1, 2. (1) He koʼe ʼe kotou tui papau ʼe ʼofa ia Sehova ki tana hahaʼi? (2) Neʼe fakatupu te tagata mo te fealagia fea?

HE KOʼE ʼe tou tui papau ʼe ʼofa ia Sehova ki tana hahaʼi? ʼI muʼa ʼo takotou tali ki te fehuʼi ʼaia, tou vakaʼi te ʼu faʼifaʼitaki ʼaeni: Lolotoga ni taʼu, neʼe fakalotomalohiʼi e te ʼu tehina mo tuagaʼane ia te tuagaʼane neʼe higoa ko Taylene. Neʼe natou ui age ke ina fai pe te meʼa ʼae ʼe ina fealagia. ʼE ina ui fenei: “Kapau neʼe mole ʼofa Sehova kia au, ʼe mole haga tokoni mai anai.” Ko Brigitte, neʼe ina taupau tokotahi ʼana fanau ʼe toko lua hili te mate ʼo tona ʼohoana. ʼE ina ui fenei: “Ko te taupau ʼo he ʼu fanau ʼi te malama ʼa Satana ʼe ko he aluʼaga ia ʼe faigataʼa, tafitō ki he faʼe ʼe ina taupau toko tahi ʼana fanau. Kaʼe ʼe au tui papau ki te ʼofa ʼo Sehova koteʼuhi neʼe ina fakapelepeleʼi au ʼi toku mamahi. Pea neʼe mole ʼi ai he temi neʼe ina fakagafua ai ke au tau mo he aluʼaga faigataʼa ʼe mole au lavaʼi anai.” (1 Kolinito 10:13) Ko Sandra neʼe tau mo he mahaki faigataʼa, neʼe mole maʼu hona faitoʼo ki ai. ʼI te fakatahi lahi, neʼe ʼi ai he tuagaʼane neʼe tokaga kia Sandra. ʼE ui fenei e te ʼohoana ʼo Sandra: “Logo la neʼe  mole ma iloʼi lelei te tuagaʼane ʼaia kaʼe neʼe fiafia ʼoma loto ia tana tokaga ʼae kia maua. Koia, maʼia mo te ʼofa ʼo ʼotatou tehina mo tuagaʼane ʼe ha ai te ʼofa ʼae ʼa Sehova kia tatou.”

² Neʼe fakatupu e Sehova te tagata mo te fealagia ʼae ke tou ʼoʼofa pea ke ʼofainaʼi tatou. Kaʼe ʼe faigafua tatatou lotovaivai ʼuhi ko te mahaki peʼe ko te ʼu fihifihia fakapaʼaga, peʼe ko te mole ʼi ʼai he ʼu fua ʼo tatatou minisitelio. Kapau ʼe tou kamata logoʼi ko Sehova ʼe mole kei ʼofa kia tatou, ʼe tonu ke tou manatuʼi ʼe tou maʼuhiga kia te ia pea ʼe nofo mo tatou. ʼE ina puke totatou nima mataʼu pea ʼe tokoni mai kia tatou. Kapau ʼe tou nofo agatonu kia te ia, ʼe mole ina galoʼi anai tatou ʼi he temi.—Esaia 41:13; 49:15.

3. Kotea ʼe feala ke ina fakalotomalohiʼi tatatou falala ʼae ki te ʼofa fualoa ʼo Sehova?

³ Ko te ʼu tehina mo tuagaʼane ʼae neʼe tou talanoa ki ai ʼi te kamata, neʼe natou tui papau ko te ʼAtua neʼe nofo mo natou lolotoga te ʼu temi faigataʼa. ʼO toe feia pe, ʼe feala ke tou falala ʼe nofo Sehova ʼi ʼotatou tafa. (Pesalemo 118:6, 7) ʼI te alatike ʼaeni, ʼe tou talanoa anai ki te ʼu meʼa ʼofa ʼaeni ʼe fa ʼe ha ai te ʼofa ʼo Sehova kia tatou: (1) Tana fakatupu, (2) te Tohi-Tapu, (3) te faikole pea (4) mo te sakilifisio ʼo Sesu. ʼE tou lau fenei ia Pesalemo 77:11, 12, MN: “ ʼE au manatuʼi anai te ʼu gaue ʼa Sah; koteʼuhi ʼe au manatuʼi anai ʼau gaue fakaofoofo ʼae neʼe ke fai ki muʼa atu. ʼEi, ʼe au metitasio anai ki ʼau gaue fuli, pea ʼe au tokagaʼi anai ʼau faʼahiga aga.” Kapau ʼe tou metitasio ki te ʼu meʼa lelei fuli neʼe foaki mai e Sehova, ʼe feala ke tokoni mai ke lahi age tatatou lotofakafetaʼi ʼae ki tona ʼofa fualoa.

