Ko Te ʼOfa ʼo Te ʼAtua ʼe Hā ʼi Te ʼOfa ʼa He Faʼē

“ ʼE feala koa ki he fafine ke ina galoʼi ia tana tamasiʼi ʼaē ʼe ina fafaga, pea ke mole ʼofa mamahi ki te tama ʼo tona fatu? Tatau aipē peʼe galoʼi e te ʼu fafine ʼaia, kae ʼe mole au galoʼi anai koe.”—ISAIA 49:15.

ʼE KITA sio ki te kiʼi tamasiʼi ʼaē neʼe hoki tupu ʼe ʼōposi e tana faʼē ʼaē ʼe ina fafaga ia ia. Ko te ʼaluʼaga ʼaenī ʼe hā ai ia te tokaga fakalelei pea mo te ʼofa ʼo te faʼē. “ ʼI te temi ʼaē neʼe au ʼuluaki fāʼufua ai ia taku kiʼi tamasiʼi, neʼe malave ʼaupitō ai kiā te au ia te ʼuhiga ʼo te ʼofa pea mo toku maʼua ki taku kiʼi fānau ʼaē neʼe hoki tupu,” ko te ʼui ʼaia e te faʼē ʼe higoa ko Pam.

Logopē lā ʼe ko he ʼaluʼaga ʼe hoko moʼoni, kae ko te ʼu kumi ʼe ina fakamoʼoni ko te ʼofa lahi ʼo te faʼē ʼe tokoni ki te tuputupu ʼo tana tamasiʼi. ʼI te tohi ʼaē neʼe tā e te World Health Organization Programme on Mental Health (Polokalama ʼo Te Kautahi Fakamālamanei ʼo ʼUhiga Ki Te Maʼuli Haohaoa ʼo ʼUhiga Mo Te Mahaki ʼUlu): “ ʼE hā mai ʼi te ʼu sivi, ko te ʼu fānau ʼaē ʼe liʼakina pea mo vaheʼi mai tanatou faʼē, ʼe natou liliu ʼo lotomamahi pea mo lotovaivai, ʼi ʼihi temi ʼe natou hoko mātataku.” ʼI te tohi pē ʼaia, ʼe fakahā ai ia te sivi ʼo ʼuhiga mo te ʼu fānau ʼaē ʼe ʼofainaʼi pea mo tokaga ki ai talu mai tanatou kei liliki, ʼe mahino ia, ʼe laka age tonatou ʼatamai ʼi te fānau ʼaē neʼe liʼakina.

ʼO ʼuhiga mo te maʼuhiga ʼo te ʼofa ʼa he faʼē, neʼe ʼui fēnei e te tōketā ʼo te ʼulu ko Alan Schore ʼo te Faleako Fakatōketā ʼo UCLA ʼi Amelika: “Ko te ʼuluaki felōgoi ʼa te tamasiʼi, ʼaē mo tana faʼē, ʼe ko he faʼifaʼitaki ia, ʼe ina teuteuʼi ʼo talu ai ia te ʼu fealagia ʼo he tahi ki tana ʼu felōgoi fuli ki muli age.”

Kae meʼa fakaʼofaʼofa foki, heʼe ko te lotomamahi, mo te lotovaivai, mo te mahaki, pea mo ʼihi atu ʼu fakaneke ʼe feala pē ki he  faʼē ke tupu ai hana liʼaki ia tana tamasiʼi peʼe “ina galoʼi ia tana tamasiʼi ʼaē ʼe ina fafaga.” (Isaia 49:15) ʼE mole ko he aga māhani ki he faʼē hana liʼaki peʼe “ina galoʼi tana tamasiʼi.” ʼI tona fakahagatonu, ʼe hagē ko te ʼu faʼē neʼe fakatuʼutuʼu ke natou ʼoʼofa ki tanatou tamasiʼi. ʼI te ʼu kumi neʼe maʼu ai ʼi te lolotoga ʼo te fai fānau, ʼe lahi ʼaupitō ʼi te ʼu faʼē ia te hormone ʼaē ko tona higoa ko te ocytocine, ʼaē ʼe ina fakatupu ʼi te falega fānau ia te mamahi fānau pea ʼe tokoni ki te sino ke ina faʼufaʼu ia te huʼa pipi maʼa te tamasiʼi. Ko te hormone pē ʼaia ʼaē ko te ocytocine, ʼe faʼufaʼu ʼi te tagata pea mo te fafine, pea ʼe toe feala pē ki te hormone ʼaia ke ina fakatupu ia he ʼu agaaga ʼe ina fakahā ai te ʼofa.

