Tou Fakamoʼoni Ki Te Moisese Lahi

“Ko Sehova ʼAtua ʼe ina fakatupu anai ʼi tokotou ʼu tehina he polofetā ohagē ko au. ʼE tonu ke kotou fakalogo kiā ia.”—GĀUE 3:22.

 1. Neʼe malave feafeaʼi ia te maʼuli ʼo Sesu Kilisito ki te hisitolia ʼo te mālamanei?

 IĀ TAʼU e lua afe ki muʼa atu, neʼe logoʼi e te kau tagata tauhi ovi ia te fakavikiviki ʼaē neʼe fai e te kau ʼāselo kaugamālie ki te ʼAtua, ʼo ʼuhiga mo te tupu ake ʼa te kiʼi tamasiʼi tagata. (Luka 2:8-14) Iā taʼu e tolugofulu ki muli age, ʼi te kua tagata leva ʼa te kiʼi tamasiʼi ʼaia, neʼe ina kamata tana minisitelio ʼaē neʼe ina fakahoko iā taʼu e tolu vaelua pea neʼe ina fakahoko ai ia he fetogi lahi ʼi te hisitolia ʼa te tagata. Ko te tagata fakamatala hisitolia ʼiloa ʼo te 19 sēkulō ko Philip Schaff neʼe ina ʼui fēnei ʼo ʼuhiga mo te tagata ʼaia: “Neʼe mole ina fai hana tohi, kae ʼe lahi age te ʼu fakamatala ʼaē kua tohi ʼo ʼuhiga mo ia, pea mo lahi age tana ʼu manatu ʼe fakatafito kiai ia te ʼu faiakonaki, te ʼu fai palalau, te ʼu tohi, te ʼu pāki, pea mo te ʼu hiva, ʼo laka age ʼi he foʼi kautau kātoa ʼo te ʼu tagata lalahi ʼo te ʼu temi muʼa pea mo totatou temi.” Kua mahino kiā tātou, ko te tagata fakatalakitupua ʼaia ʼe ko Sesu Kilisito.

 2. Koteā ʼaē neʼe ʼui e te ʼapositolo ko Soane ʼo ʼuhiga mo Sesu pea mo Tana minisitelio?

² Neʼe tohi e te ʼapositolo ko Soane ia te fakamatala ʼo te minisitelio ʼa Sesu pea neʼe ina ʼui fēnei ʼi tona fakaʼosi: “ ʼIo, ʼe kei lahi te tahi ʼu meʼa neʼe fai e Sesu, kae kapau ʼe tohi te ʼu meʼa fuli ʼaia, pea ʼe au mahalo, ʼe mole feala anai ki te mālamanei, ke ina tānaki te ʼu takaiga tohi ʼaē kā tohi.” (Soa. 21:25) Neʼe ʼiloʼi e Soane neʼe mole feala ke ina fakamatala kātoa ia te ʼu palalau pea mo te ʼu gāue ʼaē neʼe fai e Sesu lolotoga te ʼu taʼu e tolu vaelua ʼaia. Kae, ko te ʼu ʼaluʼaga tāfito ʼaē neʼe fakamatala e Soane ʼi tana Evaselio ʼe maʼuhiga ʼaupitō.

 3. ʼE tou lava fakaloloto feafeaʼi tatatou mahino ki te tuʼulaga ʼo Sesu ʼi te fakatuʼutuʼu ʼa te ʼAtua?

³ ʼO hilifaki ki te ʼu fakamatala maʼuhiga ʼo te ʼu Evaselio e fā, ʼe ʼi ai te tahi ʼu vaega Tohi-Tapu ʼe natou talanoa ai ki te tahi ʼu manatu ʼo ʼuhiga mo te maʼuli ʼo Sesu, pea ʼe fakalotomālohiʼi ai tatatou tui. Ohagē lā, ko te ʼu fakamatala Fakatohi-tapu ʼo ʼuhiga mo te ʼu tagata agatonu ʼaē neʼe māʼuʼuli ʼi muʼa ʼo te tupu ʼa Sesu, ʼe maʼu ai te ʼu manatu ʼe ina fakakakano tatatou mahino ki te tuʼulaga ʼo Sesu ʼi te fakatuʼutuʼu ʼa te ʼAtua. Tou vakaʼi age muʼa niʼihi ʼi te ʼu tagata ʼaia.