4. Kotea te ako ʼe tou maʼu mai te fakatupu ʼa Sehova?

⁴ Moka tou metitasio ki te fakatupu ʼa Sehova, ʼe tou sisio ai ki tona ʼofa ʼae kia tatou. (Loma 1:20) Ohage la, neʼe mole fakatupu pe e te ʼAtua ia te kele ke tou maʼuʼuli ai. Neʼe ina toe foaki mai ia te ʼu meʼa ʼae ʼe ʼaoga ke tou maʼuli fiafia ai. ʼE ʼaoga ke tou kakai, koia ʼae neʼe foaki mai ai e Sehova ia te ʼu faʼahiga meʼa kai kehekehe ke tou fiafia ai. (Ekelesiasi 9:7) Ko te tuagaʼane neʼe higoa ko Catherine ʼe fiafia ʼi tana sio ki te fakatupu, tafitō la moka ko te fasiga taʼu matala ʼi Kanata. ʼE ina ui fenei: “ʼE ko he meʼa fakaofoofo te sio ki te toe matala ʼo te ʼu fisiʼi teu pea mo te toe liliu mai ʼo te ʼu manulele, maʼia mo te ʼu kiʼi manulele ʼae neʼe fai fatai ʼi te fuga matapa fakamalama ʼo toku fale kuka. ʼE ʼofa moʼoni ia Sehova kia tatou ʼi tana foaki mai he ʼu meʼa ke tou fiafia ai.” ʼE ʼofa tatatou Tamai ʼi tana fakatupu pea ʼe ina loto ke tou toe leleiʼia.—Gaue 14:16, 17.

5. ʼE ha feafeaʼi te ʼofa ʼo Sehova ʼi tana fakatupu te tagata?

⁵ Neʼe fakatupu tatou e Sehova mo te fealagia ʼae ke tou fai ia he gaue ʼe lelei pea ke tou fiafia ai. (Ekelesiasi 2:24) Neʼe ina foaki ki te tagata ia te fakatotonu ʼae ke ina fakahahaʼi te kele, mo gaueʼi, mo tokaga ki te ʼu ika, mo te ʼu manulele pea mo te ʼu meʼa maʼuli fuli ʼae ʼi te kele. (Senesi 1:26-28) Pea neʼe toe fakatupu tatou mo he ʼu  kalitate matalelei ke feala ai hatatou faʼifaʼitakiʼi ia ia.—Efeso 5:1.

6. He koʼe ʼe tonu ke tou lotofakafetaʼi te Folafola ʼa te ʼAtua?

⁶ Neʼe foaki mai e Sehova ia te Tohi-Tapu ʼuhi ko tona ʼofa lahi ʼae kia tatou. ʼE ina fakaha mai pe kotea ʼae ʼe tonu ke tou iloʼi ʼo ʼuhiga mo ia pea kotea ʼe ina logoʼi ʼo ʼuhiga mo te tagata. Ohage la, ʼe fakaha mai ʼi te Tohi-Tapu pe neʼe kotea ʼae neʼe logoʼi e Sehova ʼo ʼuhiga mo te kau Iselaele, ʼae neʼe tau talagataʼa kia te ia. ʼE ui fenei ia Pesalemo 78:38: “I tona manavaofa, e ina fakamolemole te agakovi pea e mole ina maumaui. E ina taofi tua lahi tona hauhau, pea e mole ina tuku ke hifo tona mamafa katoa.” Kapau ʼe tou metitasio ki te vaega ʼaeni, ʼe tokoni mai ke tou mahino ki te  ʼofa mo te tokaga ʼae ʼa Sehova kia tatou. ʼE feala ke tou falala ʼe tokaga moʼoni ia Sehova kia tatou.—Lau ia 1 Petelo 5:6, 7.

7. He koʼe ʼe tonu ke maʼuhiga kia tatou ia te Tohi-Tapu?

⁷ ʼE tonu ke maʼuhiga kia tatou ia te Tohi-Tapu. Kotea tona tupuʼaga? Koteʼuhi ʼe felogoʼi Sehova mo tatou ʼaki tana Folafola. Kapau ʼe felogoʼi faʼifaʼitaliha he tamai peʼe ko he faʼe mo hana tamasiʼi, ʼe malohi ai tonā ʼofa pea mo tanā fefalalaʼaki. Ko Sehova ʼe ko tatatou Tamai fonu ʼi te ʼofa. Pea tatau aipe pe ʼe mole tou sisio kia te ia ʼi he temi peʼe mole tou logo ki tona leʼo, kaʼe ʼaki te Tohi-Tapu ʼe hage pe ʼe tou felogoʼi fakahagatonu mo ia. ʼE tonu ke tou fakalogo tuʼumaʼu kia te ia. (Esaia 30:20, 21) Moka tou lau te Folafola ʼa te ʼAtua, ʼe tou iloʼi ai ia ia pea mo falala kia Sehova, ʼae ʼe ina takitaki pea mo puipui tatou.—Lau ia Pesalemo 19:8-12; Taaga Lea 1:33.

