1, 2. Kotea ia te fakatuʼutuʼu ʼa te Kilisitiano takitokotahi? Kotou tuku mai he faʼifaʼitaki.

MOKA fia toli e he tahi hana foʼi mago, kotea ʼae ʼe ina ʼuluaki sioʼi? ʼE mahino ia, ʼe mole ina sioʼi anai ia te lahi ʼo te foʼi mago kaʼe ʼe ina sioʼi anai pe ʼe kua lelei ʼi te kai. Koteʼuhi ʼe loto ia ke ina maʼu he foʼi mago kua momoho.

² Ko he tahi ʼi tana ʼosi ako ia te ʼu lelei ʼo ʼuhiga mo Sehova pea mo toʼo te tonu ʼae ke papitema, ʼe haga tuputupu anai ʼana felogoʼi mo te ʼAtua. Koteʼuhi ʼe ko tana fakatuʼutuʼu ke liliu ko he Kilisitiano kua fotufotuʼa ʼi te faʼahi fakalaumalie. ʼE mole fakaʼuhiga ia te fotufotuʼa ʼaia ki te faʼahi fakasino. Kaʼe, ʼe fakaʼuhiga ia ki he tuputupu fakalaumalie ʼe tou maʼu mai he ʼu felogoʼi lelei mo te ʼAtua. Neʼe loto e te apositolo ko Paulo ke liliu ia te kau Kilisitiano ʼo Efeso ʼo fotufotuʼa ʼi te faʼahi fakalaumalie. Pea neʼe ina fakalotomalohiʼi natou ke natou logo tahi ʼi te tui pea mo haga ako ʼo ʼuhiga mo Sesu, ke feala hanatou ‘katoa ʼi te ʼuhigaʼi tagata ʼo Kilisito.’—Efeso 4:13, MN.

3. Kotea ʼae ʼe tatau ai te aluʼaga ʼae neʼe hoko ʼi te kokelekasio ʼo Efeso pea mo te hahaʼi ʼa Sehova ia ʼaho nei?

³ Neʼe kua fualoa te fakatuʼu ʼo te kokelekasio ʼo Efeso ʼi te temi  ʼae neʼe faitohi ai Paulo kia natou. Tokolahi ʼi te kokelekasio ʼaia, neʼe kua natou liliu ko he kau Kilisitiano kua fotufotuʼa ʼi te faʼahi fakalaumalie pea mo faiva. Kaʼe, neʼe kei ʼi ai ʼihi neʼe tonu ke natou fakamalohiʼi ʼanatou felogoʼi mo Sehova. ʼO toe feia pe ia ʼaho nei, tokolahi te ʼu tehina mo tuagaʼane kua fualoa tanatou tauhi kia Sehova pea kua natou fotufotuʼa ʼi te faʼahi fakalaumalie. Kaʼe, ʼe ʼi ai ʼihi ʼi te ʼu kokelekasio ʼe mole heʼeki natou kaku ki te faʼahi ʼaia. Ohage la, ko te toko lauʼi afe hahaʼi ʼe natou papitema ʼi te taʼu fuli pea ko ʼihi ʼe ʼaoga ke natou liliu ʼo fotufotuʼa ʼi te faʼahi fakalaumalie. Kaʼe, ʼe feafeaʼi ʼo ʼuhiga mo koutou?—Kolose 2:6, 7.

4, 5. Kotea ʼae ʼe kehekehe ai te kau Kilisitiano kua fotufotuʼa ʼi te faʼahi fakalaumalie mai ʼihi Kilisitiano? Kaʼe, kotea ʼae ʼe natou tatau fuli ai? (Vakaʼi te ʼuluaki pāki.)

