Ko Ai Moʼoni ʼAē ʼe Ina Puleʼi Te Mālamanei?

ʼE MAHINO ia, heʼeki kotou felāveʼi mo he kau takitaki fai fakapō neʼe natou fakatuʼutuʼu tanatou gāue. Ko tona fakaʼuhiga koa ʼe mole ko he ʼu hahaʼi moʼoni? Ko te kau takitaki fai fakapō ʼe natou faiva ʼi te fufū ʼo tonatou ʼuhiga moʼoni, peʼe mai tanatou fale pilisoni, ʼe feala pē hanatou takitaki ʼihi hahaʼi fai fakapō. Koia ʼaki te ʼu kupu tāfito ʼaē ʼe tā ʼi te ʼu sulunale ʼo ʼuhiga mo te toloke, mo te aga paomutu, mo te fakatau ʼa te hahaʼi ke natou gāue kinakina, pea mo te tahi atu ʼu faʼahi, ʼe kotou manatuʼi ai te mālohi mo te ʼu fua kovi ʼo te ʼu gāue pea mo te maʼuli moʼoni ʼo te hahaʼi fai fakapō ʼaia. ʼAki te agakovi ʼaē ʼe natou fai ki te hahaʼi, ʼe tou ʼiloʼi ai ʼe ko te kau takitaki fai fakapō ʼe natou māʼuʼuli moʼoni.

ʼE fakahā mai ʼi te Folafola ʼa te ʼAtua, ia te Tohi-Tapu, ʼe maʼuli moʼoni ia Satana, pea ohagē ko te tagata pule fai fakapō mālohi, ʼe tokaga ia ke hoko tona finegalo ʼo ina fakaʼaogaʼi ia “he ʼu fakaʼiloga loi” pea mo “te ʼu kākā fuapē ʼo te hala.” ʼI tona fakahagatonu, ʼe ʼui ʼi te Tohi-Tapu “ ʼe ina fakaliliu tuʼumaʼu pē ia ia ko he ʼāselo ʼo te mālama.” (2 Tesalonika 2:9, 10; 2 Kolonito 11:14) ʼE toe fēia pē, ko te maʼuli moʼoni ʼa te Tēvolo ʼe feala ke fakamoʼoni ʼaki tana agakovi ki te hahaʼi. Kae, tokolahi ʼe faigataʼa hanatou tui ʼe maʼuli moʼoni he laumālie ʼe fakapulipuli pea mo agakovi. ʼI muʼa ʼo tatatou vakaʼi lelei peʼe koteā ʼaē ʼe ʼui ʼi te Tohi-Tapu ʼo ʼuhiga mo te Tēvolo, tou vakaʼi age muʼa te ʼu palalau fakafeagai ʼe fai māhani e te hahaʼi pea mo te ʼu akonaki hala ʼaē ʼe faigataʼa ai ki ʼihi, hanatou tali te manatu ʼaē ʼe maʼuli moʼoni ia te Tēvolo.

◼ “ ʼE feala koa ki he ʼAtua ʼofa ke ina fakatupu ia te Tēvolo?” Mai tona ʼaluʼaga ʼaē ʼe ʼui ʼi te Tohi-Tapu ko te ʼAtua ʼe agalelei pea mo haohaoa, ʼe hagē ʼe fakafeagai mo te manatu ʼaē neʼe ina fakatupu he tahi ʼe agakovi. ʼI tona fakahagatonu, ʼe mole ʼui mai ʼi te Tohi-Tapu neʼe fakatupu e te ʼAtua te taʼi laumālie fakapulipuli mo agakovi ʼaia. Kailoa, kae ʼe ʼui fēnei ʼo ʼuhiga mo te ʼAtua: “Ko te Maka, ʼe haohaoa tana gāue, heʼe ko tona ʼu ala fuli ʼe faitotonu. ʼAtua ʼo te agatonu, ʼaē ʼe mole iā te ia te heʼe faitotonu; ʼe faitotonu ia pea mo totonu.”—Teutalonome 32:4; Pesalemo 5:4.

