ʼE Kotou Lava Mahino Feafeaʼi Ki Te Tohi-Tapu?

 1. Kotou Kole Tokoni Ki Te ʼAtua

Ko Ninfa ʼe maʼuli ʼi Italia ʼe ina ʼui fēnei: “ ʼI te tahi temi neʼe au lau te Tohi-Tapu ʼi muʼa ʼo taku moe. Neʼe au fai te faʼahi ʼaia he neʼe au ʼiloʼi ʼe ko te Folafola ʼaia ʼa te ʼAtua, pea logolā taku mole fiafia ʼi tona lau, kae neʼe au fia ʼiloʼi pe koteā ʼaē neʼe tohi e te ʼAtua ʼi te Tohi-Tapu. Neʼe au fakatuʼutuʼu ai leva ke au lau kātoa. ʼI te kamata neʼe faigafua, kae ʼi taku aʼu leva ki te ʼu faʼahi ʼaē neʼe faigataʼa ai taku mahino kiai, neʼe mole au hoko atu taku lautohi.”

NEʼE kua hoko koa kiā koutou he meʼa fēia? Neʼe hoko te faʼahi ʼaia ki te hahaʼi tokolahi. Kae ohagē ko tatatou vakaʼi ʼi te ʼalatike ki muʼa atu, ko Ia ʼaē neʼe ina foaki mai ia te Tohi-Tapu, ia Sehova ʼAtua, ʼe ina loto ke kotou mahino ki tana Folafola. Kae ʼe kotou lava mahino feafeaʼi? Ko te ʼuluaki fakatuʼutuʼu, kotou kole tokoni ki te ʼAtua.

Ko te ʼu ʼapositolo ʼa Sesu neʼe fakaʼuhiga nātou ko he ʼu hahaʼi ‘neʼe mole ako pea ʼe ko te ʼu tagata ohagē pē ko te tagata fuli’ he neʼe mole natou ako ʼi te ʼu faleako ʼa te kau lapi ke akoʼi ai nātou ki te ʼu akonaki fakalotu. (Gāue 4:13) Kae neʼe ʼui fakalelei e Sesu kiā nātou ʼe natou lava mahino ki te Folafola ʼa te ʼAtua. ʼO feafeaʼi? Neʼe fakamahino fēnei e Sesu: “Ko te tokoni, te laumālie māʼoniʼoni, ʼaē kā fekauʼi mai anai e te Tamai ʼi toku huafa, ʼe ko ia ʼaia ʼaē kā ina akoʼi anai kiā koutou te ʼu meʼa fuli ʼaia.” (Soane 14:26) Neʼe fakaʼaogaʼi e te ʼAtua ia te laumālie māʼoniʼoni ʼaia, peʼe ko te mālohi gāue, moʼo fakatupu te kele pea mo te ʼu meʼa maʼuli fuli ʼi te kele. (Senesi 1:2) Neʼe ina toe fakaʼaogaʼi te laumālie moʼo takitaki ia te toko 40 tagata ʼaē neʼe natou tohi tana ʼu manatu ʼi te Tohi-Tapu. (2 Petelo 1:20, 21) ʼE feala ke toe fakaʼaogaʼi ia te laumālie ʼaia moʼo tokoni kiā nātou ʼaē ʼe natou fia mahino ki te Tohi-Tapu.

ʼE kotou lava maʼu feafeaʼi ia te laumālie māʼoniʼoni ʼo te ʼAtua? ʼE tonu ke kotou kole ʼi te tui. ʼI tona fakahagatonu, ʼe lagi ʼaoga ke kotou kole tuʼumaʼu ia te laumālie ʼaia. Neʼe ʼui fēnei e Sesu: “Ke kotou haga kole, pea ʼe foaki atu anai kiā koutou . . . kapau ko koutou, . . . ʼe kotou popoto ʼi te foaki ki ʼakotou ʼu fānau he ʼu meʼa ʼofa ʼe lelei, ʼe feafeaʼi leva lā te lahi ake ia ʼo te foaki e te Tamai ʼaē ʼi selō te laumālie māʼoniʼoni kiā nātou ʼaē ʼe natou kole kiā te ia!” (Luka 11:9, 13) Ko Sehova ʼe ina foaki lahi anai ia tona laumālie māʼoniʼoni kiā nātou ʼaē ʼe natou kole fakamālotoloto age kiā te ia. Ko te mālohi gāue ʼaia ʼe feala ke tokoni atu ke kotou mahino ki te ʼu folafola ʼaē ʼe haʼu mai te ʼAtua, pea neʼe tohi ʼi te Tohi-Tapu kua hili nei kiai taʼu e lauʼi afe. Ko te laumālie ʼo te ʼAtua ʼe feala ke ina toe foaki atu ia te poto ʼaē ke feala ai hakotou maʼuliʼi ia te logo mālohi ʼaē ʼi te Tohi-Tapu.—Hepeleo 4:12; Sake 1:5, 6.

ʼI te temi fuli pē ʼaē ʼe kotou lau ai ia te Tohi-Tapu, kotou faikole ki te ʼAtua, ʼo kotou kole ki ai ia tona laumālie māʼoniʼoni ke tokoni atu ke kotou mahino ki tana Folafola.