Ko Te ʼOhoana Pea Mo Te ʼu Maʼua ʼo Te ʼu Mātuʼa ʼi Te Temi Fakaʼosi ʼAenī

“Kua nounou te temi.”—1 KO. 7:29.

 1. (a) Koteā te ʼu fetogi ʼe hoko nei ʼe kau ki te ʼu meʼa “faigataʼa”? (b) He koʼē ʼe ʼaoga kiā tātou ke tou tokagaʼi te ʼu fetogi ʼo te maʼuli fakafāmili?

 NEʼE fakakikite ʼi te Folafola ʼa te ʼAtua, ʼi “te temi fakaʼosi” ʼe ʼi ai anai te ʼu tau, te ʼu mafuike, te ʼu hoge, pea mo te ʼu taʼi mahaki. (Tan. 8:17, 19; Luka 21:10, 11) Neʼe toe fakatokaga ʼi te Tohi-Tapu, ʼi te temi maʼuhiga ʼaia ʼi te hisitolia ʼo te tagata ʼe hoko ai anai te ʼu fetogi lahi ʼo ʼuhiga mo te ʼu felōgoi ʼa te hahaʼi. Ko te ʼu tokakovi  ʼaē ʼe hoko ʼi te ʼu fāmili, ʼe kau anai ki te ʼu meʼa “faigataʼa” ʼo “te ʼu ʼaho fakamuli” faigataʼa ʼaenī. (2 Tim. 3:1-4) He koʼē ʼe ʼaoga kiā tātou ke tou tokagaʼi te ʼu fetogi ʼaia? Koteʼuhi kua mafola ʼaupitō te ʼu fetogi ʼaia pea mo mālohi, ʼo feala ke fua kovi ki te kau Kilisitiano ʼo te temi nei ʼo ʼuhiga mo tanatou faʼahiga sio ʼaē ki te ʼohoana pea mo te ʼu maʼua ʼo te ʼu mātuʼa. ʼO feafeaʼi?

 2. ʼI te agamāhani ʼe feafeaʼi ia te manatu ʼa te hahaʼi ʼo ʼuhiga mo te ʼohoana pea mo te māvete?

² Iā ʼaho nei, ko te māvete ʼa he taumātuʼa ʼe ko he meʼa faigafua pē ia pea kua liliu ia ko he agamāhani ki te hahaʼi fuli, pea kua lahi te ʼu fenua kua ʼāsili age te māvete ʼa te ʼu taumātuʼa. Kae ʼaua naʼa galo kiā tātou, ʼe mole tatau te manatu ʼa Sehova ʼAtua pea mo te manatu ʼa te hahaʼi ʼo ʼuhiga mo te ʼohoana pea mo te māvete. Koteā ia te manatu ʼa Sehova ki te faʼahi ʼaia?

 3. Koteā te manatu ʼa Sehova pea mo Sesu Kilisito ʼo ʼuhiga mo te ʼohoana?

³ ʼE loto e Sehova ʼAtua ko nātou ʼaē kua ʼohoana ke natou nonofo agatonu ki te fakapapau ʼaē neʼe natou fai ʼi tonatou ʼaho ʼohoana. ʼI te temi ʼaē neʼe fakatahiʼi ai te ʼuluaki tagata pea mo te ʼuluaki fafine ʼi te ʼohoana, neʼe ʼui e Sehova ko “te tagata . . . ʼe tonu anai ke pipiki ki tona ʼohoana, pea ʼe tonu anai ke nā liliu ko he kakano e tahi.” Ki muli age neʼe toe fakahā e Sesu te fakatuʼutuʼu ʼaia pea mo ʼui fēnei: “Koia, ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata.” Neʼe toe ʼui e Sesu: “Ko ʼaē ʼe māvete mo tona ʼohoana, gata pē mokā ʼe tupu mai he folonikāsio, pea toe ʼohoana ia mo he tahi fafine, ʼe tono ia.” (Sen. 2:24; Mat. 19:3-6, 9) Koia, kiā Sehova pea mo Sesu ko te ʼohoana ʼe ko he noʼo ʼe mole hona gataʼaga, gata pē mo kapau ʼe mate he tahi iā nāua. (1 Ko. 7:39) Kapau ko te ʼohoana ʼe ko he fakatuʼutuʼu taputapu, pea ko te māvete ʼe ko he fakatuʼutuʼu ʼe mole tonu ke tou meʼa noaʼi. ʼIo, ʼe ʼui ʼi te Folafola ʼa te ʼAtua ko Sehova ʼe fehiʼa ki te māvete ʼaē ʼe mole fakatafito ki te Tohi-Tapu. a—Lau ia Malakia 2:13-16; 3:6.