Ko Te ʼu Tagata ʼa Te ʼAtua Neʼe Natou Fakatātā Ia Kilisito

4, 5. Ko ai ʼaē neʼe ina fakatātā ia Sesu, pea ʼi te ʼu ʼaluʼaga fea?

⁴ Ko Soane pea mo te tahi ʼu tagata faitohi e tolu ʼo te ʼu Evaselio ʼe natou fakahā mai ko Moisese, mo Tavite pea mo Salomone, neʼe ko he ʼu tagata neʼe natou fakatātā ia Sesu ʼi tona ʼuhiga Tagata Fakanofo ʼa te ʼAtua pea mo tona ʼuhiga Hau ʼi te kā haʼu. Ko te ʼu faʼahi fea ʼaē neʼe fakatātā ai ia Sesu e te ʼu kaugana ʼaia ʼa te ʼAtua, pea koteā te ʼu ako ʼe tou lava tāʼofi mai te ʼu fakamatala ʼaia?

⁵ ʼI tona fakanounou, ʼe ʼui mai ʼi te Tohi-Tapu ko Moisese neʼe ko he polofetā, he tagata fakafelōgoi, pea mo he haofakiʼaga. ʼE toe fēia mo Sesu. Ko Tavite neʼe tauhi ovi pea neʼe ko he hau neʼe mālo ʼi te ʼu fili ʼo Iselaele. ʼO fēia mo Sesu ʼe ko he tagata tauhi ovi ia pea ʼe ko he hau ʼe mālo. (Esk. 37:24, 25) ʼI te temi ʼaē neʼe kei agatonu ai Salomone, neʼe ko he hau poto, pea ʼi tona temi pule neʼe maʼuli ia Iselaele ʼi te tokalelei. (1 Hau 4:25, 29) Mo Sesu foki ʼe poto ʼaupitō pea ʼe fakahigoaʼi ko te “ ʼAliki ʼo te Tokalelei.” (Isa. 9:6) ʼE hā lelei mai, ko te tuʼulaga ʼo Kilisito Sesu ʼe tatau mo ʼaē ʼo te ʼu tagata ʼaia kae ʼe lahi age pē ia te tuʼulaga ʼo Sesu ʼi te fakatuʼutuʼu ʼa te ʼAtua. ʼUluaki, tou fakatatau muʼa ia Sesu pea mo Moisese, pea tou vakaʼi peʼe tokoni feafeaʼi mai kiā tātou ia te fakatatau ʼaia ke tou fakamoʼoni lahi age ki te tuʼulaga ʼo Sesu ʼi te fakatuʼutuʼu ʼa te ʼAtua.

 Ko Moisese Neʼe Ko He Fakamelomelo ʼo Sesu

 6. Neʼe fakamahino feafeaʼi e te ʼapositolo ko Petelo ia te ʼaoga ʼaē ke tou fakalogo kiā Sesu?

⁶ ʼO mole fualoa ʼi te hili ʼo te Penikositē ʼo te taʼu 33 ʼo totatou temi, neʼe talanoa ia te ʼapositolo ko Petelo ʼo ʼuhiga mo te lea fakapolofetā neʼe fai e Moisese pea neʼe fakahoko e Sesu Kilisito. Neʼe tuʼu ia Petelo iā muʼa ʼo te kau Sutea e tokolahi neʼe ʼomai ʼo ʼatolasio ʼi te fale lotu. Ko te hahaʼi ʼaia neʼe “natou punamaʼuli ʼaupitō” ʼi te temi ʼaē neʼe fakamālōlō ai e Petelo pea mo Soane ia te tagata masiva neʼe ketu talu mai tana tupu, pea neʼe natou feleleʼi fuli moʼo vakaʼi te meʼa ʼaē neʼe hoko. Neʼe fakamahino e Petelo ko te gāue fakaofoofo ʼaia neʼe nā fai, neʼe ko te gāue ia ʼo te laumālie māʼoniʼoni ʼo Sehova ʼaki ia Sesu Kilisito. Pea neʼe ina fakaʼaogaʼi ia te Koga Tohi-Tapu Fakahepeleo ʼo ina ʼui fēnei: “He neʼe ʼui fēnei e Moisese: ‘Ko Sehova ʼAtua ʼe ina fakatupu anai ʼi tokotou ʼu tehina ia he polofetā ohagē ko au. ʼE tonu ke kotou fakalogo kiā ia ʼo mulimuli ki te ʼu meʼa fuli ʼaē kā ina ʼui atu.’ ”—Gāue 3:11, 22, 23; lau ia Teutalonome 18:15, 18, 19.