⁴ Moka momoho he foʼi mago, ʼe kotou tokagaʼi ai ʼe kehekehe mo ʼihi foʼi mago. Kaʼe, ʼe ʼi ai te ʼu faʼahi ʼe natou tatau fuli ai. ʼO toe feia pe ki te kau Kilisitiano kua fotufotuʼa ʼi te faʼahi fakalaumalie. ʼE mole natou tatau fuli. Koteʼuhi ʼe natou ʼomai mai te ʼu fenua kehekehe, ʼe kehekehe ʼonatou taʼu pea ʼe ʼi ai te ʼu faʼahi ʼe natou leleiʼia mo te ʼu faʼahi ʼe mole natou leleiʼia. Pea tahi, ʼe maʼu e te kau Kilisitiano fuli ʼae kua fotufotuʼa ʼi te faʼahi fakalaumalie te ʼu kalitate ʼe tatau, ʼo ha mai ai kua natou fotufotuʼa. Kotea ʼihi ʼo te ʼu kalitate ʼaia?

⁵ Ko he Kilisitiano kua fotufotuʼa ʼi te faʼahi fakalaumalie ʼe ina faʼifaʼitakiʼi ia Sesu pea mo mulimuli ʼi “ona lakaaga.” (1 Petelo 2:21) Neʼe ui e Sesu ʼe maʼuhiga ki he tahi ke ʼofa kia Sehova ʼaki tona loto katoa, mo tona laumalie katoa, mo tona ʼatamai katoa pea ke ʼofa ki tona kaiga ohage pe ko ia totonu. (Mateo 22:37-39) ʼE faiga anai ia he Kilisitiano kua fotufotuʼa ʼi te faʼahi fakalaumalie ke fakalogo ki te fakatotonu ʼaia. Pea ʼe ha ʼi tona faʼahiga maʼuli ʼe maʼuhiga kia ia ʼana felogoʼi mo Sehova pea mo tona ʼofa moʼoni ʼae ki ʼihi.

6, 7. (1) Kotea ʼihi kalitate ʼe maʼu e he Kilisitiano kua fotufotuʼa ʼi te faʼahi fakalaumalie? (2) Kotea ia te ʼu fehuʼi ʼe tonu ke tou fai kia tatou takitokotahi?

⁶ Ko te ʼofa ʼe ko he tahi kalitate ʼe tonu ke maʼu e he Kilisitiano kua fotufotuʼa ʼi te faʼahi fakalaumalie. (Kalate 5:22, 23) Pea ʼe ina toe maʼu ia te agamalu, mo te loto lolomi pea mo te kataki. ʼE feala ki te ʼu kalitate ʼaia ke tokoni kia ia ke ina ʼutakiʼi he ʼu aluʼaga faigataʼa pea mo fakatupu lotomamahi. ʼI tana ako takitokotahi, ʼe haga kumi anai e te Kilisitiano ʼae kua fotufotuʼa ʼi te faʼahi fakalaumalie te ʼu pelesepeto Fakatohi-tapu, ʼe tokoni kia ia ke ina iloʼi te meʼa ʼae ʼe lelei mo ʼae ʼe kovi. ʼE ina toʼo anai he ʼu tonu fakapotopoto moka ina fakaʼaogaʼi ia tona  leʼo ʼo loto ʼae neʼe ina akoʼi lelei ʼaki te Tohi-Tapu. ʼE agavaivai ia he Kilisitiano kua fotufotuʼa ʼi te faʼahi fakalaumalie pea ʼe tui ko te takitaki mo te ʼu lekula ʼa Sehova ʼe lelei age ʼi ʼana manatu. * (Vakaʼi te kiʼi nota.) Koia, ʼe ina fakamafola te logo lelei ʼaki te faʼafai pea mo fai ia meʼa fuli ʼe ina lavaʼi moʼo taupau te logo tahi ʼi te kokelekasio.

⁷ Tatau aipe pe ʼe kua fualoa tatatou tauhi ʼae kia Sehova kaʼe ʼe feala ke tou fai ia te ʼu fehuʼi ʼaeni kia tatou takitokotahi: ‘ ʼE ʼi ai koa he ʼu fetogi ʼe feala haku faʼifaʼitakiʼi lelei ai ia Sesu? ʼE ʼi ai koa he tahi ʼu faʼahi ʼe tonu ke au hikihiki ai?’