Te ʼu Maʼua ʼAē ʼe ʼAlutahi Mo Te ʼOhoana

 4. He koʼē neʼe fakahemala ʼihi Kilisitiano tūpulaga ʼi tanatou fai te tonu ʼaē ke natou foimo ʼohoana?

⁴ ʼI te mālama agakovi ʼaenī ʼe tou māʼuʼuli ai, ʼe manako ʼaupitō ʼosi te hahaʼi ki te ʼu felāveʼi fakasino. ʼI te ʼaho fuli pē, ʼe tou sio ai ki te ʼu pāki ʼo he ʼu aga heʼeʼaoga. ʼE mole feala hatatou meʼa noaʼi tona ʼu fua kiā tātou, tāfito lā ki totatou ʼu tūpulaga ʼaē ʼi te kōkelekāsio. Koteā ʼaē ʼe tonu ke fai e te kau Kilisitiano tūpulaga ʼo ʼuhiga mo te fakaneke ʼaia, ʼaē ʼe fakatupu he ʼu holi kovi logolā tanatou faiga ʼaē ke natou tekeʼi te faʼahi ʼaia? Moʼo tekeʼi te faʼahi ʼaia, neʼe ʼohoana ʼihi kae kei natou taʼu veliveli. ʼI tanatou manatu ʼe mole natou fai ai anai ni ʼu felāveʼi fakasino heʼeʼaoga. Kae mole fualoa ʼi tanatou kua ʼosi ʼohoana, tokolahi neʼe natou fakahemala ʼi tanatou fai ʼo te tonu ʼaia. He koʼē neʼe natou fakahemala? Heʼe ko te fiafia ʼaē neʼe maʼu e te kiʼi taumātuʼa ʼi tanā kamata ʼohoana neʼe mole fualoa ia, kua mahino leva kiā nāua toko lua ʼe faigataʼa ʼaupitō ia tanā felōgoi. Kua felāveʼi leva te ʼu kiʼi taumātuʼa ʼaia mo te fihifihia lahi.

 5. Koteā ʼaē kā tokoni anai ki te ʼu taumātuʼa ke natou nonofo agatonu ki tanatou fakapapau ʼaē neʼe natou fai ʼi tonatou ʼaho ʼohoana? (Vakaʼi mo te kiʼi nota ʼi te lalo pāsina.)

⁵ Kā kita ʼohoana mo he tahi ʼe mole felōgoi tahi mo kita, tatau aipē mo kapau ko he Fakamoʼoni, pea ʼe feala ke liliu ko he ʼaluʼaga faigataʼa. (1 Ko. 7:28) Kae tatau aipē ia te ʼaluʼaga faigataʼa ʼaia, kae ʼe ʼiloʼi e te kau Kilisitiano moʼoni kapau ʼe hoko he māvete kae ʼe mole ʼi ai hona  fakatafitoʼaga fakatohi-tapu, pea ʼe mole ko he puleʼaki lelei ia moʼo fakatokatoka ni ʼu fihifihia ʼi he maʼuli fakataumātuʼa ʼe mole fiafia. Koia, ko nātou ʼaē ʼe natou gāue kinakina moʼo puipui ia tonatou maʼuli fakataumātuʼa, heʼe natou fia nonofo agatonu ki tanatou fakapapau ʼaē neʼe natou fai ʼi tonatou ʼaho ʼohoana, ʼe tuha mo nātou ʼaia ia he fakaʼapaʼapa pea mo he tokoni ʼofa mai te kōkelekāsio. b

 6. ʼE tonu ke feafeaʼi ia te manatu ʼa te kau tūpulaga Kilisitiano ʼo ʼuhiga mo te ʼohoana?

