Tou Liʼaki Te ʼu “Meʼa ʼe Mole Maʼuhiga”

“Ko ia ʼaē ʼe faiga ki he ʼu meʼa ʼe mole maʼuhiga, ʼe mole hona loto.”—TAAG. 12:11.

 1. Koteā te ʼu meʼa maʼuhiga ʼaē ʼe tou maʼu, pea ʼe feafeaʼi hatatou fakaʼaogaʼi lelei ia te ʼu meʼa maʼuhiga ʼaia?

 ʼI TOTATOU ʼuhiga Kilisitiano, ʼe tou maʼu fuli ia he ʼu meʼa ʼe maʼuhiga. ʼE lagi mole tou māhahaki pea ʼe tou mālolohi, pe neʼe tou tutupu ake mo he faʼahiga poto, peʼe tou maʼu koloa. ʼUhi he tou ʼoʼofa ia Sehova, ʼe tou fiafia ʼi te fakaʼaogaʼi ʼo te ʼu meʼa maʼuhiga ʼaia moʼo tauhi kiā te ia, pea ʼe tou tali ia te tokoni ʼaenī ʼe fai mai: “Fakamaʼuhiga ia Sehova ʼaki tau ʼu meʼa maʼuhiga.”—Taag. 3:9.

 2. Koteā te fakatokaga ʼe fai mai ʼi te Tohi-Tapu ʼo ʼuhiga mo te ʼu meʼa ʼe mole maʼuhiga, pea koteā te fakaʼuhiga moʼoni ʼo te fakatokaga ʼaia?

² ʼI te tahi age faʼahi, ʼe toe talanoa ʼi te Tohi-Tapu ki he ʼu meʼa ʼe mole maʼuhiga pea mo fakatokaga mai ke ʼaua naʼa pulinoa totatou temi peʼe ko totatou mālohi ki te kumi ʼo te ʼu meʼa ʼaia. ʼO ʼuhiga mo te faʼahi ʼaia, tou vakaʼi te ʼu palalau ʼaē ʼe tuʼu iā Tāʼaga Lea 12:11. ʼE ʼui fēnei: “Ko ʼaē ʼe ina gāueʼi tona kele ʼe mākona anai ʼi te pane, kae ko ia ʼaē ʼe faiga ki he ʼu meʼa ʼe mole maʼuhiga, ʼe mole hona loto.” ʼE mole faigataʼa hatatou mahino ki te fakaʼuhiga moʼoni ʼo te tāʼaga lea ʼaia. Kapau ʼe fakaʼaogaʼi e he tagata tona temi pea mo tona mālohi ʼo gāue kinakina moʼo taupau ia tona fāmili, pea ʼe mahino ia ʼe maʼuli fīmālie anai mo tona fāmili. (1 Tim. 5:8) Kae kapau ʼe pulinoa tona temi peʼe ko tona mālohi moʼo kumi he ʼu meʼa ʼe mole maʼuhiga, pea ʼe ina fakahā ai “ ʼe mole hona loto,” ʼe mole fakapotopoto pea ʼe mole lelei tona loto. ʼE mahino ia, ʼe maʼuli anai te tagata ʼaia ʼi te faigataʼaʼia.

 3. ʼE fakaʼuhiga feafeaʼi ki tatatou tauhi ia te fakatokaga ʼaē ʼe fai mai ʼi te Tohi-Tapu ʼo ʼuhiga mo te ʼu meʼa ʼe mole maʼuhiga?

