Te ʼu Meʼa ʼAē Neʼe Akoʼi e Sesu ʼo ʼUhiga Mo Ia Totonu

“Neʼe ʼiloʼi papau e Sesu pe neʼe ko ai ia ia, mo tona haʼuʼaga, mo te tupuʼaga ʼo tana haʼu ki tatatou mālama, pea mo tona kā haʼu.”—TE TAGATA FAITOHI KO HERBERT LOCKYER.

ʼI MUʼA ʼo hatatou tali pea mo tui ki te ʼu meʼa ʼaē neʼe akoʼi e Sesu, ʼe ʼi ai te ʼu faʼahi ʼe tonu ke tou ʼiloʼi ʼo ʼuhiga mo ia. Neʼe ko ai moʼoni koa ia Sesu? Neʼe haʼu maifea? Koteā te tupuʼaga ʼo tona maʼuli? ʼI te ʼu Evaselio ʼo Mateo, mo Maleko, mo Luka pea mo Soane, ʼe tali e Sesu totonu ki te ʼu fehuʼi ʼaia.

Neʼe kua maʼuli ia ʼi muʼa ʼo tana tupu ʼi te kele Neʼe ʼui fēnei e Sesu ʼi te tahi lakaga: “ ʼI muʼa ʼo te tupu mai ʼa Apalahamo, neʼe kua au maʼuli au.” (Soane 8:58) Neʼe maʼuli Apalahamo iā teitei taʼu e 2 000 ʼi muʼa ʼo te tupu ʼa Sesu. Kae neʼe kua maʼuli ia Sesu māʼia ʼi muʼa ʼo te tupu ake ʼo te pāteliaka agatonu ʼaia. Kae neʼe maʼuli ʼifea Sesu? Neʼe ina fakamahino fēnei: “Neʼe au hifo mai te lagi.”—Soane 6:38.

ʼE ko Te ʼAlo ʼo te ʼAtua ʼE maʼu e Sehova tona ʼu foha tokolahi ʼe ko te ʼu ʼāselo. Kae ʼe mole he tahi ʼe hagē ko Sesu. Neʼe ʼui e Sesu ʼo ʼuhiga mo ia totonu ko ia “te ʼAlo ʼulu tokotahi ʼo te ʼAtua.” (Soane 3:18) Ko tona fakaʼuhiga ko Sesu ʼe ko ia tokotahi ʼaē neʼe faʼu tokotahi pē e te ʼAtua. ʼAki ia te ʼAlo ʼulu tokotahi ʼaia, neʼe fakatupu ai leva e te ʼAtua ia te tahi ʼu meʼa fuli pē.—Kolose 1:16.

Ko ia ko “Te Foha ʼo te tagata” Neʼe fakaʼaogaʼi e Sesu ia te kupuʼi palalau ʼaia ʼo lahi age ʼi te tahi ʼu higoa neʼe ina fakaʼaogaʼi moʼo palalau ʼo ʼuhiga mo ia. (Mateo 8:20) Neʼe ina fakahā ai neʼe mole ko he ʼāselo neʼe ina kofuʼi ia he sino tagata peʼe ko he tahi neʼe toe tupu ake ʼi he tahi sino. Kae neʼe maʼuli fakatagata talu mai tona fuafatuʼi ʼo aʼu ki tona mate. ʼAki tona laumālie māʼoniʼoni, ko te ʼAtua neʼe ina tuku ifo mai te lagi ia te maʼuli ʼo tona ʼAlo ki te kele, ʼo fuafatuʼi ʼi te fatu ʼo te tāupoʼou ko Malia. Koia, neʼe tupu ake Sesu ko he tagata haohaoa, neʼe mole agahala.—Mateo 1:18; Luka 1:35; Soane 8:46.

Ko ia te Mēsia ʼaē neʼe fakapapau Neʼe ʼui fēnei e te fafine Samalitana kiā Sesu: “ ʼE au ʼiloʼi ko te Mēsia ʼe haʼu.” Neʼe ina tali age fēnei: “Ko au ʼaenī ʼe palalau atu kiā te koe, ko au ia ia.” (Soane 4:25, 26) Ko te kupu “Mēsia” ohagē ko te kupu “Kilisito,” ʼe fakaʼuhiga ki te kupu “Fakanofo.” Ko Sesu neʼe fakanofo, pe neʼe fili e te ʼAtua, ki he gāue makehe moʼo fakahoko te ʼu fakapapau ʼa te ʼAtua.

Te tupuʼaga tāfito ʼo tana haʼu ki te kele Neʼe ʼui fēnei e Sesu ʼi te tahi lakaga: “ ʼE tonu ke au . . . fakamafola te logo lelei ʼo te puleʼaga ʼo te ʼAtua . . . , heʼe ko te tupuʼaga lā ʼaia ʼo toku fekauʼi mai.” (Luka 4:43) Logolā neʼe ina fai ia te ʼu tuʼuga gāue lelei maʼa te hahaʼi ʼaē neʼe faigataʼaʼia, kae neʼe ina fakamaʼuhigaʼi tuʼumaʼu ia te fakamafola ʼo te Puleʼaga ʼa te ʼAtua. ʼE tou vakaʼi anai ʼi te ʼu pāsina ʼaē kā hoa mai ia te ʼu meʼa ʼaē neʼe ina akoʼi ʼo ʼuhiga mo te Puleʼaga ʼaia.

ʼE hā lelei mai ko Sesu neʼe ko he tagata neʼe makehe. a ʼE tou vakaʼi anai, ko te maʼuli ʼa Sesu ʼi selō, neʼe ina fakafealagia ke ina fai he ʼu palalau ʼe maʼuhiga age ʼi tana maʼuli ʼi te kele. Koia ʼe mole tou punamaʼuli ai ki tana fakamafola ia he logo ʼe kei malave ki te maʼuli ʼo te ʼu lauʼi miliona hahaʼi ʼi te mālamanei kātoa.

[Nota]