ʼAua Naʼa Kotou Fakamamahiʼi Te Laumālie Māʼoniʼoni ʼo Sehova

“ ʼAua naʼa kotou fakamamahiʼi te laumālie māʼoniʼoni, ʼaē neʼe fakaʼiloga ai koutou.”​—EFE. 4:30.

 1. Koteā ʼaē neʼe fai e Sehova maʼa te ʼu toko lauʼi miliona hahaʼi, pea ko te maʼua fea ʼaē kua natou maʼu?

 NEʼE fai e Sehova te faʼahi makehe maʼa te ʼu toko lauʼi miliona hahaʼi ʼe māʼuʼuli nei ʼi te mālama maveuveu ʼaenī. Neʼe ina fakafealagia kiā nātou ke natou fakaovi kiā te ia ʼaki tona ʼAlo ʼulu tokotahi, ia Sesu Kilisito. (Soa. 6:44) ʼE kotou kau mo koutou iā nātou ʼaia mo kapau kua kotou foaki tokotou maʼuli ki te ʼAtua pea mo kotou maʼuliʼi te ʼu meʼa ʼaē ʼe ʼalutahi mo te faʼahi ʼaia. Mai tona ʼaluʼaga ʼaē kua kotou papitema ʼi te huafa ʼo te laumālie māʼoniʼoni, kua fakamaʼua kiā koutou ke kotou fakalogo ki te takitaki ʼa te laumālie ʼaia.—Mat. 28:19.

 2. Ko te ʼu fehuʼi fea ʼaē kā tou vakaʼi anai?

² Ko tātou ʼaē ʼe tou “tō maʼa te laumālie” kua  tou kofuʼi te ʼulugaaga foʼou. (Kal. 6:8; Efe. 4:17-24) Kae ʼe foaki mai e te ʼapositolo ko Paulo ia te tokoni pea mo ina fakatokagaʼi mai tātou ke ʼaua naʼa tou fakamamahiʼi te laumālie māʼoniʼoni ʼo te ʼAtua. (Lau ia Efesi 4:25-32.) Tou vakaʼi age muʼa te tokoni ʼaenī ʼa te ʼapositolo. Koteā ʼaē neʼe fia ʼui e Paulo ʼi tana ʼui ʼaē ke ʼaua naʼa fakamamahiʼi te laumālie ʼo te ʼAtua? ʼE feafeaʼi ki he tahi kua ina foaki tona maʼuli kiā Sehova hana fai ia te faʼahi ʼaia? Pea ʼe feafeaʼi hatatou tōkakaga naʼa tou fai he meʼa ʼe tou fakamamahiʼi ai ia te laumālie ʼo Sehova?

Te Fakaʼuhiga ʼo Te ʼu Palalau ʼa Paulo

 3. ʼE feafeaʼi anai hakotou fakamahino ia te fakaʼuhiga ʼo te ʼu palalau ʼaē iā Efesi 4:30?

³ ʼUluaki, kotou fakatokagaʼi te ʼu palalau ʼa Paulo ʼaē iā Efesi 4:30. Neʼe ina tohi fēnei: “ ʼAua naʼa kotou fakamamahiʼi te laumālie māʼoniʼoni ʼo te ʼAtua, ʼaē neʼe fakaʼiloga ai koutou ki he ʼaho ʼo te fakaʼāteaina ʼaki te totogi.” Neʼe mole loto e Paulo ke puli ia te agamaʼa ʼa tona ʼu tehina ʼi te faʼahi fakalaumālie. Neʼe ko te laumālie ʼo Sehova ʼaē neʼe ina ‘fakaʼiloga ʼaki ai nātou ki he ʼaho ʼo te ʼāteaina ʼaki te totogi.’ ʼI te temi muʼa pea ʼo aʼu mai ki te temi nei, ko te laumālie māʼoniʼoni ʼo te ʼAtua neʼe ko he meʼa fakamaʼu , peʼe ko he “fakamoʼoni ʼo te meʼa ʼaē kā haʼu” maʼa te kau fakanofo agatonu. (2 Ko. 1:22) Ko te meʼa fakamaʼu ko tona fakaʼuhiga ko te kau Kilisitiano ʼaia ʼe ʼa te ʼAtua pea ʼe natou maʼu anai te maʼuli tuputupua ʼi selō. Ko te toko 144 000 ʼaē kā fakamaʼu fakaʼosi anai.—Fakh. 7:2-4.

