ʼU Tūpulaga, Ke Kotou Manatuʼi Foki Ia Tokotou Tupuʼaga Lahi

“Ke ke manatuʼi tou Tupuʼaga Lahi ʼi te ʼu ʼaho ʼo tou temi tūpulaga.”—TNK. 12:1.

 1. ʼE fakahā feafeaʼi e Sehova ia tana falala ʼaē ki tana kau ʼatolasio tūpulaga?

 KIĀ SEHOVA ʼe maʼuhiga ia te kau tūpulaga Kilisitiano, pea ʼe natou mokomoko ohagē ko he ʼu mosiʼi hahau. Neʼe ina fakakikite ʼi te ʼaho ʼo te “mālohi fakasōlia” ʼo tona ʼAlo, ko te kau tūpulaga ʼe ‘natou lotolelei anai ʼo foaki ia nātou’ ki te gāue ʼa Kilisito. (Pes. 110:3) Neʼe hoko te lea fakapolofetā ʼaia ʼi totatou temi, ʼi te temi ʼaē ʼe mole kei fia fakalogo ai te hahaʼi tokolahi ki te ʼAtua, ʼi tanatou kua manatu pē kiā nātou totonu pea mo mānumānu koloa, pea mo natou talagataʼa. Kae neʼe ʼiloʼi e Sehova ʼe mole fēia anai ia te kau tūpulaga ʼaē ʼe tauhi age kiā te ia. ʼI toe falala lahi ʼa Sehova kiā koutou, ʼu tehina mo tuagaʼane kei tūpulaga!

 2. Koteā te fakaʼuhiga ʼo te manatuʼi ia Sehova?

² Kotou fakakaukauʼi age muʼa ia te fiafia ʼa te ʼAtua ʼi tana sio ifo ki te ʼu tūpulaga ʼe natou manatuʼi ia ia ko tonatou Tupuʼaga Lahi. (Tnk. 12:1)ʼE mole fakaʼuhiga pē ke tou manatuʼi ia Sehova kae ʼe toe fakaʼuhiga ke tou fai te meʼa ʼaē ʼe ina leleiʼia, ʼo tou tuku ke takitaki tātou ʼi te ʼaho fuli e tana ʼu lao pea mo tana ʼu pelesepeto. ʼE tou toe falala kiā Sehova, ʼo tou manatuʼi ʼe loto ia ke tou maʼuli fiafia. (Pes. 37:3; Isa. 48:17, 18) Ko te ʼu faʼahi koa ʼaia ʼe kotou logoʼi o ʼuhiga mo tokotou Tupuʼaga Lahi?

“Falala Kiā Sehova ʼAki Tou Loto Kātoa”

3, 4. Neʼe fakahā feafeaʼi e Sesu ia tana falala ʼaē kiā Sehova, pea he koʼē ʼe maʼuhiga te falala ʼaē kiā Sehova iā ʼaho nei?

³ Ko Sesu Kilisito ʼaē neʼe ina tuku mai te faʼifaʼitaki lelei ʼo ʼuhiga mo te falala ʼaē ki te ʼAtua. Neʼe ina maʼuliʼi te ʼu palalau ʼaenī iā Tāʼaga Lea 3:5, 6: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia ʼe ina fakatonutonuʼi anai tou ʼu ala foufou.” Mole faʼa fualoa ki te ʼosi ʼo tona papitema, neʼe fakaovi age ia Satana kiā Sesu, ʼo ina faigaʼi ke ina fakahalaʼi ia Sesu ke ina tali te pule pea mo te kolōlia ʼo te mālamanei. (Luka 4:3-13) Neʼe mole mulimuli ia Sesu ki tana ʼu fakahala ʼaia, he neʼe ina ʼiloʼi ʼe hoki maʼu “te ʼu koloa [moʼoni], mo te kolōlia, pea mo te maʼuli” mokā ʼe kita “agavaivai pea mo . . . manavasiʼi kiā Sehova.”—Taag. 22:4.