³ Kae ʼe tonu ke feafeaʼi tatatou mahino ki te tāʼaga lea ʼaia mo kapau ʼe fakaʼuhiga ki tatatou tauhi? ʼE tou tokagaʼi kā faʼafai he Kilisitiano pea mo agatonu ʼi tana tauhi ʼaē kiā Sehova, pea ʼe ina maʼu ia te fīmālie moʼoni. ʼE feala ke ina maʼu ia te tapuakina ʼa te ʼAtua ʼi te temi nei pea mo ina maʼu he ʼamanaki mālohi ki te kā haʼu. (Mat. 6:33; 1 Tim. 4:10) Kae kapau ʼe tokaga fau he Kilisitiano ki te ʼu meʼa ʼe mole maʼuhiga, pea ʼe feala anai ke tuʼutāmaki ai tana ʼu felōgoi mo Sehova pea mo tana ʼamanaki ʼaē ki te maʼuli heʼegata. ʼE tou lava tekeʼi feafeaʼi ia te faʼahi ʼaia? ʼE tonu ke tou fakasiosio tonu ke tou ʼiloʼi pe koteā ia te ʼu meʼa “ ʼe mole maʼuhiga” ʼi totatou maʼuli pea mo tou fakatotonu ke tou liʼaki.—Lau ia Tito 2:11, 12.

 4. Koteā ʼaē ʼe fakaʼuhiga kiai ia te ʼu meʼa ʼe mole maʼuhiga?

⁴ Koteā ʼaē ʼe fakaʼuhiga kiai ia te ʼu meʼa ʼe mole maʼuhiga? ʼE feala pē ke fakaʼuhiga ki he meʼa ʼe ina fakaleluʼi tātou mai tatatou tauhi ʼaē kiā Sehova ʼaki he loto kātoa. Ohagē lā, ʼe feala ke fakaʼuhiga ki he ʼu faʼahiga fakafiafia. ʼE mahino ia, ʼe lelei te fakafiafia mokā fai fakapotopoto. Kae kā fakavalevale fau tatatou “fakafiafia” ʼo laka age ia ʼi te ʼu gāue ʼaē ʼe pipiki ki tatatou tauhi, pea kua liliu te fakafiafia ko he meʼa ʼe mole maʼuhiga, ʼo fua kovi ia ki totatou maʼuli fakalaumālie. (Tnk. 2:24; 4:6) Ke mole hoko ia te faʼahi ʼaia, ʼe tonu ke gāueʼi e he Kilisitiano ia te aga fakapotopoto, ʼo ina vakavakaʼi fakalelei pe feafeaʼi hana fakaʼaogaʼi ʼo tona temi ʼaē ʼe maʼuhiga kiā ia. (Lau ia Kolose 4:5.) Kae ʼe ʼi ai te ʼu meʼa ʼe mole maʼuhiga ʼe kovi age ia ʼi te ʼu fakafiafia. ʼE kau ʼi te ʼu meʼa ʼe mole maʼuhiga ʼaia ia te ʼu ʼatua loi.

 Tou Liʼaki Te ʼu ʼAtua ʼe Mole Maʼuhiga

 5. ʼI te agamāhani, ʼe fakaʼaogaʼi kiteā ia te ʼu kupu “ ʼe mole maʼuhiga” ʼi te Tohi-Tapu?

⁵ ʼE tou tokagaʼi ʼe lahi te ʼu vaega Fakatohitapu ʼe fakaʼaogaʼi ai te ʼu kupu “ ʼe mole maʼuhiga,” ʼe fakaʼuhiga ki te ʼu ʼatua loi. Ohagē lā, neʼe ʼui fēnei e Sehova ki Iselaele: “ ʼE mole tonu ke kotou faʼu maʼa koutou he ʼu ʼatua ʼe mole maʼuhiga, pea ʼe mole tonu ke kotou fakatuʼu maʼa koutou he fakatātā togi peʼe ko he pou taputapu, pea ʼe mole tonu ke kotou fakatuʼu he maka ohagē ko he mātaga ʼi tokotou fenua, ke kotou tulolo kiai.” (Lev. 26:1) Neʼe tohi fēnei e te Hau ko Tavite: “Ko Sehova ʼe lahi pea ʼe tonu ke vikiʼi lahi, pea ʼe tonu ke tou manavasiʼi kiā te ia ʼo laka age ʼi te tahi age ʼu ʼatua fuli. Heʼe ko te ʼu ʼatua fuli ʼo te ʼu puleʼaga ʼe ko he ʼu ʼatua ʼe mole maʼuhiga. Kae kiā Sehova ia, neʼe ina faʼu ia te lagi.”—1 Fkma. 16:25, 26.