Neʼe Tupu Feafeaʼi Mai Ia Te ʼOfa?

Ko nātou ʼaē ʼe natou lagolago ki te akonaki ʼo te evolisio ʼe natou akonakiʼi ko te ʼofa ʼaē ʼe mole liufaki, ohagē ko ʼaē ʼa he faʼē pea mo tana tamasiʼi, neʼe tupu fakafokifā pea neʼe taupau e te filifili fakanātulā koteʼuhi ʼe fua lelei kiā nātou ʼaē ʼe natou maʼuliʼi. Ohagē lā ʼi te sulunale Mothering Magazine ʼe ʼui fēnei ai: “Ko te ʼuluaki koga ʼo totatou ʼuto, ʼaē ʼe tuputupu ʼo laka age ʼi te ʼuto ʼaē ʼe tou maʼu mai tatatou ʼu kui, ʼe ko te système limbique ʼaē ko te faʼahi ʼaē ʼe tupu ai te ʼu meʼa ʼaē ʼe tou logoʼi. ʼE ko te koga ʼaia ʼo te ʼuto ʼe ina fakafealagia ki te faʼē pea mo tana tamasiʼi ke nā maʼu he ʼu felōgoi ʼe lelei.”

ʼE moʼoni ia, ʼe hā ʼi te ʼu kumi ko te système limbique ʼaē ʼe lahi tana tokoni ki te ʼu meʼa ʼaē ʼe tou logoʼi. Kae, ʼe matatonu koa kiā koutou te ʼui ʼaē ko te ʼofa ʼo te faʼē ki tana tamasiʼi ʼe ko he ikuʼaga fakafokifā ʼo te tuputupu ʼo te ʼuto ʼo he reptile?

Tou vakaʼi ia te tahi age fakamahino. ʼE ʼui ʼi te Tohi-Tapu ko te tagata neʼe fakatupu ʼo mulimuli ki te pāki ʼo te ʼAtua, ʼaki ia te fealagia ʼaē ke ina fakahā ia te ʼu kalitātē ʼo te ʼAtua. (Senesi 1:27) Ko te kalitātē maʼuhiga ʼo Sehova ʼe ko te ʼofa. Neʼe tohi fēnei e te ʼapositolo ko Soane: “Ko ʼaē ʼe mole ʼofa neʼe mole ina ako te ʼiloʼi ʼo te ʼAtua.” Koteā tona tupuʼaga? “Koteʼuhi ko te ʼAtua ʼe ʼofa.” (1 Soane 4:8) ʼE kotou tokagaʼi ʼi te vaega Tohi-Tapu ʼe mole ʼui ai ko te ʼAtua ʼe ina maʼu te ʼofa. Kae, ʼe ina ʼui ko te ʼAtua ʼe ʼofa. ʼE ko ia te Matapuna ʼo te ʼofa.

