼaia kae ʼe mole tou ʼamanaki ʼe fai pē anai he fetogi kiai ke ʼalutahi mo tatatou manatu.—Lau ia Luka 12:42.

NOFO AGATONU KI TOKOTOU ʼOHOANA

12, 13. (a) He koʼē ʼe heʼe agatonu he tahi ki tona ʼohoana? (b) He koʼē ʼe mole ko he takuʼaki te ʼui ʼaē kua kaku te tagata ki te temi ʼaē kua kātoa ai tona mālohi?

¹² Ko te aga kākā fuapē ʼe ko he aga ia ʼe kovi, pea ʼe mole tonu ke ina pulihi ia te tokalelei pea mo te logotahi ʼo te fāmili pea mo te kōkelekāsio Fakakilisitiano. ʼI tatatou manatuʼi ia te faʼahi ʼaia, tou vakaʼi peʼe feafeaʼi hatatou nonofo agatonu ki totatou ʼohoana pea mo totatou ʼAtua.

¹³ Ko te tono ʼe ko he aga kākā ʼe fakatupu lotomamahi ʼaupitō. Ko he tahi ʼe tono ʼe mole kei nofo agatonu ia ki tona ʼohoana kae kua tokaga ia mo manako ki he tahi age. Pea ko ia ʼaē neʼe kākāʼi ʼe maʼua ke ina fai anai he ʼu fetogi ʼi tona maʼuli heʼe kua maʼuli tokotahi leva. ʼE hoko feafeaʼi te faʼahi ʼaia ki he toko lua neʼe feʼofaʼofani ʼi muʼa atu? ʼI te agamāhani, ʼe hoko te faʼahi ʼaia mokā ʼe mole kei nā fetokagaʼaki. Ko Gabriella Turnaturi, ko te Polofesea ʼe ina ako te maʼuli ʼo te tagata, ʼe ina fakamahino ʼe aga kākā he tahi ʼi te maʼuli fakataumātuʼa mokā ʼe mole kei mālohi ʼanā felōgoi fakataumātuʼa. ʼE feala pē foki ke hoko te faʼahi ʼaia ki he taumātuʼa kua fualoa tanā ʼohoana. Ohagē lā, ko he tagata ʼe taʼu 50 ʼe māvete mo tona ʼohoana ʼaē kua nā ʼohoana talu mai ni taʼu e 25 ke nofo ia mo he tahi age fafine ʼe manako ai. ʼI ʼihi fenua, ʼe ʼui e ʼihi ʼe tonu ia ke hoko heʼe kua kaku ki te taʼu ʼaē kua kātoa ai te mālohi ʼa he tagata. Kae ʼe mole ko he takuʼaki lelei ʼaia. Neʼe aga kākā ia ki tona ʼohoana. *

14. (a) ʼE feafeaʼi ia Sehova ʼo ʼuhiga mo te heʼe agatonu ʼi te maʼuli fakataumātuʼa? (b) Koteā ʼaē neʼe ʼui e Sesu ʼo ʼuhiga mo te nofo agatonu ʼi te maʼuli fakataumātuʼa?

¹⁴ ʼE feafeaʼi ia Sehova ʼo ʼuhiga mo nātou ʼaē ʼe natou liʼaki tonatou ʼohoana kae ʼe mole hona tupuʼaga Fakatohi-tapu? Ko totatou ʼAtua ʼe “fehia ki te kapu o te ohoana” peʼe ko te māvete, koia lā ʼaē neʼe fefeka ai ʼana palalau kiā nātou ʼaē neʼe natou gaohi koviʼi mo liʼaki tonatou ʼohoana. (Lau ia Malakia 2:13-16.) Neʼe tatau te manatu ʼa Sesu mo ʼaē ʼo tana Tamai, he neʼe ina akoʼi ʼe mole feala ki he tahi ke mavae peʼe ina liʼaki tona ʼohoana pea mo hagē kiā ia ko he meʼa noa.—Lau ia Mateo 19:3-6, 9.

15. Koteā ʼaē ʼe feala ke fai e ia ʼaē kua ʼohoana ke mālohi tana nofo agatonu ki tona ʼohoana?

¹⁵ Koteā ʼaē ʼe feala ke fai e ia ʼaē kua ʼohoana ke nofo agatonu ki tona ʼohoana? ʼE ʼui fēnei ʼi  te Folafola ʼa te ʼAtua: “Ke mau tou fiafia mai te fafine [peʼe ko te tagata] o tou temi tupulaga” pea “ke ke mauli fiafia mo te fafine [peʼe ko te tagata] ae e ke ofa ki ai.” (Taag. 5:18; Ekl. 9:9) ʼI te fakalaka ʼo te ʼu taʼu, ʼe tonu leva ke nā faiga tokolua ke mālohi ʼanā felōgoi. Ko tona fakaʼuhiga ke nā fetokagaʼaki, mo nā maʼu he temi ke nā ʼāteaina ai, pea mo nā feōvi lelei ʼaki. ʼE tonu ke maʼuhiga tāfito kiā nāua te taupau ʼo tanā nofo ʼohoana pea mo tanā felōgoi ʼaē mo Sehova. Koia ʼe ʼaoga ai ki he taumātuʼa ke nā ako fakatahi te Tohi-Tapu, mo nā gāue fakatahi ʼi te fai fakamafola, pea mo nā kole fakatahi te tapuakina ʼo Sehova.