 4. He koʼē ʼe maʼuhiga ke mole tou fakamamahiʼi te laumālie ʼo te ʼAtua?

⁴ Ko te fakamamahiʼi ʼo te laumālie ʼe ko he faʼahi ʼe feala ke ina taki ai ki te puli ʼo te mālohi gāue ʼo te ʼAtua ʼi te maʼuli ʼo he Kilisitiano. Ko he faʼahi ʼe feala ke hoko, heʼe hā lelei te faʼahi ʼaia ʼi te ʼu palalau ʼaē neʼe fai e Tavite ʼi tana kua ʼosi agahala ʼaē mo Pati-Sepa. ʼAki he loto fakahemala neʼe kolekole fēnei e Tavite kiā Sehova: “ ʼAua naʼa ke liʼaki au ʼi ʼou muʼa; pea ko tou laumālie māʼoniʼoni, ʼaua naʼa ke toʼo iā te au.” (Pes. 51:11) ʼE gata pē ki te kau fakanofo ʼaē kā “nofo agatonu ʼo kaku ki te mate” ia te maʼu ʼo te “kolona” ʼo te maʼuli tuputupua ʼi selō. (Fakh. 2:10; 1 Ko. 15:53) Ko te kau Kilisitiano ʼaē ʼe ʼamanaki māʼuʼuli ʼi te kele, ʼe toe ʼaoga foki kiā nātou ia te laumālie māʼoniʼoni mo kapau ʼe natou fia nofo agatonu ki te ʼAtua pea mo maʼu te maʼuli ʼaki tanatou tui ʼaē ki te sākilifisio faitotogi ʼa Kilisito. (Soa. 3:36; Loma 5:8; 6:23) Koia ʼaē, ko tātou fuli ʼe tonu ke tou nofo tokaga naʼa tou fakamamahiʼi te laumālie māʼoniʼoni ʼo Sehova.

ʼE Feafeaʼi Ki He Kilisitiano Hana Fakamamahiʼi Te Laumālie Māʼoniʼoni?

5, 6. ʼE feafeaʼi ki he Kilisitiano hana fakamamahiʼi te laumālie ʼo Sehova?

⁵ ʼI totatou ʼuhiga Kilisitiano kua papitema, ʼe feala hatatou mole fakamamahiʼi te laumālie. ʼE feala te faʼahi ʼaia, mo kapau ʼe tou ‘haga haʼele pea mo maʼuli ʼaki te laumālie,’ heʼe mole feala ai anai ke tou higa ki he ʼu holi ʼe kovi pea ʼe mole tou fai ai anai he ʼu aga ʼe fakafeagai ki te ʼAtua. (Kal. 5:16, 25, 26) Kae ʼe feala ki te ʼaluʼaga ʼaia ke fetogi. ʼE feala ke tou fakamamahiʼi te laumālie ʼo te ʼAtua mo kapau ʼe tou fakagafua ia tātou totonu ke tou vaivai, ʼo lagi mole tou ʼiloʼi totatou vaivai, ʼo ʼuhiga mo he aga ʼe tauteaʼi e te Folafola ʼa te ʼAtua.

⁶ Kapau ʼe tou fakafeagai hoholo atu ki te takitaki ʼa te laumālie māʼoniʼoni, ʼe tou fakamamahiʼi anai te laumālie pea mo Sehova, ia te Matapuna ʼo te laumālie ʼaia. ʼI tatatou vakaʼi te koga tohi ʼo Efesi 4:25-32, ʼe tou ʼiloʼi ai anai peʼe tonu ke feafeaʼi tatatou aga, pea ʼe feala ke tokoni mai ke mole tou fakamamahiʼi te laumālie ʼo te ʼAtua.

ʼE Feafeaʼi He Mole Fakamamahiʼi ʼo Te Laumālie Māʼoniʼoni?