8, 9. Kotea ʼae ʼe loto e Sehova ke tou iloʼi? Tuku mai he faʼifaʼitaki ʼi te Tohi-Tapu.

⁸ ʼE loto e Sehova ke tou iloʼi ʼe ʼofa ia tatou. ʼE fakalaka tana sio ʼi totatou ʼuhiga agahala koteʼuhi ʼe ina kumi te meʼa ʼae ʼe lelei ia tatou. (2 Koloniko 16:9) Ohage la, neʼe ina fakaha te faʼahi ʼaia ʼo ʼuhiga mo te Hau ʼo Suta ko Sosafate. Neʼe toʼo e Sosafate ia he tonu ʼe mole lelei ʼaki tana kau mo te Hau ʼo Iselaele ko Akapo pea mo tana tauʼi ia te kau Silia ʼi Lamote ʼi Kalaate. Tatau aipe pe neʼe fakaha e te ʼu polofeta loi ʼe toko 400 ki te tagata agakovi ko Akapo ʼe malo anai ʼi te tau. Kaʼe neʼe ui e te polofeta ʼa Sehova ko Mikea kia Sosafate pea mo Akapo, kapau ʼe nā olo ki te tau ʼe mole nā malo anai. Pea neʼe hoko moʼoni te faʼahi ʼaia. Neʼe mate ia Akapo ʼi te tau pea neʼe meihiʼi mate ia Sosafate. Hili te tau, neʼe fakaʼaogaʼi e Sehova ia Seu moʼo tokoniʼi ia Sosafate ʼo ʼuhiga mo tana hala. Pea neʼe toe ui fenei e Seu: “Nee ina mau ia koe ni mea lelei.”—2 Koloniko 18:4, 5, 18-22, 33, 34; 19:1-3.

⁹ ʼI ni taʼu ki muʼa atu, neʼe ui e Sosafate ki te ʼu tama ʼaliki, mo te kau Levite pea mo te kau pelepitelo, ke natou ʼaʼahi te ʼu kolo fuli ʼo Suta moʼo akoʼi ki te hahaʼi te Lao ʼa Sehova. Neʼe fua lelei te gaue ʼaia ʼo tupu ai te iloʼi e te hahaʼi mai te tahi ʼu puleʼaga ia Sehova. (2 Koloniko 17:3-10) Koia, logo la neʼe toʼo e Sosafate he tonu ʼe mole lelei ki ʼamuli, kaʼe neʼe mole galoʼi e Sehova ia te ʼu meʼa lelei ʼae neʼe ina fai ki muʼa atu. ʼE ko he faʼifaʼitaki lelei ʼaia maʼa tatou koteʼuhi ʼi ʼihi temi ʼe tou fai he ʼu lakahala. Kaʼe kapau ʼe tou foaki te meʼa ʼae ʼe lelei tuku pau ki te tauhi ʼae kia Sehova, ʼe haga ʼofa anai kia tatou pea ʼe mole ina galoʼi anai te ʼu meʼa lelei ʼae neʼe tou fai.

10, 11. (1) He koʼe ko te faikole ʼe ko he meʼa ʼofa makehe mai ia Sehova? (2) ʼE tali feafeaʼi ia Sehova ki ʼatatou faikole? (Vakaʼi te ʼuluaki pāki.)

¹⁰ Ko he tamai ʼofa ʼe ina toʼo he temi ke fakalogo ki ʼana fanau ʼi te temi ʼae ʼe natou fia palalau kia ia. ʼE ina fia iloʼi pe kotea ʼe natou logoʼi koteʼuhi ʼe tokaga moʼoni kia natou. ʼO toe feia pe mo tatatou Tamai ʼofa ko Sehova. Moka tou faikole kia te ia ʼe fagono mai. Pea ʼe ko he pilivilesio maʼuhiga tatatou palalau ki tatatou Tamai.