8. Neʼe mahino lelei feafeaʼi ia Sesu ki te Tohi-Tapu?

⁸ Neʼe mahino lelei ia Sesu ki te Folafola. Logo la neʼe kei taʼu 12, kaʼe neʼe ina fakaʼaogaʼi te Tohi-Tapu ʼi tana felogoʼi mo te kau tagata faiako ʼi te fale lotu. Pea “ko natou fuli ae nee fakalogo kia ia, nee natou punamauli i tona atamai pea mo ana tali.” (Luka 2:46, 47) Ki muli age, neʼe ina fakaʼaogaʼi lelei te Folafola ʼa te ʼAtua moʼo fakagata te ʼu palalau ʼo ʼona fili ʼi tana faifakamafola.—Mateo 22:41-46.

9. (1) Kotea te polokalama ako ʼe maʼu e he Kilisitiano kua fotufotuʼa ʼi te faʼahi fakalaumalie? (2) He koʼe ʼe tou ako ia te Tohi-Tapu?

 ⁹ Ko he tahi ʼe fia liliu ko he Kilisitiano kua fotufotuʼa ʼi te faʼahi fakalaumalie, ʼe ina faʼifaʼitakiʼi ia Sesu pea mo faiga ke lahi age tana mahino ki te Tohi-Tapu. ʼE ina kumi tuʼumaʼu ʼi te Folafola ia te ʼu moʼoni Fakatohi-tapu koteʼuhi ʼe ina iloʼi ʼe tuku te meʼa kai “fefeka ki te u tagata kua katoa.” (Hepeleo 5:14) ʼE loto e he Kilisitiano kua fotufotuʼa ʼi te faʼahi fakalaumalie ke ina maʼu te “ ʼatamai malama totonu” ʼo ʼuhiga mo te Tohi-Tapu. (Efeso 4:13, MN) Koia, kotou fai kia koutou totonu ia te ʼu fehuʼi ʼaeni: ‘ʼE au lau koa te Tohi-Tapu ʼi te ʼaho fuli? ʼE ʼi ai koa haku polokalama ki te ako takitokotahi? ʼE au fai koa te ako fakafamili ʼi te vahaʼa fuli?’ ʼI takotou ako te Tohi-Tapu, kotou kumi te ʼu pelesepeto ʼae ʼe tokoni atu ke kotou iloʼi ia te ʼu manatu pea mo te ʼu meʼa ʼae ʼe logoʼi e Sehova. Pea kotou fakaʼaogaʼi te ʼu pelesepeto ʼaia moka kotou toʼo he ʼu tonu. Koia, ʼe tokoni atu anai te faʼahi ʼaia ke kotou fakaovi kia Sehova.

10. Kotea ʼae ʼe tonu ke logoʼi e he Kilisitiano kua fotufotuʼa ʼi te faʼahi fakalaumalie ʼo ʼuhiga mo te tokoni ʼa te ʼAtua pea mo ʼana pelesepeto?

¹⁰ Ko he Kilisitiano kua fotufotuʼa ʼi te faʼahi fakalaumalie ʼe mole gata pe ki tana mahino ki te ʼu meʼa ʼae ʼe ui ʼi te Tohi-Tapu. Kaʼe, ʼe tonu ke ʼofa ki te ʼu fakatotonu ʼa te ʼAtua pea mo ʼana pelesepeto. ʼE ina fakaha tona ʼofa ʼaki tana fai te finegalo ʼo Sehova kaʼe mole ko te faʼahi ʼae ʼe loto ki ai. Pea ʼe ina toe fai he ʼu fetogi ʼi tona faʼahiga maʼuli, mo tana faʼahiga manatu pea mo tana faʼahiga gaue. Ohage la, ʼe ina faʼifaʼitakiʼi ia Sesu pea ʼe ina kofuʼi te ʼuluagaaga foʼou ʼae “nee fakatupu ke tatau mo te Atua i he faitotonu mo he maonioni ae e hau mai te mooni.” (Lau ia Efeso 4:22-24.) ʼE maʼuhiga ke tou manatuʼi neʼe fakaʼaogaʼi e te ʼAtua tona laumalie maʼoniʼoni moʼo takitaki ia te ʼu tagata faitohi ʼo te Tohi-Tapu. Koia ʼae mo kapau ʼe ako e he Kilisitiano te Tohi-Tapu, ʼe tokoni anai te laumalie maʼoniʼoni ʼo te ʼAtua kia ia ke ina fakatuputupu tona ʼatamai malama, mo tona ʼofa pea mo ʼana felogoʼi mo Sehova.

