ʼE Fia ʼIloʼi e Te Kau Lautohi . . .

ʼE Tonu Koa Ke Au Hū Ki He Kūtuga Fakalotu?

▪ ʼE kotou tuʼania koa ʼi hakotou hū ki he kūtuga fakalotu, mai tona ʼaluʼaga ʼaē ʼe kotou fakatokagaʼi te mālualoi iā nātou ʼaia pea mo tanatou mole logotahi, ʼo fēia ki te kau takitaki lotu? Kapau ʼe kotou fēia, pea ʼe lagi ʼalutahi pē te faʼahi ʼaē ʼe kotou logoʼi mo te tākuga lea Fakafalani ʼaenī, “Ko ʼaē ʼe ovi ki te ʼēkelesia ʼe tau mamaʼo ʼosi ia mai te ʼAtua.”

ʼE lagi kotou fakaʼapaʼapa ki te Tohi-Tapu pea mo kotou manatu ʼe tonu ki te puleʼaga mo te hahaʼi ke natou fakaʼapaʼapa ki te loto takitokotahi ʼo he tahi ʼe ina filifili he lotu ke hū kiai. Kae ʼe lagi kotou feʼekeʼaki: ‘Peʼe ʼui moʼoni mai koa e te ʼAtua ʼe tonu ke kau ki he lotu ia nātou ʼaē ʼe natou fia tauhi kiā te ia pea ke ina tali leleiʼi natou?’

ʼEī. He koʼē ʼe feala ke tou tali fakahagatonu fēia? Pea ʼe tali koa ia te ʼu lotu fuli?

Tou vakaʼi age muʼa te faʼifaʼitaki ʼa Sesu. Neʼe kau koa ki he lotu? ʼI te kei veliveli ʼa Sesu, neʼe ko hana agamāhani mo tona fāmili ʼaē neʼe Sutea pea mo ʼihi, ʼi te ʼolo ki te fale lotu ʼaē ʼi Selusalemi moʼo fakahoko ai tanatou tauhi. (Luka 2:41-43) ʼI tana kua lahilahi ake leva, ko Sesu neʼe tauhi fakatahi mo tona ʼu tehina Sutea ki te ʼAtua ʼi te sinakoka ʼo te kolo. (Luka 4:14-16) ʼI tana palalau ki te fafine ʼo te tahi lotu, neʼe ʼui fēnei e Sesu: “ ʼE matou ʼatolasio mātou ki te meʼa ʼaē ʼe matou ʼiloʼi.” (Soane 4:22) ʼI te lakaga ʼaia, neʼe fakahā fakalelei age e Sesu, neʼe kau ia ki te faʼahiga lotu Fakasutea.

Ki muli age, neʼe ʼui e Sesu mai te ʼaluʼaga ʼaē neʼe mole tali ia ia e te puleʼaga Sutea, ʼe mole tali anai e te ʼAtua tanatou tauhi hala. (Mateo 23:33–24:2) Kae neʼe ina fakahā ko nātou ʼaē ʼe fia ʼatolasio ki te ʼAtua pea ke ina tali, neʼe tonu ke natou kau ki he kūtuga kua fakatuʼutuʼu fakalelei. Neʼe ina ʼui fēnei ki tana kau tisipulo: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soane 13:35) ʼE tonu ki te tisipulo ʼa Kilisito ke fakatahi mo te ʼu tehina mo tuagaʼane ʼo Sesu ke ina fakahā ai ia tona ʼofa ʼaē kiā nātou. ʼI tona fakahagatonu, neʼe fakahā lelei e Sesu ʼe ko ala pē e lua, peʼe ko lotu pē e lua. Neʼe ina ʼui ʼo ʼuhiga mo te tahi ala, ʼe “laulahi pea mo ʼātea” ia te ala ʼaē ʼe taki “ki te fakaʼauha.” Kae ʼo ʼuhiga mo te lua ala, neʼe ina ʼui fēnei: “[ʼE] fāveliveli ia te matapā pea mo lauveliveli ia te ala ʼaē ʼe fakatau ki te maʼuli, pea ʼe tokosiʼi ia nātou ʼe natou maʼu.”—Mateo 7:13, 14.

ʼE mahino mai ai kiā tātou, ʼe ko te lotu pē e tahi ʼaē ʼe tali e te ʼAtua. ʼE fakatokaga mai ʼi te Tohi-Tapu ke ʼaua naʼa tou fakatahi mo nātou ʼaē “ ʼe hagē ʼe natou pipiki ki te ʼAtua, kae ʼe natou lītuʼa ki tona mālohi.” ʼE toe ʼui fēnei ʼi te Folafola ʼa te ʼAtua: “Mai iā nātou ʼaia ke ke maliu kehe mai ai.” (2 Timoteo 3:5) ʼI te tahi faʼahi, ʼe fua lelei ʼaupitō kiā tātou ke tou ʼiloʼi ia nātou ʼaē ʼe haʼele ʼi te ala ʼaē ʼe ina taki ki te maʼuli pea ke tou fakatahi mo nātou ʼaia. ʼE tou maʼu ai ʼi te temi nei ia he fakalotomālohi pea mo he tokoni, pea mo he ʼamanaki taulekaleka ki te temi kā haʼu.—Hepeleo 10:24, 25.

ʼE kotou lava ʼiloʼi feafeaʼi peʼe ko te lotu fea ʼaē ʼe ʼalu ʼi te ala fāveliveli? Koteā ʼaē ʼe mole kotou vakavakaʼi ai muʼa ia te ʼu tali Fakatohi-tapu ʼaē ʼi te kāpite 15 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? a ʼE tokoni atu anai te tohi ʼaia, ke kotou ʼiloʼi ʼaki te takitaki ʼa te Tohi-Tapu, peʼe ko te lotu fea ʼaē ʼe tonu ke kotou kau ai.

[Nota]