⁴ Iā ʼaho nei, kua mālohi ʼi te mālamanei ia te loto mānumānu pea mo te tahi manatu pē kiā kita totonu. Pea ʼi he mālama fēia, ʼe tou aga fakapotopoto anai ʼo muliʼi ia te faʼifaʼitaki ʼa Sesu. ʼAua foki naʼa galo kiā tātou, ko Satana ʼe faiga mālohi anai ke ina fakahehē ia te ʼu kaugana ʼa Sehova ke natou mavae mai te ala lauveliveli ʼaē ʼe fakatau ki te maʼuli. ʼE faiga ia ke ʼolo fuli te hahaʼi ʼi te ala laulahi ʼaē ʼe fakatau ki te fakaʼauha. ʼAua naʼa kotou tuku ke ina fakahehē koutou! Kae ke kotou fakatotonu ke kotou manatuʼi tokotou Tupuʼaga Lahi. Kotou falala kātoa kiā te ia, pea ke kotou puke maʼu ia “te maʼuli moʼoni,” ʼaē kua ovi mai.—1 Tim. 6:19.

ʼU Tūpulaga, Ke Kotou Aga Fakapotopoto!

 5. Koteā takotou manatu ʼo ʼuhiga mo te kā haʼu ʼo te mālama ʼaenī?

⁵ Ko te kau tūpulaga ʼaē ʼe natou manatuʼi tonatou Tupuʼaga Lahi ʼe natou popoto age ʼi te tahi kau tūpulaga ʼo tonatou taʼiake. (Lau ia Pesalemo 119:99, 100.) ʼUhi ko tanatou mulimuli ki te manatu ʼa te ʼAtua, ʼe natou ʼiloʼi lelei ai te kovi ʼo te ʼu fakatuʼutuʼu ʼo te mālamanei. Logolā tokotou ʼu taʼu siʼisiʼi, kae kua kotou fakatokagaʼi pē te kua lēsili age ʼo te maʼuli tuʼania pea mo hoha ʼa te hahaʼi ʼo ʼuhiga mo te kā haʼu. Kapau ʼe kei kotou ako, neʼe lagi kotou logo ki ni ʼu fihifihia ʼo ʼuhiga mo te ʼulihi ʼo te kele, mo tona kua māfana age ʼi te temi muʼa, mo te maumauʼi ʼo te ʼu vao matuʼa, pea mo ʼihi atu pē ʼu fihifihia. ʼE tuʼaniaʼi tāfito e te hahaʼi  te ʼu faʼahi ʼaia, kae ʼe gata pē ki te kau Fakamoʼoni ʼa Sehova ʼaē ʼe natou mahino lelei, ʼe pipiki te ʼu fihifihia ʼaia ki te fakaʼiloga ʼo te kua vave fakaʼosi ʼo te mālama ʼa Satana.—Fakh. 11:18.

 6. Neʼe kākāʼi feafeaʼi ʼihi tūpulaga?

⁶ Kae meʼa fakaʼofaʼofa foki, heʼe ko ʼihi kaugana tūpulaga ʼa te ʼAtua neʼe mole nonofo tōkakaga pea neʼe galo ai kiā nātou te kua nounou ʼo te temi ʼo te tuʼu ʼaenī. (2 Pet. 3:3, 4) Ko ʼihi neʼe natou agahala mamafa ʼuhi ko tanatou fakakaugā kovi pea mo tanatou sioʼi te ʼu pāki ʼe hā ai te ʼu felāveʼi fakasino heʼeʼaoga. (Taag. 13:20) ʼI meʼa fakaʼofaʼofa anai ʼo hatatou mole kei maʼu te ʼofa ʼo te ʼAtua kae kua tou ovi pē ki te fakaʼosi ʼo te tuʼu ʼaenī! Tou manatuʼi te meʼa ʼaē neʼe hoko ki te kau Iselaele ʼi te taʼu 1473 ʼi muʼa ʼo totatou temi, ʼi te temi ʼaē neʼe natou nonofo ai ʼi te ʼu Mafa ʼo Moape, ʼi tanatou kua vave hū pē ki te Kele ʼo Te Fakapapau. Koteā ʼaē neʼe hoko ai?

