Ko Te Mālohi ʼo Te ʼAtua ʼe Hā ʼi Te ʼu Fetuʼu

“Hiki ake ʼokotou mata ki ʼoluga pea ke kotou sio. Ko ai koa ʼaē neʼe ina fakatupu te ʼu meʼa ʼaia? Ko Ia ʼaē neʼe ina fakaʼasi mai ki tuʼa ʼonatou kautau ʼo fai pē ki tona tokolahi, pea ina pāui fuli nātou ʼi ʼonatou higoa. ʼI te lahi ʼo te mālohi, heʼe toe mālohi foki ia ʼi tona māfimāfi, ʼe mole puli he tahi iā nātou.”—ISAIA 40:26.

KO TE laʼā ʼe ko he foʼi fetuʼu pē ia. Kae, ʼe tuʼa 330 000 ia tona lahi age ʼi te kele. ʼE lahi te ʼu fetuʼu ʼaē ʼe tuʼu ovi ki te kele ʼe liliki age ia ʼi te laʼā. Kae ko ʼihi fetuʼu, ohagē ko te tahi ko tona higoa ko V382 Cygni, ʼe lagi tuʼa 27 ia tona lahi age ʼi te laʼā.

ʼE feafeaʼi hakotou ʼiloʼi ia te mālohi ʼo te vela ʼo te laʼā? Fakakaukauʼi age ia te mālohi ʼo he afi mo kapau ʼe kotou tutuʼu iā kilometa e hogofulu-mā-nima mai ai pea ʼe kei kotou logoʼi aipē ia tona vevela. Ko te laʼā, ʼi tona fakafuafua ko kilometa e 150 miliona ia tona mamaʼo mo te kele. Kae, ʼi te ʼu ʼaho taʼi laʼā, ʼe feala pē ke maka pulapula vai ia te kili! ʼE fakaofoofo, heʼe ko te vaega tahi ki te tahi miliale ʼo te mālohi ʼo te laʼā ʼaē ʼe kaku mai ki te kele. Kae ko te kiʼi koga ʼo te mālohi ʼaia ʼo te laʼā ʼe feʼauga moʼo taupau ia te maʼuli ʼi te kele.

ʼI tona fakahagatonu, ʼi te fakafuafua ʼaē neʼe maʼu e te kau popoto ʼo ʼuhiga mo te kātoa ʼo te mālohi ʼaē ʼe tuku mai e te laʼā, ʼe feʼauga moʼo taupau te maʼuli ʼo he ʼu fetuʼu e 31 afe miliale ʼe tatau mo te kele. ʼI te tahi age fakafuafua ʼo te toe mālohi ʼaia, mo kanapau lā neʼe feala age ke puke kātoa ia te mālohi ʼo te laʼā ʼi he sekonita pē e tahi, pea ʼe feala pē ke ina fakahila ia Amelika “ ʼaki he mālohi ʼe feala ke tologa iā taʼu e hiva miliona,” ko te ʼui ʼaia ʼa te Space Weather Prediction Center (SWPC).

Ko te mālohi ʼo te laʼā ʼe haʼu mai te ʼuho ʼo te laʼā—ʼe hagē ko he fale hila fakanukeleʼea ʼe ina fakatahiʼi ia te ʼu atomes pea mo fakahaʼu mai ki tuʼa ia te toe mālohi. Ko te laʼā ʼe lahi ʼaupitō pea mo māʼopoʼopo ʼaupitō tona ʼuho, koia ʼaē ʼe ʼaoga ai he ʼu lauʼi miliona taʼu ke feala ki te mālohi ʼaē ʼe faʼufaʼu ia tona ʼuho ke hā mai ki tuʼa. ʼE ʼui fēnei e te SWPC: “Kanapaulā neʼe tonu ke fakagata e te laʼā ia te faʼufaʼu ʼo te mālohi ʼi totatou temi, ʼe hoki lagi hili taʼu e nimagofulu miliona pea hoki tou logoʼi ʼi te Kele!”

ʼI te lakaga ʼaenī, kotou vakaʼi ia te ʼaluʼaga ʼaenī: Mokā kotou hiki ake ai ʼokotou mata ʼi he pō ʼe lau lelei, ʼe kotou sisio ai ki te ʼu lauʼi afe fetuʼu, ʼe tahi ʼalu pē mo tona toe mālohi lahi, ʼo teitei tatau pē mo te laʼā. Pea ʼaki te ʼu fakafuafua ʼa te kau popoto ko te ʼu fetuʼu ʼe lauʼi miliale mo miliale ʼi te ʼatulaulau!

ʼE haʼu maifea ia te ʼu fetuʼu fuli ʼaia? Tokolahi te kau fai kumi ʼe natou tui ʼi te temi nei ki he ʼu tupuʼaga ʼe mole heʼeki natou mahino kiai, ko te ʼatulaulau neʼe tupu fakafokifā kua hili kiai ia taʼu e 14 miliale. ʼE fakamahino lelei mai ʼi te Tohi-Tapu: “ ʼI te kamataʼaga neʼe fakatupu e te ʼAtua ia te lagi pea mo te kele.” (Senesi 1:1) ʼE tou tui papau, ko Ia ʼaē neʼe ina fakatupu ia te ʼu fetuʼu lalahi ʼe natou fakatupu he toe mālohi, ʼe feala ke fakamatalatala tonu ʼe ‘mālohi ʼi tona māfimāfi.’—Isaia 40:26.