 7. He koʼē neʼe feala ki te hahaʼi ʼaē neʼe fakalogo kiā Petelo ke natou mahino ki tana ʼu palalau ʼo ʼuhiga mo he polofetā ʼe lahi age iā Moisese?

⁷ Ko te ʼu palalau ʼaia ʼa Moisese neʼe lagi ʼiloʼi lelei e te hahaʼi ʼaē neʼe fakalogo kiā Petelo. ʼI tonatou ʼuhiga Sutea, neʼe natou fakaʼapaʼapa lahi kiā Moisese. (Teu. 34:10) ʼAki he fakaʼamu lahi, neʼe natou fakatalitali ki te haʼu ʼa he polofetā ʼe lahi age iā Moisese. Ko te polofetā ʼaia ʼe mole liliu pē anai ia ko he mēsia, ko he fakanofo ʼo te ʼAtua ohagē ko Moisese, kae ʼe liliu anai ia ko te Mēsia, “te Kilisito ʼa te ʼAtua, ia Ia ʼaē neʼe Fili” e Sehova.—Luka 23:35; Hep. 11:26.

Te ʼu Faʼahi ʼAē Neʼe Tatau Ai Ia Sesu Pea Mo Moisese

 8. Ko te ʼu faʼahi fea ʼaē ʼe tatau ai ia te maʼuli ʼo Moisese pea mo te maʼuli ʼo Sesu?

⁸ ʼE ʼi ai te ʼu faʼahi, ʼe tatau ai te maʼuli ʼo Sesu ʼi te kele pea mo ʼaē ʼo Moisese. Ohagē lā, ʼi tanā kei meamea, neʼe haofaki ia Moisese pea mo Sesu he neʼe fia matehi nāua e te ʼu pule agakovi. (Eke. 1:22–2:10; Mat. 2:7-14) Pea ko nāua toko lua neʼe ‘pāui mai Esipito.’ Neʼe ʼui fēnei e te polofetā ko Osea: “ ʼI te temi ʼaē neʼe kei tamasiʼi ai ia Iselaele, neʼe au ʼofa ai, pea mai Esipito neʼe au pāuiʼi toku foha.” (Osea 11:1) Ko te ʼu palalau ʼaē neʼe fai e Osea neʼe fakaʼuhiga ki te temi ʼaē neʼe mavae ai te puleʼaga ʼo Iselaele ʼi Esipito, ʼi te takitaki ʼa Moisese, te tagata ʼaē neʼe fakanofo e te ʼAtua. (Eke. 4:22, 23; 12:29-37) Kae neʼe mole fakaʼuhiga pē te ʼu palalau ʼa Osea ki he ʼaluʼaga neʼe hoko ʼi te temi muʼa, kae neʼe toe fakaʼuhiga foki ki he ʼaluʼaga neʼe hoko ʼi he temi ki ʼamuli. Neʼe ko te lea fakapolofetā ʼo ʼuhiga mo Sosefo pea mo Malia, neʼe hoko ʼi te temi ʼaē neʼe nā mavae ai mo Sesu mai Esipito, ʼi te ʼosi mate ʼo te Hau ko Helote.—Mat. 2:15, 19-23.

 9. (a) Koteā te ʼu milakulo ʼaē neʼe fai e Moisese pea mo Sesu? (b) Kotou fakahā mai he tahi ʼu ʼaluʼaga ʼe tatau ai ia Sesu pea mo Moisese. (Vakaʼi ia te fakamatala ʼaē ʼe ʼātakai, ko tona kupu tāfito “Te Tahi ʼu Faʼahi ʼAē Neʼe Tatau Ai Ia Sesu Pea Mo Moisese,” ʼi te pāsina 25.)