Neʼe Natou Higa Kae Neʼe Kua Natou Ovi Pē Ki Tonatou Fakapale

7, 8. (a) Koteā te puleʼaki kākā ʼaē neʼe fakaʼaogaʼi e Satana ʼi te ʼu Mafa ʼo Moape? (b) Koteā te puleʼaki kākā ʼe fakaʼaogaʼi e Satana iā ʼaho nei?

⁷ ʼI te temi ʼaia, neʼe loto tāfito e Satana ke mole maʼu e te kau Iselaele ia te tofiʼa ʼaē neʼe fakapapauʼi age kiā nātou. ʼI tana mole lava fakahalaʼi nātou ʼaki te polofetā ko Palaame, neʼe fai ai leva e Satana ia te puleʼaki kākā; neʼe ina faigaʼi ke ina fakalakahalaʼi te kau Iselaele ke tupu ʼaki ai hanatou mole maʼu ia te tapuakina ʼa Sehova. Neʼe ina fakaʼaogaʼi te ʼu fafine finemui Moapite moʼo fakahalaʼi ʼo te kau Iselaele, pea neʼe fua te fakahala ʼaia ʼa te Tēvolo. Neʼe fai e te hahaʼi te ʼu felāveʼi fakasino heʼeʼaoga mo te ʼu ʼofafine ʼo Moape pea mo natou ʼatolasio kiā Paale ʼo Peole! Logolā neʼe kua natou ovi ki tonatou tofiʼa maʼuhiga ʼaē ko te Kele ʼo Te Fakapapau, kae neʼe mamate ia te toko 24 000 Iselaele. ʼI tuʼutāmaki fakaʼofaʼofa leva neʼe hoko!—Fkau. 25:1-3, 9.

⁸ Iā ʼaho nei, kua vave pē tatatou aʼu ki te kele ʼo te fakapapau ʼaē ʼe lelei age: ko te tuʼu foʼou ʼo te ʼu faʼahiga meʼa ʼaenī. Ohagē pē ko tana ʼu kākā māhani, kei fakaʼaogaʼi pē e Satana ia te ʼu felāveʼi fakasino heʼeʼaoga moʼo fakahalaʼi ia te hahaʼi ʼa te ʼAtua. ʼI te kua kovi ʼaupitō ʼo te ʼu lēkula ʼo ʼuhiga mo te aga ʼaē ke fai ʼi te mālamanei, kua meʼa noaʼi pē ia te fai folonikāsio pea ko te fai tagata pea mo te fai fafine, ʼo tahi fakalogo pē ia ki te hahaʼi takitokotahi. Neʼe ʼui fēnei e te tuagaʼane Kilisitiano: “ ʼE gata pē ʼi tomatou ʼapi pea ʼi te ʼu fale fono, ʼaē ʼe akoʼi ai ki taku ʼu fānau ʼe mole leleiʼia e te ʼAtua ia te fai tagata pea mo te fai fafine, pea mo te ʼu felāveʼi fakasino ʼi muʼa ʼo te ʼohoana.”

 9. Koteā ʼaē ʼe feala ke hoko lolotoga ʼi “te mātala ʼo te temi tūpulaga,” pea koteā ʼaē ʼe lava fai e te kau tūpulaga ʼo ʼuhiga mo te faʼahi ʼaia?