⁶ Kei kotou tūpulaga koa pea mo selipatea? Kapau koia, ʼe tonu ke feafeaʼi ia takotou manatu ʼo ʼuhiga mo te ʼohoana? Kapau ʼi muʼa ʼo hakotou fakatahi mo he tahi Kilisitiano, ʼe kotou gāue ke kotou liliu ko he tahi kua fotufotuʼa ʼi te faʼahi fakasino, ʼi takotou faʼahiga fakakaukau, pea ʼi te faʼahi fakalaumālie, pea ʼe mole kotou maʼuli lotomamahi anai. ʼE moʼoni, ʼe mole fakamaʼua mai ʼi te Tohi-Tapu he taʼu ke kita ʼohoana ai. c Kae ʼe fakahā mai ʼe lelei age muʼa hakotou fakatalitali ke fakalaka te temi ʼaē ʼe mālohi ai tokotou ʼu holi fakasino. (1 Ko. 7:36) Koteā tona tupuʼaga? Heʼe kapau ʼe kei mālohi fau tokotou ʼu holi fakasino pea ʼe mole kotou maʼu ai anai he fakasiosio lelei, ʼo feala ai ke mole lelei te ʼu tonu ʼaē ʼe kotou fai, pea tupu ʼaki ai leva hokotou lotomamahi ki muli age. Kotou manatuʼi, ʼe ʼaoga pea mo fakatupu fiafia kiā koutou ia te tokoni poto ʼaē ʼa Sehova ʼi te Tohi-Tapu ʼo ʼuhiga mo te ʼohoana.—Lau ia Isaia 48:17, 18.

Te ʼu Maʼua ʼo Te ʼu Mātuʼa

 7. Koteā ʼaē neʼe hoko ki ʼihi taumātuʼa kei tūpulaga, pea he koʼē ʼe feala ke liliu te faʼahi ʼaia ko he kavega ki te ʼohoana?

⁷ Ko ʼihi taumātuʼa ʼaē neʼe ʼohoana kae kei natou taʼu veliveli, ʼe natou liliu ko ni ʼu mātuʼa kae kei natou tamasiʼi pē lā mo nātou. Neʼe heʼeki feʼauga ia te temi ʼaē ke nā feʼiloʼiʼaki lelei ai ʼi muʼa ʼo te tupu ʼa te tamasiʼi, ʼaē ʼe tonu ke tokaga tuʼumaʼu ki ai. ʼI te kua tokaga pē ʼaē ʼa te faʼē ki te tamasiʼi, ʼe feala ai anai ki tona ʼohoana ke maheka. Tahi ʼaē, ʼuhi ko te ʼu pō ʼaē ʼe mole mamoe ai te ʼu mātuʼa ʼi tanā tōkakaga ʼaē ki te tamasiʼi, ʼe feala ai ke fihifihia te felōgoi ʼa te taumātuʼa. ʼO mahino ai leva kiā nāua ʼi te temi ʼaia, ʼe mole kei lahi tonā temi faʼifaʼitaliha. ʼE mole kei feala hanā ʼolo ki he ʼu faʼahi pea mo fai ni ʼu meʼa ohagē ko tonā maʼuli ʼi muʼa ʼo tanā maʼu tanā tamasiʼi. Koteā anai he puleʼaki ʼe tonu ke nā fai ʼi te kua fetogi ʼo tonā maʼuli?

 8. ʼE tonu ke fakaʼuhiga feafeaʼi e te ʼu mātuʼa ia tonā ʼu maʼua, pea koteā tona tupuʼaga?

⁸ Ohagē pē ko te ʼu maʼua ʼaē ʼe ʼalutahi mo te ʼohoana, ʼe tonu ke fakaʼuhiga ia te ʼu maʼua ʼo te ʼu mātuʼa ohagē ko he ʼu maʼua pea mo he pilivilēsio neʼe foaki e te ʼAtua. Pe koteā pē ni ʼu fetogi ʼe hoko ʼi te maʼuli ʼo he taumātuʼa Kilisitiano ʼi te temi ʼaē ʼe tupu ai he tamasiʼi, kae ʼe tonu ke nā fai ni ʼu fetogi ʼi tonā maʼuli ʼo mulimuli pē ki te ʼu maʼua foʼou ʼaia kua nā maʼu. Kapau neʼe foaki e Sehova ia te fealagia ʼaē ki te ʼu mātuʼa ke natou maʼu fānau, pea ʼe tonu ki te ʼu mātuʼa ke natou gaohi ia te kiʼi tamasiʼi ohagē ko “he tofiʼa mai iā Sehova.” (Pes. 127:3) ʼE faiga anai he faʼē pea mo he tamai ke nā fai fakalelei tonā ʼu maʼua ʼi tonā ʼuhiga “mātuʼa ʼi te fakatahi mo te ʼAliki.”—Efe. 6:1.

