Kotou Fiafia ʼi Tokotou Maʼuli Fakataumātuʼa

“ ʼE mālohi anai he loto fale ʼaki te poto, pea ʼe tuʼu mālohi anai ʼaki te fakasiosio tonu.”—TAAG. 24:3.

 1. ʼO ʼuhiga mo te ʼuluaki tagata, neʼe fakahā feafeaʼi e te ʼAtua tona poto?

 ʼE ʼILOʼI e tatatou Tamai poto ʼaē ʼe ʼi selō ia te meʼa ʼaē ʼe lelei kiā tātou. Ohagē lā, neʼe ʼiloʼi e te ʼAtua ke hoko ia Tana fakatuʼutuʼu, neʼe “mole lelei ke nofo tokotahi te tagata” ʼi te ʼōloto ʼo Eteni. Ko te koga tāfito ʼo te fakatuʼutuʼu ʼaia, ke ʼohoana te hahaʼi pea ke natou fānaunau pea mo “fakafonu te kele.”—Sen. 1:28; 2:18.

 2. Koteā te fakatuʼutuʼu neʼe fai e Sehova ke fua lelei ki te mālamanei?

² Neʼe ʼui fēnei e Sehova: “ ʼE au fai anai hona tokoni ke liliu ko hona fakakātoa.” Pea neʼe fakamoe e te ʼAtua ia te ʼuluaki tagata, pea mai tona sino haohaoa neʼe Ina toʼo ai he hui, ʼo ina faʼu ai he fafine. ʼI te temi ʼaē neʼe ʼaumai ai e Sehova ia te fafine haohaoa ʼaia ko Eva kiā Atama, neʼe ʼui fēnei e te tagata: “Ko ia ʼaenī ko te hui ʼo toku hui pea mo te kakano ʼo toku kakano. ʼE fakahigoaʼi anai ia ia ko te Fafine, koteʼuhi mai te tagata neʼe toʼo mai ai ia ia nei.” Neʼe liliu moʼoni ia Eva ko te fakakātoa ʼo Atama. ʼE nā tahi maʼu anai tonā agaaga pea mo tonā ʼu kalitātē, kae neʼe nā haohaoa pea neʼe faʼu nāua ki te pāki ʼo te ʼAtua. Koia, ko Sehova ʼaē neʼe ina fakatuʼu ia te ʼuluaki ʼohoana. Neʼe mole faigataʼa kiā Atama mo Eva tanā tali ia te fakatuʼutuʼu fakaʼatua ʼaia, ʼaē neʼe tonu ai ke nā fetokoniʼaki pea mo felagolagoʼaki.—Sen. 1:27; 2:21-23.

 3. Koteā ia te manatu ʼa te tokolahi ʼo ʼuhiga mo te meʼa ʼofa ʼaē ko te ʼohoana, pea ko te ʼu fehuʼi fea ʼaē ʼe malaga ai?

³ Kae meʼa fakaʼofaʼofa foki, he kua mafola ʼi te mālamanei ia te agatuʼu. Ko te ʼu fihifihia ʼaē ʼe tupu mai ai ʼe mole haʼu ia mai te ʼAtua. Tokolahi ʼe natou meʼa noaʼi ia te meʼa ʼofa ʼo te ʼAtua ʼaē ko te ʼohoana, ʼo natou lau ʼe mole kei ʼaoga ia te fakatuʼutuʼu ʼaia ʼi totatou temi, ʼe ko he meʼa fakatupu lotomamahi peʼe fakatupu fihi. Tokolahi iā nātou ʼaē neʼe ʼohoana, kua natou māvete. ʼE mole kei ʼofainaʼi te fānau pea kua natou liliu ohagē pē ko he ʼu meʼa ʼe fakaʼaogaʼi e te taumātuʼa mokā ʼe nā tokakovi. Tokolahi te ʼu mātuʼa ʼe mole natou aga fakapotopoto, tatau aipē mo kapau ʼe ʼaoga te faʼahi ʼaia ke toe maʼu ai te tokalelei pea mo te logotahi. (2 Tim. 3:3) ʼE feafeaʼi leva he taupau ʼo te fiafia ʼi te nofo ʼohoana ʼi te ʼu temi faigataʼa ʼaenī? Koteā te ʼaoga ʼo te fetokoniʼaki ʼa he taumātuʼa pea mo nā fakalogo kātoa ki te takitaki ʼa Sehova ke ʼaua naʼa māvete? Koteā te ako ʼe tou lava maʼu mai te ʼu faʼifaʼitaki ʼo totatou temi ʼo ʼuhiga mo nātou ʼaē ʼe natou fiafia ʼi tonatou maʼuli fakataumātuʼa?