 6. He koʼē ʼe vaʼiganoa te ʼu ʼatua loi?

⁶ Ohagē ko tona ʼui e Tavite, ʼe tou fakatokagaʼi ʼi te ʼu meʼa ʼaē neʼe fakatupu e Sehova ia te fakamoʼoni ʼo tona mālohi. (Pes. 139:14; 148:1-10) Neʼe ko he toe pilivilēsio lahi neʼe maʼu e te kau Iselaele ʼi tanatou fai he fuakava mo Sehova! Neʼe ko he toe agavale tanatou lītuʼa mai iā te ia kae natou tulolo iā muʼa ʼo te ʼu fakatātā togi pea mo te ʼu pou taputapu! ʼI te ʼu temi ʼaē neʼe natou faigataʼaʼia ai, neʼe hā lelei ai ia te vaʼiganoa ʼaē ʼo tonatou ʼu ʼatua loi, ʼo mole natou lava haofaki ia nātou totonu pea mo te hahaʼi ʼaē neʼe tauhi age kiā nātou.—Ktf. 10:14, 15; Isa. 46:5-7.

7, 8. ʼE lava liliu feafeaʼi ia “te ʼu Koloa” ko he ʼatua?

⁷ ʼI te ʼatu ʼu fenua ʼo te temi nei, ʼe kei tulolo te hahaʼi iā muʼa ʼo te ʼu pāki neʼe faʼu e te tagata, pea ʼe vaʼiganoa te ʼu ʼatua ʼaia ohagē pē ko te ʼu ʼatua ʼo te temi muʼa. (1 Soa. 5:21) Kae ʼi te Tohi-Tapu ʼe toe talanoa ai ki te tahi age ʼu meʼa ʼe fakaʼuhiga ko te ʼu ʼatua, ʼo mole gata pē ʼi te ʼu fakatātā. Ohagē lā, tou vakaʼi ia te ʼu palalau ʼaenī neʼe fai e Sesu: “ ʼE mole feala ke kaugana he tahi ki ni pule e lua; koteʼuhi, heʼe fehiʼa anai ia ki he tahi kae ʼofa ia ki tona lua, peʼe pipiki anai ia ki he tahi, kae ina meʼa noaʼi anai tona lua. ʼE mole feala ke kotou kaugana ki te ʼAtua pea mo te ʼu Koloa.”—Mat. 6:24.

⁸ ʼE lava liliu feafeaʼi ia “te ʼu Koloa” ko he ʼatua? Tou toʼo he fakatā, ohagē lā ko he foʼi maka neʼe tuʼu ʼi he gāueʼaga ʼi te Iselaele ʼo temi muʼa. Ko te foʼi maka ʼaia ʼe feala pē hona fakaʼaogaʼi moʼo laga ʼo he ʼapi peʼe ko he kaupā. ʼI te tahi age faʼahi, kapau neʼe fakatuʼu ohagē ko “he pou taputapu” peʼe ko “he mātaga,” pea neʼe liliu ia ko he foʼi maka fakatupu tūkia ki te hahaʼi ʼa Sehova. (Lev. 26:1) ʼO toe fēia pē mo te falā, ʼe ʼi ai tona ʼaoga, kae ʼe tonu pē ke fakafeʼauga moʼo taupau ʼo totatou maʼuli, pea ʼe feala ke tou fakaʼaogaʼi lelei ʼi te tauhi ʼaē kiā Sehova. (Tnk. 7:12; Luka 16:9) Kae kapau ʼe tou fakamuʼamuʼa age ia te kumi ʼo te paʼaga ʼi tatatou tauhi ʼaē ki te ʼAtua, pea kua liliu leva ia ko hotatou ʼatua. (Lau ia 1 Timoteo 6:9, 10.) ʼI te mālama ʼaenī, ʼaē kua maʼuhiga ʼaupitō ki te hahaʼi ia te maʼu paʼaga, ʼe tonu ke tou vakavakaʼi fakalelei peʼe kei tou maʼu he manatu fakapotopoto ʼo ʼuhiga mo te faʼahi ʼaia.—1 Tim. 6:17-19.