TOU NONOFO AGATONU KIĀ SEHOVA

16, 17. (a) ʼE lava ʼahiʼahiʼi feafeaʼi takotou nofo agatonu ki te ʼAtua ʼi te fāmili pea mo te kōkelekāsio? (b) Koteā te faʼifaʼitaki ʼe hā ai te ʼu fua lelei ʼo te fakalogo ki te fakatotonu ʼaē ʼa te ʼAtua ke mole fakatahi mo he tahi ʼi totatou fāmili kua fakamavae?

¹⁶ Ko ʼihi ʼi te kōkelekāsio neʼe natou fai he ʼu agahala mamafa pea neʼe fakatonutonuʼi “fakamalohii natou, koteuhi ke natou mau he tui e maa.” (Tito 1:13) Neʼe maʼua ke fakamavae ʼihi ʼuhi ko tanatou aga. Ko te fakatonutonuʼi ʼo “natou nee akonakii fena,” neʼe tokoni ai ke natou toe mālolohi ʼi te faʼahi fakalaumālie. (Hep. 12:11) ʼE feafeaʼi mo kapau ʼe fakamavae he tahi ʼi totatou fāmili peʼe ko hotatou kaumeʼa? ʼE tou nonofo agatonu anai koa ki te ʼAtua peʼe kiā ia ʼaē neʼe fakamavae? Ko Sehova ʼe sio mai peʼe tou mulimuli anai ki tana fakatotonu ʼaē ke mole tou fakatahi mo he tahi kua fakamavae.—Lau ia 1 Kolonito 5:11-13.

¹⁷ Tou vakaʼi age muʼa te ʼu fua lelei ʼe maʼu e he fāmili neʼe nofo agatonu ki te fakatotonu ʼaē ʼa Sehova ke mole fakatahi mo he tahi ʼi te fāmili neʼe fakamavae. Ko he tūpulaga neʼe fakamavae talu mai taʼu e 10, pea ʼi te ʼu taʼu ʼaia ko tana tamai, mo tana faʼē pea mo ʼona tehina neʼe mole natou “fakatahi” mo ia. ʼI ʼihi temi, neʼe faiga ke fakatahi mo nātou, kae neʼe natou tahi fakatotonu ke mole natou toe felōgoi mo ia. ʼI te kua toe fakahū ʼa te tūpulaga ki te kōkelekāsio, neʼe ina ʼui neʼe loto tuʼumaʼu pē ia ke felōgoi mo tona fāmili, tāfito ʼi te ʼu pō ʼaē neʼe nofo tokotahi ai. Neʼe ina toe fakahā kapau lā neʼe fakatahi tona fāmili mo ia, tatau aipē peʼe ko he kiʼi temi siʼisiʼi, neʼe feʼauga pē te kiʼi temi ʼaia ke fiafia ai. Kae ʼuhi ko tanatou mole felōgoi mo ia, neʼe mālohi ai tana fia fakatahi mo nātou pea mo uga ai ia ia ke toe fakatokatoka mo Sehova. Kapau ʼe kotou fia talagataʼa ki te fakatotonu ʼaē ʼa te ʼAtua ke mole fakatahi mo he tahi ʼi tokotou fāmili kua fakamavae, kotou manatuʼi ia te faʼifaʼitaki ʼaenī.

18. ʼI tatatou ʼosi vakaʼi te ʼu fua lelei ʼo te nofo agatonu pea mo te ʼu fua kovi ʼo te heʼe agatonu, koteā ʼaē ʼe kotou fakatotonu anai ke kotou fai?

¹⁸ ʼE tou māʼuʼuli ʼi he mālama ʼe aga kākā pea mo heʼe agatonu. Kae, ʼi te kōkelekāsio ʼe feala ke tou mulimuli ki te ʼu faʼifaʼitaki ʼo he hahaʼi ʼe nofo agatonu. ʼE hā ʼi tonatou maʼuli ʼe natou mulimuli ki te tokoni ʼaenī: “Ke aua naa mavae ia koe te agalelei mo te agatonu.” (Taag. 3:3) ʼOfa pē ke tou nonofo agatonu ki te ʼAtua pea mo tou feagatonuʼaki!

[ʼU nota]

[ʼU fehuʼi ʼo te ako]

[Paki ʼo te pāsina 16]

Ko Petelo neʼe nofo agatonu kiā Sesu, te ʼAlo ʼaē neʼe fakanofo e te ʼAtua logolā Tona liʼakina e ʼihi