⁹ Ko te kau tūpulaga ʼaē ʼe natou manatuʼi tonatou Tupuʼaga Lahi, ʼe natou ʼiloʼi ko te ʼu felāveʼi fakasino ʼe ko he meʼa ʼofa taputapu ʼe pipiki ki te maʼuli pea mo te fānaunau. Koia, ʼe natou mahino ai ʼe tonu pē ke fai te ʼu felāveʼi fakasino ʼaia, ʼo mulimuli ki te takitaki ʼa te ʼAtua, ʼo fai pē e he tagata pea mo he fafine kua nā ʼohoana. (Hep. 13:4)  Kae ʼi te lolotoga ʼo “te mātala ʼo te temi tūpulaga” ʼaē ko he temi ʼe mālohi ai te ʼu holi fakasino pea mole heʼeki kātoa ai he fakasiosio poto, ʼe feala ke faigataʼa ki he tūpulaga ia hana nofo maʼa. (1 Ko. 7:36) Koteā ʼaē ʼe feala ke kotou fai mokā ʼe kotou maʼu ni ʼu manatu ʼe heʼemaʼa? Kotou faikole fakamālotoloto kiā Sehova ke tokoni atu ke kotou maʼu ia he ʼu manatu ʼe lelei. ʼE fakalogo tuʼumaʼu pē Sehova kiā nātou ʼaē ʼe natou falala fakamālotoloto age kiā te ia. (Lau ia Luka 11:9-13.) Ko te ʼu fai palalau ki he ʼu meʼa ʼe maʼa pea mo fakalotomālohi ki te tui, ʼe toe tokoni atu anai ki tokotou ʼatamai ke kotou maʼu ni ʼu manatu ʼe maʼa.

Kotou Filifili Fakapotopoto Takotou ʼu Fakatuʼutuʼu Ki Te Kā Haʼu!

10. Koteā te ʼu manatu kovi ʼaē ʼe tonu ke tou tekeʼi, pea ko te ʼu fehuʼi fea ʼaē ʼe feala ke tou fai?

¹⁰ Ko te tahi tupuʼaga ʼo te maʼuli fakavalevale ʼa te kau tūpulaga ʼo te mālamanei pea mo holi ki te ʼu fakafiafia ʼo te kakano, heʼe mole natou ‘maʼu ia te fakahā’ mai te ʼAtua, ko tona fakaʼuhiga ʼaē ʼe mole takitaki nātou e te ʼAtua peʼe mole maʼu honatou ʼamanaki lelei ki te kā haʼu. (Taag. 29:18) ʼE natou hagē ko te kau Iselaele ʼo te temi ʼo Isaia ʼaē neʼe mole kei natou fakalogo ki te ʼAtua, kae kua natou māʼuʼuli pē ki te “fakafiafia pea mo te fiafia, . . . [ʼo natou] kai ia te kanoʼi manu pea mo ʼinu te vino.” (Isa. 22:13) ʼAua naʼa kotou fakaʼamu ki te maʼuli ʼo te taʼi hahaʼi ʼaia, kae he koʼē koa ʼe mole kotou fakakaukauʼi ia te ʼamanaki maʼuhiga ʼaē kā foaki anai e Sehova ki tana ʼu kaugana agatonu? Kapau ko koe ko he kaugana tūpulaga ʼa te ʼAtua, ʼe ke fakaʼamu koa lā ki te mālama foʼou? ʼE ke faiga mālohi koa ke ke ‘maʼuli fakapotopoto ʼo ke fakatalitali ki te ʼamanaki fakafiafia’ ʼaē neʼe fakatuʼutuʼu e Sehova ke ina foaki atu? (Tito 2:12, 13) Ko takotou tali ki te fehuʼi ʼaia ʼe hā anai ʼi te ʼu fakatuʼutuʼu pea mo te ʼu gāue ʼaē kā kotou fakamuʼamuʼa ʼi tokotou maʼuli.