9, 10. (a) Koteā te manatu ʼa he Kilisitiano ʼo ʼuhiga mo te ako? (b) Koteā te tuʼutāmaki ʼo te hoko atu ʼo te ako ʼi te ʼu faleako lalahi?

⁹ ʼE ʼi ai te tahi meʼa ʼe ʼaoga kae ʼe feala ke liliu ko he meʼa ʼe mole maʼuhiga, ʼe ko te ako ʼi te ʼu faleako. ʼE tou loto ke maʼu e tatatou ʼu fānau ia he ako ʼe lelei moʼo taupau ʼo tonatou maʼuli ki muli age. Ko te tahi faʼahi ʼe maʼuhiga age, ko he Kilisitiano neʼe lelei tana ako, ʼe poto lelei age anai ʼi te lau pea mo mahino ki te Tohi-Tapu, ʼe poto anai ʼi te fakakaukauʼi ʼo he ʼu faigataʼaʼia pea mo fai ni ʼu puleʼaki lelei, pea ʼe ina akoʼi fakalelei anai ki te hahaʼi ia te ʼu moʼoni ʼo te Tohi-Tapu pea mo fakalotoʼi nātou. Ke maʼu he ako ʼe lelei, ʼe tonu ke fakaʼaogaʼi kiai he temi lahi, kae ʼe ko he temi ʼe fakaʼaogaʼi lelei.

¹⁰ Kae ʼe feafeaʼi ʼo ʼuhiga mo te hoko atu ʼo te ako ʼi he univelesitē? Maʼa te hahaʼi tokolahi, ʼe ko he faʼahi ʼe ʼaoga tāfito ke feala ai ki he tahi ke maʼuli lelei ai. Kae ki te tokolahi ʼaē ʼe natou faiga ki te taʼi ako ʼaia, ki muli age ʼe natou maʼu ia te manatu fakatupu tuʼutāmaki ʼo te mālama ʼaenī. ʼAki te taʼi ako ʼaia, ʼe pulinoa ai te ʼu taʼu maʼuhiga ʼo te temi tūpulaga, ʼaē neʼe feala ke fakaʼaogaʼi lelei age ki te tauhi ʼaē kiā Sehova. (Tnk. 12:1) Koia ʼe mole tou punamaʼuli ai ki te kua tokosiʼi ʼaupitō ʼo te hahaʼi ʼaē ʼe natou tui ki te ʼAtua, ʼi te ʼu fenua ʼaē ʼe kaugamālie ai ia nātou ʼaē ʼe kau ki te ʼu taʼi ako lalahi ʼaia. ʼE mole faiga anai ia he Kilisitiano ke ina maʼu he faʼahiga ako māʼoluga ʼi te mālama ʼaenī ke feala ai hana maʼuli fīmālie, kae ʼe falala anai pē ia kiā Sehova.—Taag. 3:5.

 ʼAua Naʼa Tou Tuku Ke Liliu Te ʼu Holi Fakasino Ko He ʼAtua

11, 12. He koʼē neʼe ʼui e Paulo ʼo ʼuhiga mo ʼihi: “Ko tonatou ʼatua ko tonatou fatu”?

¹¹ ʼI tana faitohi ki te kau Filipe, ʼe fakatokagaʼi e te ʼapositolo ko Paulo te tahi age meʼa ʼe feala ke liliu ko he ʼatua. ʼE palalau ʼo ʼuhiga mo nātou ʼaē neʼe ko he ʼu tehina mo tuagaʼane ki muʼa atu, pea ʼe ina ʼui fēnei: “ ʼE natou tokolahi ia nātou—neʼe au palalau tuʼumaʼu atu ʼo ʼuhiga mo nātou, kae ʼe au toe palalau atu nei kiai mo tagi—heʼe natou haʼele ohagē ko ni ʼu fili ʼo te pou fakamamahi ʼa Kilisito, pea ko tonatou fakaʼosi ʼe ko te fakaʼauha, pea ko tonatou ʼatua ko tonatou fatu, . . . pea ʼe manatu pē nātou ki te ʼu meʼa ʼo te kele.” (Filp. 3:18, 19) ʼE lava liliu feafeaʼi he tahi ʼo ʼatua ki tona fatu?