⁹ Ko Moisese pea mo Sesu neʼe nā fai te ʼu milakulo, ʼo hā ʼaki ai neʼe lagolago ia Sehova kiā nāua. Ohagē ko tona fakamatala ʼi te Tohi-Tapu, ko Moisese neʼe ko te ʼuluaki tagata ʼaē neʼe ina fai ni ʼu milakulo. (Eke. 4:1-9) Ohagē lā, neʼe fai e Moisese ia te milakulo ʼaki te vai, ʼi tana fakatotonu ʼaē ke liliu ko he toto ia te ʼu vai ʼo te Nile, pea mo tana vaheʼi lua ia te Tai Kula, pea mo te tatafe mai ʼa te vai mai te foʼi maka ʼi te toafa. (Eke. 7:19-21; 14:21; 17:5-7) Neʼe toe fai e Sesu ia te ʼu milakulo ʼaki te vai. Ko tana ʼuluaki milakulo neʼe ko te fakaliliu ʼo te vai ko he vino ʼi te kātoaga ʼo te ʼohoana. (Soa. 2:1-11) Ki muli age, neʼe ina fakamalūlū ifo ia te Tai tokakovi ʼo Kalilea. Pea ʼi te tahi lakaga, neʼe haʼele ʼi te fuga tai! (Mat. 8:23-27; 14:23-25) Ko te tahi ʼu faʼahi ʼaē ʼe tatau ai ia Moisese pea mo Sesu, ia te Moisese Lahi, ʼe feala hakotou maʼu ʼi te fakamatala ʼaē ʼe ʼātakai ʼi te pāsina 25.

Tou Fakamoʼoni Ki Te ʼUhiga Polofetā ʼo Sesu

10. Koteā te ʼu gāue ʼaē ʼe fai e he polofetā moʼoni, pea he koʼē ʼe tou lava ʼui ko Moisese neʼe ko he polofetā moʼoni?

¹⁰ Tokolahi ʼe natou manatu ko he polofetā, ʼe ko he tahi ʼe ina fakakikite te kā haʼu, kae ʼe mole gata ai pē ia te ʼu gāue ʼaē ʼe fai e he polofetā. Ko he polofetā moʼoni ʼe ko he tahi ʼe palalau maʼa Sehova, ko he tahi ʼe ina tala ia “te ʼu meʼa taulekaleka ʼa te ʼAtua.” (Gāue 2:11, 16, 17) ʼI te ʼu meʼa ʼaē ʼe ina fakamatala, ʼe kau ai ia te ʼu meʼa kā hoko ʼi te kā haʼu, pea mo ina fakahā he ʼu faʼahi ʼo ʼuhiga mo te fakatuʼutuʼu ʼa Sehova, peʼe ina tala ia te ʼu fai fakamāu ʼa te ʼAtua. Neʼe fēia ia Moisese ʼi tona ʼuhiga  polofetā. Neʼe ina fakakikite ia te ʼu Tautea e Hogofulu ʼaē neʼe tō ki Esipito. Neʼe ina fakahā ki te kau Iselaele ia te fuakava ʼo te Lao ʼaē neʼe fai ʼi Sinai, pea mo ina akoʼi age kiā nātou ia te finegalo ʼo te ʼAtua. Kae neʼe tonu ki ʼamuli ke haʼu te polofetā ʼe lahi age iā Moisese.

