Tou Tokoni Kiā Nātou ʼAē Kua Hehē Mai Te Faga Ovi

“Kotou fakafiafia mo au, heʼe kua au toe maʼu taku ovi ʼaē neʼe puli.”—LUKA 15:6.

 1. Neʼe fakahā feafeaʼi e Sesu ʼe ko ia te tauhi ovi ʼofa?

 KO TE ʼAlo ʼulutokotahi ʼo Sehova, ia Sesu Kilisito, ʼe higoa ko “te tagata tauhi ovi lahi ʼo te ʼu ovi.” (Hep. 13:20) Ko te Tohi-Tapu neʼe ina fakakikite tana haʼu, pea neʼe ina fakahā ko ia tokotahi pē ia te Tauhi Ovi ʼaē neʼe ina kumi te “ ʼu ovi ʼaē kua hehē” ʼo Iselaele. (Mat. 2:1-6; 15:24) Tahi ʼaē, ohagē pē ko te tauhi manu ʼaē ʼe feala ke ina foaki ia tona maʼuli moʼo puipui tana faga ovi, ʼe toe fēia mo Sesu neʼe ina foaki tona maʼuli ko he totogi fakasākilifisio maʼa te kau ovi ʼaē kā natou maʼu anai ia te ʼu fua lelei ʼo tana sākilifisio.—Soa. 10:11, 15; 1 Soa. 2:1, 2.

 2. Koteā ia te ʼu meʼa ʼaē neʼe lagi tupu ai te mole kei fakatahi mo te kōkelekāsio ʼa ʼihi Kilisitiano?

² Kae ko ʼihi ʼaē neʼe hagē neʼe natou leleiʼia te sākilifisio ʼa Sesu pea neʼe kua natou kaugana ki te ʼAtua, neʼe natou tōtō leva ʼi te faʼahi fakalaumālie. Ko te lotovaivai, pea mo te mahamahaki, peʼe ko ʼihi age ʼu meʼa ʼaē neʼe lagi tupu ai tanatou mole kei fakatahi mo te kōkelekāsio. Kae ʼe feala pē hanatou māʼuʼuli tokalelei pea mo fiafia mokā natou fakatahi ki te faga ovi ʼa te ʼAtua ohagē ko tona ʼui e Tavite ʼi te Pesalemo 23. Ohagē lā, neʼe hiva fēnei: “Ko Sehova ʼe ko toku Tauhi Ovi. ʼE mole au hala anai ʼi he meʼa.” (Pes. 23:1) Ko nātou ʼaē neʼe nonofo ʼi te faga ovi ʼa te ʼAtua, ʼe mole natou hala mo he meʼa ʼi te faʼahi fakalaumālie, kae ko te maʼuli fiafia ʼaia ʼe mole kei maʼu ia e te ʼu ovi ʼaē kua hehē. Ko ai ʼaē ʼe feala ke tokoni kiā nātou ʼaia? ʼE lava foaki feafeaʼi ia te tokoni ʼaia? Koteā ʼaē ʼe feala ke fai moʼo tokoni kiā nātou ke natou toe liliu mai ki te faga ovi?

Ko Ai ʼAē ʼe Feala Ke Tokoni Kiā Nātou?

 3. Neʼe fakahā feafeaʼi e Sesu ia te meʼa ʼaē ʼe ʼaoga ke tou fai moʼo haofaki he ovi kua hehē mai te lotoʼā ʼa te ʼAtua?

³ Kā kita fia haofaki he ovi kua hehē mai te lotoʼā ʼa te ʼAtua pea ʼe tonu ke tou faiga fakamālotoloto. (Pes. 100:3) Neʼe fakaʼaogaʼi e Sesu ia te lea fakatātā ʼi tana ʼui ʼaenī: “Kapau ko he tagata ʼe ina maʼu he ʼu ovi e teau pea ko he tahi iā nātou ʼe hehē, ʼe mole ina tuku anai koa te hivagofulu-mā-hiva ʼi te ʼu moʼuga kae ʼalu ʼo kumi ia ia ʼaē kua hehē? Pea kapau ʼe ina maʼu, ʼio, ʼe au tala atu kiā koutou, ʼe fiafia kiai ʼo lahi ake ʼi te hivagofulu-mā-hiva ʼaē neʼe mole hehē. Pea ʼe toe fēia pē, ʼe mole loto he tahi, ʼi te ʼapi ʼo taku Tamai ʼaē ʼe ʼi selō, ke mate he tokotahi ia nātou liliki ʼaia.” (Mat. 18:12-14) Ko ai ʼaē ʼe feala ke tokoni ki te ʼu ovi ʼaē kua hehē mai te faga ovi?

