1 Tokoni

Kotou ʼOʼofa Ki Te Hahaʼi, Kae Mole Ki Te Falā Pea Mo Te ʼu Koloa

KOTEĀ ʼAĒ ʼE AKOʼI MAI ʼI TE TOHI-TAPU? “Ko te manako ki te paʼaga ʼe ko te aka ʼaia ʼo te ʼu meʼa kovi fuli.”—1 Timoteo 6:10.

HE KO’Ē ʼE FAIGATAʼA? Ko te hahai faifakatau ʼe natou fakaneke tātou ke mole tou leleiʼia te ʼu meʼa ʼaē kua tou maʼu. ʼE natou loto ke tou gāue ʼi te temi fuli pē ke lahi hatatou falā, ke feala ai hatatou toʼo hatatou ʼu meʼa ʼe foʼou age, mo lelei age, pea mo lahi age. ʼE fakahala te falā, pea ʼe faigafua pē hakotou manako kiai. Kae ʼe fakatokagaʼi mai ʼi te Tohi-Tapu, ko he tahi ʼe manako ki te ʼu koloa ʼe mole feala anai ʼi he temi ke maʼuli fakafeʼauga. Neʼe tohi fēnei e te Hau ko Salomone: “Ko ʼaē ʼe manako ki te paʼaga ʼe mole mākona anai ia ʼi te paʼaga, ʼo fēia mo ʼaē ʼe manako ki te ʼu koloa, ʼe mole mākona anai ia ʼi te totogi.”—Tagata Tānaki 5:10.

KOTEĀ ʼAĒ ʼE FEALA KE KOTOU FAI? Kotou muliʼi te faʼifaʼitaki ʼa Sesu pea kotou ako ke lahi age tokotou ʼofa ʼaē ki te hahaʼi ʼi te ʼu koloa. Neʼe tali lelei e Sesu ke ina tuku te ʼu meʼa fuli ʼaē neʼe ina maʼu—māʼia mo tona maʼuli—ʼuhi pē ko tona ʼofa ʼaē ki te hahaʼi. (Soane 15:13) Neʼe ina ʼui fēnei: “ ʼE lahi age te fiafia ʼo takita foaki, ʼi takita tali.” (Gāue 20:35) Kapau ʼe tou fai fēia, ʼo tou foaki totatou temi pea mo totatou ʼu koloa maʼa te hahaʼi, pea ʼe natou toe liufaki mai anai ia totatou ʼofa ʼaia. Neʼe ʼui fēnei e Sesu: “Kotou fakamāhani ʼi te foaki, pea ʼe foaki atu anai kiā koutou.” (Luka 6:38) Ko nātou ʼaē ʼe natou faiga ke natou maʼu hanatou falā pea mo honatou ʼu koloa ʼe natou fakamamahiʼi pē ia nātou totonu pea mo maʼuli kinakina. (1 Timoteo 6:9, 10) Kae ko te fīmālie moʼoni ia ʼe maʼu mai takita ʼofa ki te hahaʼi pea mo tokita ʼofainaʼi ʼaē e ʼihi.

Koteā ʼaē ʼe mole kotou vakavakaʼi ai peʼe feala hakotou fakafaigafua ia tokotou maʼuli? ʼE feala koa hakotou fakasiʼisiʼi ifo te lahi ʼo tokotou ʼu koloa peʼe ko te ʼu meʼa ʼaē ʼe kotou fia totogi? Kapau ʼe kotou fai te faʼahi ʼaia, pea ʼe feala ai ke kotou maʼu he temi ʼe lahi age pea mo he mālohi ki te ʼu meʼa ʼaē ʼe maʼuhiga age ki tokotou maʼuli, ʼaē ko te tokoni ki te hahaʼi pea mo tauhi ki te ʼAtua, ia ia ʼaē neʼe ina foaki atu te ʼu meʼa fuli pē ʼaē ʼe kotou maʼu.—Mateo 6:24; Gāue 17:28.

[Paki ʼo te pasina 4]

“Kotou fakamāhani ʼi te foaki, pea ʼe foaki atu anai kiā koutou”