Tou Fakalogo Kātoa Ki Te Takitaki ʼa Sehova

 4. (a) Koteā te tokoni neʼe foaki e Paulo ʼo ʼuhiga mo te ʼohoana? (b) ʼE feafeaʼi ki te ʼu Kilisitiano fakalogo hanatou mulimuli ki te tokoni ʼa Paulo?

⁴ Neʼe foaki e te ʼapositolo ko Paulo ia te tokoni fakaʼatua ki te kau vītua mo kapau ʼe natou fia ʼohoana, ke natou ʼohoana “ ʼi te ʼAliki pē.” (1 Ko. 7:39) ʼE mole ko he manatu foʼou ʼaia ki te kau Kilisitiano ʼaē neʼe tuputupu ake ko te kau Sutea. Neʼe fakatotonu lelei ʼi te Lao ʼa te ʼAtua ki Iselaele, ke ‘mole natou fai he fuakava ʼohoana’ mo he tahi mai te ʼu puleʼaga pagani ʼi ʼonatou tafaʼaki. Neʼe toe foaki e Sehova ia te fakamahino ʼe ina fakahā ai te fua kovi ʼo te mole fakalogo ki te fakatotonu fakaʼatua ʼaia. “[Ko he tahi ʼe mole Iselaele] ʼe ina fakatafoki anai tou foha ke mole mulimuli iā te au, pea ʼe mahino papau ia ʼe natou tauhi anai ki te tahi ʼu ʼatua; pea ko te hauhau ʼo Sehova ʼe hoko moʼoni anai kiā koutou pea ʼe ina fakaʼauha vave anai ia koe.” (Teu. 7:3, 4) Koteā ʼaē ʼe ʼamanaki kiai ia Sehova, ke fai e tana ʼu kaugana ʼo te temi nei mokā natou filifili honatou ʼohoana? ʼE hā mai, ʼe  tonu ki he kaugana ʼa te ʼAtua ke ʼohoana “ ʼi te ʼAliki” mo he tahi kua papitema. ʼE ko he fakatuʼutuʼu poto mo kapau ʼe fakalogo kātoa he tahi ki te takitaki ʼa Sehova mokā ʼe ina fili hona ʼohoana.

 5. Koteā te manatu ʼa Sehova pea mo te ʼu Kilisitiano ʼohoana ki te ʼu fakapapau ʼaē ʼe fai ʼi te ʼaho ʼo te ʼohoana?

⁵ ʼE taputapu kiā mata ʼo te ʼAtua ia te ʼu fakapapau ʼaē ʼe fai ʼi te ʼaho ʼo te ʼohoana. ʼO ʼuhiga mo te ʼuluaki ʼohoana, ko Sesu ia te ʼAlo ʼo te ʼAtua neʼe ina ʼui fēnei: “Ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata.” (Mat. 19:6) ʼE fakamanatuʼi mai e te tagata fai pesalemo ia te maʼuhiga ʼo te ʼu fakapapau: “Momoli ki te ʼAtua he ʼu fakafetaʼi ʼo ʼuhiga mo tau sākilifisio, pea ke ke fakahoko tau ʼu fakapapau ki te Māʼoluga.” (Pes. 50:14) Logolā ia te fiafia lahi ʼaē ʼe maʼu e te taumātuʼa ʼi te ʼaho ʼaē ʼe nā ʼohoana ai, kae ko te ʼu fakapapau ʼaē ʼe nā fai ʼi te ʼaho ʼaia ʼe maʼuhiga pea ʼe pipiki kiai te ʼu fakamaʼua.—Teu. 23:21.

