1, 2. (1) Ko te fai ʼohoana fea ʼae ʼe fiafia lahi ai anai te lagi? (2) Ko te ʼu fehuʼi fea ʼae ka tou talanoa anai ki ai?

KO TE tokonaki ʼo he fai ʼohoana, ʼe ʼaoga tuʼumaʼu ki ai ia he toe temi lahi. Kaʼe ʼe tou palalau anai ki he fai ʼohoana fakaʼaliʼaliki kua teuteuʼi talu mai teitei taʼu ʼe 2 000. Kua ponoi mai pe te temi ʼae ka fakatapu ai te tagata ʼohoana mo tona ʼohoana. ʼI te lagi ʼe logona anai ʼi te fale Hau katoa he musika fakafiafia pea mo te hiva fenei ʼa te kau ʼaselo: “ ʼAleluia, he ʼe ko Sehova totatou ʼAtua, ia te Mafimafi, kua kamata tana pule fakahau. Ke tou fakafiafia pea mo tou fiafia lahi, pea mo tou fakakololia kia te ia, he ʼe kua hoko mai te ʼohoana ʼo te Akeno, pea kua teuteu tona ʼohoana.”—Apk. 19:6, 7, MN.

² Ko “te Akeno” ʼae ʼe talanoa ki ai ʼi te vaega ʼaia, ʼe ko Sesu Kilisito. (Soa. 1:29) Pea ʼe fiafia lahi anai te lagi ʼuhi ko te fai ʼohoana ʼaia. ʼE feafeaʼi tona teu ʼohoana? Ko ai tona ʼohoana pea neʼe teuteuʼi feafeaʼi ki te fai ʼohoana? ʼE hoko anai ʼafea te fai ʼohoana? ʼE fiafia anai te lagi ʼi te fai ʼohoana ʼaia, kaʼe ʼe feafeaʼi anai kia natou ʼae ʼe ʼamanaki maʼuʼuli ʼi te kele ʼo talu ai? ʼE tou fia iloʼi te ʼu tali ki te ʼu fehuʼi ʼaia, koia tou hoko atu tatatou ako te Pesalemo 45.

3, 4. (1) Kotea ʼae ʼe ui ʼi te pesalemo ki te teu ʼohoana ʼo te Hau? Kotea ʼae ʼe toe fiafia lahi age ai te Hau? (2) Ko ai ‘te ʼu ʼofafine ʼo te ʼu hau’ pea mo te “fafine hau” ʼae ʼe fakafiafia mo te Hau?

³ Lau ia Pesalemo 45:9, 10. Ko te Tagata ʼOhoana, ia Sesu Kilisito, ʼe ina tui tona teu ʼohoana fakaʼaliʼaliki. Pea ʼe fakamagoni tona teu ʼaki “te u kaloni lelei tukupau.” Ohage la ko te mila mo te kasi, ko te ʼu fuʼu ʼakau fakamagoni ʼo te lolo taputapu ʼae neʼe fakaʼaogaʼi moʼo fakanofo he tahi ʼi Iselaele.—Eke. 30:23-25.

⁴ ʼI te lagi ʼe toe fiafia lahi age te Tagata ʼOhoana ʼi tana logo ki te musika maliē ʼi tona fale Hau koteʼuhi kua ovi mai te temi ʼae ke ʼohoana ai. ʼE toe fiafia foki mo te “fafine hau,” ia te koga ʼo te kautahi ʼa te ʼAtua ʼi selo, ʼae ko ‘te ʼu ʼofafine ʼo te ʼu hau,’ ia te ʼu ʼaselo maʼoniʼoni. Koia ʼe logo anai ʼi te lagi te hiva ʼaeni: “Ke tou fakafiafia pea mo tou fiafia lahi, . . . he ʼe kua hoko mai te ʼohoana ʼo te Akeno.”