11. Neʼe fakahoko feafeaʼi e Sesu ia tona ʼuhiga polofetā ʼaē neʼe lahi age iā Moisese?

¹¹ Ki muli age, ʼi te ʼuluaki sēkulō, ko Sakalia neʼe gāue ohagē ko he polofetā he neʼe ina fakahā ia te fakatuʼutuʼu ʼa te ʼAtua ʼo ʼuhiga mo tona foha, ia Soane. (Luka 1:76) Neʼe liliu tona foha ko Soane Patita, ʼaē neʼe ina tala ia te haʼu ʼa Sesu Kilisito, ia te polofetā ʼaē kua fualoa tanatou fakatalitali ki ai, pea ʼe lahi age iā Moisese. (Soa. 1:23-36) ʼI tona ʼuhiga polofetā, neʼe lahi te ʼu faʼahi neʼe fakakikite e Sesu. Ohagē lā, neʼe talanoa ʼo ʼuhiga mo tana mate, ʼo ina fakakikite peʼe hoko feafeaʼi anai tana mate, peʼe mate anai ʼifea, pea ko ai ʼaē kā natou matehi ia ia. (Mat. 20:17-19) Neʼe punamaʼuli te hahaʼi Sutea, he neʼe toe fakakikite foki e Sesu ia te fakaʼauha ʼo Selusalemi pea mo tona fale lotu. (Mko. 13:1, 2) Ko tana ʼu lea fakapolofetā ʼe toe fakaʼuhiga ki totatou temi.—Mat. 24:3-41.

12. (a) Neʼe fakatuʼu feafeaʼi e Sesu ia te tafitoʼaga ʼo te gāue fai fakamafola ʼi te mālamanei? (b) He koʼē ʼe tou mulimuli ki te faʼifaʼitaki ʼa Sesu iā ʼaho nei?

¹² ʼO hilifaki ki tona ʼuhiga polofetā, ko Sesu neʼe ko he tagata fai fakamafola pea mo faiako. Neʼe ina fakamafola ia te logo lelei ʼo te Puleʼaga ʼo te ʼAtua, pea neʼe mole he tahi ohagē ko ia, neʼe palalau ʼaki he lototoʼa ʼe lahi age. (Luka 4:16-21, 43) ʼI tona ʼuhiga tagata faiako, neʼe mole hona tatau. Neʼe ʼui  fēnei e ʼihi ʼaē neʼe natou logo kiā te ia: “ ʼE mole heʼeki ʼi ai he tahi age tagata kua palalau fēia.” (Soa. 7:46) Neʼe gāue ia Sesu ʼaki he loto faʼafai moʼo fakamafola ia te logo lelei, pea neʼe ina akoʼi ki tana ʼu tisipulo ia te faʼafai ʼaia maʼa te Puleʼaga. Neʼe ina fakatuʼu ai ia te tafitoʼaga ʼo te fai fakamafola pea mo te faiako ʼaē kā fai ʼi te mālamanei kātoa, ʼaē kei hoko atu pē tona fai ʼi te temi nei. (Mat. 28:18-20; Gāue 5:42) ʼI te taʼu ʼaenī kua hili, ko te toko fitu miliona kau tisipulo ʼa Sesu neʼe natou fai teitei hola e 1 500 000 000 moʼo fakamafola ia te logo lelei ʼo te Puleʼaga pea mo akoʼi ia te ʼu moʼoni ʼo te Tohi-Tapu ki te hahaʼi ʼaē ʼe natou fia ʼiloʼi. ʼE kotou lagolago lelei koa ki te gāue ʼaia?

13. Koteā ʼaē kā tokoni mai ke tou “nonofo ʼalaʼala”?

¹³ ʼE tou tui papau neʼe fakahoko e Sehova ia te lea fakapolofetā ʼaē ke tupu ia he polofetā ohagē ko Moisese. ʼE malave feafeaʼi kiā koutou ia te faʼahi ʼaia? ʼE lahi age koa takotou falala ki te hoko ʼo te ʼu lea fakapolofetā ʼo ʼuhiga mo tatatou kā haʼu? ʼEī, ko te metitāsio ki te faʼifaʼitaki ʼo te Moisese Lahi, ʼe ina uga tātou ke tou “nonofo ʼalaʼala pea mo tou aga fakapotopoto” ʼo ʼuhiga mo te ʼu gāue ʼaē kā ʼamanaki fakahoko e te ʼAtua.—1 Tes. 5:2, 6.