 9. (a) Koteā ʼaē ʼe fakamaʼua ki te akoʼi ʼo he tamasiʼi? (b) Koteā ʼaē ʼe feala ke fai e he tagata ʼohoana moʼo tokoni ki tona ʼohoana ke mālohi tuʼumaʼu ʼi te faʼahi fakalaumālie?

⁹ ʼE ko he maʼuli fakasākilifisio loaloaga ʼaē ʼe ʼaoga moʼo akoʼi ʼo he tamasiʼi. Heʼe fakamaʼua kiai he toe temi lahi pea mo he mālohi. ʼE tonu ke mahino ki te tehina kua ʼohoana, ʼi te kua ʼosi tupu ʼo te tamasiʼi, ʼe lahi anai te temi ʼaē ʼe lagi mole fakalogo ai anai tona ʼohoana ki te ʼu fono pea mo veliveli te temi ʼaē ke ina ako tokotahi pea mo metitāsioʼi te Tohi-Tapu. ʼE ko he faʼahi ʼe feala ke fakatupu vaivai ai ki tona maʼuli fakalaumālie. ʼI te ʼu maʼua ʼo te ʼu mātuʼa, ʼe fakamaʼua ki te tagata ʼohoana ke ina fai ia meʼa fuli ʼe ina lavaʼi moʼo tokaga ki te tamasiʼi. ʼE ina fai anai he puleʼaki ke feala ki tona ʼohoana ke ina maʼu mo ia te ʼu lelei ʼo te ʼu fono ʼaē neʼe tōtō ai, ʼo ina fakamatala ki muli age ʼi tonā ʼapi te ʼu puani ʼaē neʼe vakaʼi ʼi te fono. ʼE feala mo ia ke tokaga ki te tamasiʼi, ke feala  ki tona ʼohoana ke kau ki te fakamafola ʼo te Puleʼaga.—Lau ia Filipe 2:3, 4.

10, 11. (a) ʼE feafeaʼi te akoʼi ʼo te fānau ki “te ʼu fakatokaga ʼa Sehova”? (b) He koʼē ʼe tuha mo te ʼu mātuʼa Kilisitiano e tokolahi ke ʼofainaʼi nātou e te kōkelekāsio?

¹⁰ ʼI te ʼu maʼua ʼo te ʼu mātuʼa, ʼe mole gata pē ki te foaki ki te tamasiʼi hana meʼa kai, mo hona ʼu mutuʼi meʼa, mo hona nofoʼaga, pea mo tokaga ke ʼaua naʼa mahaki. Tāfito lā ʼi te ʼu temi maveuveu fakaʼosi ʼaenī, ʼe ʼaoga ki te kau tūpulaga ke natou ako talu mai tanatou kei veliveli te ʼu pelesepeto ʼo ʼuhiga mo te aga ʼaē ke fai pea mo natou mulimuli anai kiai. ʼE tonu ke akoʼi te fānau ʼi “te akonaki pea mo te ʼu fakatokaga ʼa Sehova.” (Efe. 6:4) Ko te akoʼi ʼo “te ʼu fakatokaga” ki te fānau, ko tona fakaʼuhiga ke ʼai e te ʼu mātuʼa ia te ʼu manatu ʼa Sehova ki te ʼatamai ʼo te tamasiʼi talu mai tana kei veliveli ʼo fai hoholo aipē mo te ʼu temi faigataʼa ʼo tona temi tūpulaga.—2 Tim. 3:14, 15.