ʼE fakamatalatala fēnei ʼi te Tohi-Tapu ia te ʼofa: “Ko te ʼofa ʼe kātaki fualoa pea mo agaʼofa. Ko te ʼofa ʼe mole maheka, ʼe mole laupisi, ʼe mole fialahi, ʼe mole ina fai he ʼu aga ʼe mole mata feʼauga, ʼe mole ina kumi pē te meʼa ʼaē ʼe ʼaoga kiā te ia, ʼe mole ʼita ia. ʼE mole ina tokagaʼi te kovi ʼaē neʼe fai age kiā te ia. ʼE mole fakafiafia ki te heʼe faitotonu, kae ʼe fakafiafia ʼaki te moʼoni. ʼE ina ʼamo ia meʼa fuli, ʼe tui kiā meʼa fuli, ʼe falala kiā meʼa fuli, ʼe ina kātakiʼi ia meʼa fuli. Ko te ʼofa ʼe molemo puli ia ʼi he lakaga.” (1 Kolonito 13:4-8) ʼE fakapotopoto koa hatatou tui ki te kalitātē maʼuhiga ʼaenī neʼe fokifā age pē ia kua hā?

ʼE Malave Feafeaʼi Kiā Koutou?

ʼI takotou lau ia te fakaʼuhiga ʼo te ʼofa ʼi te palakalafe ʼaē kua hili atu, ʼe kotou holi fakamālotoloto koa ke kotou maʼu he tahi ʼe ina fakahā atu ia te taʼi ʼofa ʼaia? ʼE ko he agamāhani ia takotou ia te holi ʼaia. Koteā tona tupuʼaga? Koteʼuhi “ko tatou ia te hako o te Atua.” (Gāue 17:29, Tauhi Foou) Neʼe fakatupu tātou ke tou tali pea ke tou fakahā ia te faʼahiga ʼofa ʼaia. Pea ʼe feala anai ke tou tui papau ko te ʼAtua ʼe ʼofa lahi kiā tātou. (Soane 3:16; 1 Petelo 5:6, 7) ʼI te vaega Tohi-Tapu ʼaē ʼi te kamataʼaga ʼo te ʼalatike, ʼe ʼui ai ko te ʼofa ʼo te ʼAtua kiā tātou ʼe mālohi age ia, ʼe tologa age ia, ʼi te ʼofa ʼa he faʼē ki hana tamasiʼi!

Kae ʼe lagi kotou feʼekeʼaki anai: ‘Kapau ko te ʼAtua ʼe poto, mo mālohi pea mo manavaʼofa, he koʼē ʼe mole ina fakagata ia te mamahi? He koʼē ʼe ina fakafealagia ki te tamaliki ke mamate, ke hoko atu te mamahi, pea mo te ʼu maumau ʼi te kele ʼuhi ko te mole lelei ʼo te u fakatuʼutuʼu pea mo te ʼu holi fakavale?’ ʼE ko he ʼu fehuʼi ʼe ʼaoga ke tou maʼu hona ʼu tali fakapotopoto kiai.

Logolā he faʼahiga tali ʼe feala ke fai e te hahaʼi ʼe mole tui, ʼe feala ke tou maʼu he ʼu tali ʼe totonu ki te ʼu fehuʼi ʼaia. Ko te toko lauʼi miliona hahaʼi ʼi te ʼu fenua ʼe lauʼi teau kua natou maʼu te ʼu faʼahiga tali ʼaia ʼi tanatou akoʼi ia te Tohi-Tapu mo te kau Fakamoʼoni ʼa Sehova. ʼE fakaafe koutou e nātou ʼaē ʼe natou tā te nusipepa ʼaenī ke kotou fai fēia. ʼAki te tuputupu ʼo tokotou ʼatamai mālama ʼo ʼuhiga mo te ʼAtua ʼi takotou vakavakaʼi ia tana Folafola pea mo tana fakatupu, ʼe kotou mahino anai ko te ʼAtua ʼe mole mamaʼo pea ʼe tou lava mahino lelei ki ai. ʼE hoki kotou tui papau anai ko te ʼAtua ʼe “mole mamaʼo iā tātou takitokotahi.”—Gāue 17:27.

[Fakamatala ʼo te pasina 8]

Ko te ʼofa ʼo te ʼAtua kiā tātou ʼe tologa age ia, ʼi te ʼofa ʼa he faʼē ki hana tamasiʼi