7, 8. Fakamahino pe koʼē ʼe tonu ke tou palalau ʼaki te moʼoni.

⁷ ʼE tonu ke tou palalau ʼaki te moʼoni. Iā Efesi 4:25, neʼe tohi fēnei e Paulo: “ ʼI te temi ʼaenī kua kotou liʼaki ai te loi, kotou tahi tala te moʼoni ki tona kāiga, heʼe ko tātou ko te ʼu koga ʼo te meʼa e tahi.” Mai tona ʼaluʼaga ʼaē ʼe tou logotahi heʼe “ko tātou ko te ʼu koga ʼo te meʼa e tahi,” ʼe mahino ia ʼe mole tou faiga anai ke tou kākāʼi totatou ʼu tehina mo tuagaʼane, heʼe ko te aga ʼaia ʼe tatau ʼosi pē mo hatatou loiʼi nātou. Ko nātou ʼaē ʼe natou hoko atu pē te aga ʼaia, ʼe ko tona ikuʼaga ʼe mole natou toe maʼu ia he felōgoi pea mo te ʼAtua.—Lau ia Tāʼaga Lea 3:32.

⁸ Ko te ʼu palalau pea mo te ʼu aga fakakākā, ʼe  feala ai ke puli ia te logotahi ʼa te kōkelekāsio. Koia, ʼe tonu ai ke tou hagē ko te polofetā ko Taniela ʼaē ʼe tuha mo te falala, neʼe mole feala ki ʼihi ke natou maʼu he kākā iā te ia. (Tan. 6:4) Pea ʼe tonu ke tou manatuʼi te tokoni ʼa Paulo ki te kau Kilisitiano ʼaē ʼe ʼolo ki selō, ʼaē neʼe ina ʼui ko te hahaʼi fuli ʼo “te sino ʼo Kilisito” ʼe natou pipiki tahi fuli pea ʼe ʼaoga ke natou logotahi pea mo te ʼu tisipulo fakanofo moʼoni ʼa Sesu. (Efe. 4:11, 12) Kapau ʼe tou fia māʼuʼuli ʼo heʼegata ʼi te Palatiso ʼi te kele, pea ʼe tonu mo tātou ke tou palalau ʼaki te moʼoni, heʼe ko he faʼahi ʼe tokoni ki te logotahi ʼo totatou foʼi fāmili fakatautēhina ʼi te mālamanei.

 9. He koʼē ʼe maʼuhiga ke tou fakalogo ki te tokoni ʼaē iā Efesi 4:26, 27?

⁹ ʼE tonu ke tou fakafeagai ki te Tēvolo, ʼo mole tou tuku he fakafealagia ki ai ke ina maumauʼi totatou maʼuli fakalaumālie. (Sake 4:7) ʼE tokoni mai ia te laumālie māʼoniʼoni ke tou fakafeagai kiā Satana. Ohagē lā, ʼe feala ke tou fai te faʼahi ʼaia ʼaki hatatou tōkakaga naʼa mole tou matātāʼofi hotatou ʼita. Neʼe tohi fēnei e Paulo: “Kotou ʼiʼita, kae ʼaua naʼa kotou agahala; ke ʼaua naʼa tō te laʼā ki tokotou ʼita, pea ʼaua naʼa kotou tuku he faigamālie ki te Tēvolo.” (Efe. 4:26, 27) Kapau ʼe tou ʼita tonu, ko he faikole fakalogologo fakavilivili ʼe feala ke tokoni mai ke tou ‘malū ifo,’ ʼo tou fakahā he loto lolomi naʼa feala pē ke tou fakamamahiʼi te laumālie ʼo te ʼAtua. (Taag. 17:27) Koia ʼaua naʼa tou nofo mo hotatou ʼita pea ʼaua naʼa tou foaki kiā Satana he faigamālie moʼo fakaneke ai tātou ke tou fai he meʼa ʼe kovi. (Pes. 37:8, 9) Ko he puleʼaki moʼo fakafeagai ki ai, ke tou mulimuli ki te tokoni ʼa Sesu, ʼo tou foimo fakatokatoka te ʼu fihifihia.—Mat. 5:23, 24; 18:15-17.

