Te ʼu Fehuʼi ʼa Te Kau Lautohi

ʼI tana tohi ki te kau Hepeleo, neʼe talanoa ia te ʼapositolo ko Paulo ki “te hilifaki ʼo te ʼu nima.” Neʼe fakaʼuhiga koa ki te fakanofo ʼo te ʼu tagata ʼāfea peʼe ki he tahi age fakatuʼutuʼu?—Hep. 6:2.

ʼE mole feala ke tou ʼiloʼi papau ia te faʼahi ʼaia, kae neʼe lagi talanoa ia Paulo ki te hilifaki ʼo te ʼu nima moʼo fakaʼuhiga ki te foaki ʼo he ʼu meʼa ʼofa ʼo te laumālie.

ʼE moʼoni, ʼi te Tohi-Tapu ʼe tau talanoa ai ki te hilifaki ʼo te ʼu nima moʼo fakaʼuhiga ki te hinoʼi ʼo ni ʼu tagata ki he ʼu gāue Fakateokalatike. Ko Moisese neʼe ina “hilifaki tona nima” kiā Sosue ʼi te temi ʼaē neʼe hinoʼi ai ia ia ke ina fetogi ia ia. (Teu. 34:9) ʼI te kōkelekāsio Fakakilisitiano, neʼe fakanofo ʼihi tagata fakapotopoto ʼi te kua hilifaki ʼo te ʼu nima ʼaē kiā nātou. (Gāue 6:6; 1 Tim. 4:14) Neʼe fai e Paulo ia te fakatokaga ke ʼaua naʼa hilifaki fakavilivili ʼo te ʼu nima ki he tagata.—1 Tim. 5:22.

Kae neʼe fakalotomālohiʼi e Paulo ia te kau Kilisitiano Hepeleo ke natou “hiki atu ki te kātoa ʼo te ʼuhigaʼi tagata” ʼi tanatou kua tuku “te akonaki ʼo te kamataʼaga ʼo ʼuhiga mo Kilisito.” Pea neʼe talanoa leva ia ki te “fakahemala ʼo ʼuhiga mo te ʼu gāue mate pea mo te tui ki te ʼAtua, te akonaki ʼo ʼuhiga mo te ʼu papitema pea mo te hilifaki ʼo te ʼu nima.” (Hep. 6:1, 2) Ko tona fakaʼuhiga koa, ko te hinoʼi ʼo te ʼu tagata ʼāfea ʼe ko he fakatuʼutuʼu ʼe kau ʼi te akonaki ʼo te kamataʼaga, ʼo maʼua ki te ʼu tehina Kilisitiano ke natou hiki atu kiai? Kailoa. Ko te ʼuhiga tagata ʼāfea ʼi te kōkelekāsio, ʼe ko he pilivilēsio ia ʼe tonu ke fakaʼamu kiai ia te ʼu tehina kua fakapotopoto pea ke natou mahino ki te maʼuhiga ʼo te gāue ʼaia.—1 Tim. 3:1.

Kae neʼe ʼi ai te tahi ʼaluʼaga ʼaē neʼe hilifaki ai te ʼu nima ki he tahi. ʼI te ʼuluaki sēkulō, neʼe situʼa ia Sehova ki te kau Sutea kae neʼe ina tali ia te Iselaele fakalaumālie, ia te kōkelekāsio ʼo te kau Kilisitiano fakanofo. (Mat. 21:43; Gāue 15:14; Kal. 6:16) Ko te ʼu meʼa ʼofa fakamilakulo ʼo te laumālie, ohagē ko te palalau ʼi te ʼu lea kehekehe, neʼe fakamoʼoni ki te fetogi maʼuhiga ʼaia. (1 Ko. 12:4-11) ʼI te kua tui ʼaē ʼa Kolonelio pea mo tona lotofale, neʼe natou maʼu ai te laumālie māʼoniʼoni, pea neʼe hā lelei ia te faʼahi ʼaia ʼi tanatou “palalau ʼi te ʼu lea kehekehe.”—Gāue 10:44-46.

ʼI ʼihi temi, neʼe foaki ia te ʼu meʼa ʼofa fakamilakulo ʼaki te hilifaki ʼo te ʼu nima. ʼI te temi ʼaē neʼe fakamafola ai e Filipo ia te logo lelei ʼi Samalia, neʼe papitema ai ia te tokolahi. Ko te kolesi pule neʼe natou fekauʼi ai te ʼu ʼapositolo ko Petelo pea mo Soane ke ʼolo ki te potu ʼaia. Koteā tona tupuʼaga? ʼE tou lau fēnei ʼi te Tohi-Tapu: “Pea neʼe nā hilifaki ʼonā nima [kiā nātou ʼaē neʼe hoki papitema], pea neʼe natou kamata tali ia te laumālie māʼoniʼoni.” Ko tona fakaʼuhiga, neʼe lagi natou tali ia te ʼu meʼa ʼofa ʼo te laumālie, ʼo natou maʼu ai he ʼu faʼahiga fealagia neʼe sio kiai ia te hahaʼi. ʼE tou ʼiloʼi te faʼahi ʼaia, heʼe ko Simone ʼaē neʼe ina fai ia te ʼu meʼa faifakalauʼakau ʼi te temi muʼa, neʼe sio mata ki te gāue ʼo te laumālie kiā nātou, pea neʼe faiga ʼaki he loto mānumānu ke ina totogi ia te fealagia ʼaē ke ina hilifaki tona ʼu nima ki ʼihi moʼo foaki ia te laumālie māʼoniʼoni kiā nātou, ke feala ai hanatou fakahoko mo nātou ia he ʼu milakulo. (Gāue 8:5-20) Ki muli age, neʼe papitema ia te toko 12 ʼi Efesi. ʼE tou lau fēnei: “ ʼI te hilifaki e Paulo ʼona nima kiā nātou, neʼe hifo ia te laumālie māʼoniʼoni kiā nātou, pea neʼe natou kamata palalau ʼi te ʼu lea kehekehe pea mo lea fakakikite.”—Gāue 19:1-7; fakatatau pea mo 2 Timoteo 1:6.

Koia, ʼi te koga tohi ʼo Hepeleo 6:2, ʼe hā mai neʼe talanoa ia Paulo ki te hilifaki ʼo te ʼu nima moʼo fakaʼuhiga ki te foaki ʼo te ʼu meʼa ʼofa ʼo te laumālie kiā nātou ʼaē neʼe foʼofoʼou mai.