Ko Kilisito ʼi Tona ʼUhiga Tagata Fakafelōgoi

14. He koʼē ʼe tou ʼui ko Moisese neʼe ko he tagata fakafelōgoi ʼa te kau Iselaele pea mo te ʼAtua?

¹⁴ Ohagē ko Moisese, ko Sesu neʼe ko he tagata fakafelōgoi. Ko he tagata fakafelōgoi ʼe gāue ohagē ko he ʼalesō. Ko Moisese neʼe ko he tagata fakafelōgoi ʼo te fuakava ʼo te Lao ʼaē neʼe fai e Sehova pea mo te kau Iselaele. Kanapau lā neʼe fakalogo ia te ʼu foha ʼo Sakopo ki te ʼu lao ʼa te ʼAtua, neʼe feala pē ki te ʼAtua ke ina haga taupau nātou ohagē ko hona koloa makehe, ko tana kōkelekāsio. (Eke. 19:3-8) Neʼe tuʼu ia te fuakava ʼaia mai te taʼu 1513 ʼi muʼa ʼo totatou temi ʼo aʼu ki te ʼuluaki sēkulō ʼo totatou temi.

15. He koʼē ko Sesu ko he tagata fakafelōgoi ʼe māʼoluga age iā Moisese?

¹⁵ ʼI te taʼu 33 ʼo totatou temi, neʼe fai e Sehova ia he fuakava ʼe lelei age mo te Iselaele foʼou, “te Iselaele ʼa te ʼAtua,” ʼaē neʼe liliu ko te kōkelekāsio fakamālamanei neʼe faʼufaʼu e te kau Kilisitiano fakanofo. (Kal. 6:16) Ko te fuakava ʼaē neʼe ko Moisese tana tagata fakafelōgoi, neʼe ko he ʼu lao neʼe tohi ki he maka e te ʼAtua, kae ko te fuakava ʼaē ko Sesu tona tagata fakafelōgoi, ʼe māʼoluga age ia. Ko tana ʼu lao neʼe tohi e te ʼAtua ki te ʼu loto ʼo te hahaʼi. (Lau ia 1 Timoteo 2:5; Hepeleo 8:10.) Koia ko “te Iselaele ʼa te ʼAtua” ʼe ko he koloa makehe ʼa te ʼAtua ʼi te temi nei, ‘he puleʼaga ʼe ina fakatupu ia te ʼu fua’ ʼo te Puleʼaga ʼe takitaki e Sesu. (Mat. 21:43) Ko nātou ʼo te puleʼaga fakalaumālie ʼaia, ʼe natou kau ki te fuakava foʼou ʼaia. Kae ʼe mole ko nātou pē ʼaē ʼe natou maʼu ia te ʼu lelei ʼo te fuakava ʼaia. Ko te hahaʼi tokolahi ʼe mole malau, pea tokolahi iā ʼaho nei kua mamate, ʼe natou maʼu anai ʼo talu ai ia te ʼu lelei mai te fuakava ʼaia ʼaē ʼe māʼoluga age.

Tou Fakamaʼuhigaʼi Ia Kilisito ʼi Tona ʼUhiga Tagata Haofaki

16. (a) Neʼe fakaʼaogaʼi feafeaʼi e Sehova ia Moisese moʼo haofaki ia tana hahaʼi? (b) Ohagē ko tona ʼui iā Ekesote 14:13, ko ai te Matapuna ʼo te haofaki?

¹⁶ ʼI te pō fakaʼosi ʼi muʼa ʼo tanatou mavae mai Esipito, ko ʼihi ʼo te hōloga ʼo Iselaele neʼe feala ke natou tuʼutāmakiʼia. Neʼe ʼamanaki fakalaka ia te ʼāselo ʼa te ʼAtua ʼi te fenua ʼo Esipito moʼo matehi ia te ʼu ʼuluaki tupu fuli. Neʼe fakahā e Sehova kiā Moisese, ʼe haofaki anai ia te ʼu ʼuluaki tupu ʼo Iselaele mo kapau neʼe vali e te kau Iselaele ki tonatou fuga matapā ia te toto ʼo te ʼakeno ʼo te Pāsikate. (Eke. 12:1-13, 21-23) Pea ko he faʼahi neʼe hoko moʼoni. Ki muli age, neʼe felāveʼi leva ia te puleʼaga kātoa mo te ʼaluʼaga fakatuʼutāmaki. Neʼe hagē kua natou tō ki he hele, heʼe ʼi ʼonatou muʼa neʼe ko te Tai Kula kae tuli mai nātou e te ʼu sāliote tau ʼo Esipito. Neʼe toe haofaki nātou e Sehova ʼaki ia Moisese, ʼaē neʼe ina vaheʼi lua fakamilakulo ia te tai.—Eke. 14:13, 21.