5. Ko ai koa te ʼohoana ʼo te Akeno?

⁵ Lau ia Pesalemo 45:11, 12. Kua tou mahino pe ko ai te Tagata ʼOhoana, kaʼe ko ai koa ia tona ʼohoana? ʼE mole ko he fafine moʼoni. Kaʼe ʼe ina fakata te toko 144 000 kau Kilisitiano fakanofo fuli. Ko Sesu, ʼe ko te pule ʼo tana kokelekasio fakanofo. (Lau ia Efeso 5:23, 24.) ʼE kauga Hau anai te kau fakanofo ʼaia mo Sesu ʼi tona Puleʼaga Fakamesia ʼi selo. (Luka 12:32) Pea ʼe natou toe muliʼi “te Akeno, i te u kogamea fuli ae e alu ia ia ki ai.” (Apk. 14:1-4) ʼE natou liliu anai ko te ʼohoana ʼo te Akeno pea mo muliʼi ia ia ki tona nofoʼaga ʼi te lagi.—Soa. 14:2, 3.

6. He ko ʼe neʼe fakahigoa te kau fakanofo ko ‘te ʼofafine ʼo te hau,’ pea he ko ʼe neʼe fakatotonu age ke natou galoʼi tanatou hahaʼi?

⁶ ʼE fakahigoaʼi te fafine ʼohoana ko ‘te ʼofafine’ pea ʼe toe fakahigoaʼi foki ko ‘te ʼofafine ʼo te hau.’ (Pes. 45:14) Ko ai koa te “hau” ʼaia? ʼE ko Sehova. ʼE ina vavae te kau Kilisitiano fakanofo ko ʼana “fanau.” (Loma 8:15-17) Pea neʼe fakatotonu fenei ki te kau fakanofo: “Ke ke galoi tau hahai mo te fale o tau tamai.” Mai tona ʼuhiga ʼae ʼe natou liliu anai ko he fafine ʼohoana ʼi selo, koia ʼae ʼe tonu ai ki te kau fakanofo ke natou “pipiki ki te u mea o oluga, kae aua ki te u mea ae i te kele.”—Kol. 3:1-4.

7. (1) ʼE teuteuʼi feafeaʼi e Kilisito te fafine ʼae ka ina ʼohoanaʼi? Pea he ko ʼe ʼe finemui te fafine ʼaia kia te ia? (2) Kotea te manatu ʼa te fafine ʼohoana ʼo ʼuhiga mo te tagata ʼae ka ina ʼohoanaʼi?

⁷ Talu mai ni lau ʼi taʼu ʼe teau, mo te teuteuʼi e Kilisito ia tona ʼohoana ki te fai ʼohoana ʼi selo. Neʼe tohi e te apositolo ko Paulo neʼe ʼofa ia Kilisito ki te kokelekasio pea “nee ina foaki ia ia totonu o uhiga mo ia, ke ina fakamaonioni ia, mo ina fakamaa ia, pea mo ina fufulu ia aki te vai o te folafola, koteuhi ke ina fakaha ia kia ia, ko te Ekelesia fakakololia, hee uli, hee fefe, hee maimoa, kae maonioni mo hee mele.” (Efe. 5:25-27) Koia ʼae neʼe ina ui fenei ai ki te kau fakanofo ʼi Kolinito: “E au finenonofo [peʼe maheka] kia koutou i he finenonofo o te Atua, koteuhi kua au fakatahii koutou ki he tagata ohoana e tahi, o tupu ke au fakahaha koutou kia Kilisito o hage ko he taupoou maa.” (2 Ko. 11:2) ʼE finemui te fafine kia mata ʼo te Hau, ia Sesu Kilisito koteʼuhi ʼe maʼa ia tana tauhi pea mo leleiʼia e te ʼAtua. ʼE tulolo te fafine ʼohoana ia muʼa ʼo te tagata ʼae ka ina ʼohoanaʼi pea ʼe ina tali lelei ke liliu ko tona “Aliki.”

8. He ko ʼe ʼe ui ʼe “gigila katoa” te fafine ʼohoana?

⁸ Lau ia Pesalemo 45:14, 15. Ko te fafine ʼohoana kua “fakamataleleiʼi ki tona ʼohoana” pea “e gigila katoa” ki te fai ʼohoana fakaʼaliʼaliki. Ia Apokalipisi 21:2, MN, ʼe fakatatau ai te fafine ʼohoana ki he kolo, ia te Selusalemi Foʼou. ʼE gigila te kolo ʼaia ʼi selo ʼaki “te kololia o te Atua” pea ʼe tatau  tona gigila mo ʼae ʼo “he foi maka mauhiga lahi, o he foi maka ko te sasepe ae e malama o hage ko te kilisitale.” (Apk. 21:10, 11) ʼE fakatalakitupua te fakamatalatala ʼo te taulekaleka ʼo te Selusalemi Foʼou ʼi te tohi ʼo Apokalipisi. (Apk. 21:18-21) Pea ko te fafine ʼohoana ʼe “gigila katoa” ia. ʼE ko te taʼi fai ʼohoana fakaʼaliʼaliki la ʼaia ʼi te lagi ʼae ʼe tou fakatalitali ki ai.