¹² ʼE hā mai, neʼe maʼuhiga age ki ʼihi ʼaē neʼe feʼiloʼiʼaki mo Paulo, tanatou mulimuli ki te ʼu holi fakasino ʼi tanatou tauhi fakatahi ʼaē mo Paulo kiā Sehova. Ko ʼihi neʼe lagi kua lahi fau tanatou kakai pea mo tanatou ʼiʼinu, ʼo tupu ʼaki ai tanatou kua liliu ko ni hahaʼi kai fakavale peʼe mo ʼinu kava. (Taag. 23:20, 21; vakaʼi ia Teutalonome 21:18-21.) Ko ʼihi neʼe lagi kua natou fakaʼaogaʼi kātoa ia te ʼu lelei ʼo te mālama ʼo te ʼuluaki sēkulō, ʼo tupu ai tanatou mole kei tauhi ʼaē kiā Sehova. ʼOfa pē ke mole tou tuku ia totatou holi ʼaē ki he maʼuli ʼaē ʼe tou manatu ʼe lelei, ke ina fakasiʼisiʼi tatatou tauhi ʼaē kiā Sehova ʼaki totatou loto kātoa.—Kol. 3:23, 24.

13. (a) Koteā ia te mānumānu, pea neʼe feafeaʼi tona fakamatala e Paulo? (b) ʼE tou lava tekeʼi feafeaʼi ia te mānumānu?

¹³ Neʼe toe talanoa ia Paulo ki te tahi faʼahi ʼo te tauhi hala. Neʼe ina tohi fēnei: “Koia, kotou fakamate te ʼu koga ʼo tokotou sino ʼaē ʼi te kele, ʼo ʼuhiga mo te fai folonikāsio, mo te aga heʼemaʼa, mo te holi ki te ʼu felāveʼi fakasino, mo te holi ki te meʼa ʼaē ʼe kovi, mo te mānumānu, ʼaē ʼe ko he tauhi tamapua.” (Kol. 3:5) Ko te mānumānu ʼe ko te holi mālohi ki he meʼa ʼe mole ʼa kita. ʼE feala ke kita holi ki ni ʼu koloa. Peʼe feala pē ke fakaʼuhiga ki te holi ki he ʼu felāveʼi fakasino heʼeʼaoga. (Eke. 20:17) ʼE fakapotopoto te fakatatau ʼo te ʼu taʼi holi ʼaia ki he tauhi tamapua, te tauhi ʼo he ʼatua loi. Neʼe fakaʼaogaʼi e Sesu te palalau fakatā moʼo fakahā ia te maʼuhiga ʼaupitō ʼaē ke tou lolomi ia te ʼu taʼi holi kovi ʼaia.—Lau ia Maleko 9:47; 1 Soa. 2:16.

Tou Tōkakaga Ki Te ʼu Palalau ʼAē ʼe Feala Ke Liliu Ko He ʼu Meʼa ʼe Mole Maʼuhiga

14, 15. (a) Koteā te “meʼa ʼe mole maʼuhiga” ʼaē neʼe tūkia ai te tokolahi ʼi te temi ʼo Selemia? (b) He koʼē neʼe maʼuhiga ia te ʼu palalau ʼaē neʼe fai e Moisese?