Ko te manatu ʼaenī ʼaē ʼe tonu ke tou tokagaʼi: peʼe feala koa ki he tahi neʼe fakatupu haohaoa e te ʼAtua ke ina fai he aga ʼe heʼe faitotonu. ʼI tana mole faʼu te tagata pea mo te kau ʼāselo ohagē ko he ʼu masini, neʼe foaki age e te ʼAtua kiā nātou ia te loto faʼitaliha, ia te fealagia ʼaē ke natou filifili te ʼu meʼa ʼaē ʼe natou loto kiai. Koia, ko he tahi ʼe haohaoa, mo poto, ko he tagata peʼe ko he laumālie, ʼe feala ke ina filifili ke ina fai te meʼa ʼaē ʼe lelei peʼe ko te meʼa ʼaē ʼe kovi.

ʼE mole fakagafua anai e te ʼAtua ki te tagata mo te kau ʼāselo ke natou filifili faʼitaliha te aga ʼaē ʼe lelei peʼe ko ʼaē ʼe kovi, pea ʼi te moʼi temi pē ʼaia ke ina tāʼofi tanatou fia fai te aga ʼaē ʼe kovi. Neʼe talanoa ia Sesu ki te fakaʼaogaʼi kovi ʼo te loto faʼitaliha ʼi te temi ʼaē neʼe ina ʼui fēnei ʼo ʼuhiga mo te Tēvolo: “Neʼe mole haga nofo ia ʼi te moʼoni.” (Soane 8:44) ʼE hā lelei ʼi te ʼu palalau ʼaia ko ia ʼaē neʼe liliu ko te Tēvolo, ʼi te kamata neʼe ko te laumālie haohaoa ia, ʼaē ʼi te tahi temi neʼe “nofo ia ʼi te moʼoni.” a Neʼe fakatupu e Sehova ʼAtua te tagata pea mo te kau ʼāselo ʼaki ia te loto faʼitaliha  ʼuhi ʼaē ʼe ʼofa pea mo falala kiā nātou.—Kotou vakaʼi te fakamatala ʼaē ʼe ʼātakai “ ʼE Feala Koa Ki He Tahi ʼe Haohaoa Ke Liliu ʼo Heʼe Haohaoa?” ʼi te pāsina 6.

◼ “Ko te Tēvolo ʼe ko he kaugana ʼa te ʼAtua” Ki ʼihi, ʼe hagē ʼe fakahā ʼi te Tohi-Tapu te manatu ʼaia ʼi te tohi ʼa Sopo. ʼO mulimuli ki te fakamatala ʼo ʼuhiga mo te koga tohi ʼaē ʼe ʼui ai ko te Tēvolo “neʼe . . . ʼevaʼeva pē ʼi he mo he ʼi te kele,” ʼe fakaʼuhiga ia ki te gāue ʼo te ʼu malomu Pelesia ʼo te temi muʼa, ʼaē neʼe natou fai fagona pea mo natou fakamatalatala te ʼu meʼa ki tonatou hau. (Sopo 1:7) Kae kanapaulā ko te Tēvolo neʼe ko he malomu moʼoni ʼa te ʼAtua, he koʼē neʼe tonu ke ina fakamahino ki te ʼAtua neʼe “ ʼevaʼeva pē ʼi he mo he ʼi te kele”? ʼI te fakamatala ʼo te tohi ʼa Sopo ʼe mole ʼui ia ko te Tēvolo ʼe ko he tahi ʼe faifaitahi mo te ʼAtua, kae ʼe fakahigoaʼi ai ko Satana, ʼaē ʼe fakaʼuhiga “ko he tahi ʼe fakafeagai,” ʼo hā mai ai ko te Fili lahi ʼaia ʼo te ʼAtua. (Sopo 1:6) Kae ʼe haʼu mai fea te manatu ʼaē ʼe ko te Tēvolo ʼe tauhi ki te ʼAtua?

