ʼE Fia ʼIloʼi e Te Kau Lautohi . . .

Koteā te fakaʼuhiga ʼo Halamaketone?

▪ Tokolahi ʼe natou fakaʼuhiga ia te kupu “Halamaketone” ki he tautea lahi peʼe ki he tau fakanukeleʼea, peʼe ko he tuʼutāmaki fakanātulā. Ko te kupu Halamaketone ʼi te Tohi-Tapu ʼe mole fakaʼuhiga ia ki te ʼu ʼaluʼaga ʼaia. Kae koteā koa tona fakaʼuhiga Fakatohi-tapu?

ʼI te Tohi-Tapu, ʼe maʼu te kupu “Halamaketone” (“Hala-Maketone”) ʼi te tohi ʼo Fakahā. ʼE talanoa ai ki te tau pē e tahi, “te tau ʼo te ʼaho lahi ʼo te ʼAtua te Māfimāfi,” ʼaē kā fakatahitahi “te ʼu hau ʼo te kele kātoa” ki te tau fakaʼosi mo te ʼAtua. ʼE toe talanoa ʼi te tahi ʼu vaega Fakatohi-tapu ki te tau ʼaia.—Fakahā 16:14-16; Esekiele 38:22, 23; Soele 3:12-14; Luka 21:34, 35; 2 Petelo 3:11, 12.

Koteā ʼaē kā hoko anai ʼi te tau ʼaia? ʼI hona ʼaluʼaga fakatātā, ʼe ʼui fēnei ʼi te tohi ʼo Fakahā: “[Ko] te ʼu hau ʼo te kele pea mo tanatou ʼu kautau, kua natou fakatahitahi moʼo tauʼi ia ia ʼaē ʼe heka ʼi te hōsi pea mo tana kautau.” Kae ‘ko ia ʼaē ʼe heka ʼi te hōsi’ ʼe ko te ʼAlo ʼo te ʼAtua, ia Sesu Kilisito, ʼaē neʼe fakanofo e te ʼAtua ke ina takitaki ia te foʼi tau ʼa te kau ʼāselo ke natou mālo ʼi te ʼu fili ʼo te ʼAtua. (Fakahā 19:11-16, 19-21) Iā Selemia 25:33, ʼe fakahā fēnei ai te kaugamālie ʼa te hahaʼi ʼaē neʼe mole tauhi ki te ʼAtua ʼaē kā fakaʼauha anai: “Ko te hahaʼi ʼaē kā matematehi anai e Sehova ʼi te ʼaho ʼaia, ʼe leta anai mai te tahi potu taupotu ʼo te kele ʼo aʼu ki te tahi potu taupotu ʼo te kele.”

He koʼē ʼe tonu ke hoko mai ia Halamaketone? ʼE mole tali ʼe te ʼu puleʼaga te pule faʼitaliha ʼa te ʼAtua, kae ʼe natou fakamaʼuhigaʼi tonatou ʼuhiga pule. (Pesalemo 24:1) ʼE talanoa iā Pesalemo 2:2 ki tanatou fiatuʼu: “Ko te ʼu hau ʼo te kele kua natou [nofo] teuteu ki te tau ʼaia pea ko te kau ʼaliki kua natou fakatahitahi ohagē ko he tokotahi ʼo fakafeagai kiā Sehova pea mo ia ʼaē kua ina fakanofo.”

ʼI te fakahagatonu, ko te hahaʼi fakafeagai ʼaia ʼe natou hagē ko he ʼu hahaʼi agatuʼu ʼe natou ʼui ko tonatou kele, kae mole natou kau kiai pea ʼe mole gata aipē, kae ʼe natou toe fakaʼaoga koviʼi pea mo natou maumauʼi te kele. Iā ʼaho nei ko te ʼu puleʼaga ʼe natou maumauʼi te kele pea mo natou ʼulihi ia te vai mo te ʼaele. Neʼe fakakikite ʼi te Folafola ʼa te ʼAtua te ʼu ʼaluʼaga fakamataku ʼaia ʼo ʼui fēnei: ‘Neʼe ʼiʼita te ʼu puleʼaga, pea neʼe hoko mai te hauhau ʼo te ʼAtua.’ Pea ʼe ina ‘fakaʼauha anai ia nātou ʼaē e natou maumauʼi te kele.’ (Fakahā 11:18) Ko Halamaketone ʼe ko te puleʼaki ʼaia neʼe fai e te ʼAtua moʼo fakatokatoka te fakafihi ʼaē pe ko ai ʼaē ʼe tonu ke ina puleʼi te mālamanei.—Pesalemo 83:18.

Ko ʼāfea ʼaē kā hoko mai ai Halamaketone? Neʼe fakahā lelei fēnei mai e te ʼAlo ʼo te ʼAtua: “Pea ki te ʼaho ʼaia mo te hola ʼaia, ʼe mole [he tahi ʼe ina] ʼiloʼi, pe ko te kau ʼāselo ʼo te lagi pe ko te ʼAlo, kae gata pē ki te Tamai.” (Mateo 24:36) Logolā te faʼahi ʼaia, kae ko Sesu Kilisito, te Hau pea mo Tagata Tau, ʼi tana talanoa ʼo ʼuhiga mo Halamaketone, neʼe ina fai ia te fakatokaga ʼaenī: “Koʼenī! ʼE au haʼu ohagē he tagata kaihaʼa. Fiafia ia ia ʼaē ʼe nofo ʼalaʼala.” (Fakahā 16:15) Koia, ko te tau ʼaia ʼaē kā hoko ʼi te kele kātoa ʼe pipiki kiai te ʼi henī ʼa Kilisito, ʼaē ʼe fakahā ʼi te ʼu lea fakapolofetā ʼo te Tohi-Tapu kua hoko nei.

ʼE fakaʼauha pē anai ʼi Halamaketone te kau agakovi ʼaē ʼe mole fia fetogi, kae ʼe ʼi ai anai “te toe hahaʼi tokolahi” ʼe hao ʼi te ʼaho ʼaia. (Fakahā 7:9-14) ʼE natou sisio anai ki te hoko moʼoni ʼo te ʼu palalau ʼaenī: “Kei toe he kiʼi temi siʼi pē, pea pulihi anai te tagata agakovi; pea ʼe mahino papau ia ʼe ke tokaga anai ki tona potu, kā kua puli anai ia. Kae ko te kau agavaivai ʼe natou maʼu anai te kele, pea ʼe natou fiafia moʼoni anai ʼi te mahu ʼo te tokalelei.”—Pesalemo 37:10, 11.

[Fakamatala ʼo te pāsina 20]

“Ko te kau agavaivai ʼe natou maʼu anai te kele, pea ʼe natou fiafia moʼoni anai ʼi te mahu ʼo te tokalelei”