10, 11. He koʼē ʼe mole tonu ke tou kaihaʼa peʼe tou fai he aga fakakākā?

¹⁰ ʼE mole tonu ke tou tō ki te fakahala ʼaē ko te kaihaʼa peʼe ko te aga fakakākā. ʼO ʼuhiga mo te kaihaʼa, neʼe tohi fēnei e Paulo: “Ke ʼaua naʼa toe kaihaʼa te tagata kaihaʼa, kae ke gāue kinakina ʼaki tona ʼu nima ke maʼu hana meʼa ke ina foaki ki ʼaē ʼe nofo ʼi te faigataʼaʼia.” (Efe. 4:28) Kapau ko he Kilisitiano kua foaki tona maʼuli ki te ʼAtua neʼe kaihaʼa, pea ʼe mahino ia ʼe ina ‘ ʼulihi anai te huafa ʼo te ʼAtua’ ʼaki he ʼu laukovi ʼe fai mai anai ki tona huafa. (Taag. 30:7-9) Māʼiapē lā mo he tahi ʼe maʼuli masiva, ʼe mole ko he takuʼaki ʼaia ke kaihaʼa. Ko nātou ʼaē ʼe natou ʼofa ki te ʼAtua pea mo tonatou kāiga, ʼe natou mahino ʼe mole ʼi ai he takuʼaki ke kita kaihaʼa ai.—Mko. 12:28-31.

¹¹ ʼE mole talanoa pē Paulo ʼo ʼuhiga mo te aga ʼaē ʼe mole tonu ke tou fai; kae ʼe ina toe fakahā mai mo te aga ʼaē ʼe tonu ke tou fai. Kapau ʼe tou maʼuli pea mo haʼele ʼaki te laumālie māʼoniʼoni, pea ʼe tou gāue kinakina anai ke feala ai hatatou taupau te maʼuli fakasino ʼo totatou fāmili pea mo maʼu hatatou “meʼa ke [tou] foaki ki ʼaē ʼe nofo ʼi te faigataʼaʼia.” (1 Tim. 5:8) Ko Sesu pea mo tana ʼu ʼapositolo neʼe natou taupau he falā moʼo tokoni ki te hahaʼi māsisiva, kae ko te tagata kākā ko Sutasi Isikaliote neʼe ina kaihaʼa te tahi koga ʼo te falā. (Soa. 12:4-6) ʼE mahino ia neʼe mole taki ia ia e te laumālie māʼoniʼoni. Ohagē ko tona ʼui e Paulo, ko tātou ʼaē ʼe takitaki e te laumālie ʼo te ʼAtua, ʼe tou  “aga fakahagatonu iā meʼa fuli pē.” (Hep. 13:18) Koia ʼe mole tou fakamamahiʼi ai te laumālie māʼoniʼoni ʼo Sehova.

Ko Te Tahi ʼu ʼAluʼaga Ke ʼAua Naʼa Fakamamahiʼi Ai Te Laumālie Māʼoniʼoni

12, 13. (a) Ohagē ko tona fakahā iā Efesi 4:29, ko te faʼahiga palalau fea ʼaē ʼe tonu ke tou tekeʼi? (b) ʼE tonu ke feafeaʼi tatatou ʼu palalau?

¹² ʼE tonu ke tou tōkakaga ki tatatou ʼu palalau. Neʼe ʼui fēnei e Paulo: “Ke ʼaua naʼa haʼu he palalau ʼuli mai tokotou gutu, kae ko he ʼu lea ʼe lelei moʼo laga mokā ʼe ʼaoga, ke feala hona ʼaoga kiā nātou ʼaē ʼe fagono kiai.” (Efe. 4:29) Ohagē ko tona ʼui ʼi te palakalafe ʼi muʼa atu, ʼe mole gata pē te fakahā mai e Paulo ia te ʼu meʼa ʼaē ʼe mole tonu ke tou fai, kae ʼe ina toe ʼui mai te ʼu meʼa ʼaē ʼe tonu ke tou fai. ʼAki te takitaki ʼa te laumālie ʼo te ʼAtua, ʼe uga ai anai tātou ke tou ‘fai he ʼu palalau ʼe lelei moʼo fakatuputupu ke feala ke malave lelei kiā nātou ʼaē ʼe fakalogo.’ Tahi ʼaē, ʼe mole tonu ke haʼu mai totatou gutu ia he “palalau ʼuli.” Ko te kupu fakakeleka ʼaē neʼe fakaliliu mai ai te kupu “ ʼuli” neʼe fakaʼaogaʼi moʼo fakamahino he fuaʼi ʼakau kua pala, peʼe ki he ʼika peʼe ko he kanoʼi manu kua mamanu. Ohagē pē ko tatatou fakalialia ʼaē ki he meʼa kai kua mamanu, ʼe tou fēhihiʼa ki te palalau ʼaē ʼe kovi kiā Sehova.

