Kotou Fakaovi Ki Te ʼAtua

“ ʼE Tuʼu Mālohi Anai . . . Tou Puleʼaga”

2 SAMUELE 7:1-16

LOLOTOGA te hisitolia, tokolahi te ʼu tagata pule neʼe fakahifo nātou ʼi tonatou ʼu tuʼulaga. Ko ʼihi neʼe mole toe fakanofo nātou, pea ko ʼihi leva neʼe fakahifo nātou kae heʼeki ʼosi tonatou temi ʼaē neʼe tonu ai ke fakahoko tonatou ʼu maʼua. ʼE feafeaʼi lā kiā Sesu Kilisito, te Hau ʼo te Puleʼaga ʼo te ʼAtua ʼaē ʼi selō? ʼE ʼi ai koa he meʼa ʼe ina lava tāʼofi tana pule ʼi tona ʼuhiga Hau fakanofo e te ʼAtua? ʼE tou maʼu tona tali ʼi te ʼu palalau ʼaē neʼe fai e Sehova ki te Hau ko Tavite ʼi te temi muʼa, ʼaē iā 2 Samuele ʼi te kāpite 7.

ʼI te kamataʼaga ʼo te kāpite ʼaia, ʼe tou ako ai neʼe ufiufi Tavite, he neʼe nofo ia ʼi te fale hau matalelei ia ia ʼaē ko te tagata kelekele kae ko te ʼaleka ʼo te ʼAtua ʼe tuku ia ʼi te fale fehikitaki. a Neʼe fakahā e Tavite tana loto ʼaē ke laga he ʼapi ʼe tāu mo Sehova peʼe ko hona fale lotu. (Vaega 2) Kae ʼe mole ko Tavite anai ʼaē ka ina laga te fale lotu ʼaia. ʼAki te polofetā ko Natane, neʼe tala e Sehova kiā Tavite ʼe ko he tahi anai ʼi tona ʼu foha kā ina laga te fale lotu ʼaia.—Te ʼu vaega 4, 5, 12, 13.

Neʼe malave ki te loto ʼo Sehova ia te loto mālohi ʼaē ʼa Tavite ke ina laga hona fale lotu. Moʼo tali ki te ʼu faiga fakamālotoloto ʼaia ʼa Tavite pea mo mulimuli ki te lea fakapolofetā, neʼe fai e te ʼAtua ia te fuakava mo Tavite, ʼe ina fakanofo anai he tahi ʼi te hōloga hau ʼo Tavite ke hau anai ʼo talu ai. Neʼe tala e Natane te fakapapau maʼuhiga ʼa te ʼAtua kiā Tavite, ʼo ina ʼui fēnei: “ ʼE mahino papau ia ʼe tuʼu mālohi anai ʼi ʼou muʼa tou ʼapi pea mo tou puleʼaga ʼo aʼu ki he ʼu temi ʼe mole ʼiloʼi hona gataʼaga; ko tou ʼafioʼaga ʼe liliu anai ʼo tuʼu mālohi anai ʼo aʼu ki he ʼu temi ʼe mole ʼiloʼi hona gataʼaga.” (Vaega 16) Ko ai te Tofiʼa heʼegata ʼo te fuakava ʼaia—ia Ia ʼaē ka Hau anai ʼo talu ai?—Pesalemo 89:20, 29, 34-36.

Ko Sesu ʼo Nasaleti neʼe hifo mai te hōloga ʼo Tavite. ʼI te fakahā ʼo te tupu ʼa Sesu neʼe ʼui fēnei e te ʼāselo: “ ʼE foaki anai e Sehova ʼAtua kiā te ia te hekaʼaga fakahau ʼo Tavite tana tamai, pea ʼe hau anai ia ki te ʼapi ʼo Sakopo ʼo talu ai, pea ko tona puleʼaga, ʼe mole ʼi ai anai hona gataʼaga.” (Luka 1:32, 33) Koia ko te fuakava ʼaē neʼe fai mo Tavite, neʼe fakahoko ʼaki ia Sesu Kilisito. Koia, ʼe pule Sesu, kae neʼe mole ko he tagata ʼaē neʼe ina fakanofo ia ia ki te tuʼulaga ʼaia, ʼe ko te fakapapau maʼuhiga ʼa te ʼAtua ʼaē neʼe feala ai ke pule ʼo talu ai. Tou manatuʼi age muʼa, ʼe hoko tuʼumaʼu pē ia te ʼu fakapapau ʼa te ʼAtua.—Isaia 55:10, 11.

ʼE tou maʼu te ʼu ako maʼuhiga e lua ʼi te kāpite 7 ʼo 2 Samuele. ʼUluaki, ʼe tou falala ʼe mole he meʼa peʼe ko he tahi ʼe ina lava tāʼofi ia Sesu Kilisito ke pule. Koia, ʼe feala ke tou tui papau ʼe ina fakahoko kātoa anai te fakatuʼutuʼu ʼo te finegalo ʼo te ʼAtua ʼi te kele ohagē ko selō, ʼo mulimuli pē ki te ʼu palalau ʼaē neʼe ina fai.—Mateo 6:9, 10.

Lua, ʼaki te fakamatala ʼaenī ʼe tou ako te ʼulugaaga ʼo Sehova. Tou manatuʼi neʼe ʼiloʼi e Sehova ia te loto ʼo Tavite, pea mo mahino kiai. ʼE ko he meʼa fakalotofīmālie tatatou ʼiloʼi ʼaē ko Sehova ʼe ina ʼiloʼi pea mo mahino ki tatatou tauhi fakamālotoloto ʼaē kiā te ia. ʼI ʼihi lakaga, ʼe ʼi ai totatou ʼu tuʼakoi, ohagē ko te mahaki peʼe ko te vaivai matuʼa ʼe lagi feala ai ke mole tou fai ia meʼa fuli ʼaē ʼe holi kiai totatou loto ʼi te tauhi ʼaē ki te ʼAtua. Kapau ʼe tou tau mo he ʼu ʼaluʼaga fēia, pea ʼofa pē ke tou maʼu he loto fakafīmālie ʼaki tatatou ʼiloʼi ʼaē ko Sehova ʼe mahino ki te ʼu meʼa fuli ʼaē ʼi te loto ʼo he tahi ʼe tauhi fakamālotoloto age kiā te ia.

[Nota]