 6. Koteā te ako ʼe tou maʼu mai te faʼifaʼitaki ʼa Sefeteo?

⁶ Tou vakaʼi age muʼa te faʼifaʼitaki ʼa Sefeteo, ʼaē neʼe tuʼi fakamāu ʼi Iselaele ʼi te 12 sēkulō ʼi muʼa ʼo totatou temi. Neʼe ina fai ia te fakapapau ʼaenī kiā Sehova: “Kapau ʼe ke tuku mai anai ki toku nima te ʼu foha ʼo Amone, pea koʼenī anai te meʼa kā hoko: ko ʼaē kā hū mai anai ki tuʼa mai te ʼu matapā ʼo toku ʼapi ʼo fakafetaulaki mai kiā te au, ʼi taku toe liliu mai mo te mālo mai te ʼu foha ʼo Amone, ko ia ʼaia ʼe foaki anai maʼa Sehova, pea ko ia ʼaia ʼe au momoli anai ko he holokosetā.” ʼI tana toe liliu mai ki Misipa, pea ʼi tana sio ʼaē neʼe ko tona ʼofafine ia tana fānau ʼulu tokotahi ʼaē neʼe haʼu ʼo fakafetaulaki mai kiā te ia, neʼe faigaʼi koa e Sefeteo ke mole ina fakahoko ia tana fakapapau ʼaē neʼe ina fai? Kailoa. Neʼe ina ʼui fēnei: “Neʼe au ʼavahi toku gutu kiā Sehova, pea ʼe mole kei feala haku toe liliu mai ki muli.” (Ktf. 11:30, 31, 35) Neʼe fakahoko e Sefeteo ia tana fakapapau ʼaē neʼe ina fai kiā Sehova, logolā neʼe mole kei feala ai ke ina maʼu hona hōloga moʼo tuku holo kiai tona higoa. Neʼe ʼi ai pē te kehekehe ʼo te fakapapau ʼa Sefeteo pea mo te ʼu fakapapau ʼohoana, kae ko te faʼahi ʼaē ʼe tou tāʼofi, ʼe ko tana haga ʼaē ʼo fakahoko, ʼaē ʼe ko he faʼifaʼitaki lelei maʼa te hahaʼi ʼohoana Kilisitiano ʼo ʼuhiga mo te ʼu fakapapau ʼaē ʼe natou fai.

Koteā ʼAē ʼe Tupu Ai He Fiafia ʼo He ʼOhoana?

 7. Ko te ʼu fetogi fea ʼaē ʼe ʼaoga ke fai e he taumātuʼa kei foʼofoʼou ʼohoana?

⁷ Tokolahi te hahaʼi ʼohoana ʼe natou fakamatala ʼaki he loto fiafia ia te temi ʼaē neʼe natou fakatahi ai. Neʼe ko he meʼa fakafiafia te temi ʼaē neʼe natou feʼiloʼiʼaki ai mo tonatou ʼohoana! Neʼe natou feʼiloʼiʼaki lelei age, he neʼe lahi te temi ʼaē neʼe natou fakatahi ai. Peʼe ʼi muʼa ʼo te ʼohoana ʼa te taumātuʼa neʼe nā fakatahi peʼe ko he ʼohoana neʼe fakatuʼutuʼu e niʼihi, kae ʼi te temi ʼaē kua nā liliu ai ko he taumātuʼa, neʼe ʼaoga ke nā fai ni ʼu fetogi. ʼE ʼui fēnei e te tagata ʼohoana: “Ko te fihifihia lahi ʼaē neʼe tau mo māua ʼi tamā foʼofoʼou ʼohoana, ko tamā mahino ʼaē kua mā toko lua pea kua tonu ke mā fai fakatahi tamā ʼu fakatuʼutuʼu. Lolotoga te kiʼi temi, neʼe faigataʼa hamā fakafisi ki te ʼu meʼa neʼe loto kiai tomā ʼu kaumeʼa pea mo tomā ʼu fāmili.” Ko te tahi tagata ʼohoana, kua taʼu 30 nei tana kua ʼohoana, neʼe mahino kiā ia ʼi tana kamata ʼohoana neʼe tonu ke aga fakapotopoto, ʼo tonu ai ke “fakakaukau kua nā tokolua.” ʼI muʼa ʼo hana tali he fakaafe peʼe ko he fai ʼo he gāue, ʼe felōgoi muʼa mo tona ʼohoana, ʼosi ʼaia pea ʼe ina fai he tonu, ʼo mulimuli pē ki te ʼu meʼa ʼaē ʼe lelei kiā nāua tokolua. ʼI te taʼi ʼaluʼaga ʼaia, ʼe ʼaoga ki te taumātuʼa ke nā aga fakapotopoto.—Taag. 13:10.