4, 5. Ko te aga fea ʼaē ʼe tonu ke maʼu e te kau tagata ʼāfea ki te faga ovi ʼa te ʼAtua?

⁴ Kapau ʼe tonu ki he kau tagata ʼāfea ke natou tokoni  ki he ovi kua hehē, pea ʼe tonu anai ke natou manatuʼi ko te faga ovi ʼa te ʼAtua ʼe ko he kōkelekāsio ʼe faʼufaʼu e te hahaʼi kua foaki tonatou maʼuli kiā Sehova—ʼeī, ko he ‘faga ovi maʼuhiga ʼo te lotoʼā ʼa te ʼAtua.’ (Pes. 79:13) ʼE ʼaoga ke ʼofainaʼi ia te ʼu taʼi ovi ʼaia, pea ko tona fakaʼuhiga ʼe tonu ki te kau tauhi ovi ʼofa ke natou tōkakaga kiā nātou. ʼE feala ke fua lelei mo kapau ʼe natou aga fakakaumeʼa mokā natou ʼaʼahi nātou. Kapau ko te fakalotomālohi ʼa he tauhi ovi ʼe fai ʼaki te ʼofa, pea ʼe feala ai anai ki te ʼu ovi ʼaē kua vaivai fakalaumālie ke natou toe felōgoi lelei mo Sehova pea mo natou toe fia liliu mai ki te kōkelekāsio.—1 Ko. 8:1.

⁵ Ko te maʼua ʼaē ʼe tuku ki te kau tauhi ovi ʼo te faga ovi ʼa te ʼAtua, ʼe ko te kumi ʼo te ʼu ovi ʼaē kua hehē pea mo faigaʼi ke natou tokoni kiā nātou. Ko te ʼapositolo ko Paulo neʼe ina fakamanatuʼi ki te ʼu tagata ʼāfea ʼo Efesi ʼo tona temi, ia tonatou maʼua ʼaē ke natou tōkakaga ki te faga ovi, ʼi tana ʼui ʼaenī: “Kotou tōkakaga kiā koutou totonu pea mo te faga ovi fuli, ʼaē kua fakanofo koutou ki ai e te laumālie māʼoniʼoni ko he kau taupau, moʼo fafaga te kōkelekāsio ʼa te ʼAtua, ʼaē neʼe ina totogi ʼaki te taʼataʼa ʼo tona ʼAlo totonu.” (Gāue 20:28) ʼO toe fēia mo te ʼapositolo ko Petelo, neʼe ina foaki ia te tokoni ʼaenī ki te ʼu tagata ʼāfea fakanofo: “Kotou fafaga te faga ovi ʼa te ʼAtua ʼaē neʼe tuku atu ke kotou taupau, ʼo mole fai ʼaki he loto fakakinau, kae ʼaki he lotolelei; ʼo mole fai ʼaki he loto mānumānu ki he meʼa neʼe maʼu fakakākā, kae ʼaki he faʼafai; ʼo mole pule ʼaki he loto fefeka kiā nātou ʼaē ko te tofiʼa ʼo te ʼAtua, kae ʼaki hatatou liliu ko he ʼu faʼifaʼitaki ki te faga ovi.”—1 Pet. 5:1-3.