11. He koʼē ʼe tonu ki te kau tūpulaga Kilisitiano ʼaē kei ako ke natou gāue kinakina?

¹¹ ʼE faigaʼi e te mālamanei ke fakaʼaogaʼi pē e te kau tūpulaga ia tonatou mālohi kātoa ki te ʼu fakatuʼutuʼu ʼo te mālama ʼaenī. ʼIo, ko nātou ʼaē iā koutou ʼe kei ako, ʼe tonu ke natou gāue kinakina ke natou maʼu he ako ʼe lelei. Kotou manatuʼi, ʼe mole tonu pē ke kotou maʼu hakotou gāue ʼe lelei kae ʼe tonu foki ke kotou tokoni ki te kōkelekāsio pea mo kotou liliu ko he kaugā fai fakamafola ʼe tuputupu ʼi te faʼahi fakalaumālie. Pea ki te faʼahi ʼaia, ʼe ʼaoga ke kotou felōgoi lelei mo te hahaʼi, ke kotou popoto ʼi te fakakaukau, pea mo fakatokatoka pea mo fakaʼapaʼapa ʼi takotou ʼu fai palalau mo te hahaʼi. Tahi ʼaē meʼa, ko te kau tūpulaga ʼaē ʼe natou ako te Tohi-Tapu pea mo faiga ke natou maʼuliʼi tona ʼu pelesepeto ʼi tonatou maʼuli, ʼe natou maʼu ia te ako ʼe lelei age pea ʼe natou maʼu ia te fakatafito ki te kā haʼu ʼe lelei pea mo heʼegata.—Lau ia Pesalemo 1:1-3. a

12. Koteā te faʼifaʼitaki lelei ʼe ʼaoga ke faʼifaʼitakiʼi e te ʼu fāmili Kilisitiano?

¹² ʼI Iselaele, neʼe ko he fakatuʼutuʼu maʼuhiga ia te ako ʼo te ʼu fānau e te ʼu mātuʼa. Neʼe akoʼi ki te fānau ia te ʼu faʼahi fuli ʼo te maʼuli, tāfito lā te ʼu gāue ʼaē neʼe pipiki ki te tauhi ki te ʼAtua. (Teu. 6:6, 7) Koia, ko te kau tūpulaga Iselaele ʼaē neʼe fakalogo ki tanatou ʼu mātuʼa pea mo ʼihi hahaʼi mātutuʼa ʼaē neʼe manavasiʼi ki te ʼAtua, neʼe natou maʼu ai te ʼatamai mālama pea neʼe natou toe maʼu ai foki mo te poto, te fakasiosio tonu, te ʼatamai, pea mo te poto fakakaukau, ʼaē ko he ʼu kalitātē neʼe feala pē hona maʼu ʼaki te ako fakaʼatua. (Taag. 1:2-4; 2:1-5, 11-15) ʼE tonu mo te ʼu fāmili Kilisitiano ʼo te temi nei ke natou foaki he ako fēia ki tanatou ʼu fānau.

Kotou Fakalogo Kiā Nātou ʼAē ʼe ʼOʼofa Kiā Koutou

13. Koteā te ʼu tokoni ʼaē ʼe fai ki ʼihi tūpulaga, pea he koʼē ʼe tonu ke natou vakavakaʼi lelei ia te ʼu tokoni ʼaia?

¹³ ʼE fai ki te kau tūpulaga he ʼu tokoni mai te faʼahiga hahaʼi kehekehe, ohagē lā ko te hahaʼi fai tokoni ʼi te ʼu faleako, ʼaē ʼi te agamāhani ʼe natou tokoniʼi pē te fānau ke lelei tonatou maʼuli ʼi te mālama  ʼaenī. ʼE matou kole atu ke kotou vakavakaʼi ia te ʼu tokoni fuli ʼaia ʼi te faikole pea ʼaki te Folafola ʼa te ʼAtua pea mo te ʼu tohi Fakatohi-tapu ʼaē ʼe foaki mai e te tagata kaugana agatonu mo poto. ʼI takotou ako ia te Tohi-Tapu, kua kotou ʼiloʼi ai ʼe tauʼi tāfito e Satana te kau tūpulaga pea mo nātou ʼaē ʼe heʼeki fakapotopoto. Ohagē lā, ʼi te ʼōloto ʼo Eteni, ʼi te heʼeki kātoa ʼo te poto ʼo Eva neʼe fakalogo ai ia kiā Satana, ʼaē ko he tahi kehe neʼe mole ʼofa pē lā kiā Eva. Kanapau lā neʼe fakalogo ia Eva kiā Sehova, ʼaē neʼe ina fakahā age ki ai tona ʼofa ʼi te ʼu ʼaluʼaga kehekehe, ʼe kehe anai ia totatou maʼuli ʼi te temi nei.—Sen. 3:1-6.