8, 9. (a) He koʼē ʼe maʼuhiga he felōgoi lelei? (b) Ko te ʼaluʼaga fea ʼaē ʼe ʼaoga ai anai te aga fakapotopoto pea koteā tona tupuʼaga?

⁸ ʼI ʼihi temi, ko te taumātuʼa ʼaē ʼe ʼohoana ʼe mole tatau tanā ʼu agaʼi fenua. ʼI te temi leva ʼaia ʼe ʼaoga tāfito anai kiā nāua ke nā felōgoi fakahagatonu. ʼE mole tatau te ʼu faʼahiga felōgoi. Kapau ʼe kotou fakatokagaʼi te faʼahiga felōgoi ʼaē ʼo tokotou hoa mo tona fāmili, pea ʼe tokoni atu anai ke kotou mahino ki tona ʼulugaaga. ʼI ʼihi temi, ʼe mole ko te ʼu palalau ʼaē ʼe fai mai e he tahi ʼaē kā tou ʼiloʼi ai tana manatu, kae ko tona faʼahiga fakahā mai ʼo te ʼu palalau ʼaia. Pea ʼe lahi te ʼu manatu ʼe tou mahino anai kiai tatau aipē pe neʼe mole lea kiai. (Taag. 16:24; Kol. 4:6) ʼE maʼuhiga ia te fakasiosio tonu ki te maʼuli fiafia.—Lau ia Tāʼaga Lea 24:3.

⁹ ʼO ʼuhiga mo te filifili ʼo te ʼu fakafiafia, neʼe maʼuhiga maʼa te tokolahi ke natou maʼu ia he aga  fakapotopoto. ʼI muʼa ʼo takotou ʼohoana, ʼe lagi ko tokotou hoa neʼe lahi tana faigaoʼi pe neʼe kau ki he tahi age ʼu fakafiafia. ʼE ʼaoga anai koa ʼi te temi ʼaenī kua kotou ʼohoana ai ke fai he ʼu fetogi? (1 Tim. 4:8) ʼE toe fai anai mo ni ʼu fetogi ʼo ʼuhiga mo te temi ʼaē ʼe kotou fakaʼaogaʼi ki takotou ʼu mātuʼa, pea mo tokotou ʼu tehina mo tuagaʼane. ʼE ʼaoga ki he taumātuʼa honā temi ke feala ai hanā fai fakatahi he ʼu gāue fakalaumālie pea mo ʼihi age ʼu gāue.—Mat. 6:33.

10. ʼE lagolago feafeaʼi anai ia te aga fakapotopoto ke felōgoi lelei te ʼu mātuʼa pea mo tanatou ʼu fānau ʼaē kua ʼohoana?

¹⁰ Kā ʼohoana he tagata, ʼe mavae ʼi tana tamai pea mo tana faʼē, pea ʼe toe fēia ki he fafine mokā ʼohoana. (Lau ia Senesi 2:24.) Kae ko te fakatotonu ʼa te ʼAtua ʼaē ke fakaʼapaʼapa te fānau ki te tamai pea mo te faʼē, ʼe hoko atu pē ia tatau aipē mokā kua ʼohoana. Koia tatau aipē peʼe kua nā ʼohoana, kae ʼe nā fakaʼaogaʼi anai he temi ki tanā ʼu mātuʼa. Ko te tagata ʼohoana, kua taʼu 25 nei tana kua ʼohoana, ʼe ina ʼui fēnei: “ ʼI ʼihi temi, ʼe faigataʼa hata tokaga fakatatau ki te loto pea mo te ʼu meʼa ʼaē ʼe ʼaoga ki tota hoa pea mo ʼaē ʼo tata ʼu mātuʼa, mo tota ʼu tuagaʼane, pea mo nātou ʼaē ʼo tota hoa. Moʼo ʼiloʼi ia te fakatuʼutuʼu lelei ke au fai, neʼe ʼaoga kiā au ia te koga tohi ʼo Senesi 2:24. ʼE tonu ke au tauhi pea mo tokaga ki ʼihi ʼo toku fāmili, kae ʼe fakahā mai ʼi te vaega ʼaia, ʼe tonu ʼuluaki ke au agatonu ki toku ʼohoana.” Ko te ʼu mātuʼa Kilisitiano ʼaē ʼe natou aga fakapotopoto, ʼe natou fakaʼapaʼapa anai mo kapau ko tanatou ʼu fānau ʼaē kua ʼohoana kua natou faʼufaʼu nei he fāmili logotahi, ʼaē ko te tagata ʼohoana ʼe ko tona maʼua ke ina takitaki te fāmili ʼaia.