¹³ ʼE tonu ki tatatou ʼu palalau ke fakaʼapaʼapa, pea mo lelei, mo “konakonaʼi ʼaki te masima.” (Kol. 3:8-10; 4:6) ʼE tonu ke ʼiloʼi e te hahaʼi ʼe tou kehe mo nātou ʼaki pē hanatou logo ki tatatou ʼu palalau. Koia tou tokoni ki ʼihi, ʼo tou fai te palalau ʼaē “ ʼe lelei moʼo laga.” Pea ʼofa pē ke tou hagē ko te tagata fai pesalemo ʼaē neʼe hiva fēnei: “Ke liliu te ʼu palalau ʼo toku gutu pea mo te metitāsio ʼo toku loto ʼo lave lelei ʼi muʼa iā te koe, Ê Sehova, toku Maka pea mo toku Fakamaʼuli!”—Pes. 19:14.

14. ʼO mulimuli kiā Efesi 4:30, 31, koteā ʼaē ʼe tonu ke tou taʼaki iā tātou?

¹⁴ ʼE tonu ke toʼo iā tātou te ʼu lotokovi, mo te ʼita, mo te lea kovi fuli pē, pea mo te agakovi fuli pē. ʼI tana ʼosi fakatokagaʼi ia te kau Kilisitiano ʼo ʼuhiga mo te fakamamahiʼi ʼo te laumālie ʼo te ʼAtua, neʼe tohi fēnei e Paulo: “Ke toʼo iā koutou te lotokovi fuli pē, te ʼita fuli pē, te hauhau fuli pē, te kalaga fuli pē, te lea kovi fuli pē, pea mo te agakovi fuli pē.” (Efe. 4:30, 31) ʼI totatou ʼuhiga heʼe haohaoa, ʼe tonu kiā tātou fuli ke tou gāue mālohi moʼo lolomi tatatou ʼu manatu pea mo tatatou ʼu aga. Kapau ʼe tou tuku ke puleʼi tātou e “te lotokovi fuli pē, te ʼita fuli pē, te hauhau fuli pē,” pea ʼe tou fakamamahiʼi anai te laumālie ʼo te ʼAtua. ʼE toe ʼaoga te tokoni ʼaia mo kapau ʼe tou nofo mo hotatou ʼita kiā ia ʼaē neʼe lakahala mai kiā tātou, ʼo tou lotokovi ai, pea mo fakafisi ke tou ʼolo ʼo fakatokatoka te fihifihia mo ia. Māʼia mo kapau ʼe tou kamata meʼa noaʼi te tokoni Fakatohi-tapu, pea ʼe feala pē anai ke tuputupu iā tātou he ʼu manatu ʼe taki anai ki te agahala ʼaē ki te laumālie pea ʼe feala ke tou tuʼutāmakiʼia ai.