¹¹ ʼE feala ke tou faikole kia Sehova ʼi he temi pe. ʼE ko hotatou Kaumeʼa pea ʼe fagono tuʼumaʼu ki ʼatatou faikole. ʼE ui fenei e Taylene ʼae neʼe tou talanoa ki ai ʼi te kamata: “ʼE feala ke koutou palalau faʼifaʼitaliha kia te ia.” Moka tou fakaha kia Sehova ʼatatou manatu ʼae ʼi ʼotatou loto, ʼe feala ke ina tali mai ʼaki he vaega, peʼe ko he alatike ʼi ʼatatou tohi, peʼe ko he fakalotomalohi  mai he tehina peʼe ko he tuagaʼane. ʼE fagono ia Sehova ki ʼatatou faikole fakamalotoloto pea ʼe lotomahino kia tatou tatau aipe pe ʼe mole lotomahino mai he tahi. Ko tana tali ki ʼatatou faikole ʼe ha ai tona ʼofa fualoa ʼae kia tatou.

12. He koʼe ʼe tonu ke tou ako ia te ʼu faikole ʼae ʼi te Tohi-Tapu? Kotou tuku mai he faʼifaʼitaki.

¹² ʼE feala ke tou maʼu he ʼu ako maʼuhiga mai te ʼu faikole ʼae ʼi te Tohi-Tapu. ʼI ʼihi temi, ʼe ʼaoga ke tou ako te ʼu faikole ʼaia lolotoga te ako fakafamili. Kapau ʼe tou metitasio ki te ʼu faikole fakamalotoloto ʼa te ʼu kaugana ʼa te ʼAtua ʼi te temi muʼa, ʼe tou hikihiki ai anai ʼatatou faikole. Ohage la, kotou ako ia te faikole agavaivai ʼa Sonasi ʼi tana ʼi te fatu ʼo te ika lahi. (Sonasi 2:1-11) ʼE feala ke tou toe vakaʼi te faikole fakamalotoloto ʼa Salomone ʼi te temi ʼae neʼe fakatapuʼi ai te fale lotu. (1 Hau 8:22-53) Pea ʼe feala ke tou metitasio ki te faikole faʼifaʼitaki ʼa Sesu. (Mateo 6:9-13) Pea ʼe toe maʼuhiga ke “koutou fakaha ki te Atua te u mea ae e aoga kia koutou aki ni kole” pea “ko te tokalelei o te Atua, ae e fakalaka age i te u atamai fuli, e ina taupau anai okotou loto mo akotou manatu.” ʼE haga tuputupu anai tatatou lotofakafetaʼi ʼae ki te ʼofa fualoa ʼo Sehova.—Filipe 4:6, 7.

13. Kotea ia te faigamalie ʼe tou maʼu ʼuhi ko te sakilifisio ʼo Sesu?

¹³ Neʼe foaki mai e Sehova ia te meʼa ʼofa ʼae ko te sakilifisio ʼo Sesu ke “tou mauli” ai. (1 Soane 4:9) ʼI tatatou talanoa ki te ʼofa ʼaia ʼo te ʼAtua, neʼe tohi fenei ai e te apositolo ko Paulo: “Ko Kilisito, ʼi te temi ʼae kua fakakatofa, neʼe mate ki te kau agahala. ʼE faigataʼa anai ki he tahi ke mate maʼa he tagata agatonu; ʼe feala anai ke mate he tahi ʼo ʼuhiga mo he tagata agalelei. Kaʼe ko te ʼAtua ʼe ina fakaha totonu mai kia tatou tona ʼofa ʼi te faʼahi ʼaia, ʼi te temi ʼae neʼe kei tou agahala ai, neʼe mate ia Kilisito maʼa tatou.” (Loma 5:6-8, MN) Ko te sakilifisio ʼo Sesu ʼe ko te faʼifaʼitaki lahi ʼaia ʼo te ʼofa ʼo te ʼAtua pea ʼe ina foaki te faigamalie ke maʼu e te tagata ia he ʼu felogoʼi lelei mo ia.

14, 15. Kotea te fakaʼuhiga ʼo te sakilifisio ʼo Sesu (1) ki te kau Kilisitiano fakanofo? (2) kia natou ʼae ʼe natou maʼu ia te ʼamanaki ke natou maʼuʼuli ʼi te kele?

¹⁴ ʼE logoʼi e he kutuga ʼo te kau Kilisitiano ia te ʼofa fualoa ʼo Sehova ʼi hona aluʼaga makehe. (Soane 1:12, 13; 3:5-7) Pea neʼe fakanofo natou e te ʼAtua ʼaki tona laumalie maʼoniʼoni ʼo natou liliu ai ko “te u fanau a te Atua.” (Loma 8:15, 16) Ko ʼihi ia natou ʼaia ʼe kei nonofo ʼi te kele. Kaʼe he koʼe neʼe ui e Paulo ʼe natou heheka ‘fakatahi mo Sesu Kilisito ʼi te ʼu potu ʼo te lagi’? (Efeso 2:6) Koteʼuhi neʼe foaki e Sehova kia natou ia te ʼamanaki ʼae ke natou maʼuʼuli ʼo heʼe gata ʼi selo.—Efeso 1:13, 14; Kolose 1:5.