11, 12. He koʼē ʼe maʼuhiga ki te taumātuʼa ke nā fai hanā ako fakafāmili pea mo nā faikole fakatahi?

¹¹ Ko he ako fakafāmili ʼe fai tuʼumaʼu, ʼe ko he tahi ʼaia fakatuʼutuʼu maʼuhiga. Ko te ʼu fua lelei ʼaē neʼe maʼu e te ʼu fāmili Kilisitiano e tokolahi mai te fakatuʼutuʼu ʼaia, ʼe fakamoʼoni ai ki te faʼahi ʼaia. ʼE lagi ʼe mole faigafua te fai ʼo te ako ʼaia peʼe ke fai hoholo. Pea ʼe fakamoʼoni kiai ia te pule fāmili: “Kanapau lā neʼe feala ke toe holomuli ia te temi pea mo fetogi ia meʼa fuli, ʼe mahino ia ʼe mā fai tuʼumaʼu anai te ako fakafāmili talu mai pē te kamataʼaga ʼo tamā ʼohoana.” ʼE ina toe ʼui fēnei: “ ʼI meʼa fakafiafia haku sio ki te fiafia ʼaē ʼe maʼu e toku ʼohoana ʼuhi ko te ʼu moʼoni fakalaumālie ʼaē ʼe mā maʼu fakatahi ʼi tamā ako.”

¹² Ko te faikole fakatahi ʼe ko te tahi ʼaia tokoni. (Loma 12:12) Kā logotahi he taumātuʼa ʼi tanā tauhi ʼaē kiā Sehova, pea ʼe mālohi te noʼo ʼo tonā maʼuli fakataumātuʼa ʼuhi ko tanā ʼu felōgoi ʼaē mo te ʼAtua. (Sake 4:8) ʼE ʼui fēnei e te tagata ʼohoana Kilisitiano: “Ko te fakamolemole vave ni ʼu hala pea mo fakahā te ʼu hala ʼaia mokā ʼe tou faikole taumātuʼa, ʼe ko he faʼahiga fakahā ʼaia, ʼe tou lotomamahi fakamālotoloto tatau aipē peʼe ko he ʼu kiʼi hala ʼe fakatupu ʼita.”—Efe. 6:18.

Kotou Aga Fakapotopoto ʼi Te Maʼuli Fakataumātuʼa

13. Koteā te tokoni neʼe foaki e Paulo ʼo ʼuhiga mo te ʼu felāveʼi fakasino ʼa te taumātuʼa?

¹³ Ko te ʼu Kilisitiano ʼaē kua ʼohoana ʼe tonu ke natou tekeʼi te ʼu aga ʼaē ʼe natou maumauʼi ia te ʼu felōgoi fakataumātuʼa, ohagē lā ko te ʼu aga heʼeʼaoga ʼaē ʼe holi mālohi kiai te mālama ʼaenī. ʼO ʼuhiga mo te faʼahi ʼaia, ʼe tokoni fēnei mai Paulo: “Ke liufaki e te tagata ki te fafine tona maʼua, kae ke toe fai fēia pē foki mo te fafine ki tona ʼohoana. Ko te fafine ʼohoana ʼe mole ina puleʼi ia tona sino ʼoʼona, kae ko tona ʼohoana; ʼo toe fēia pē, ʼe mole puleʼi e te tagata ʼohoana tona sino ʼoʼona, kae ko tona ʼohoana.” Pea neʼe fai ai leva e Paulo ia te fakatotonu ʼaenī: “ ʼAua naʼa kolua fefakafisiʼaki, gata pē mo kapau neʼe kolua lototahi kiai ʼi he temi kua kolua fakatotonu kiai.” Koteā tona tupuʼaga? “Ke feala ai hakolua fakaʼaogaʼi he temi ki te faikole pea mo feala ke kolua toe fakatahi, naʼa fakahalaʼi tuʼumaʼu koulua e Satana ʼuhi ko takolua mole loto lolomi.” (1 Ko. 7:3-5) ʼI te talanoa ʼaē ʼa Paulo ʼo ʼuhiga mo te faikole, ʼe ina fakahā te ʼu meʼa ʼaē ʼe tonu ke fakamuʼamuʼa e he Kilisitiano. Kae neʼe ina toe fakahā pē foki, ʼe tonu ki te kau Kilisitiano fuli ʼaē kua ʼohoana ke natou tokagaʼi te ʼu meʼa ʼaē ʼe ʼaoga ʼi te faʼahi fakasino pea ʼi te loto ʼo tonatou ʼohoana.