¹¹ ʼI te ʼui ʼaē ʼa Sesu ki tana ʼu tisipulo ke natou “fai ni ʼu tisipulo ʼi te hahaʼi ʼo te ʼu fenua fuli pē,” ʼe mahino ia neʼe ina ʼui ʼe tonu ki te ʼu mātuʼa ke natou tokoni ki tanatou ʼu fānau ke natou liliu ko ni ʼu tisipulo. (Mat. 28:19, 20) ʼE ko he fakatuʼutuʼu ʼe faigataʼa ʼuhi ko te ʼu fakahala ʼaē ʼe fai ki te kau tūpulaga ʼi te mālama ʼaenī. Tahi ʼaē meʼa, ko te ʼu mātuʼa ʼaē ʼe tokaga lelei ki te akoʼi ʼo tanatou fānau ke natou liliu ko ni ʼu Kilisitiano, ʼe tuha mo nātou ke ʼofainaʼi e te ʼu tehina mo te ʼu tuagaʼane fuli ʼi te ʼu kōkelekāsio. ʼO ʼuhiga mo tonatou ʼu maʼua ʼi tonatou ʼuhiga mātuʼa kua natou “mālo” ʼi tanatou tui pea mo tanatou agatonu ʼi te fakahala ʼa te mālamanei.—1 Soa. 5:4.

ʼE Natou Selipatea Peʼe Mole Natou Maʼu Fānau Moʼo Fakahoko Ia He Fakatuʼutuʼu ʼe Lelei

12. He koʼē neʼe fakatuʼutuʼu e ʼihi Kilisitiano ke natou nonofo selipatea muʼa?

¹² ʼI te “kua nounou te temi” pea mo te kua ‘fetogi ʼo te ʼaluʼaga ʼo te mālama ʼaenī,’ ʼe fakalotomālohiʼi tātou e te Folafola ʼa te ʼAtua ke tou vakavakaʼi ia te ʼu lelei ʼo te nofo selipatea. (1 Ko. 7:29-31) Koia, ko ʼihi Kilisitiano neʼe natou fakatuʼutuʼu ke mole natou ʼohoana peʼe ke natou nonofo selipatea lolotoga ni ʼu taʼu ʼi muʼa ʼo hanatou ʼohoana. ʼE tuha mo nātou ʼaia ia he fakafetaʼi, ʼi tanatou mole fakaʼaogaʼi ʼo tonatou ʼāteaina ʼaia moʼo kumi ni ʼu meʼa ʼe ʼaoga pē kiā nātou totonu. Tokolahi ʼe natou nonofo selipatea ke “mole fakalelu” nātou mai tanatou tauhi ʼaē kiā Sehova. (Lau ia 1 Kolonito 7:32-35.) Ko ʼihi selipatea Kilisitiano ʼe natou gāue ko ni ʼu pioniē peʼe ko ni ʼu Petelite. Tokolahi ʼe natou kumi ke natou fakalahi tanatou ʼu gāue ʼaē ki te kautahi ʼa Sehova, ʼaki hanatou faiga ke natou maʼu ia te ʼu kalitātē ʼaē ke feala hanatou kau ki te Ako ʼo Te Minisitelio. ʼE mahino ia, ko nātou ʼaē neʼe kau ki te selevisi temi kātoa lolotoga ni ʼu taʼu ʼi tanatou kei selipatea pea ki muli age leva neʼe natou ʼohoana, ʼi te agamāhani ʼe natou ʼui ʼe kei fua lelei pē ki tonatou maʼuli fakataumātuʼa ia te ʼu ako ʼaoga ʼaē neʼe natou maʼu mai te ʼu taʼu ʼaia ʼaē neʼe natou maʼuli selipatea ai.