14. He koʼē ʼe tonu ke tou fakalogo kiā Sehova pea mo tatatou ʼu mātuʼa ʼaē ʼi te tui?

¹⁴ ʼE toe ʼofa ʼaupitō ia tokotou Tupuʼaga Lahi kiā koutou, pea ʼe mole he kākā ʼi tona ʼofa ʼaia kiā koutou. ʼE loto ia ke kotou fiafia ʼo heʼegata, kae ke mole gata pē ʼi te temi nei! Koia, ohagē ko te ʼofa ʼa he tamai ʼofa, ʼe ina ʼui atu kiā koutou pea mo nātou fuli ʼaē ʼe tauhi age kiā te ia: “Koʼenī te ala. Kotou haʼele ai.” (Isa. 30:21) Kapau ko takotou ʼu mātuʼa ʼe ko he ʼu Fakamoʼoni pea mo nā ʼofa moʼoni kiā Sehova, ʼe ko he tahi ʼaia tapuakina kiā koutou. Kotou fakalogo ʼaki te fakaʼapaʼapa ki tanā ʼu tokoni mokā ʼe nā fai he ʼu fakatuʼutuʼu peʼe ko he ʼu faʼahi ke kotou fakamuʼamuʼa ʼi tokotou maʼuli. (Taag. 1:8, 9) ʼI tona fakahagatonu, ʼe natou loto ke kotou māʼuʼuli, pea ʼe ko he faʼahi ʼe maʼuhiga age ia ʼi te ʼu koloa peʼe ko te maʼu tuʼulaga ʼi te mālama ʼaenī.—Mat. 16:26.

15, 16. (a) He koʼē ʼe feala ke tou falala kiā Sehova? (b) Koteā te ako maʼuhiga ʼe feala ke tou maʼu mai te meʼa ʼaē neʼe hoko kiā Paluke?

¹⁵ Ko nātou ʼaē ʼe natou manatuʼi tonatou Tupuʼaga Lahi, ʼe natou fakafaigafua tonatou maʼuli, ʼo natou falala ko Sehova ʼe “mole” ina tuku anai nātou, ʼe “mole” situʼa anai ia kiā nātou. (Lau ia Hepeleo 13:5.) Mai tona ʼaluʼaga ʼaē ko te faʼahiga maʼuli lelei ʼaia ʼe fakafeagai ki te faʼahiga manatu ʼa te mālamanei, koia ʼaē ʼe tonu ai ke tou tōkakaga naʼa tou mulimuli ki te manatu ʼaia ʼa te mālamanei. (Efe. 2:2) Pea ki te faʼahi ʼaia, tou vakaʼi age muʼa ia te faʼifaʼitaki ʼa Paluke, te tagata sīkalaipe ʼa Selemia, ʼaē neʼe maʼuli ʼi te ʼu ʼaho fakamuli mo faigataʼa ʼo Selusalemi pea neʼe iku ki te fakaʼauha ʼo te kolo ʼi te taʼu 607 ʼi muʼa ʼo totatou temi.