17, 18. Ko te ʼu ʼaluʼaga fea ʼaē ʼe māʼoluga age ia te fakaʼāteaina ʼaē ʼa Sesu ʼi ʼaē ʼa Moisese?

¹⁷ Logolā te fakaofoofo ʼo te haofaki ʼaia, kae ʼe lahi age pē ia te haofaki ʼaē neʼe fai e Sehova ʼaki ia Sesu. ʼE fakaʼaogaʼi e Sehova ia Sesu moʼo fakaʼāteaina ia te hahaʼi fakalogo mai te pōpula ʼaē ki te agahala.  (Loma 5:12, 18) Pea ko te haofaki ʼaia ʼe ko “he fakaʼāteaina heʼegata.” (Hep. 9:11, 12) Ko te huafa ʼo Sesu ʼe fakaʼuhiga “Ko Sehova ʼe Ina Haofaki.” Ko Sesu, ʼaē ko totatou Fakaʼāteaina, peʼe ko totatou Tagata Haofaki, ʼe mole ina fakaʼāteaina pē tātou mai te ʼu agahala ʼaē neʼe tou fai ʼi te temi muʼa, kae ʼe ina toe foaki mai ia te fealagia ʼaē ke tou maʼu he maʼuli ʼe lelei age. ʼI tana fakaʼāteaina tana kau tisipulo mai tanatou nonofo pōpula ki te agahala, ʼe haofaki nātou e Sesu mai te hauhau ʼa te ʼAtua pea ʼe feala ai ke natou maʼu he ʼu felōgoi ʼofa mo Sehova.—Mat. 1:21.

¹⁸ Ko te fakaʼāteaina mai te agahala ʼaē ʼe foaki anai e Sesu ʼi tona temi totonu, ʼe fakaʼuhiga ki te fakaʼāteaina mai te ʼu fua kovi ʼo te agahala, ʼaē ko te mahaki pea mo te mate. Moʼo ʼiloʼi pe feafeaʼi anai te temi ʼaia, kotou tokagaʼi te meʼa ʼaē neʼe hoko ʼi te ʼalu ʼaē ʼa Sesu ki te ʼapi ʼo te tagata neʼe higoa ko Sailusi, ʼaē neʼe mate tona ʼofafine e taʼu 12. Neʼe fakalotofīmālieʼi e Sesu ia Sailusi, ʼo ʼui māʼana: “ ʼAua naʼa ke manavasiʼi, kehe pē ke ke tui, pea ʼe maʼuli anai ia.” (Luka 8:41, 42, 49, 50) Neʼe hoko moʼoni ia te ʼu palalau ʼaia, he neʼe fakatuʼuake ia te kiʼi taʼahine! ʼE kotou lava fakakaukauʼi age koa ia te fiafia ʼaē neʼe maʼu e tana ʼu mātuʼa? ʼE kotou ʼiloʼi fakatomuʼa ai, ia te toe fiafia lahi age ʼaē kā tou maʼu anai mokā “ko nātou fuli ʼaē ʼe nonofo ʼi te ʼu falemaka fakamanatu ʼe natou logo anai ki [te] leʼo [ʼo Sesu] pea mo natou hū mai anai ki tuʼa” ʼi te fakatuʼuake. (Soa. 5:28, 29) ʼE moʼoni, ko Sesu ʼe ko te Tagata Haofaki, peʼe ko totatou Fakaʼāteaina!—Lau ia Gāue 5:31; Tito 1:4; Fakh. 7:10.

19, 20. (a) ʼE malave feafeaʼi kiā tātou tatatou metitāsio ki te tuʼulaga ʼo Sesu ʼi tona ʼuhiga Moisese Lahi? (b) Koteā ʼaē kā tou vakaʼi anai ʼi te ʼalatike ʼaē kā hoa mai?