15. Kapau ʼe fai mai he palalau kovi kiā tātou, koteā ʼaē ʼe tonu ke tou fai?

¹⁵ ʼE tonu ke tou agalelei, mo manavaʼofa, pea mo loto fakamolemole. Neʼe tohi fēnei e Paulo: “Ke kotou liliu ʼo feagaleleiʼaki, fonu ʼi te manavaʼofa, ʼo kotou fefakamolemoleʼaki, ohagē ko te fakamolemole ʼa te ʼAtua kiā koutou ʼaki ia Kilisito.” (Efe. 4:32) Tatau aipē peʼe tou lotomamahi ʼaupitō ʼi he agakovi neʼe fai mai, kae tou loto fakamolemole, ohagē ko te ʼAtua. (Luka 11:4) Tou fakakaukauʼi age muʼa, neʼe fai e he tahi he palalau kovi ʼo ʼuhiga mo tātou, pea ʼaki he manatu fakatokatoka ʼe tou fakaovi ki ai. ʼE ina fakahā ʼe lotomamahi moʼoni pea mo faifakalelei mai. Koia ʼe tou fakamolemole ki ai, kae ʼe ʼi ai te tahi age meʼa ʼe tonu ke tou fai. ʼE ʼui fēnei iā Levitike  19:18: “ ʼE mole tonu anai ke ke lagavaka, peʼe ke taupau hou ʼita ki te ʼu foha ʼo tau hahaʼi; pea ʼe tonu ke ke ʼofa ki tou tatau ohagē pē ko koe totonu. Ko au Sehova.”

ʼE Tonu Ke Tou Nofo Tōkakaga

16. Tuku mai he faʼifaʼitaki, ʼe fakahā ai te ʼaoga ʼaē ke tou fai he ʼu fetogi ke mole tou fakamamahiʼi ai te laumālie ʼo Sehova.

¹⁶ Māʼia mo te ʼu temi ʼaē ʼe tou tō ʼāteaina ai, pea ʼe feala ke tou fia fai he meʼa ʼe mole leleiʼia e te ʼAtua. Ohagē lā, ʼe feala ki he tehina ke ina fakalogologo he ʼu musika ʼe mole tāu mo feʼauga ki he Kilislitiano. ʼAki te temi, pea vevele tona leʼo ʼo loto he neʼe ina meʼa noaʼi te tokoni ʼo te Tohi-Tapu ʼaē ʼe maʼu ʼi te ʼu tohi neʼe tā e te “tagata kaugana agatonu mo poto.” (Mat. 24:45) ʼE feala ke ina hūfakiʼi tona fihifihia ʼaia pea lagi ina manatuʼi te ʼu palalau ʼaē ʼa Paulo iā Efesi 4:30. ʼE fakatotonu mālohi ia ke mole ina fai he meʼa ʼe ina fakamamahiʼi ai anai ia te laumālie ʼo te ʼAtua, pea ʼe fakatotonu atu nei ia ke mole ina fakalogo ki te ʼu musika ʼaē ʼe kovi. ʼE tapuakina anai e Sehova ia te aga ʼaia ʼa te tehina. Koia la ʼaē, tou tōkakaga tuʼumaʼu naʼa tou fakamamahiʼi te laumālie ʼo te ʼAtua.

17. Koteā anai kā hoko mo kapau ʼe mole tou nofo tokaga pea mo faikole?

¹⁷ Kapau ʼe mole tou nofo tokaga pea mo faikole, ʼe feala pē ke tou higa ki he aga heʼemaʼa peʼe kovi, ʼo tupu ʼaki ai hatatou fakamamahiʼi ia te laumālie. Mai tona ʼaluʼaga ʼaē ko te laumālie māʼoniʼoni ʼe ina fakatupu ia te ʼu kalitātē ʼe ʼalutahi mo te ʼulugaaga ʼo tatatou Tamai ʼaē ʼe ʼi selō, koia kā tou fakamamahiʼi pea ko te ʼAtua ʼaē ʼe tou fakamamahiʼi, pea ko te faʼahi ʼaia ʼe mahino ia ʼe mole tou loto anai ke hoko. (Efe. 4:30, kiʼi nota.) Neʼe agahala te kau sekelipa Sutea ʼo te ʼuluaki sēkulō, ʼo natou lau ko te ʼu milakulo ʼa Sesu neʼe fai ʼaki te mālohi ʼo Satana. (Lau ia Maleko 3:22-30.) Ko te ʼu fili ʼaia ʼo Kilisito neʼe ‘fasituʼu ki te laumālie māʼoniʼoni’ pea neʼe natou fai ia te agahala ʼaē ʼe mole maʼu he fakamolemole kiai. ʼOfa pē ke ʼaua naʼa tou aga fēia ʼi he temi!

