Koteā ʼAē ʼe Tonu Ke ʼIloʼi e Te Fānau?

“Ko te Tohi-Tapu kātoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu.”—2 TIMOTEO 3:16.

ʼE ʼAOGA ke akoʼi age ki te fānau te moʼoni ʼo ʼuhiga mo te ʼAtua. ʼE natou lava maʼu ʼifea ia te moʼoni ʼaia? Mai te Tohi-Tapu, te tohi lotu ʼaē ʼe fakaʼapaʼapaʼi lahi ʼi te mālamanei.

Ko te Tohi-Tapu ʼe hagē ia ko he tohi mai te ʼAtua. ʼI te tohi ʼaia, ʼe fakahā ai e te ʼAtua Tona ʼuluagaaga pea ʼe ina foaki mai he takitaki ʼo ʼuhiga mo te aga ʼaē ʼe tonu ke fai ki tana fānau fuli, nātou ʼaē ʼe liliki pea mo nātou ʼaē ʼe kua mātutuʼa. Tou vakaʼi ʼihi akonaki ʼi te ʼu akonaki ʼaē ʼe tou maʼu ʼi te Tohi-Tapu, pea mo te ʼu ako ʼaē ʼe feala pē lā ki te fānau ʼaē ʼe kei liliki ke natou tāʼofi mai ai.

Koteā ʼaē ʼe loto e te ʼAtua ke tou ʼiloʼi ʼo ʼuhiga mo ia?

◼ Koteā ʼaē ʼe akoʼi mai ʼi te Tohi-Tapu: “Ko koe, ʼaē ko tou huafa ko Sehova, ko koe tokotahi pē, te Māʼoluga ʼAupitō ʼi te kele kātoa.” —Pesalemo 83:18.

Te ako kiā tātou: Ko te ʼAtua ʼe mole ko he mālohi pē ia ʼe nofo ʼi te ʼu potu fuli pē, kae ko he Tahi ʼe maʼuli moʼoni pea ʼe ʼi ai tona huafa.

◼ Koteā ʼaē ʼe akoʼi mai ʼi te Tohi-Tapu: “Ko Sehova ʼe ina sivi te ʼu loto fuli pea ʼe ina ʼiloʼi te ʼu faleleʼaga fuli pē ʼo te ʼu fakakaukau. Kapau ʼe ke kumi ia ia, ʼe ina tuku anai ke ke maʼu ia ia.”—1 Fakamatala 28:9.

Te ako kiā tātou: Ko Sehova ʼAtua ʼe tokaga ia kiā tātou fuli, ʼo kau ai mo te tamaliki liliki. (Pesalemo 10:14; 146:9) ʼE ina loto ia ke tou ʼiloʼi ia ia.

◼ Koteā ʼaē ʼe akoʼi mai ʼi te Tohi-Tapu: “ ʼAua naʼa ke fakamamahiʼi . . . he tamasiʼi tagata ʼe hala mo tamai. Kapau ʼe ke fakamamahiʼi ia ia ʼi he faʼahiga ʼaluʼaga pē, kapau ʼe fetapa mai kiā te au, pea ʼe au logo moʼoni ki tana kalaga.”—Ekesote 22:22-24.

Te ako kiā tātou: ʼE toe fagono foki ia Sehova ki te ʼu faikole ʼaē ʼa te tamaliki liliki. ʼE feala ke tou palalau tuʼumaʼu ki te ʼAtua pea mo tou fakahā kiā te ia ia tatatou ʼu manatu pea mo te ʼu meʼa ʼi totatou loto.

◼ Koteā ʼaē ʼe akoʼi mai ʼi te Tohi-Tapu: “Tuʼumaʼu pē neʼe natou ʼahiʼahiʼi te ʼAtua, pea neʼe natou fakalotomamahi ia te Māʼoniʼoni ʼo Iselaele.”—Pesalemo 78:41.

Te ako kiā tātou: ʼE malave tatatou ʼu palalau pea mo te ʼu meʼa ʼaē ʼe tou fai ki te loto ʼo Sehova, koia ʼaē ʼe tonu ai ke tou fakakaukau ʼi muʼa ʼo hatatou palalau pea mo fai he meʼa.

 ʼE tonu ke feafeaʼi tatatou aga kiā nātou ʼaē ʼe kehekehe mo tātou?

◼ Koteā ʼaē ʼe akoʼi mai ʼi te Tohi-Tapu: “Ko te ʼAtua ʼe mole fakapalatahi, kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.”—Gāue 10:34, 35.

Te ako kiā tātou: Kapau ʼe tali e te ʼAtua te hahaʼi mai te ʼu fenua fuli pē, pea ʼe mole tonu ke tou fakakeheʼi ʼihi ʼuhi pē ko tonatou lanu peʼe ʼuhi heʼe mole tou fōliga tahi.