¹⁵ ʼE feala kia natou fuli ʼae ʼe mole kau ki te kau fakanofo ke natou kaumeʼa ʼo te ʼAtua mo kapau ʼe natou tui ki te sakilifisio ʼo Sesu. ʼE natou toe maʼu te faigamalie ʼae ke vavae natou ko te ʼu fanau ʼa te ʼAtua. Pea ʼe natou maʼuʼuli anai ʼo heʼe gata ʼi te  palatiso fakakelekele. Ko te sakilifisio ʼo Sesu ʼe ha ai te ʼofa ʼo Sehova ki te tagata fuli pe. (Soane 3:16) ʼE ko he aluʼaga fakafiafia tatatou iloʼi ʼae ʼe foaki mai anai e Sehova he maʼuli fiafia ʼi te malama foʼou, mo kapau ʼe tou tauhi agatonu kia te ia. Koia, tou fakaha ʼe maʼuhiga kia tatou ia te sakilifisio ʼo Sesu koteʼuhi ʼe ko te fakamoʼoni lahi tokotahi ʼaia ʼo te ʼofa fualoa ʼo Sehova kia tatou.

16. Hili tatatou metitasio ki te ʼofa ʼo Sehova, kotea ʼae ka tou fai anai?

¹⁶ ʼE mole feala ke tou lau te lahi ʼo te ʼofa ʼae neʼe fakaha e Sehova kia tatou. Neʼe hiva fenei te Hau ko Tavite: “Oi Atua, e mole feala ke au mahino ki au fakakaukau! E natou lahi aupito! Kapau e au lau natou, e natou lahi age i te u fisii one. E au ala ake, pea e au nofo aipe mo koe.” (Pesalemo 139:17, 18) ʼE lahi te ʼu aluʼaga ʼe ha ai te ʼofa ʼo Sehova kia tatou. Kapau ʼe tou metitasio ki te ʼu faʼahi ʼaia, ʼe uga ai tatou ke tou ʼoʼofa pea mo foaki kia te ia te ʼu meʼa ʼae ʼe tou fealagia.

17, 18. Kotea ʼihi aluʼaga ʼe feala ke tou fakaha ai totatou ʼofa ʼae ki te ʼAtua?

¹⁷ ʼE lahi te ʼu aluʼaga ke tou fakaha ai totatou ʼofa ʼae kia Sehova. Ohage la, ʼe feala ke tou fakaha totatou ʼofa ʼae kia Sehova ʼaki tatatou fakamafola ki te hahaʼi ia te logo lelei ʼo te Puleʼaga ʼaki he lotofaʼafai. (Mateo 24:14; 28:19, 20) Pea ʼe toe feala ke tou fakaha totatou ʼofa ʼae ki te ʼAtua ʼaki tatatou katakiʼi te ʼu ʼahiʼahi. (Lau ia Pesalemo 84:12; Sakopo 1:2-5.) Kapau ʼe tou felaveʼi mo he ʼu ʼahiʼahi ʼe faigataʼa, ʼe tou tui papau ʼe sio ia Sehova ki ʼotatou mamahi pea ʼe tokoni mai anai koteʼuhi ʼe tou maʼuhiga kia te ia.—Pesalemo 56:9.

¹⁸ ʼE uga e totatou ʼofa ʼae kia Sehova ke tou metitasio ki te ʼu meʼa matalelei fuli ʼae neʼe ina fakatupu. ʼE tou fakaha totatou ʼofa ʼae kia Sehova pea mo tana Folafola ʼaki tatatou ako fakalelei te Tohi-Tapu. ʼE tou faikole tuʼumaʼu kia Sehova koteʼuhi ʼe tou ʼoʼofa kia te ia pea ʼe tou fia fakamalohiʼi ʼatatou felogoʼi mo ia. Pea kapau ʼe tou metitasio ki te meʼa ʼofa maʼuhiga ʼae ko te sakilifisio ʼo Sesu, ʼe lahi age anai totatou ʼofa ʼae kia te ia. (1 Soane 2:1, 2) ʼE ko ʼihi aluʼaga pe ʼaia ʼo tatatou fakaha kia Sehova ʼe maʼuhiga tona ʼofa fualoa kia tatou.