¹⁴ ʼE feala ke fakaʼuhiga ia te ʼu meʼa ʼe mole maʼuhiga ki he ʼu palalau. Ohagē lā, neʼe ʼui fēnei e Sehova kiā Selemia: “Ko te loi ʼaē ʼe fakakikite e te kau polofetā ʼaki toku huafa. Neʼe mole au fekauʼi nātou, neʼe mole au fakatotonu age he meʼa kiā nātou, neʼe mole au palalau age kiā nātou. Ko he meʼa loi ʼaē neʼe hā, pea mo he tivināsio, pea mo he meʼa ʼe mole maʼuhiga, pea mo he kākā ʼo tonatou loto, koʼenā te ʼu meʼa ʼe natou ʼui atu ʼi tanatou fai fakakikite.” (Sel. 14:14) Ko te kau polofetā loi ʼaia neʼe natou ʼui ʼe natou palalau ʼi te huafa ʼo Sehova, kae neʼe ko tanatou ia ʼu manatu ʼa nātou totonu, tonatou pē ia poto ʼaē neʼe natou fakamafola. Koia, ko tanatou ʼu palalau neʼe ko “he meʼa ʼe mole maʼuhiga.” Neʼe vaʼiganoa ia pea neʼe natou fakatupu tuʼutāmaki moʼoni ʼi te faʼahi fakalaumālie. ʼI te taʼu 607 ʼi muʼa ʼo totatou temi, ko te tokolahi ʼaē neʼe natou fakalogo ki te ʼu palalau ʼaia neʼe mole maʼuhiga, neʼe natou mamate ʼi te ʼu nima ʼo te kau sōlia ʼo Papiloni.

 ¹⁵ Kae neʼe ʼui fēnei e Moisese ki Iselaele: “Kotou gāueʼi tokotou loto ki te ʼu folafola fuli ʼaē neʼe au fakatokagaʼi atu kiā koutou ʼi te ʼaho nei. . . . Heʼe mole ko he folafola ʼe mole maʼuhiga ia kiā koutou, kae ʼe ina fakaʼuhiga ia ko tokotou maʼuli, pea ʼaki te folafola ʼaia, ʼe feala ai anai hakotou fakatologa ia tokotou ʼu ʼaho ʼi te kele ʼaē kā kotou maʼu, ʼi takotou fakalaka ʼi te Solotane.” (Teu. 32:46, 47) ʼEī, ko te ʼu palalau ʼaē neʼe fai e Moisese neʼe haʼu ia mai te ʼAtua. Koia, neʼe maʼuhiga te ʼu palalau ʼaia ki te maʼuli fīmālie ʼo te puleʼaga. Ko nātou ʼaē neʼe natou tokagaʼi ia te ʼu folafola ʼaia, neʼe natou maʼuli fualoa pea mo mahu koloa. ʼOfa pē ke tou liʼaki tuʼumaʼu pē ia te ʼu palalau ʼe mole maʼuhiga pea mo tou pipiki ki te ʼu folafola maʼuhiga ʼo te moʼoni.

16. ʼE tonu ke feafeaʼi kiā tātou ia te ʼu palalau ʼa te hahaʼi popoto ʼaē ʼe fakafeagai ki te Folafola ʼa te ʼAtua?

¹⁶ Iā ʼaho nei, ʼe tou logo koa ki he palalau ki he ʼu meʼa ʼe mole maʼuhiga? ʼEī. Ohagē lā, ʼe ʼui e ʼihi hahaʼi popoto ko te akonaki ʼo ʼuhiga mo te evolisio pea mo te ʼu meʼa ʼaē neʼe maʼu e te hahaʼi popoto ʼi te tahi atu ʼu faʼahi, ʼe fakahā ai ʼe mole kei ʼaoga te tui ki te ʼAtua, heʼe feala ke fakamahino ia meʼa fuli ʼaki pē te gāue ʼo te nātulā. ʼE tonu koa ke tou tokagaʼi ia te ʼu taʼi palalau pauʼu ʼaia? Kailoa ia! Ko te poto ʼo te tagata ʼe kehe ia mo te poto ʼo te ʼAtua. (1 Ko. 2:6, 7) Kae ʼe tou ʼiloʼi, kā fakafeagai te ʼu akonaki ʼa te tagata ki te ʼu moʼoni ʼaē neʼe fakahā e te ʼAtua, pea ʼe ko te ʼu akonaki ʼa te tagata ʼaē ʼe loi tuʼumaʼu pē. (Lau ia Loma 3:4.) Logolā te haʼele ki muʼa ʼo te poto fakatagata ʼi ʼihi faʼahi, kae ʼe kei moʼoni pē ia te ʼu palalau ʼaenī ʼi te Tohi-Tapu ʼo ʼuhiga mo te poto ʼo te tagata: “Ko te poto ʼo te mālama ʼaenī ʼe ko he agavale kiā mata ʼo te ʼAtua.” Kapau ʼe fakatatau ki te poto ʼo te ʼAtua ʼaē ʼe mole hona tuʼakoi, pea ʼe mole he ʼaoga ia ʼo te faʼahiga ʼatamai ʼo te tagata.—1 Ko. 3:18-20.