¹⁶ Neʼe lagi loto e Paluke ke lelei age tona maʼuli ʼi te faʼahi fakasino. Neʼe tokagaʼi e Sehova ia te faʼahi ʼaia pea ʼaki he agalelei, neʼe ina fakatokaga age kiā Paluke ke ʼaua naʼa ina kumi he “ ʼu meʼa lalahi” maʼa ia totonu pē. Neʼe agavaivai pea mo agapoto ia Paluke, he neʼe fakalogo kiā Sehova pea neʼe hao ai ʼi te fakaʼauha ʼo Selusalemi. (Sel. 45:2-5) ʼI te tahi age faʼahi, ko te hahaʼi ʼo te temi ʼo Paluke ʼaē neʼe natou faiga ke natou maʼu ia he “ ʼu meʼa lalahi” ʼi te faʼahi fakasino, ʼo mole natou fakamuʼamuʼa ʼi tonatou maʼuli ia tanatou tauhi ʼaē kiā Sehova, neʼe mole tuai pea neʼe puli fuli tonatou ʼu koloa ʼaia ʼi te temi ʼaē neʼe ʼomai ai te kau Kalitia (te kau Papiloni) ʼo fakaʼauha ia Selusalemi. Neʼe toe mamate ai foki mo te tokolahi. (2 Fkma. 36:15-18) Ko te meʼa ʼaē neʼe hoko kiā Paluke, ʼe tokoni mai ke tou mahino ki te maʼuhiga age ke tou felōgoi lelei mo te ʼAtua ʼi hatatou fia maʼu koloa pea mo maʼu tuʼulaga ʼi te mālama ʼaenī.

Kotou Tokagaʼi Te ʼu Faʼifaʼitaki Lelei

17. He koʼē ko Sesu, mo Paulo pea mo Timoteo e ko he ʼu faʼifaʼitaki lelei ki te ʼu kaugana ʼa Sehova iā ʼaho nei?

¹⁷ Ke tou haʼele ʼi te ala ʼo te maʼuli, ʼe tou maʼu ʼi te Folafola ʼa te ʼAtua ia te ʼu tuʼuga faʼifaʼitaki lelei.  Ohagē lā ko Sesu neʼe ko te tagata poto pē ʼaia ʼo te temi fuli, kae neʼe tokaga tāfito ia ki te meʼa ʼaē kā tokoni anai ki te hahaʼi ʼo talu ai, ia te fakamafola ʼo “te logo lelei ʼo te puleʼaga.” (Luka 4:43) Ke ina foaki kiā Sehova ia te meʼa lelei ʼaē neʼe ina maʼu, neʼe situʼa ia te ʼapositolo ko Paulo ki he tuʼulaga māʼoluga kae ina fakaʼaogaʼi tona temi pea mo tona mālohi ki te fakamafola ʼo te logo lelei. Ko Timoteo ʼaē ko te “fanau mooni i te tui” neʼe ina muliʼi ia te faʼifaʼitaki lelei ʼa Paulo. (1 Tim. 1:2, Tauhi Foou) Neʼe fakahemala koa ia Sesu, mo Paulo pea mo Timoteo ki tonatou maʼuli ʼaē neʼe natou situʼa kiai? Kailoa ia! Neʼe ʼui e Paulo ʼe ina fakatatau ki “he ʼu tuʼuga ʼotaʼota” ia te ʼu meʼa ʼaē ʼe foaki age e te mālama mokā ʼe ina fakatatau ki te maʼuhiga ʼo te tauhi ki te ʼAtua.—Filp. 3:8-11.

18. Koteā te ʼu fetogi lahi neʼe fai e te tehina tūpulaga, pea he koʼē neʼe mole fakahemala ia ki te tonu ʼaē neʼe ina fai?