14. ʼE ʼaoga feafeaʼi ki te taumātuʼa ʼo ʼuhiga mo tanā ʼu felāveʼi fakasino ke nā maʼuliʼi ia te ʼu pelesepeto fakatohi-tapu?

¹⁴ ʼE tonu ki te taumātuʼa ke nā fepalalauʼaki fakahagatonu pea ke mahino kiā nāua, kapau ʼe  mole nā fefakaʼapaʼapaʼaki ʼi tanā ʼu felāveʼi fakasino pea ʼe feala ai ke tupu honā ʼu fihifihia. (Lau ia Filipe 2:3, 4; vakaʼi ia Mateo 7:12.) Neʼe hoko moʼoni ia te ʼu faʼahi ʼaia ki ʼihi fāmili ʼe mole natou lotu tahi. Kae tatau aipē mo kapau ʼe ʼi ai ni ʼu fihifihia, ʼe feala pē ki te Kilisitiano ʼaki he aga fakapotopoto, mo tana agalelei, pea mo tana fakalogo ke ina fakatokatoka te faʼahi ʼaia. (Lau ia 1 Petelo 3:1, 2.) Ko te ʼofa kiā Sehova pea mo tona ʼohoana, pea mo he aga fakapotopoto, ʼe tokoni anai ki te faʼahi ʼaia ʼo te maʼuli fakataumātuʼa.

15. Koteā ʼaē ʼe maʼuhiga ai ia te fakaʼapaʼapa ki te maʼuli fiafia ʼa he taumātuʼa?

¹⁵ ʼI te tahi ʼu ʼaluʼaga foki, ko te tagata ʼohoana agalelei ʼe ina gaohi fakalelei anai tona ʼohoana. Ohagē lā, ʼe ina tokagaʼi anai te ʼu meʼa ʼaē ʼi tona loto, māʼiapē lā mo te ʼu kihiʼi meʼa noa. ʼE ʼui fēnei e te tagata kua ʼohoana talu mai taʼu e 47: “ ʼE kei au ako pē te faʼahi ʼaia.” ʼE fakalotomālohiʼi te ʼu fafine Kilisitiano ke natou fakaʼapaʼapa lahi ki ʼonatou ʼohoana. (Efe. 5:33) Kapau ʼe natou palalau kovi ʼo ʼuhiga mo tonatou ʼu ʼohoana, pea mo valokiʼi tanatou ʼu hala ki niʼihi, ʼe mole ko hanatou fakaʼapaʼapa ʼaia kiā nātou. Iā Tāʼaga Lea 14:1, ʼe ina fakamanatuʼi mai te faʼahi ʼaenī: “Ko te fafine ʼaē ʼe poto moʼoni neʼe ina laga tona fale, kae ko ia ʼaē ʼe vale ʼe ina holoʼi ʼaki ʼona ʼu nima.”

ʼAua Naʼa Kotou Tuku He Faigamālie Ki Te Tēvolo

16. ʼE feafeaʼi ki te ʼu taumātuʼa hanatou fakaʼaogaʼi ʼi tonatou maʼuli ia te tokoni ʼaē iā Efesi 4:26, 27?