 6. He koʼē ʼe ʼaoga tāfito ʼi te temi nei ke tōkakaga te kau tagata ʼāfea ki te faga ovi ʼa te ʼAtua?

⁶ ʼE tonu ki te kau tauhi ovi Kilisitiano ke natou faʼifaʼitakiʼi ia “te tauhi ovi lelei” ko Sesu. (Soa. 10:11) Neʼe tokaga ʼaupitō ia ki te faga ovi ʼa te ʼAtua pea mo ina fakahā ia te maʼuhiga ʼaē ke tokaga kiā nātou, ʼi tana ʼui ʼaē kiā Simone Petelo ke ina ‘fafaga Tana ʼu kiʼi ovi.’ (Lau ia Soane 21:15-17.) ʼE ʼaoga tāfito ʼi te temi nei he tokaga fēia ki te ʼu ovi, heʼe ko te Tēvolo kua mālohi age tana ʼu faiga ʼaē ke ina maumauʼi te agatonu ʼo nātou ʼaē kua foaki tonatou maʼuli ki te ʼAtua. ʼE gāue tāfito ia Satana ki te ʼu vaivaiʼaga ʼo te tagata pea ʼe ina fakaʼaogaʼi te mālamanei moʼo fakahalaʼi te faga ovi ʼa Sehova ke natou tō ki te agahala. (1 Soane 2:15-17; 5:19) Ko nātou ʼaē ʼe mole kei fakatahi mo te kōkelekāsio, ʼe faigafua tonatou fakahalaʼi, koia ʼe ʼaoga tāfito ai kiā nātou ʼaia he tokoni ke feala hanatou muliʼi ia te tokoni ʼaē ke natou ‘haʼele ʼaki te laumālie.’ (Kal. 5:16-21, 25) Moʼo tokoni ki te ʼu ovi ʼaia, ʼe ʼaoga kiai ia te faikole ki te ʼAtua ʼaki he loto falala, mo te takitaki ʼo tona laumālie, pea mo te fakaʼaogaʼi ʼaki he aga poto ia tana Folafola.—Taag. 3:5, 6; Luka 11:13; Hep. 4:12.

 7. ʼE maʼuhiga feafeaʼi ki te kau tagata ʼāfea ia te fafaga ʼaē ʼo te ʼu ovi ʼaē neʼe tuku age ke natou tōkakaga kiai?

⁷ ʼI Iselaele ʼi te temi muʼa, neʼe fakaʼaogaʼi e te tagata tauhi manu he ʼakau loa ʼe piko ʼi tona tumutumu moʼo taki tana faga manu. Kā fakahū e te tauhi manu te faga ovi ki te lotoʼā peʼe fakamavae mai ai, pea ʼe ‘fakalaka te ʼu manu’ ʼi lalo ʼo te ʼakau, ke feala ai honatou lau e te tagata tauhi manu. (Lev. 27:32; Mik. 2:12; 7:14) ʼE lagi ʼaoga anai ki he tauhi ovi Kilisitiano ke ina ʼiloʼi lelei ia te faga ovi ʼa te ʼAtua pea mo te ʼaluʼaga ʼo nātou takitokotahi ʼaē ʼe tokaga ki ai. (Vakaʼi ia Tāʼaga Lea 27:23.) Koia, ko te tokaga ki te faga ovi ʼe ko he faʼahi maʼuhiga ʼi te ʼu faʼahi ʼaē ʼe felōgoi kiai ia te kau tagata ʼāfea. ʼE kau kiai ia te ʼu fakatuʼutuʼu moʼo tokoni ki te ovi ʼaē kua hehē. Neʼe ʼui e Sehova ʼe ina kumi anai tana ʼu ovi pea mo foaki anai kiā nātou ia te tokaga ʼaē ʼe ʼaoga kiā nātou. (Esk. 34:11) Koia ʼe fiafia ia te ʼAtua mokā fai e te kau tagata ʼāfea ia te ʼu faʼahi ʼaia moʼo tokoni ki he ovi kua hehē ke toe liliu mai ki te lotoʼā.

