Kua Ovi Mai Te ‘Temi ʼAē Kua Fakakatofa’

OHAGĒ ko te polofetā ko Hapakuke, neʼe fakaʼamu ia te ʼu tisipulo ʼa Sesu ke natou sio ki te fakatagata ʼo te ʼu mamahi. ʼI tanatou ʼiloʼi ʼaē ko te Puleʼaga ʼo te ʼAtua ʼe ina fakatokatoka anai te ʼu fihifihia ʼo te kele, neʼe natou fehuʼi fēnei age kiā Sesu: “Ko ʼāfea ʼaē kā hoko ai anai te ʼu meʼa ʼaia, pea koteā anai te fakaʼiloga ʼo tau ʼi henī [ʼi tona ʼuhiga pule Fakahau] pea mo te fakaʼosi ʼo te tuʼu ʼo te ʼu faʼahiga meʼa ʼaenī?” (Mateo 24:3) Moʼo tali kiai, neʼe ʼui age e Sesu ʼe gata pē kiā Sehova ʼAtua ʼe ina ʼiloʼi te temi totonu ʼaē kā pule kātoa ai anai ia te Puleʼaga ki te kele. (Mateo 24:36; Maleko 13:32) Kae ko Sesu pea mo ʼihi neʼe natou fakakikite ia te ʼu meʼa ʼaē kā hoko anai ʼi te kele, pea ʼe fakahā ai anai ia te kua ovi mai ʼo te temi fakaʼosi.—Vakaʼi te  fakamatala ʼaē ʼe ʼātakai ʼi te faʼahi mataʼu.

ʼE mole kotou fakamoʼoni koa lā ko te ʼu meʼa ʼaia ʼe hoko moʼoni ʼi totatou temi? Neʼe toe fakakikite e Sesu, ʼe fai anai ʼi te mālamanei kātoa ia te ako. Neʼe ina ʼui fēnei: “Ko te logo lelei ʼaenī ʼo te puleʼaga ʼe fakamafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.”—Mateo 24:14.

Pea ʼe lolotoga hoko nei. Ko te kau Fakamoʼoni ʼa Sehova ʼe natou lolotoga fai nei ia te gāue ʼaia. Iā fenua e 236, ko te kau Fakamoʼoni e fitu miliona tupu ʼe natou tala ki te hahaʼi te gāue ʼaē kā fai anai e te Puleʼaga, pea ʼe natou tokoni kiā nātou ke natou fakaʼalutahi ia tonatou maʼuli mo te ʼu lēkula faitotonu ʼa te ʼAtua, ʼaē ko tona finegalo ke ina fakagata te mamahi. Hoko atu takotou ako ke kotou mahino ki te Puleʼaga ʼo te ʼAtua, pea ʼe kotou maʼu ai anai te ʼamanaki ʼaē ke kotou māʼuʼuli ʼi he mālama ʼe mole toe ʼi ai anai te mamahi, ʼo talu ai.

[Talanoa ʼo te pasina 8]

 Te ʼu Vaega Fakatohi-tapu ʼe Talanoa Ai Ki Te ʼu ʼAho Fakamuli

MATEO 24:6, 7; FAKAHĀ 6:4

• Te ʼu tau ʼe mole hona ʼu fakatatau

MATEO 24:7; MALEKO 13:8

• Te ʼu mafuike lalahi

• Te ʼu hoge

LUKA 21:11; FAKAHĀ 6:8

• Te ʼu taʼi mahaki

MATEO 24:12

• Te ʼāsilisili ʼo te manukinukiʼi ʼo te lao

• Te puli ʼo te ʼofa

FAKAHĀ 11:18

• Te maumauʼi ʼo te kele

2 TIMOTEO 3:2

• Te manako fakavale ki te paʼaga

• Te talagataʼa ki te ʼu mātuʼa

• Te tahi ʼofa pē kiā kita totonu

2 TIMOTEO 3:3

• Te heʼeʼofa

• Te mole kei felōgoi ʼa te hahaʼi

• Te mole kei ʼi ai ʼo te loto lolomi

• Te mole kei manako ki te lotoʼofa

2 TIMOTEO 3:4

• Ko te kaumeʼa mo te ʼu fakafiafia kae mole kaumeʼa mo te ʼAtua

2 TIMOTEO 3:5

• Tokolahi te hahaʼi ʼe natou ʼui fakamalualoi ʼe natou Kilisitiano

MATEO 24:5, 11; MALEKO 13:6

• Tokolahi te kau polofetā loi

MATEO 24:9; LUKA 21:12

• Te fakatagaʼi ʼo te kau Kilisitiano moʼoni

MATEO 24:39

• ʼE mole tokagaʼi e te hahaʼi te ʼu fakatokaga Fakatohi-tapu

[Paki ʼo te pasina 8]

ʼI te mālamanei kātoa, ko te kau Fakamoʼoni ʼa Sehova ʼe natou akoʼi ki te hahaʼi ke natou mahino ki te Puleʼaga ʼo te ʼAtua