ʼE Tali Koa e Te ʼAtua Te ʼu Faʼahiga Tauhi Fuli Pē?

Te ʼu tali ʼaē ʼe fai māhani:

▪ “Ko te ʼu lotu fuli ʼe natou taki ki te ʼAtua.”

▪ “ ʼE mole maʼuhiga te meʼa ʼaē ʼe kotou tui kiai, kehe pē ke kotou tauhi fakamālotoloto.” Koteā ʼaē neʼe ʼui e Sesu?

▪ “Kotou hū ʼi te matapā fāveliveli; heʼe laulahi pea mo ʼātea ia te ala ʼaē ʼe fakatau ki te fakaʼauha, pea e tokolahi ia nātou ʼe hū ai; kae fāveliveli ia te matapā pea mo lauveliveli ia te ala ʼaē ʼe fakatau ki te maʼuli, pea e tokosiʼi ia nātou ʼe natou maʼu.” (Mateo 7:13, 14) Neʼe mole tui ia Sesu ko te ʼu ala fuli ʼe taki ki te ʼAtua.

▪ “Tokolahi ʼe natou ʼui mai anai kiā te au ʼi te ʼaho ʼaia: ‘ ʼAliki, ʼAliki, neʼe mole koa lā matou lea fakapolofetā ʼaki tou huafa, pea mo kapu te ʼu temonio ʼaki tou huafa, pea mo fai te ʼu gāue mālohi ʼaki tou huafa?’ Kae hoki au fakahā age anai leva kiā nātou: Neʼe heʼeki au ʼiloʼi au ia koutou! Kotou fakamamaʼo atu iā te au, ia koutou ʼaē ʼe gāue ohagē ko he ʼu tagata ʼe natou manuki ki te lao.” (Mateo 7:22, 23) ʼE mole tali e Sesu ia nātou fuli ʼaē ʼe natou lau ʼe natou mulimuli iā te ia.

TOKOLAHI te ʼu hahaʼi lotu ʼe natou pipiki mālohi ki te ʼu akonaki ʼaē ʼe natou tui kiai pea mo tanatou ʼu talatisio. Kae koteā ʼaē ʼe hoko mo kapau ko te ʼu akonaki ʼaia ʼe mole ʼalutahi ia mo te meʼa ʼaē ʼe tuʼu ʼi te Folafola ʼa te ʼAtua, ia te Tohi-Tapu? Neʼe fakahā e Sesu te tuʼutāmaki ʼo te muliʼi ia te ʼu talatisio fakatagata, ʼi tana ʼui fēnei ki te kau takitaki lotu ʼo tona temi: “Kua kotou fakanoaʼi te folafola ʼa te ʼAtua ʼuhi ko takotou ʼu talatisio.” Pea neʼe ina fakaʼaogaʼi ia te ʼu folafola ʼaenī neʼe fai e te ʼAtua: “Ko te hahaʼi nei ʼe natou fakamaʼuhiga au ʼaki ʼonatou laugutu, kae mamaʼo ʼaupitō tonatou loto iā te au. ʼE ko he maumau noa pē ʼo tanatou haga fai mai kiā te au he tauhi, heʼe natou akonakiʼi te ʼu akonaki ʼe ko he ʼu fakatotonu fakatagata pē.”—Mateo 15:1-9; Isaia 29:13.

ʼE mole maʼuhiga pē ia te ʼu akonaki ʼaē ʼe tou tui kiai, kae ʼe toe maʼuhiga foki mo te aga. ʼE ʼui fēnei ʼi te Tohi-Tapu ʼo ʼuhiga mo ʼihi ʼaē ʼe natou lau ʼe natou ʼatolasio ki te ʼAtua: “ ʼI muʼa ʼo te hahaʼi ʼe natou tala ʼe natou ʼiloʼi te ʼAtua, kae ʼe natou fakafisi ki ai ʼaki tanatou ʼu gāue.” (Tito 1:16) ʼI tona ʼuhiga moʼoni, ʼe ʼui ʼi te Tohi-Tapu ʼo ʼuhiga mo nātou ʼaē ʼe māʼuʼuli ʼi totatou temi: “[ʼE natou] kaumeʼa mo te ʼu fakafiafia kae mole kaumeʼa mo te ʼAtua, ʼe hagē ʼe natou pipiki ki te ʼAtua, kae ʼe natou lītuʼa ki tona mālohi; pea mai iā nātou ʼaia ke ke maliu kehe mai ai.”—2 Timoteo 3:4, 5.

ʼE maʼua ki he tahi ke tauhi fakamālotoloto, kae ʼe mole gata aipē. Koteā tona tupuʼaga? Heʼe feala ke tauhi fakamālotoloto he tahi ki he faʼahi ʼe hala. Koia ʼe maʼuhiga ke ina maʼu ia te ʼatamai mālama totonu ʼo ʼuhiga mo te ʼAtua. (Loma 10:2, 3) Ko te maʼu ʼo te ʼatamai mālama ʼaia pea mo maʼuliʼi te ʼu folafola ʼaē ʼi te Tohi-Tapu, ʼe feala ai anai ke tou fakafiafia ia te ʼAtua. (Mateo 7:21) Koia, ʼe mahino ia ko te tauhi ʼaē ʼe moʼoni ʼe tonu ke fai ʼaki he loto fakamālotoloto, mo tui ki he ʼu akonaki ʼe moʼoni pea mo fai ia te aga ʼaē ʼe moʼoni. Pea ko he gāue ʼe moʼoni ʼe ko te fai ʼo te finegalo ʼo te ʼAtua ʼi te ʼaho fuli pē!—1 Soane 2:17.

Kapau ʼe kotou fia ʼiloʼi he tahi age ʼu manatu ʼo ʼuhiga mo te ʼu faʼahi ʼaē ʼe tuʼu ʼi te Tohi-Tapu ʼo ʼuhiga mo te ʼAtua, kotou fakafelōgoi mo te kau Fakamoʼoni ʼa Sehova ke fai hakotou ako Tohi-Tapu.

[Paki ʼo te pasina 9]

Ko te tauhi ʼaē ʼe moʼoni, ʼe tonu ke fai ʼaki he loto fakamālotoloto, mo tui ki he ʼu akonaki ʼe moʼoni pea mo fai ia te aga ʼaē ʼe moʼoni