17. ʼE tonu ke feafeaʼi kiā tātou te ʼu palalau ʼaē ʼe fai e te kau takitaki ʼo te Keletiate pea mo te kau ʼapositā?

¹⁷ ʼE toe fai foki e te kau takitaki ʼo te Keletiate ia te ʼu palalau ʼe mole maʼuhiga. ʼE natou ʼui ʼe natou palalau ʼi te huafa ʼo te ʼAtua, kae ʼe lahi age tanatou ʼu palalau ʼe mole fakatafito ki te Tohi-Tapu, pea ko te ʼu meʼa ʼaē ʼe natou ʼui ʼe vaʼiganoa. ʼE toe fai foki mo te kau ʼapositā he ʼu palalau ʼe mole maʼuhiga, ʼo natou lau ʼe lahi age tonatou ia poto ʼi “te tagata kaugana agatonu mo poto” ʼaē neʼe fakanofo. (Mat. 24:45-47) Kae ʼe palalau pē te kau ʼapositā ʼo mulimuli ki tonatou ia poto, pea ʼe vaʼiganoa tanatou ʼu palalau, ko he foʼi maka fakatupu tūkia kiā ia ʼaē ʼe fakalogo kiai. (Luka 17:1, 2) Koteā ʼaē ʼe tonu ke tou fai ke mole tou hehē ʼi te ʼu palalau ʼaia?

ʼE Tou Lava Liʼaki Feafeaʼi Ia Te ʼu Palalau ʼe Mole Maʼuhiga?

18. Ko te ʼu faʼahi fea ʼaē ʼe feala ai ke tou maʼuliʼi ia te tokoni ʼaē ʼe tuʼu iā 1 Soane 4:1?

¹⁸ Ko te ʼapositolo ko Soane ʼaē neʼe kua matuʼa, neʼe ina foaki mai ia te tokoni ki te faʼahi ʼaia. (Lau ia 1 Soane 4:1.) ʼO mulimuli ki te tokoni ʼa Soane, ʼe tou fakalotomālohiʼi tuʼumaʼu anai ia te hahaʼi ʼaē ʼe tou felāveʼi mo nātou ʼi te gāue fai fakamafola, ke natou vakavakaʼi peʼe tuʼu ʼi te Tohi-Tapu ia te ʼu meʼa ʼaē ʼe tou ʼui age kiā nātou. ʼE toe lelei te lēkula ʼaia maʼa tātou. Kapau ʼe tou logo ki he ʼu palalau ʼe fatufatuʼi ai te moʼoni peʼe laukovi ki te kōkelekāsio,  ki te kau tagata ʼāfea, peʼe ko he tahi pē ʼi ʼotatou ʼu tehina, ʼe mole tonu ke tou fakatui kiai kae neʼe heʼeki tou maʼu hona fakamoʼoni. Kae ʼe tonu ke tou fai te ʼu fehuʼi ʼaenī: “Ko ia ʼaē ʼe ina fakamafola ia te ʼu palalau ʼaenī, ʼe ʼalutahi koa te aga ʼaē ʼe ina fai mo te manatu ʼa te Tohi-Tapu? Ko te ʼu fakamatala ʼaia peʼe ko te ʼu meʼa ʼaia ʼe lau ʼe lagolago koa ki te fakatuʼutuʼu ʼa Sehova? ʼE lagolago koa ia ki te tokalelei ʼo te kōkelekāsio?” Ko he palalau pē ʼe tou logo kiai ʼe ina maumauʼi tatatou ʼu felōgoi fakatautēhina kae ʼe mole ina lagalaga ia, ʼe vaʼiganoa.—2 Ko. 13:10, 11.