¹⁶ “Kotou ʼiʼita, kae ʼaua naʼa kotou agahala; ke ʼaua naʼa tō te laʼā ki tokotou ʼita, pea ʼaua naʼa kotou tuku he faigamālie ki te Tēvolo.” (Efe. 4:26, 27) Kā maʼuliʼi e te taumātuʼa ia te ʼu palalau ʼaenī, pea ʼe tokoni ki te fakatokatoka peʼe ki te tekeʼi ʼo he ʼu fihifihia. ʼE ʼui fēnei e te tuagaʼane: “ ʼI taku manatu neʼe heʼeki he fihifihia kua hoko neʼe mole au fakatokatoka mo toku ʼohoana, tatau aipē peʼe tonu ke loaloaga te temi ʼaē ke mā fakaʼaogaʼi kiai mo ʼona fakatokatoka.” ʼI tanā foʼofoʼou ʼohoana, ko te tuagaʼane pea mo tona ʼohoana neʼe nā fakatotonu ʼe ʼosi anai te ʼaho kae kua nā fakatokatoka tona ʼu fihifihia. “Pe koteā pē he fihifihia neʼe tau mo māua kae neʼe mā fakatuʼutuʼu ke mā fefakamolemoleʼaki pea mo galoʼi te faʼahi ʼaia, pea ke mā fakaʼuhiga pē ia te ʼaho fuli ko he ʼaho foʼou kiā māua.” Koia neʼe mole nā ‘tuku ai he faigamālie ki te Tēvolo.’

17. Tatau aipē mo kapau ʼe mole tatau ia te felōgoi ʼa te taumātuʼa, kae koteā ʼaē kā tokoni anai kiā nāua?

¹⁷ Kae ʼe feafeaʼi anai mo kapau neʼe kotou ʼohoana mo he tahi ʼe mole tatau takotou ʼu felōgoi? ʼE lagi ʼe mole kotou maʼuli fiafia ohagē ko ʼihi taumātuʼa. Kae kapau ʼe kotou manatuʼi te fakatuʼutuʼu ʼa te Tupuʼaga ʼo ʼuhiga mo te ʼohoana, pea ko he faʼahi ʼe tokoni atu anai kiā koutou. ʼAki te takitaki ʼa te laumālie, neʼe tokoni fēnei e Paulo ia te kau Kilisitiano: “Ke fakamaʼuhigaʼi e te hahaʼi fuli te nofo ʼohoana pea ke ʼaua naʼa ʼulihi te moeʼaga fakataumātuʼa, heʼe fakamāuʼi anai e te ʼAtua te kau fai folonikāsio pea mo te kau tono.” (Hep. 13:4) Pea ʼaua naʼa galo iā tātou te ʼu palalau ʼaenī: “Ko he maea ʼe kau tolu, ʼe mole motu vave anai.” (Tnk. 4:12) Kā tōkakaga te taumātuʼa ke fakatapuhā ia te huafa ʼo Sehova, pea ʼe nā logotahi anai ia nāua pea ʼe nā toe logotahi pē anai mo te ʼAtua. ʼE tonu ke nā gāue fakatahi ke liliu tonā maʼuli fakataumātuʼa ʼo fua lelei, heʼe vikiʼi ai anai ia Sehova, te Tupuʼaga ʼo te ʼohoana.—1 Pet. 3:11.

18. Koteā ʼaē ʼe feala ke kotou tui papau kiai ʼo ʼuhiga mo te ʼohoana?

¹⁸ ʼE feala ki te kau Kilisitiano ke natou fiafia ʼi tonatou maʼuli fakataumātuʼa. Pea ke feala ia te faʼahi ʼaia, ʼe tonu ke nā faiga mālohi pea mo maʼuliʼi te ʼu kalitātē fakakilisitiano, pea ʼe kau ai te kalitātē ʼaē ko te aga fakapotopoto. Iā ʼaho nei, ʼi te kōkelekāsio ʼa te kau Fakamoʼoni ʼa Sehova ʼi te mālamanei kātoa, ʼe lahi te ʼu taumātuʼa ʼe natou fakamoʼoni ʼe feala ke maʼu ia te fiafia ʼi te maʼuli fakataumātuʼa.

ʼE Kotou Tali Feafeaʼi Anai?

• He koʼē ko te maʼuli fiafia ʼi te nofo ʼohoana ʼe mole ko he moemisi?

• Koteā ʼaē ʼe feala ke tokoni ki he taumātuʼa ke fua lelei tonā maʼuli fakataumātuʼa?

• Ko te ʼu kalitātē fea ʼaē ʼe ʼaoga ki he taumātuʼa ke nā maʼuliʼi?

[ʼU fehuʼi ʼo te ako]