 8. Ko te ʼu ʼaluʼaga fea ʼaē ʼe feala ai ki te kau tagata ʼāfea ke natou foaki he tokoni ʼe ʼaoga tāfito ki he ovi?

⁸ Kā mahaki he tehina peʼe ko he tuagaʼane ʼi te faʼahi fakasino, ʼe ko he meʼa fakalotomālohi kiā ia mokā ʼe ʼaʼahi e he tauhi ovi ʼo te faga ovi ʼa te ʼAtua. ʼE toe fēia pē mo kapau ʼe mahaki he ovi ʼi te faʼahi fakalaumālie, pea ʼe foaki age ki ai ia te tokoni ʼaē ʼe ʼaoga tāfito ki ai. ʼE feala ki te kau tagata ʼāfea ke natou lau age he ʼu vaega fakatohi-tapu, vakaʼi mo ia he ʼalatike, fai palalau mo ia ki he ʼu puani maʼuhiga ʼo te fono, mo faikole mo ia, pea mo ʼihi atu ʼu meʼa ʼe feala ke natou fai. ʼE feala ke natou fakamahino age kiā ia ʼaē kua mole kei fakatahi mo te kōkelekāsio, ʼe fiafia anai te kōkelekāsio mokā natou sio ʼe toe ʼalu age ki te ʼu fono. (2 Ko. 1:3-7; Sake 5:13-15) Ko he ʼaʼahi, he telefoni, peʼe ko he faitohi, ʼe maʼuhiga ʼaupitō! ʼE feala ke toe fiafia lahi age mo te tagata ʼāfea manavaʼofa ʼaē ʼe ina foaki ia te tokoni ʼaē ʼe ʼaoga tāfito ki he ovi kua tō kehe mai te faga ovi.

 Ko He Gāue ʼe Tou Kau Fuli Kiai

9, 10. He koʼē ʼe tou ʼui ko te tokaga ki he ovi kua hehē ʼe mole gata pē ki te kau tagata ʼāfea?

⁹ ʼE tou māʼuʼuli nei ʼi he temi ʼe tou maʼumaʼua ai pea mo he ʼu temi faigataʼa, koia ʼe lagi feala ai ke mole tou tokagaʼi hota tehina kua tō kehe atu ʼi te kōkelekāsio. (Hep. 2:1) Kae ko te faga ovi ʼa Sehova ʼe maʼuhiga kiā te ia. Ko te ovi takitokotahi ʼe maʼuhiga, ohagē pē ko te ʼu koga kehekehe ʼo tota sino. Koia, ko tātou fuli ʼe ʼaoga ke tou tōkakaga ki ʼotatou tehina pea ke tou fetokoniʼaki. (1 Ko. 12:25) ʼE fēia koa takotou manatu?

¹⁰ Tatau aipē peʼe ko te ʼu tagata ʼāfea ʼaē ʼe tonu ke natou kumi he ovi kua hehē pea mo tokoni ki ai, kae ʼe mole gata pē te gāue ʼaia mo te kau tagata ʼāfea. ʼE feala mo ʼihi ke kaugā gāue mo te kau tauhi ovi ʼaia. ʼE feala pea ʼe tonu ke tou fakalotomālohi pea mo foaki ia he tokoni fakalaumālie ki ʼotatou tehina mo tuagaʼane ʼaē ʼe ʼaoga kiā nātou he tokoni ke natou toe liliu mai ki te faga ovi. ʼE foaki feafeaʼi ia te tokoni ʼaia?

11, 12. Koteā ia te fealagia ʼaē ʼe feala ke kotou maʼu moʼo tokoni ki he tahi ʼe ʼaoga ki ai he tokoni fakalaumālie?

¹¹ ʼI ʼihi ʼaluʼaga, ʼe feala ki te ʼu tagata ʼāfea ke natou hinoʼi he tehina peʼe ko he tuagaʼane ke ina fai he ako Tohi-Tapu mo he tahi ʼe mole kei fakatahi mo te kōkelekāsio, kae ʼe kumi tokoni. Ko te fakatuʼutuʼu ʼo te ʼu taʼi faiga ʼaia, ʼe ko he tokoni ke natou toe fakatuputupu ia “te ʼofa ʼaē neʼe [natou] maʼu ʼi te kamata.” (Fakh. 2:1, 4) ʼE feala ke toe lagaʼi pea mo fakalotomālohiʼi ʼi te faʼahi fakalaumālie ia totatou ʼu tehina ʼaia, ʼaki he vakaʼi mo nātou he ʼu manatu neʼe fakahā ʼi te ʼu fono ʼaē neʼe mole kau ai.