18. ʼE feafeaʼi hatatou ʼiloʼi neʼe mole tou fai te agahala ʼaē ʼe mole maʼu kiai te fakamolemole?

¹⁸ Mai tona ʼuhiga ʼaē ʼe mole tou fia fai pē lā he kiʼi hala ʼe feala ke taki ai tātou ki te agahala ʼaē ʼe mole he fakamolemole kiai, pea ʼe tonu ke tou manatuʼi te ʼu palalau ʼaē neʼe fai e Paulo ke mole fakamamahiʼi te laumālie. Kae ʼe feafeaʼi mo kapau kua tou agahala mamafa? Kapau kua tou fakahemala, pea neʼe kua tokoniʼi tātou e te ʼu tagata ʼāfea, pea kua feala ke tou ʼui kua fakamolemole mai te ʼAtua kiā tātou, pea neʼe mole tou fai te agahala ʼaē ʼe fakafeagai ki te laumālie māʼoniʼoni. ʼAki te tokoni ʼa te ʼAtua, ʼe feala foki ke mole tou toe fakamamahiʼi te laumālie.

19, 20. (a) Koteā te ʼu meʼa ʼaē ʼe tonu ke tou tekeʼi? (b) Koteā ʼaē ʼe tonu ke tou fakatototonu ke tou fai?

¹⁹ ʼAki tona laumālie māʼoniʼoni, ʼe fakatuputupu ai e te ʼAtua ia te ʼofa, mo te fiafia, pea mo te logotahi ʼo tana hahaʼi. (Pes. 133:1-3) Koia, tou tōkakaga naʼa tou fakamamahiʼi te laumālie māʼoniʼoni ʼuhi neʼe tou fai fatufatu pe neʼe tou fai he palalau heʼe fakaʼapaʼapa ʼo ʼuhiga mo te kau tauhi ovi ʼaē neʼe fakanofo ʼaki te laumālie. (Gāue 20:28; Suta 8) Kae ʼe tonu ke tou lagolago ki te logotahi pea mo tou fefakaʼapaʼapaʼaki ʼi te kōkelekāsio. ʼE mahino papau ia, ʼe mole tou loto anai ke tahi faʼufaʼu ʼi te hahaʼi ʼa te ʼAtua ia he ʼu kiʼi kūtuga ʼe natou fakatahitahi tuʼumaʼu pē iā nātou. Neʼe tohi fēnei e Paulo: “ ʼE au tokoni atu kiā koutou, ʼu tehina, ʼaki te huafa ʼo totatou ʼAliki ko Sesu Kilisito, ke kotou palalau fuli ʼi he logotahi, pea ke ʼaua naʼa ʼi ai he ʼu maveuveu iā koutou, kae ke kotou logotahi fakalelei ʼi he laumālie pē e tahi pea mo he manatu e tahi.”—1 Ko. 1:10.

²⁰ ʼE loto e Sehova ke mole tou fakamamahiʼi tona laumālie pea ʼe feala ke tokoni mai kiā tātou. ʼOfa pē ke tou haga kole te laumālie māʼoniʼoni pea ke tou fakatotonu ke mole tou fakamamahiʼi te laumālie ʼaia. ʼOfa pē ke tou haga “tō maʼa te laumālie,” ʼo tou kumi fakamālotoloto tana takitaki ʼi te temi nei pea mo heʼegata.

ʼE Kotou Tali Feafeaʼi Anai?

• Koteā te fakaʼuhiga ʼo te ʼui ʼaē ke fakamamahiʼi te laumālie ʼo te ʼAtua?

• ʼE feafeaʼi ki he tahi kua foaki tona maʼuli kiā Sehova hana fakamamahiʼi tona laumālie?

• Ko te ʼu ʼaluʼaga fea ʼaē ʼe feala ai ke tou fakamamahiʼi te laumālie māʼoniʼoni?

[ʼU fehuʼi ʼo te ako]

[Paki ʼo te pasina 30]

Foimo fakatokatoka te ʼu tokakovi

[Paki ʼo te pasina 31]

Ko te fua fea ʼaē ʼe ina fakatātā lelei takotou ʼu palalau?