11. Kotea ʼae neʼe fai e Sesu ʼi tana ʼi te kele?

¹¹ Neʼe haohaoa ia Sesu, kaʼe neʼe fakatahi mo te hahaʼi ʼe mole haohaoa ʼi tana ʼi te kele. Neʼe mole haohaoa fuli ʼana matuʼā mo ʼona tehina pea mo ʼona tokolua. Maʼia mo te ʼu tisipulo ʼa Sesu neʼe natou fiameʼameʼa pea mo manatu pe kia natou totonu. Ohage la, ʼi te po ʼi muʼa ʼo tana mate neʼe fihi ʼana tisipulo “pe ko ai e lahi age ia natou.” (Luka 22:24) Logo la neʼe natou maʼu he ʼu manatu hala, kaʼe neʼe iloʼi e Sesu kua vave liliu ʼana tisipulo ko he kau Kilisitiano kua fotufotuʼa ʼi te faʼahi fakalaumalie. Pea ʼe natou faʼufaʼu anai ia he kokelekasio ʼe logo tahi. ʼI te po pe ʼaia, neʼe faikole ia Sesu ke logo tahi ʼana tisipulo, ʼo ina kole fenei ki tana Tamai ʼae ʼe ʼi selo: “Ohage pe ko koe Tamai ʼe ke logo tahi mo au, pea ʼe au logo tahi mo koe . . . koteʼuhi ke natou logo tahi ohage ko tatā logo tahi.”—Soane 17:21, 22, MN.

12, 13. (1) Kotea ʼakotou fakatuʼutuʼu ʼi tokotou ʼuhiga Kilisitiano? (2) Kotea ʼae neʼe ako e he tehina ke ina taupau te logo tahi?

¹² ʼE taupau e he Kilisitiano kua fotufotuʼa ʼi te faʼahi fakalaumalie ia te logo tahi ʼi te kokelekasio. (Lau ia Efeso 4:1-6, 15, 16.) ʼI totatou ʼuhiga Kilisitiano, ʼe ko tatatou fakatuʼutuʼu ke tou ‘faifaitahi’ ko tona fakaʼuhiga ke tou gaue fakatahi ʼi te  logo tahi. Pea ke maʼu te logo tahi ʼaia, ʼe tonu ki he Kilisitiano ke ina maʼu te agavaivai. Koia ʼae kapau ʼe lotomamahi ʼuhi ko te ʼu vaivaiʼaga ʼo ʼihi, ʼe gaue kinakina anai ia te Kilisitiano ʼae kua fotufotuʼa ʼi te faʼahi fakalaumalie moʼo taupau ke malohi ia te logo tahi ʼi te kokelekasio. Koia, kotou fai kia koutou totonu ia te ʼu fehuʼi ʼaeni: ‘Kotea ʼae ʼe au fai anai moka fai e he tehina mo he tuagaʼane he lakahala? Kotea ʼe au logoʼi moka fai mai e he tahi he ʼu palalau ʼe fakatupu lotomamahi? ʼE ko haku agamahani koa ia te mole palalau ki te kilisitiano ʼaia? Peʼe au faiga koa ke maʼu te tokalelei ia maua?’ ʼE loto e he Kilisitiano kua fotufotuʼa ʼi te faʼahi fakalaumalie ke ina fakatokatoka he fihifihia kaʼe mole ke liliu ko he tahi ʼe fakatupu tukia.