¹² Kapau ʼe kole atu e te ʼu tagata ʼāfea ke kotou fai he ako mo he tahi ʼe ʼaoga ki ai he tokoni fakalaumālie, kotou faikole kiā Sehova ke ina takitaki takotou ʼu faiga pea ke ina tapuakiʼi. ʼE mahino ia, ʼe kotou ‘tuku anai takotou ʼu gāue kiā Sehova totonu, pea ko takotou ʼu fakatuʼutuʼu ʼe tuʼu mālohi anai.’ (Taag. 16:3) Kotou metitāsioʼi te ʼu vaega Tohi-Tapu pea mo te ʼu puani fakalotomālohi ki te tui ʼaē ʼe feala ke kotou fakaʼaogaʼi ʼi te ako mo nātou ʼaē ʼe ʼaoga ki ai he tokoni fakalaumālie. Kotou metitāsioʼi te faʼifaʼitaki lelei neʼe tuku mai e te ʼapositolo ko Paulo. (Lau ia Loma 1:11, 12.) Neʼe fakaʼamu ia Paulo ke sio ki te ʼu Kilisitiano ʼo Loma moʼo foaki age kiā nātou he ʼu meʼa ʼofa fakalaumālie ke feala ai hanatou nonofo mālolohi ʼi te tui. Neʼe toe fakaʼamu foki ke iā nātou he fefakalotomālohiʼaki. ʼE mole tonu koa lā mo tātou ke tou maʼu ia te taʼi manatu ʼaia mokā tou tokoni ki he ovi kua hehē mai te faga ovi ʼa te ʼAtua?

13. Koteā ʼaē ʼe lagi feala ke kotou fai palalau kiai mo ia ʼaē ʼe mole kei fakatahi mo te kōkelekāsio?

¹³ Lolotoga takotou fai palalau, ʼe lagi feala ke kotou fai ki ai te fehuʼi ʼaenī: “Neʼe ke ʼiloʼi feafeaʼi ia te moʼoni?” Kotou fakamanatuʼi age te ʼu fiafia ʼaē neʼe ina maʼu ʼi te temi ʼaia, ʼo kotou fakalotomālohiʼi ia te ovi ʼaē ʼe mole kei fakatahi mo te kōkelekāsio ke palalau ki te ʼu fiafia ʼaē neʼe ina maʼu ʼi te temi ʼaē neʼe kei tatuʼu mai ai ki te ʼu fono, tana kau ki te fai fakamafola, pea mo te ʼu fakatahi lalahi. Kotou fai palalau mo ia ki te ʼu lakaga fiafia ʼi te ʼu temi ʼaē neʼe kotou fai fakamafola fakatahi ai. Kotou palalau age ki te ʼu fiafia ʼe kotou maʼu ʼi takotou fakaovi ʼaē kiā Sehova. (Sake 4:8) Kotou fakahā ia tokotou loto fakafetaʼi ki te faʼahiga tokaga ʼa te ʼAtua kiā tātou ohagē ko hana hahaʼi, tāfito lā ʼi tana foaki mai te fakalotofīmālie pea mo he ʼamanaki ʼi totatou ʼu temi mamahi.—Loma 15:4; 2 Ko. 1:3, 4.

14, 15. Koteā te ʼu tapuakina neʼe maʼu ki muʼa atu e nātou ʼaē ʼe mole kei fakatahi mo te kōkelekāsio, ʼaē ʼe lagi ʼaoga anai ke kotou fakamanatuʼi age?

¹⁴ ʼE lagi lelei anai ke fakamanatuʼi age kiā ia ʼaē ʼe mole kei fakatahi mo te kōkelekāsio, ia he ʼu tapuakina neʼe ina maʼu ʼi te temi ʼaē neʼe kau ai ki te ʼu gāue ʼo te kōkelekāsio. Ohagē lā, neʼe ina maʼu te tapuakina ʼaē ke tuputupu ʼi te ʼatamai mālama ʼo ʼuhiga mo te Folafola ʼa te ʼAtua pea mo tana ʼu fakatuʼutuʼu. (Taag. 4:18) ʼI tana ‘haʼele ʼaki te laumālie,’ neʼe lagi faigafua age kiā ia tana tekeʼi ia te ʼu fakahala ki te agahala. (Kal. 5:22-26) Pea ʼaki he leʼo ʼo loto ʼe maʼa neʼe feala ai hana fakaovi kiā Sehova ʼi te faikole pea mo maʼu ia ‘te tokalelei ʼa te ʼAtua, ʼaē ʼe māʼoluga age ʼi te ʼu manatu fuli pea mo puipui totatou ʼu loto pea mo totatou ʼu ʼatamai.’ (Filp. 4:6, 7) Kotou taupau maʼu ia te ʼu manatu ʼaia, kotou fakahā he tokaga fakamālotoloto, pea tāfito, ke kotou fakalotomālohiʼi ʼaki te ʼofa ia tokotou tehina peʼe ko tokotou tuagaʼane ke toe liliu mai ki te kōkelekāsio.—Lau ia Filipe 2:4.