¹⁸ Tokolahi ia te kau tūpulaga Kilisitiano iā ʼaho nei, ʼe natou faʼifaʼitakiʼi ia te tui ʼa Sesu, mo Paulo pea mo Timoteo. Ohagē lā, ko te tehina tūpulaga neʼe lelei te totogi ʼo tana gāue, neʼe ina ʼui fēnei: “Mai tona ʼaluʼaga ʼaē ʼe au maʼuliʼi te ʼu pelesepeto Fakatohi-tapu, neʼe mole tuai pea hiki au ki te tahi tuʼulaga. Logolā te ʼu lelei fakakoloa ʼaē neʼe au maʼu, kae neʼe au logoʼi ʼe vaʼiganoa. ʼI taku palalau ki te hahaʼi takitaki ʼo te sōsiete ʼo ʼuhiga mo taku fia kau ʼaē ki te minisitelio temi kātoa, neʼe natou ʼui mai aipē, ʼe natou hiki anai toku totogi, ʼo natou fakaʼamu ʼe au hoko atu anai taku gāue ʼi te sōsiete. Kae neʼe kua au fakatotonu ke au mavae. Tokolahi te hahaʼi ʼe feala ke mole natou mahino pe koʼē neʼe au tuku te gāue ʼe totogi lelei kae au kau ki te selevisi temi kātoa. Kae ʼe au tali age pē anai, ʼe au fia fakahoko moʼoni taku fakapapau ʼaē neʼe au fai ki te ʼAtua. ʼI taku kua fakaʼaogaʼi pē ia toku maʼuli ki te ʼu gāue fakalaumālie, kua au fiafia pea mo fīmālie, pea ʼe mole feala ki he ʼu tuʼuga paʼaga peʼe ko he tuʼulaga ke natou foaki mai te ʼu lelei ʼaia.”

19. Koteā te fakatuʼutuʼu poto ʼe fakalotomālohiʼi te kau tūpulaga ke natou fai?

¹⁹ ʼI te mālamanei kātoa, neʼe fai e te ʼu toko lauʼi afe tūpulaga te ʼu taʼi fakatuʼutuʼu poto ʼaia ki tonatou maʼuli. Koia, ʼu tūpulaga kā kotou fakakaukauʼi ia tokotou kā haʼu, ʼaua naʼa galo kiā koutou ia te ʼaho ʼo Sehova. (2 Pet. 3:11, 12) ʼAua naʼa kotou fakaʼamu ki te maʼuli ʼo nātou ʼaē ʼe natou fakaʼaogaʼi kātoa te ʼu lelei ʼo te mālamanei. Kae kotou fakalogo kiā nātou ʼaē ʼe ʼoʼofa moʼoni kiā koutou. Ko te tānaki ʼo “he u koloa . . . i Selo” ʼe ko hokotou puipuiʼaga lelei pē ʼaia pea ʼe kotou maʼu ai pē anai ia te ʼu tapuakina heʼegata. (Mat. 6:19, 20, Tauhi Foou; lau ia 1 Soane 2:15-17.) ʼIo, kotou manatuʼi tokotou Tupuʼaga Lahi. Kapau ʼe kotou fai ia te faʼahi ʼaia, ʼe tapuakina anai koutou e Sehova.

[Nota]

ʼE Kei Kotou Manatuʼi Koa?

• ʼE feafeaʼi hatatou fakahā tatatou falala ʼaē ki te ʼAtua?

• Ko te ako fea ʼaē ʼe lelei ʼaupitō age?

• Koteā te ʼu ako ʼe feala ke tou maʼu mai te meʼa ʼaē neʼe hoko kiā Paluke?

• Ko ai te ʼu faʼifaʼitaki lelei ʼaē ʼe ʼaoga kiā tātou, pea koteā tona tupuʼaga?

[ʼU fehuʼi ʼo te ako]

[Paki ʼo te pasina 17]

ʼE foaki e Sehova ia te ako ʼaē ʼe lelei age

[Paki ʼo te pasina 19]

Neʼe fakalogo ia Paluke kiā Sehova pea neʼe hao ʼi te fakaʼauha ʼo Selusalemi. Koteā te ako ʼe feala ke kotou maʼu mai te faʼifaʼitaki ʼaia?