ʼI te kamata ʼo te ʼuluaki sēkulō ʼo totatou temi, ko te ʼu tohi Sutea ʼe mole kau ʼi te ʼu tohi ʼo te Tohi-Tapu, neʼe fakamatala ai ko te Tēvolo ʼe tālaga mo te ʼAtua ʼo ʼuhiga mo te totogi ʼo tana ʼu gāue, kae ʼe toe fakalogo pē foki ki Tona finegalo. ʼI tana tohi Mephistopheles, ʼe fakamahino e te tagata fai hisitolia ko J. B. Russell ko te Tagata Polotesitā ko Maletino Lutelo neʼe manatu ia ko te Tēvolo ʼe ko he meʼa gāue ʼa te ʼAtua “ohagē ko te toki pelu peʼe  ko he huo fuli kele ʼaē ʼe ina fakaʼaogaʼi moʼo gāueʼi tona ʼōloto.” Pea ʼe hilifaki kiai e Russell te manatu ʼaē, “ ʼe fiafia ia te huo fuli kele tana maumauʼi ia te vao kovi,” kae ʼe fakalogo pē ia ki te pule māʼoluga ʼo te ʼAtua, ʼo ina fakahoko ai te finegalo ʼo te ʼAtua. Ko te akonaki ʼa Lutelo, ʼaē ki muli age neʼe tali e te teolosia Falani ko Soane Kalevino, neʼe fakalotomamahi ki te hahaʼi tui, ʼaē neʼe natou manako ki te faitotonu. ʼE lava feafeaʼi ki he ʼAtua ʼofa ke mole gata pē tana fakagafua ia te kovi kae ke ina fakatupu te kovi? (Sake 1:13) Ko te akonaki ʼaia, mo te ʼu meʼa fakalialia ʼo te 20 sēkulō ʼe faigataʼa ai ki te tokolahi hanatou tui ki te maʼuli moʼoni ʼa te ʼAtua pea mo Tēvolo.

◼ “Ko te Tēvolo ʼe ko te kovi ʼaē ʼe ʼi te loto ʼa te tagata fuli pē” Kapau ʼe tou manatu ko te Tēvolo ʼe ko te kovi pē ʼaē ʼe iā tātou, pea ʼe mole feala anai ke tou mahino ki ʼihi vaega Tohi-Tapu. Ohagē lā, ko ai koa ʼaē neʼe fai palalau mo te ʼAtua ʼi te fakamatala iā Sopo 2:3-6? Neʼe feala koa ke fai palalau ia te ʼAtua mo te kovi ʼaē neʼe ʼi te loto ʼo Sopo, pe neʼe lagi feala koa hana fai palalau mo ia totonu? Tahi ʼaē, ʼe vikiʼi anai koa ʼi te tahi temi e te ʼAtua ia te ʼu kalitātē ʼo Sopo pea ina fakagafua leva ki muli age ke ʼahiʼahi Sopo ʼaki te kovi ʼaē ʼe ʼi tona loto? Kapau ʼe tou ʼui ʼe fēia ia te ʼAtua pea ʼe tou fakaliliu ia ia ko he tahi ʼe aga fakalialia. Kae ʼe ʼui ia ʼi te Tohi-Tapu, “ ʼe mole . . . heʼe faitotonu” te ʼAtua. (Pesalemo 92:15) Ko te ʼAtua ʼe mole aga fakalialia ia, he neʼe mole ina tali “ke ina faoʼi . . . tona nima” ke ina fai he meʼa ʼe kovi kiā Sopo. ʼE hā mai ko te Tēvolo ʼe mole fakaʼuhiga ia ki te kovi ʼaē ʼe ʼi te tagata peʼe ʼi te ʼAtua, kae ki he ʼāselo neʼe ina fakaliliu ia ia totonu ko te Fili ʼo te ʼAtua.

Ko Ai Moʼoni ʼAē ʼe Ina Puleʼi Te Mālamanei?

Tokolahi iā ʼaho nei, ʼe natou manatu ʼe mole kei ʼaoga ke tou tui ki te maʼuli moʼoni ʼo te Tēvolo. Kae, ʼe matatonu age ia te fakamahino ʼaē ʼe tupu ia te agakovi ʼaē ʼe tou sio kiai mai te Tēvolo. ʼI tona fakahagatonu, ko te faiga ʼaē ke pulihi ia te manatu ʼo ʼuhiga mo te Tēvolo, neʼe ina taki ai te hahaʼi tokolahi ke natou liʼaki ia te ʼAtua pea mo te ʼu lēkula fuli ʼo ʼuhiga mo te aga ʼaē ʼe tonu ke fai.