9. Ko ai ʼae ʼe ʼave ki ai te fafine ʼohoana? Pea ʼe feafeaʼi te teu ʼo te fafine ʼohoana?

⁹ ʼE ʼave te fafine ʼohoana ki tona ʼOhoana, ia te Hau Fakamesia. ʼE ina teuteuʼi pea mo fakamaʼa ia te fafine ʼohoana ʼaki “te folafola.” Pea ko te fafine ʼohoana ʼe “maonioni mo hee mele.” (Efe. 5:26, 27) ʼE tonu foki ke tuha tona teu mo te aluʼaga ʼaia. Pea ʼe feia tona teu ʼohoana. “E ina kofu he kofu nee lalaga aki te aulo” pea “e ave ia ia kia mua o te hau, aki he kofu nee teuteui ke matalelei.” ʼO ʼuhiga mo te fai ʼohoana ʼo te Akeno, “neʼe fakatotonu [ki te fafine ʼohoana] ke ina kofuʼi te lino manifi gigila pea mo mamaʼa, he ʼe ko te lino manifi ʼe ina fakatata ia te ʼu gaue faitotonu ʼa te kau maʼoniʼoni.”—Apk. 19:8, MN.

10. ʼE hoko anai ʼafea te fai ʼohoana ʼo te Akeno?

¹⁰ ʼE ui fenei ia Apokalipisi 19:7, MN: “Ke tou fakafiafia pea mo tou fiafia lahi, pea mo tou fakakololia kia te ia, he ʼe kua hoko mai te ʼohoana ʼo te Akeno, pea kua teuteu tona ʼohoana.” ʼE hoko anai ʼafea te fai ʼohoana ʼo te Akeno? Logo la ʼe ui ia Apokalipisi 19:7 “kua teuteu tona ʼohoana” ki te fai ʼohoana, kaʼe ʼe mole talanoa te ʼu vaega ʼae ʼe hoa mai ki ai, ki te fai ʼohoana ʼaia. Kaʼe ʼe talanoa ʼi te ʼu vaega ʼaia ki te koga fakaʼosi ʼo te mamahi lahi. (Apk. 19:11-21) Ko tona fakaʼuhiga koa ʼe hoko anai te fai ʼohoana ʼi muʼa ʼo te fakaʼosi e te Hau ia tana malo? Kailoa ia. Ko te ʼu aluʼaga ʼae neʼe fakakikite ia Apokalipisi neʼe mole tohi ia ʼo mulimuli ki te temi ʼae neʼe hoko ai. ʼI te Pesalemo 45, ko te Hau ko Sesu Kilisito ʼe ina fakamaʼu muʼa tana heleta pea mo malo ʼi ʼona fili pea hoki hoko ai leva te fai ʼohoana fakaʼaliʼaliki.—Pes. 45:4, 5.

11. Kotea anai ka fai e Kilisito ʼi muʼa ʼo te hoko ʼo te fai ʼohoana?

¹¹ Koia ʼe tou ako ʼi te Tohi-Tapu ʼe fakaalualu fenei anai te ʼu aluʼaga ʼaia: ʼUluaki, ʼe pulihi anai “te fafine faifeauaki,” ia Papilone Lahi ʼae ko te kautahi fakamalamanei ʼo te ʼu lotu hala. (Apk. 17:1, 5, 16, 17; 19:1, 2) Pea ʼe fakaʼauha anai e Kilisito te toega ʼo te malama agakovi ʼa Satana ʼi Halamaketone, “te tau o te aho lahi o te Atua Mafimafi.” (Apk. 16:14-16; 19:19-21) Pea ʼe fakaʼosi anai leva e te Hau tana malo ʼaki tana li ia Satana mo tana kau temonio ki te vanu, ʼae ʼe mole kei feala anai ke natou fai he meʼa ʼe kovi ki he tahi. ʼE hage pe anai ia kua natou mamate.—Apk. 20:1-3.

