Ko Te ʼAtua ʼe Ko He Tahi Moʼoni Koa?

 Te ʼu tali ʼaē ʼe fai māhani:

◼ “ ʼE ʼi te ʼu faʼahi fuli pē, iā meʼa fuli pē. ʼE hagē ia ko te matagi.”

◼ “ ʼE ko he poto peʼe ko he mālohi ʼe mole hona sino.” Koteā ʼaē neʼe ʼui e Sesu?

◼ “ ʼI te ʼapi ʼo taku Tamai, ʼe lahi ai te ʼu nofoʼaga.” (Soane 14:2) Neʼe ʼui e Sesu ʼe ʼi ai te ʼapi fakatātā ʼo te ʼAtua, peʼe ko hona nofoʼaga.

◼ “Neʼe au haʼu mai te Tamai pea neʼe au haʼu ki te mālamanei. Pea tahi ʼaē meʼa, ʼe au mavae ʼi te mālamanei, pea ʼe au ʼalu ki te Tamai.” (Soane 16:28) Neʼe tui ia Sesu ko te ʼAtua ʼe ko he Tahi pea ʼe ʼi ai te koga meʼa ʼe nofo ai.

NEʼE mole he temi neʼe talanoa ai ia Sesu ʼo ʼuhiga mo te ʼAtua, ʼo ina ʼui ʼe ko he mālohi ʼe mole hona sino. Kae neʼe palalau ia mo te ʼAtua pea neʼe faikole kiā te ia. Neʼe ina tau fakahigoaʼi ia Sehova ko tana Tamai ʼaē ʼe ʼi selō, ko he kupuʼi palalau ʼe fakahā ai tana felōgoi lelei ʼaē mo te ʼAtua.—Soane 8:19, 38, 54.

ʼE moʼoni “ ʼe mole heʼeki ʼi ai he tagata kua sio ki te ʼAtua” pea “ko te ʼAtua ʼe ko te Laumālie.” (Soane 1:18; 4:24) Kae ʼe mole fakaʼuhiga leva ʼe mole hona sino. ʼE ʼui fēnei mai ʼi te Tohi-Tapu: “Kapau ʼe ʼi ai he sino kakano, pea ʼe ʼi ai foki mo te sino fakalaumālie.” (1 Kolonito 15:44) ʼE maʼu koa e Sehova hona sino fakalaumālie?

ʼEī. ʼI te fakatuʼuake ʼo Sesu, “neʼe hū ia ki te lagi tonu, ke feala hana hū ʼi te temi nei maʼa tātou iā muʼa ʼo te ʼAtua.” (Hepeleo 9:24) ʼI te vaega ʼaia, ʼe tou akoʼi ai ia faʼahi maʼuhiga e lua ʼo ʼuhiga mo te ʼAtua. ʼUluaki, ʼe ʼi ai tona nofoʼaga. Lua, ʼe mole ko he mālohi ʼe nofo ʼi te ʼu faʼahi fuli pē, kae ʼe ko he Tahi ʼe moʼoni.

Kae ʼe lava feafeaʼi ki te ʼAtua hana takitaki te ʼu meʼa ʼi te ʼu potu fuli pē? ʼE feala ke foaki e te ʼAtua ia tona laumālie māʼoniʼoni, peʼe ko tona mālohi gāue, ki he faʼahi pē ʼi te ʼatulaulau. Ohagē ko he tamai ʼe ina faoʼi tona nima moʼo fakanaʼanaʼa pea mo tokoni ki tana fānau, ʼe folahi e te ʼAtua ia tona laumālie māʼoniʼoni moʼo fakahoko ia tana fakatuʼutuʼu.—Pesalemo 104:30; 139:7.

ʼUhi ʼaē ko te ʼAtua ʼe ko he Tahi, ʼe ʼi ai mo tona ʼulugaaga pea mo te ʼu meʼa ʼe ina leleiʼia pea mo ʼihi ʼe mole ina leleiʼia. ʼE ʼi ai te ʼu meʼa ʼe ina logoʼi ʼi tona loto. ʼE ʼui ʼi te Tohi-Tapu ʼe ʼofa ki tana hahaʼi, ʼe fiafia ʼi tana ʼu gāue, ʼe fehiʼa ki te tauhi tamapua, pea mo lotomamahi ʼo ʼuhiga mo te agakovi. (Senesi 6:6; Teutalonome 16:22; 1 Hau 10:9; Pesalemo 104:31) Iā 1 Timoteo 1:11, ʼe fakahigoaʼi ko “te ʼAtua fiafia.” ʼE mole tou punamaʼuli ai ki te ʼui ʼaē e Sesu ʼe feala hatatou ako ke tou ʼoʼofa ki te ʼAtua ʼaia ʼaki totatou loto kātoa!—Maleko 12:30. a

[Nota]

[Paki ʼo te pasina 5]

Ohagē ko he tamai ʼe ina faoʼi tona nima, ko te ʼAtua ʼe ina folahi ia tona laumālie māʼoniʼoni moʼo fakahoko ia tana fakatuʼutuʼu