Neʼe tohi fēnei e Charles-Pierre Baudelaire ko te tagata faituketuke ʼo te ʼu taʼu 1800: “Ko te kākā lahi ʼo te ʼu kākā fuli ʼaē neʼe fai e te Tēvolo, ko tana fakalotoʼi tātou ke tou tui ʼe mole maʼuli moʼoni ia.” ʼI tana fufū tona ʼuhiga moʼoni, ko te Tēvolo neʼe ina lagaʼi he ʼu manatu lotolotolua ʼo ʼuhiga mo te maʼuli moʼoni ʼa te ʼAtua. Kapau ʼe mole maʼuli moʼoni te Tēvolo, tokolahi ʼe natou manatu anai ko te kovi fuli pē ʼe tupu mai te ʼAtua pea ʼe mole kei natou tui ai kiā te ia. ʼE mole koa lā ko te faʼahi totonu ʼaia ʼaē ʼe loto kiai e te Tēvolo?

Ohagē ko he pule fai fakapō, ko te Tēvolo ʼe ina fia fakafufū ia tona ʼuhiga moʼoni moʼo fakahoko tana fakatuʼutuʼu. Pea koteā tana fakatuʼutuʼu? ʼE tali fēnei ʼi te Tohi-Tapu: “Neʼe fakakiviʼi e te ʼatua ʼo te tuʼu ʼo te ʼu faʼahiga meʼa ʼaenī, ia te ʼatamai ʼo nātou ʼaē ʼe mole tui, ke ʼaua naʼa fakamālamagia nātou e te mālama gigila ʼo te logo lelei fakakolōlia ʼo ʼuhiga mo Kilisito, ʼaē ko te pāki ʼo te ʼAtua.”—2 Kolonito 4:4.

ʼE kei toe te fehuʼi maʼuhiga. Koteā ʼaē kā fai anai e te ʼAtua ki te Tēvolo ʼaē ʼe faiva poto pea mo ina fakatupu te kovi mo te mamahi fuli? ʼE tou vakaʼi anai te faʼahi ʼaia ʼi te ʼalatike ʼaē kā hoa mai.

[Nota]

[Fakamatala ʼo te pāsina 5]

Ko te Tēvolo ʼe ko he kaugana koa ʼa te ʼAtua peʼe fakafeagai ki te ʼAtua?

[Talanoa/Palalau ʼo te pāsina 6]

ʼE Feala Koa Ki He Tahi ʼe Haohaoa Ke Liliu ʼo Heʼe Haohaoa?

Ko te ʼuhiga haohaoa ʼaē neʼe foaki e te ʼAtua ki te tagata pea mo te kau ʼāselo ʼe fakatuʼakoi. Logolā neʼe fakatupu haohaoa ia Atama, kae neʼe tonu ke fakaʼapaʼapa ki te ʼu fakatuʼakoi ʼaē neʼe fakamaʼua ki ai ia tona Tupuʼaga. Ohagē lā, neʼe mole feala ke ina kai ia te kele, peʼe ko te kilikili, peʼe ko he moʼi ʼakau ʼo mole fua kovi kiā ia. Kapau neʼe mole ina tokagaʼi ia te lao ʼo te gravité pea ʼalu ʼo fakatō ifo mai he ʼutu maka ʼe māʼoluga, neʼe feala ke mate peʼe lavea kovi.

ʼO toe fēia, ʼe mole feala ki he tagata peʼe ko he ʼāselo ʼe haohaoa ke fakalaka ʼi te ʼu lēkula ʼo te aga ʼaē ʼe tonu ke fai, ʼaē neʼe fakatuʼutuʼu e te ʼAtua ʼo mole fua kovi kiā ia. Koia, kā fakaʼaogaʼi kovi e te tagata peʼe ko he ʼāselo ia te loto faʼitaliha, pea “ ʼe tō gafua ki te hala pea mo te agahala.”—Senesi 1:29; Mateo 4:4.