13. He koʼē neʼe fakatuʼutuʼu e ʼihi taumātuʼa Kilisitiano ke mole natou maʼu fānau?

¹³ ʼI ʼihi koga meʼa ʼo te mālamanei, ʼe hoko ai te tahi fetogi ʼi te maʼuli ʼo te ʼu fāmili. Ko te ʼu taumātuʼa e tokolahi neʼe natou fakatuʼutuʼu ke mole natou maʼu fānau. Ko ʼihi taumātuʼa ʼe natou fai te fakatuʼutuʼu ʼaia ʼuhi ko te ʼu faigataʼaʼia fakapaʼaga; pea ki ʼihi ʼe  mole natou fia maʼu fānau heʼe natou fia ʼāteaina moʼo fai hanatou ʼu gāue ke maʼu lahi ai hanatou falā. ʼI te kau Kilisitiano, ʼe toe ʼi ai pē foki mo te ʼu taumātuʼa ʼe natou fakatuʼutuʼu ke mole natou maʼu fānau. Kae ʼi te agamāhani ʼe natou fai te fakatuʼutuʼu ʼaia ke feala honatou ʼāteaina lahi age ki te ʼu gāue ʼaē kiā Sehova. ʼE mole fakaʼuhiga leva ʼe mole tatau ia te maʼuli ʼo te ʼu taumātuʼa ʼaia mo te hahaʼi fuli ʼaē kua ʼohoana. Kae kua natou tali ke natou situʼa ki ʼihi tapuakina ʼo te nofo ʼohoana, ʼo natou fakamaʼumaʼua ʼi tonatou maʼuli ia te ʼu gāue ʼaē ʼo te Puleʼaga. (1 Ko. 7:3-5) Ko ʼihi ʼi te ʼu taumātuʼa ʼaia, ʼe natou gāue kiā Sehova pea mo tonatou ʼu tehina ʼi te silikō, mo te tisitilike peʼe ʼi te Petele. Ko ʼihi ʼe natou pioniē peʼe natou misionea. Ko Sehova ʼe mole ina galoʼi ia tanatou gāue pea mo te ʼofa ʼaē neʼe natou fakahā ki tona huafa.—Hep. 6:10.

“Te ʼu Mamahi ʼi Tonatou Kakano”

14, 15. Koteā te ʼu ‘mamahi ʼi te kakano’ ʼaē ʼe feala ke hoko ki te ʼu mātuʼa Kilisitiano?

¹⁴ Neʼe ʼui e te ʼapositolo ko Paulo ʼo ʼuhiga mo te kau Kilisitiano ʼaē kua ʼohoana, ʼe natou tau anai mo te ʼu ‘mamahi ʼi te kakano.’ (1 Ko. 7:28) ʼI te ʼu mamahi ʼaia, ʼe lagi ko he mahaki ʼi te taumātuʼa, peʼe ko tanā fānau, peʼe ko tanā ʼu mātuʼa ʼaē kua vaivai matuʼa. ʼE lagi feala ke kau ki te ʼu mamahi ʼaia, ia te ʼu faigataʼaʼia pea mo te ʼu lotomamahi ʼaē ʼe natou maʼu mai tanatou akoʼi ʼaē ʼo tanatou fānau. Ohagē ko te faʼahi neʼe kua tou talanoa kiai ʼi te kamata ʼo te ʼalatike ʼaenī, neʼe fakakikite ʼi te Tohi-Tapu ʼi “te ʼu ʼaho fakamuli” ʼe ʼi ai anai “te ʼu temi maʼuhiga ʼaupitō mo faigataʼa.” Pea ʼe kau ʼi te ʼu meʼa faigataʼa ʼaia, te fānau ʼaē ʼe ‘talagataʼa anai ki tanatou ʼu mātuʼa.’—2 Tim. 3:1-3.

¹⁵ Ko te ako fānau ʼe ko he maʼua maʼuhiga ki te ʼu mātuʼa Kilisitiano, koteʼuhi ʼe mole heʼeki tou hao mai te ʼu fua kovi ʼo te ʼu meʼa ʼaē ʼe hoko ʼi “te ʼu temi maʼuhiga ʼaupitō” ʼaenī. Koia, ʼe tonu ki te ʼu mātuʼa Kilisitiano ke natou gāue mālohi moʼo tauʼi te fakahala ʼaē ʼe fai e “te tuʼu ʼo te ʼu faʼahiga meʼa ʼaenī” ki tanatou ʼu fānau. (Efe. 2:2, 3) Pea ʼe mole ko he gāue ʼe faigafua tuʼumaʼu! ʼE ko he meʼa ‘fakatupu lotomamahi’ ki he taumātuʼa neʼe tokaga ʼo akoʼi tanā fānau ki te ʼu moʼoni ʼo te ʼAtua mokā situʼa kiā Sehova.—Taag. 17:25.