12, 13. (1) ʼE hoko anai ʼafea te fai ʼohoana ʼo te Akeno? (2) ʼI te lagi, ko ai anai ka fiafia ki te fai ʼohoana ʼo te Akeno?

¹² ʼI te ʼu ʼaho fakamuli, ʼe fakatuʼuake ki te lagi ia te kau Kilisitiano fakanofo ʼae neʼe mamate agatonu. ʼI he kiʼi temi pe hili te fakaʼauha ʼo Papilone Lahi pea ʼi muʼa ʼo Halamaketone, ʼe fakaʼosi anai e Kilisito ia tana fakatahiʼi mo ia ʼi te lagi te toko 144 000 kau Kilisitiano fakanofo fuli. (1 Tes. 4:16, 17) Pea ʼi te hili ʼo Halamaketone, kua feala leva ke fakahoko te ʼohoana ʼo te Akeno. ʼE ko he aluʼaga fakafiafia anai te fai ʼohoana ʼaia. ʼE ui fenei ia Apokalipisi 19:9, MN: “Fiafia ia natou ʼae ʼe fakaafe ki te taumafa ʼo te ʼohoana ʼo te Akeno.” ʼEi, ʼe fiafia moʼoni te fafine ʼohoana. Pea ʼe fiafia anai te Hau ʼi tana fakatahi mo ʼona kaumeʼa fakanofo fuli ʼi te lagi. (Luka 22:18, 28-30) Kaʼe ʼe mole ko te fafine ʼohoana pe pea mo te Tagata ʼOhoana ʼae ka fiafia anai.

¹³ Ohage pe ko tona ui ʼi te kamata, ʼe logo anai ʼi te lagi ki te hiva fenei ʼa te kau  ʼaselo: “Ke tou fakafiafia pea mo tou fiafia lahi, pea mo tou fakakololia kia te ia, he ʼe kua hoko mai te ʼohoana ʼo te Akeno, pea kua teuteu tona ʼohoana.” (Apk. 19:6, 7, MN) Kaʼe ʼe feafeaʼi ki te ʼu kaugana ʼa Sehova ʼi te kele? ʼE natou toe fiafia anai koa mo natou ki te toʼotoʼoga ʼaia?

14. Ohage ko tona ui ʼi te Pesalemo 45, ko ai te ʼu “kaumea” ʼo te fafine ʼohoana?

¹⁴ Lau ia Pesalemo 45:13, 15, 16. Neʼe fakakikite e te polofeta ko Sakalia, ʼi te ʼu ʼaho fakamuli, ʼe lotofakafetaʼi anai te hahaʼi ʼi te malamanei katoa ʼi tanatou tauhi fakatahi kia Sehova mo te kau fakanofo ʼae ʼe kei maʼuʼuli ʼi te kele. Neʼe ina tohi fenei: “I te u aho aia, e too anai e ni tagata e toko hogofulu mai te u lea kehekehe fuli o te atu puleaga he tagata Sutea e toko tahi i te tapatapa o tona kofu, o ui: E matou olo anai mo koe, koteuhi kua matou iloi e nofo te Atua mo koutou.” (Sakl. 8:23) Ko te ʼu “tagata e toko hogofulu” ʼaia ʼe fakaʼuhiga ki te ‘ ʼofafine ʼo Tile’ pea mo “te kau mau koloa a te hahai” ʼae ʼe tuʼu ia Pesalemo 45:13. ʼE natou lagolago ki te kau fakanofo pea ʼe natou faiga ke natou maʼu he tokoni fakalaumalie mai ia natou moʼo tauhi kia Sehova. Talu mai te taʼu 1935 mo te tokoni ʼa te kau fakanofo ʼaia ki te hahaʼi ke natou “ako te faitotonu,” ko tona fakaʼuhiga, ko te toko lau ʼi miliona hahaʼi kua natou ako te moʼoni ʼo ʼuhiga mo Sehova. (Tan. 12:3) Ko te ʼu “tagata e toko hogofulu” ʼe ko te ʼu kaumeʼa agatonu ʼo te kau fakanofo. ʼE natou maʼa he neʼe natou mavae ʼi te tauhi hala. Koia la ʼae ʼe ui ʼi te Pesalemo ko te ʼu “kaumea” ʼaia ko he ʼu “taahine tupulaga” he ʼe natou hage ko he ʼu taupoʼou ʼe maʼa. Kua natou foaki tonatou maʼuli kia Sehova pea mo  fakaha ko natou ko he ʼu kaugana agatonu ʼa te Hau ko Sesu Kilisito.