19. ʼE lava ʼiloʼi feafeaʼi e te kau tagata ʼāfea ʼe mole natou fai he ʼu palalau ʼe mole maʼuhiga?

¹⁹ ʼO ʼuhiga mo te ʼu palalau ʼe mole maʼuhiga, ʼe toe maʼu pē foki e te kau tagata ʼāfea ia he ako maʼuhiga. ʼI te ʼu lakaga fuli pē ʼaē ʼe tonu ai ke natou foaki he ʼu tokoni, ʼe natou manatuʼi tonatou ʼu tuʼakoi pea ʼe mole natou fia foaki he tokoni ʼe fakatafito pē ki te ʼu meʼa ʼaē neʼe hoko kiā nātou ʼi tonatou maʼuli. ʼE tonu ke natou fakahā tuʼumaʼu pē te manatu ʼaē ʼe tuʼu ʼi te Tohi-Tapu. ʼE maʼu te lēkula lelei ʼi te ʼu palalau ʼaenī neʼe fai e te ʼapositolo ko Paulo: “ ʼAua naʼa kotou fakalaka ʼi te ʼu meʼa ʼaē kua tohi.” (1 Ko. 4:6) ʼE mole tonu ke fakalaka te kau tagata ʼāfea ʼi te ʼu meʼa ʼaē kua tohi ʼi te Tohi-Tapu. Pea ʼe mole natou toe fakalaka ʼi te ʼu tokoni Fakatohitapu ʼaē ʼi te ʼu tohi ʼa te tagata kaugana agatonu mo poto.

20. Koteā ʼaē ʼe tokoni mai ke tou liʼaki te ʼu meʼa ʼe mole maʼuhiga?

²⁰ ʼE fakatupu tuʼutāmaki ia te ʼu meʼa ʼe mole maʼuhiga, peʼe fakaʼuhiga ki he ʼu “ ʼatua,” ki he ʼu palalau peʼe ki he tahi age meʼa. Koia lā ʼaē, ʼe tou faikole tuʼumaʼu ai ke tokoni mai Sehova ke tou lava ʼiloʼi ia te ʼu meʼa ʼe mole maʼuhiga ʼaia, pea mo tou kumi tana takitaki ke tou liʼaki te ʼu meʼa ʼaia. Kapau ʼe tou fai fēia, pea ʼe tou fai te ʼu palalau ʼaenī ʼa te tagata fai pesalemo: “Leʼei kehe ʼoku mata ke ʼaua naʼa sio ki te meʼa ʼaē ʼe vaʼiganoa; puipui ia au ʼi tou ala.” (Pes. 119:37) ʼI te ʼalatike ʼaē kā hoa mai, ʼe tou hoko atu anai tatatou palalau ʼo ʼuhiga mo te maʼuhiga ʼaē ke tou tali ia te takitaki ʼa Sehova.

ʼE Feala Koa Hakotou Fakamahino?

• Koteā te “ ʼu meʼa ʼe mole maʼuhiga” ʼaē ʼe tonu ke tou liʼaki?

• Koteā ʼaē ʼe tonu ke tou fai ke mole liliu te paʼaga ko he ʼatua?

• ʼE lava liliu feafeaʼi ia te ʼu holi fakasino ko he tauhi tamapua?

• ʼE tou lava liʼaki feafeaʼi ia te ʼu palalau ʼe mole maʼuhiga?

[ʼU fehuʼi ʼo te ako]

[Paki ʼo te pasina 7]

Neʼe fakalotomālohiʼi te kau Iselaele ke natou ‘gāueʼi tonatou kele,’ kae ke mole natou kumi he ʼu meʼa ʼe mole maʼuhiga

[Paki ʼo te pasina 9]

ʼAua naʼa kotou tuku ia te holi ʼaē ki te ʼu koloa ke fakasiʼisiʼi ai takotou tauhi ʼaē kiā Sehova

[Paki ʼo te pasina 10]

Ko te ʼu palalau ʼa te kau tagata ʼāfea ʼe feala ke maʼuhiga ʼaupitō