¹⁹ ʼI tatatou ʼiloʼi ʼaē ʼe feala ke tou tokoni ki te hahaʼi ke natou maʼu te ʼu lelei mai te ʼu gāue haofaki ʼa Sesu, ʼe uga ai tātou ke tou kau ki te gāue fai fakamafola pea mo faiako. (Isa. 61:1-3) Tahi ʼaē meʼa, ʼi tatatou metitāsio ki te tuʼulaga ʼo Sesu ʼi tona ʼuhiga Moisese Lahi, ʼe mālohi age tatatou falala ki tana fakaʼāteaina ʼo tana ʼu tisipulo mokā haʼu moʼo fakahoko ia te fakamāu ki te hahaʼi agakovi.—Mat. 25:31-34, 41, 46; Fakh. 7:9, 14.

²⁰ ʼEī, ko Sesu ʼe feala pē ke fakaʼuhiga ko Moisese Lahi. Neʼe ina fai ia te ʼu meʼa fakatalakitupua neʼe mole feala ke fai e Moisese. Ko tana palalau ohagē ko he polofetā pea mo gāue ohagē ko he tagata fakafelōgoi ʼe malave ki te tagata fuli pē ʼo te mālamanei. ʼI tona ʼuhiga Tagata Haofaki, ʼe mole foaki e Sesu ia he haofaki fakatemi pē kae ko he haofaki ʼe heʼegata maʼa te mālamanei. Kae ʼe lahi age te ʼu ako ʼe tou maʼu ʼo ʼuhiga mo Sesu mai te ʼu tagata agatonu ʼo te temi muʼa. ʼI te ʼalatike ʼaē kā hoa mai, ʼe tou talanoa anai pe neʼe feafeaʼi tana ʼu gāue ʼi tona ʼuhiga Tavite Lahi pea mo Salomone Lahi.

ʼE Feala Koa Hakotou Fakamahino?

Neʼe lahi feafeaʼi age ia Sesu iā Moisese ʼi tona ʼuhiga

• polofetā?

• tagata fakafelōgoi?

• tagata haofaki?

[ʼU fehuʼi ʼo te ako]

[Talanoa ʼo te pasina 25]

TE TAHI ʼU FAʼAHI ʼAĒ NEʼE TATAU AI IA SESU PEA MO MOISESE

◻ Neʼe nā liʼaki toko lua ia he ʼu tuʼulaga maʼuhiga kae nā tauhi kiā Sehova pea mo tana hahaʼi.—2 Ko. 8:9; Filp. 2:5-8; Hep. 11:24-26.

◻ Neʼe nā tauhi toko lua ʼi tonā ʼuhiga fakanofo, peʼe ko he ʼu ‘kilisito.’—Mko. 14:61, 62; Soa. 4:25, 26; Hep. 11:26.

◻ Neʼe nā fakafofoga toko lua ia te huafa ʼo Sehova.—Eke. 3:13-16; Soa. 5:43; 17:4, 6, 26.

◻ Neʼe nā agamalū toko lua.—Fkau. 12:3; Mat. 11:28-30.

◻ Neʼe nā fafaga toko lua ia te hahaʼi kaugamālie.—Eke. 16:12; Soa. 6:48-51.

◻ Neʼe nā tuʼi fakamāu pea mo fai lao toko lua.—Eke. 18:13; Mala. 4:4; Soa. 5:22, 23; 15:10.

◻ Neʼe foaki kiā nāua toko lua ia te pule ki te fale ʼo te ʼAtua.—Fkau. 12:7; Hep. 3:2-6.

◻ Neʼe ʼui ʼo ʼuhiga mo nāua neʼe ko he ʼu fakamoʼoni agatonu ʼa Sehova.—Hep. 11:24-29; 12:1; Fakh. 1:5.

◻ ʼI te ʼosi mate ʼo Moisese pea mo Sesu, neʼe toʼo e te ʼAtua tonā ʼu sino.—Teu. 34:5, 6; Luka 24:1-3; Gāue 2:31; 1 Ko. 15:50; Suta 9.