‘ ʼE ʼi Ai Anai Te Mamahi Lahi’

16. Koteā te “mamahi” ʼaē neʼe fakakikite e Sesu?

¹⁶ Kae ʼe ʼi ai anai te tahi mamahi ʼe lahi age ia ʼi te “mamahi” ʼaia ʼe felāveʼi mo te ʼu taumātuʼa pea mo te taupau ʼo te fānau. ʼI tana lea fakapolofetā ʼo ʼuhiga mo tana ʼi henī pea mo te fakaʼosi ʼo te ʼu faʼahiga meʼa ʼo te tuʼu ʼaenī, neʼe ʼui fēnei e Sesu: “[ʼE] ʼi ai anai te mamahi lahi, ʼe mole hona tatau kua hoko talu mai te kamataʼaga ʼo te mālamanei ʼo kaku mai ki te temi nei, kailoa, pea ʼe mole toe hoko anai he tahi mamahi fēia.” (Mat. 24:3, 21) Ki muli age neʼe fakahā e Sesu ko he toe hahaʼi tokolahi ʼe natou hao anai ʼi te “mamahi lahi” ʼaia. Kae ʼe tauʼi pē anai e te tuʼu ʼa Satana ʼo ina ʼohofiʼi fakaʼosi ia te kau Fakamoʼoni ʼa Sehova ʼaē ʼe maʼuli tokalelei. ʼE mahino ia, ʼe ko he temi faigataʼa anai kiā tātou fuli, te hahaʼi fotufotuʼa pea mo te fānau.

17. (a) He koʼē ʼe feala ke tou falala ki te kā haʼu? (b) Koteā ʼaē ʼe tonu ke malave ki tatatou faʼahiga sio ʼaē ki te ʼohoana pea mo te ʼu maʼua ʼo te ʼu mātuʼa?

¹⁷ Kae ʼe mole tonu ke tou tuʼaniaʼi fau te kā haʼu. Ko te ʼu mātuʼa ʼaē ʼe natou agatonu kiā Sehova ʼe feala hanatou falala ʼe puipui anai nātou pea mo tanatou ʼu fānau. (Lau ia Isaia 26:20, 21; Sofo. 2:2, 3; 1 Ko. 7:14) Kae ʼi te temi nei, ʼe tonu ke tou ʼiloʼi ko te ʼu ʼaho faigataʼa ʼaenī ʼe tou māʼuʼuli ai, ʼe feala ke malave kiā tātou ʼo ʼuhiga mo tatatou faʼahiga sio ʼaē ki te ʼohoana pea mo te ʼu maʼua ʼo te ʼu mātuʼa ʼi te temi fakaʼosi ʼaenī. (2 Pet. 3:10-13) Koia, peʼe tou selipatea peʼe kua tou ʼohoana, peʼe tou maʼu fānau peʼe kailoa, kae ʼe tou fakamaʼuhigaʼi ai anai pea mo fakavikiviki ia Sehova pea mo te kōkelekāsio kātoa.

[ʼU nota]

Moʼo Fakamanatu

• He koʼē ʼe tonu ki te kau Kilisitiano tūpulaga ke mole natou foimo ʼohoana fakavilivili?

• Koteā ʼaē ʼe fakamaʼua ki te akoʼi ʼo he tamasiʼi?

• He koʼē e tokolahi te kau Kilisitiano ʼe natou fakatuʼutuʼu ke natou nonofo selipatea, peʼe ke mole natou maʼu fānau mo kapau kua natou ʼohoana?

• Koteā te “mamahi” ʼaē ʼe feala ke hoko ki te ʼu mātuʼa Kilisitiano?

[ʼU fehuʼi ʼo te ako]

[Paki ʼo te pasina 21]

He koʼē ʼe aga fakapotopoto anai ia te ʼu Kilisitiano tūpulaga mo kapau ʼe natou fakatalitali muʼa ke natou fotufotuʼa ʼi muʼa ʼo hanatou ʼohoana?

[Paki ʼo te pasina 23]

He koʼē neʼe fakatuʼutuʼu e ʼihi taumātuʼa Kilisitiano ke mole natou maʼu fānau?