ʼE Fakaʼaogaʼi Feafeaʼi e Te ʼAtua Ia Tona Māfimāfi?

Ko Sehova ʼAtua ʼe ina fakaʼaogaʼi ia tona māfimāfi moʼo lagolago kiā nātou ʼe natou fakahoko tona finegalo. Ohagē ko te ʼapositolo ko Paulo neʼe ina fakaʼaogaʼi ia tona mālohi ki te akoʼi ʼo ʼihi ʼo ʼuhiga mo te ʼAtua. Ko Paulo neʼe mole ko he tahi neʼe ʼi ai hona mālohi makehe, kae neʼe ina lava fakahoko ia te ʼu gāue lelei logolā he ʼu fakafeagai fefeka. ʼO feafeaʼi? Neʼe ina ʼiloʼi neʼe ina maʼu ia “te mālohi ʼaē ʼe fakalaka ʼi te mālohi māhani” ʼaē ʼe haʼu mai te ʼAtua.—2 Kolonito 4:7-9.

 Ko Sehova ʼAtua ʼe ina toe fakaʼaogaʼi foki ia tona mālohi moʼo fakaʼauha ia nātou ʼaē ʼe mole natou fakaʼapaʼapa ki tana ʼu lēkula ʼo ʼuhiga mo te aga ʼaē ʼe tonu ke fai. Neʼe fakahā e Sesu Kilisito ia te fakaʼauha ʼo Sotoma mo Komola pea mo te Tulivio ʼi te temi ʼo Noe ʼe ko he ʼu faʼifaʼitaki ʼaia ʼo te vaevae lelei e Sehova ia tona mālohi moʼo fakaʼauha ʼo te kau agakovi. Neʼe fakakikite e Sesu kua vave pē ia te toe fakaʼaogaʼi e Sehova ia tona mālohi moʼo fakaʼauha ia nātou ʼaē ʼe fakafisi ki Tana ʼu lēkula.—Mateo 24:3, 37-39; Luka 17:26-30.

ʼE Malave Feafeaʼi Kiā Koutou?

ʼI te hili ʼo tatatou metitāsio ki te mālohi ʼo te ʼAtua ʼaē ʼe hā ʼi te ʼu fetuʼu, ʼe lagi kotou manatu tahi mo te Hau ko Tavite, ʼi tana ʼui fēnei: “Kā au sio ki tau ʼu lagi, te ʼu gāue ʼo tou ʼu nima, te māhina pea mo te ʼu fetuʼu ʼaē neʼe ke teuteuʼi, koteā te ʼuhiga ʼo te tagata ʼaē kā mate ke ke manatuʼi ia ia, pea mo te foha ʼo te tagata ʼaē neʼe toʼo mai te kele ke ke taupau lelei ia ia?”—Pesalemo 8:3, 4.

ʼE tonu ke tou agavaivai ʼo tou mahino ko tātou ʼe tou mata veliveli mokā fakatatau ki te lahi ʼaupitō ʼo te ʼatulaulau. Kae ʼe mole tonu ke tou tuʼania ki te mālohi ʼo te ʼAtua. Neʼe uga e Sehova ia te polofetā ko Isaia ke ina tohi ia te ʼu palalau fakalotomālohi ʼaenī: “[Ko te ʼAtua] ʼe ina foaki te mālohi kiā ia ʼaē kua gaʼegaʼe; pea ʼe ina fakatuputupu te mālohi iā ia ʼaē ʼe mole hona mālohi. Ko te tamaliki tagata ʼe natou gaʼegagaʼe anai pea mo vaivavai anai, pea ko te kau talavou ʼe natou tūkia moʼoni anai, kae kiā nātou ʼaē ʼe natou falala kiā Sehova ʼe natou toe mālolohi anai. ʼE natou mahiki ake anai ʼaki he ʼu kapakau, ohagē ko te ʼu ʼakūila. ʼE natou feleleʼi anai pea ʼe mole natou vaivavai anai; ʼe natou haʼele anai pea ʼe mole natou gaʼegagaʼe anai.”—Isaia 40:29-31.

Kapau ʼe kotou loto ke kotou fai ia te finegalo ʼo te ʼAtua, ʼe feala ke kotou tui papau ʼe ina foaki atu anai ia tona laumālie māʼoniʼoni ke tokoni atu kiā koutou. Kae ʼe tonu anai ke kotou kole ia te faʼahi ʼaia. (Luka 11:13) ʼAki te tokoni ʼa te ʼAtua, ʼe feala ke kotou kātakiʼi ia he faʼahiga ʼahiʼahi pē pea mo maʼu ia te mālohi moʼo fai ia te meʼa ʼaē ʼe totonu.—Filipe 4:13.

[Fakamatala ʼo te pasina 7]

ʼAki te tokoni ʼa te ʼAtua, ʼe feala ke kotou maʼu ia te mālohi moʼo fai ia te meʼa ʼaē ʼe totonu

[Paki ʼo te pasina 7]

ʼO kamata mai ʼoluga mai te faʼahi hema: Ko te galaxie ʼo Whirlpool, te ʼu Pléiades (te ʼu fetuʼu ʼe fakatahitahi), te Nébuleuse dʼOrion, te galaxie dʼAndromède

[Paki ʼo te pasina 7]

Ko te laʼā ʼe tuʼa 330 000 ia tona lahi age ʼi te kele

[Haʼuʼaga ʼo te paki pasina 7]

Pleiades: NASA, ESA and AURA/Caltech; all others above: National Optical Astronomy Observatories