¹⁵ Kotou fakakaukauʼi age muʼa mo kanapau lā ko koutou neʼe ko he tagata ʼāfea ʼe kotou fai he ʼaʼahi fakatauhi ovi. ʼE feala hakotou fakalotomālohiʼi he taumātuʼa ʼe mole kei fakatahi mo te kōkelekāsio ke nā metitāsioʼi ia te temi ʼaē neʼe nā ʼuluaki  logo ai ki te moʼoni ʼo te Folafola ʼa te ʼAtua. Neʼe lagi taulekaleka ia te moʼoni, mo fakapotopoto, mo fakafiafia, pea mo maʼu ai te fakaʼāteaina fakalaumālie! (Soa. 8:32) Neʼe lagi lahi tanā loto fakafetaʼi ʼo ʼuhiga mo te ʼu manatu ʼaē neʼe nā ako ʼo ʼuhiga mo Sehova, tona ʼofa, pea mo tana ʼu fakatuʼutuʼu taulekaleka! (Vakaʼi ia Luka 24:32.) Kotou fakamanatuʼi age kiā nāua ia te felōgoi lelei ʼaē mo Sehova pea mo te pilivilēsio taulekaleka ʼo te faikole ʼaki he leʼo ʼo loto ʼe maʼa, ʼaē ʼe maʼu e te kau Kilisitiano kua foaki ia tonatou maʼuli ki te ʼAtua. Kotou fakalotomālohiʼi fakamālotoloto ia nātou ʼaē ʼe mole kei fakatahi mo te kōkelekāsio ke natou toe tali ia “te logo lelei fakakolōlia ʼo te ʼAtua fiafia” ko Sehova.—1 Tim. 1:11.

Kotou Haga ʼOfa Kiā Nātou

16. Tuku mai he faʼifaʼitaki ʼe fakahā ai ia te fua lelei ʼo te ʼu faiga ʼaē moʼo foaki ia he tokoni ʼi te faʼahi fakalaumālie.

¹⁶ ʼE ʼi ai moʼoni koa he ʼu fua ʼo te ʼu tokoni ʼaenī neʼe tou vakaʼi ʼi te palakalafe 14 mo 15? ʼEī. Ohagē lā, ko te tūpulaga neʼe kaugā fagona ʼi tona taʼu 12, pea ʼi tona taʼu 15 neʼe mole kei fakatahi mo te kōkelekāsio. Kae ki muli age neʼe toe mālohi ʼi te faʼahi fakalaumālie, pea neʼe kau ki te selevisi temi kātoa iā taʼu e 30. Neʼe toe mālohi ʼi te faʼahi fakalaumālie he neʼe ko te tokoni ʼaē neʼe foaki tāfito age e te tagata ʼāfea. Neʼe ina leleiʼia ʼaupitō ia te tokoni fakalaumālie ʼaē neʼe foaki age!

17, 18. Ko te ʼu kalitātē fea ʼaē ʼe ʼaoga anai ke kotou maʼu moʼo tokoni ki he tahi kua hehē mai te faga ovi ʼa te ʼAtua?

¹⁷ ʼE ko te ʼofa ʼaē ʼe ina uga te kau Kilisitiano ke natou tokoni kiā nātou ʼaē ʼe mole kei fakatahi mo te kōkelekāsio ke natou toe liliu mai. ʼO ʼuhiga mo tana ʼu tisipulo, neʼe ʼui fēnei e Sesu: “E au foaki atu kiā koutou te fakatotonu foʼou, ke kotou feʼofaʼofani; ohagē ko taku ʼofa ʼaē kiā koutou, ke toe fēia foki mo koutou, ke kotou feʼofaʼofani. ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soa. 13:34, 35) ʼEī, ko te ʼofa ʼe ko te fakaʼiloga ʼo te kau Kilisitiano moʼoni. Ko te ʼofa ʼaia, ʼe mole tonu koa lā ke fakahā age ki te kau Kilisitiano ʼaē ʼe mole kei fakatahi mo te kōkelekāsio? ʼE mahino ia! Kae ko te taʼi tokoni ʼaia ʼaē ʼe ʼaoga, ʼe fakamaʼua kiai ia he ʼu kalitātē fakaʼatua.