◼ Koteā ʼaē ʼe akoʼi mai ʼi te Tohi-Tapu: “Kotou nonofo teuteu tuʼumaʼu moʼo tali kiā nātou ʼaē ʼe natou fehuʼi atu te tupuʼaga ʼo takotou falala, kae kotou tali ʼaki he agamalū pea mo he fakaʼapaʼapa lahi.”—1 Petelo 3:15.

Te ako kiā tātou: Kā tou fai palalau mo he tahi ʼo ʼuhiga mo te lotu, ʼe tonu ke tou fakahā age tatatou ʼu manatu ʼaki he tui papau kae ʼe mole tou fai fakaʼita age. ʼE tonu foki ke tou toe fakaʼapaʼapa kiā nātou ʼaē ʼe mole tatau tanatou ʼu akonaki fakalotu pea mo tātou.

ʼE tonu ke feafeaʼi tatatou aga ki totatou fāmili?

◼ Koteā ʼaē ʼe akoʼi mai ʼi te Tohi-Tapu: “Fānau, kotou talagafua ki ʼakoutou ʼu mātuʼa iā meʼa fuli pē, heʼe ko te meʼa ʼaia ʼe lelei ʼi te ʼAliki.”—Kolose 3:20.

Te ako kiā tātou: Ko te fānau ʼaē ʼe talagafua ʼe natou fakahā ʼe natou ʼoʼofa ki tanatou ʼu mātuʼa pea ʼe natou toe fia fakafiafia ia te ʼAtua.

◼ Koteā ʼaē ʼe akoʼi mai ʼi te Tohi-Tapu: “Kotou haga fekātakiʼaki pea mo fefakamolemoleʼaki ʼaki he lotolelei, mo kapau ʼe lotomamahi he tahi ʼi he meʼa ki he tahi age. Ohagē pē ko te lotolelei ʼa Sehova ke ina fakamolemole kiā koutou, kotou toe fai fēia pē mo koutou.”—Kolose 3:13.

Te ako kiā tātou: ʼI ʼihi temi, ko ʼihi ʼo kau ai mo totatou fāmili ʼe natou fakalotomamahi anai tātou. Kae kapau ʼe tou loto ke fakamolemole mai ia te ʼAtua, pea ʼe tonu ke tou ako ke tou fakamolemole ki te hahaʼi.—Mateo 6:14, 15.

 He koʼē ʼe tonu ke tou palalau ʼi te moʼoni pea mo tou agalelei?

◼ Koteā ʼaē ʼe akoʼi mai ʼi te Tohi-Tapu: “Kotou liʼaki . . . te loi, [pea] kotou tahi tala te moʼoni ki tona kāiga.”—Efesi 4:25.

Te ako kiā tātou: Kā tou tala te moʼoni, pea ʼe tou faʼifaʼitakiʼi ai ia te ʼAtua pea mo tou fakafiafia ia tona loto. Kapau kua tou māhani ʼi te loi, pea ʼe tou hagē anai ko te fili ʼo te ʼAtua, ia te Tēvolo, ia ia ʼaē ko “te tamai ʼo te loi.”—Soane 8:44; Tito 1:2.

◼ Koteā ʼaē ʼe akoʼi mai ʼi te Tohi-Tapu: “Ko te meʼa fuli pē ʼe kotou loto ke fai e te hahaʼi maʼa koutou, ʼe maʼua foki mo koutou, ke kotou toe fai fēia maʼa nātou.”—Mateo 7:12.

Te ako kiā tātou: ʼE tonu ke tou tokagaʼi te ʼu meʼa ʼaē ʼi te loto, mo te ʼu manatu pea mo te ʼu meʼa ʼaē ʼe ʼaoga ki totatou fāmili pea mo te hahaʼi ʼo totatou kolo. Kā tou fakahā ʼe tou “kaugā mamahi” mo te hahaʼi, pea ʼi te agamāhani ko nātou ʼaia ʼe natou toe agalelei mai kiā tātou.—1 Petelo 3:8; Luka 6:38.

Ohagē ko tona fakahā ʼi te ʼu faʼifaʼitaki ʼaia, ko te ʼu ako ʼaē ʼe tou maʼu ʼi te Tohi-Tapu ʼe feala ke tokoni ki te fānau, ke natou liliu ko ni hahaʼi lalahi ʼe loto tokaga, mo aga fakaʼapaʼapa pea mo lotomahino. Kae ko ai ʼaē ʼe tonu ke ina akoʼi age ki te fānau te ʼu ako ʼaia?