¹³ Tou vakaʼi te faʼifaʼitaki ʼo Uwe. ʼI te temi muʼa, neʼe ita tuʼumaʼu ʼo ʼuhiga mo te ʼu vaivaiʼaga ʼo te ʼu tehina mo tuagaʼane. Pea neʼe ina fakaʼaogaʼi te Tohi-Tapu pea mo te tohi Étude perspicace des Écritures moʼo ako te hisitolia ʼo Tavite. Kotea tona tupuʼaga? Koteʼuhi neʼe toe felaveʼi ia Tavite mo he ʼu fihifihia mo ʼihi kaugana ʼa te ʼAtua. Ohage la, neʼe faiga te Hau ko Saulo ke ina matehi ia Tavite, ko ʼihi hahaʼi neʼe natou fia taumakaʼi ia ia pea maʼia mo tona ʼohoana neʼe ina vaʼi ia ia. (1 Samuele 19:9-11; 30:1-6; 2 Samuele 6:14-22) Kaʼe logo la ia te ʼu faʼahi ʼaia, neʼe ʼofa pea mo falala ia Tavite kia Sehova. Pea neʼe toe manavaʼofa foki ia Tavite. Koia, neʼe mahino kia Uwe, neʼe tonu ke ina faʼifaʼitakiʼi te faʼahi ʼaia. ʼUhi ko tana ako te Tohi-Tapu, neʼe mahino ai ʼe tonu ke ina fetogi ia tana faʼahiga manatu ʼo ʼuhiga mo te ʼu vaivaiʼaga ʼo ʼona tehina. Neʼe tonu ke mole ina manatuʼi ʼanatou lakahala pea ke ina taupau ia te logo tahi ʼi te kokelekasio. ʼE toe feia koa mo ʼakotou fakatuʼutuʼu?

14. Neʼe filifili feafeaʼi e Sesu ʼona kaumeʼa?

¹⁴ Neʼe aga fakakaumeʼa ia Sesu mo te hahaʼi. Neʼe fiafia te hahaʼi tagata mo fafine, mo te kau tupulaga pea mo te kau matutuʼa, ʼo toe feia pe mo te ʼu tamaliki ʼi te fakatahi mo Sesu. Kaʼe neʼe filifili lelei e Sesu ʼona kaumeʼa. Neʼe ina ui fenei ki ʼana tisipulo: “Ko koutou ko oku kaumea, mo kapau e kotou fai te mea e au fekau atu kia koutou.” (Soane 15:14) Koia, neʼe filifili e Sesu ʼona kaumeʼa lelei mai ia natou ʼae neʼe mulimuli agatonu ia ia pea mo ʼoʼofa mo tauhi kia Sehova. ʼE kotou filifili koa hokotou kaumeʼa mai ia natou ʼae ʼe ʼoʼofa kia Sehova ʼaki tonatou loto katoa? He koʼe ʼe maʼuhiga te faʼahi ʼaia?

15. Kotea ia te ʼu lelei ʼe lava maʼu e te kau tupulaga mai tanatou fakatahi mo te kau Kilisitiano ʼae kua fotufotuʼa ʼi te faʼahi fakalaumalie?