¹⁸ Kapau ʼe kotou fia tokoni ki he tahi kua hehē mai te faga ovi ʼa te ʼAtua, ko te ʼu kalitātē fea ʼaē ʼe ʼaoga anai ke kotou fakahā? ʼO mole gata pē ʼi te ʼofa, ʼe lagi ʼaoga ke kotou manavaʼofa, agalelei, agamalū, pea mo faʼa kātaki. ʼO mulimuli pē ki te ʼu ʼaluʼaga, ʼe lagi toe ʼaoga anai ia te loto fakamolemole. Neʼe tohi fēnei e Paulo: “Kotou kofuʼi foki te ʼu ʼofa mamahi ʼo te manavaʼofa, pea mo te agalelei,  te manatu agavaivai, te agamalū pea mo te faʼa kātaki. Kotou haga fekātakiʼaki pea mo fefakamolemoleʼaki ʼaki he lotolelei, mo kapau ʼe lotomamahi he tahi ʼi he meʼa ki he tahi age. Ohagē pē ko te lotolelei ʼa Sehova ke ina fakamolemole kiā koutou, kotou toe fai fēia pē mo koutou. Kae, ʼo hilifaki ki te ʼu meʼa fuli ʼaia, kotou kofuʼi ia te ʼofa, he ko he noʼo haohaoa ia ki te logo tahi.”—Kol. 3:12-14.

19. He koʼē ʼe fua lelei anai tatatou faiga ʼo tokoni ki te ʼu ovi ke natou toe liliu mai ki te kōkelekāsio ʼo te kau Kilisitiano?

¹⁹ Ko te ʼalatike ʼaē kā hoa mai, ʼe talanoa anai pe koʼē neʼe hehē ʼihi mai te faga ovi ʼa te ʼAtua. ʼE toe talanoa ai peʼe feafeaʼi te fakatalitali ʼo nātou ʼaē ʼe toe liliu ki te kōkelekāsio. Kapau ʼe kotou ako ia te ʼalatike ʼaia pea mo metitāsioʼi te faʼahi ʼaia, kotou tui papau ko te ʼu faiga fuli ʼaē ʼe kotou fai ʼaki te ʼamanaki ʼaē ke kotou tokoni ki te kau ovi ke toe liliu mai, ʼe fua lelei anai. ʼI te tuʼu ʼo te ʼu faʼahiga meʼa ʼaenī, tokolahi te hahaʼi ʼe natou teitei fakaʼaogaʼi tonatou maʼuli kātoa moʼo tānaki honatou ʼu koloa, kae ko te maʼuli ʼe maʼuhiga age ia ʼi te paʼaga fuli ʼo te mālamanei. Neʼe fakahā lelei e Sesu ia te faʼahi ʼaia ʼi tana lea fakatātā ʼo te ovi ʼaē neʼe puli. (Mat. 18:12-14) ʼOfa pē ke kotou manatuʼi te puani ʼaia mokā kotou tokoni fakamālotoloto ki te ʼu ovi ʼaē ʼe ʼofa mamahi ki ai Sehova pea kua natou hehē, ke natou toe liliu mai ki te faga ovi.

ʼE Kotou Tali Feafeaʼi Anai?

• Ko te maʼua fea ʼe tonu ke fakahoko e te kau tauhi ovi Kilisitiano ki te ʼu ovi ʼaē kua hehē mai te faga ovi?

• ʼE feafeaʼi hakotou tokoni kiā nātou ʼaē ʼe mole kei fakatahi mo te kōkelekāsio?

• Ko te ʼu kalitātē fea ʼe ʼaoga anai ke kotou maʼu moʼo tokoni kiā nātou ʼaē kua hehē mai te faga ovi?

[ʼU fehuʼi ʼo te ako]

[Paki ʼo te pasina 15]

Ko te kau tauhi ovi Kilisitiano ʼe natou faiga ʼaki te ʼofa ke natou tokoni kiā nātou ʼaē kua hehē mai te faga ovi ʼa te ʼAtua