¹⁵ ʼE ʼi ai ʼihi foʼi mago ʼe momoho lelei mo kapau ʼe kofukofu leleiʼi peʼe fakaleu. ʼO toe feia pe, ʼe feala ki te ʼofa ʼo ʼotatou tehina mo tuagaʼane ke tokoni atu ke kotou liliu ko he Kilisitiano kua fotufotuʼa ʼi te faʼahi fakalaumalie. ʼE lagi ko koutou ko he tupulaga ʼe kotou fakatuʼutuʼu pe ʼe kotea ʼae ka kotou fai anai ʼi tokotou maʼuli. Kapau koia, ʼe ko he aga fakapotopoto anai takotou filifili ʼokotou kaumeʼa mai ia natou ʼae kua fualoa tanatou tauhi kia Sehova pea  mo taupau te logo tahi ʼi te kokelekasio. ʼE lagi neʼe natou felaveʼi mo he ʼu fihifihia ʼi tonatou maʼuli pea mo katakiʼi he ʼu ʼahiʼahi ʼi tanatou tauhi ʼae kia Sehova. Koia, ʼe feala ke natou tokoni atu ke kotou filifili ia te faʼahiga maʼuli ʼae ʼe lelei tokotahi. Pea ka kotou fakatahi mo natou, ʼe feala ke natou tokoni atu ke kotou toʼo he ʼu tonu fakapotopoto pea ke kotou tuputupu ʼi tokotou ʼuhiga Kilisitiano.—Lau ia Hepeleo 5:14.

16. Neʼe tokoni feafeaʼi ia te kau Kilisitiano kua fakapotopoto ʼo te kokelekasio ki he tuagaʼane ʼi tana kei finemui?

¹⁶ Lolotoga tona taʼu fakaʼosi ʼi te ako, ʼe manatuʼi e Helga ko ʼihi ʼo ʼona kaugā ako neʼe natou palalau ki ʼanatou fakatuʼutuʼu ki te ka haʼu. Tokolahi ia natou neʼe natou fia hoko atu ʼi te univelesite, ke feala ai hanatou maʼu hanatou gaue lelei ki ʼamuli. Kaʼe, neʼe faipalalau ia Helga mo te ʼu Kilisitiano kua fakapotopoto ʼi tana kokelekasio. ʼE ina ui fenei: “Tokolahi ia natou kua matutuʼa age ia au, neʼe lahi tanatou tokoni mai, mo fakalotomalohiʼi au ke au toʼo ia te selevisi temi katoa. Ki muli age, neʼe feala ke au gaue taʼu nima ʼi te selevisi pionie. ʼI te temi nei, hili ni taʼu ki muli age, kua au fiafia ʼi taku tuku he temi lahi ʼo toku temi tupulaga ki te tauhi kia Sehova. Pea ʼe mole au fakahemala ʼi te fai ʼo te fakatuʼutuʼu ʼaia.”

17, 18. ʼE feafeaʼi hatatou faiga ke tou tauhi fakamalotoloto kia Sehova?

¹⁷ Kapau ʼe tou faʼifaʼitakiʼi ia Sesu, pea ʼe tou liliu anai ko he kau Kilisitiano kua fotufotuʼa ʼi te faʼahi fakalaumalie. Pea ʼe tou fakaovi anai kia Sehova mo toe tuputupu ai tatatou fia tauhi ʼae kia te ia. Moka kua fotufotuʼa he tahi ʼi te faʼahi fakalaumalie, ʼe faiga fakamalotoloto anai ke tauhi kia Sehova. Koia, neʼe fakalotomalohiʼi fenei ai e Sesu ʼana tisipulo: “Ke mu tokotou malama ia mua o te u tagata, o tupu ke natou sisio ki akotou gaue lelei, pea ke natou fakakololia ki takotou tamai ae e nofo i te atu lagi.”—Mateo 5:16.

¹⁸ Neʼe tou ako pe ʼe lava lagolago malohi feafeaʼi ia he Kilisitiano kua fotufotuʼa ʼi te faʼahi fakalaumalie ki te kokelekasio. ʼE toe feala ke fakaha e he Kilisitiano ia tana kua fotufotuʼa ʼi te faʼahi fakalaumalie ʼi tana faʼahiga fakaʼaogaʼi ia tona leʼo ʼo loto. ʼE lava tokoni feafeaʼi mai totatou leʼo ʼo loto ke tou toʼo he ʼu tonu ʼe fakapotopoto? Pea ʼe tou lava fakaʼapaʼapa feafeaʼi ki te leʼo ʼo loto ʼo ʼihi? ʼE tou tali anai ki te ʼu fehuʼi ʼaia ʼi te alatike ka hoa mai.