15. ʼE gaue feafeaʼi te ʼu “kaumea” mo te kau fakanofo ʼae ʼe kei maʼuʼuli ʼi te kele?

¹⁵ ʼE lotofakafetaʼi lahi te kau fakanofo ʼae ʼe kei maʼuʼuli ʼi te kele ki te ʼu “kaumea” ʼaia, koteʼuhi ʼe natou tokoni ʼaki he faʼafai ki te fakamafola ʼo ‘te logo lelei ʼo te Puleʼaga’ ʼi te kele katoa. (Mat. 24:14) ʼE mole ui pe e te laumalie mo te fafine ʼohoana ‘Haʼu,’ kaʼe ʼe toe ui foki e natou ʼae ʼe logo ki ai ‘Haʼu.’ (Apk. 22:17) Ko tona fakaʼuhiga, neʼe logo te tahi ʼu ovi ki te ui ʼae ʼa te kau fakanofo ‘Haʼu’ pea ʼe toe ui mo natou ki te hahaʼi ʼi te malamanei katoa ‘Haʼu.’—Soa. 10:16.

16. Kotea te pilivilesio ʼae neʼe foaki e Sehova ki te tahi ʼu ovi?

¹⁶ ʼE ʼofa te kau fakanofo ʼae ʼe kei maʼuʼuli ʼi te kele ki te tahi ʼu ovi. Pea ʼe natou fiafia ʼi te foaki ʼae e Sehova kia natou ia te pilivilesio ʼae ke natou fakafiafia mo natou ki te fai ʼohoana. Neʼe fakakikite ko te ʼu “kaumea” ʼaia, ‘ ʼe ʼave anai natou ʼi lotomalie ʼo ni fakafiafia. ʼE fiafia moʼoni anai ia te famili katoa ʼo Sehova ʼae ʼi te lagi mo te kele moka hoko anai te fai ʼohoana ʼo te Akeno ʼi selo. ʼE talanoa ʼi te tohi ʼo Apokalipisi ko te toe hahaʼi tokolahi, ʼae ʼe tauhi kia Sehova ʼi te kele, “ ʼe natou tutuʼu ia muʼa ʼo te hekaʼaga fakahau pea ia muʼa ʼo te Akeno.” ʼE natou tauhi kia Sehova ʼi te malaʼe fakakelekele ʼo tona fale lotu fakalaumalie.—Apk. 7:9, 15, MN.

17, 18. ʼE fua lelei feafeaʼi anai te fai ʼohoana ʼo te Akeno kia natou ʼae ka maʼuʼuli ʼi te malama foʼou? Ko ai anai ʼae ka tamai kia Kilisito lolotoga tana ʼAfio Ia Taʼu ʼe Afe?

¹⁷ Lau ia Pesalemo 45:17. ʼE toe fiafia lahi age anai te ʼu “kaumea” ʼo te ʼohoana ʼo Kilisito ʼi te temi ʼae ka natou sisio ai ki te ʼu lelei ka maʼu e te hahaʼi ʼi te malama foʼou ʼuhi ko te fai ʼohoana. Ko te Hau ia Sesu Kilisito ʼe ina fakatuʼuake anai ʼana “tamai” ʼi te kele. Pea ʼe liliu anai te ʼu “tamai” ʼaia ko ʼona “foha” koteʼuhi ko Kilisito ʼae ka ina fakatuʼuake natou. (Soa. 5:25-29; Hep. 11:35) ʼE fili anai e Kilisito ʼihi ʼi te ʼu “foha” ʼaia ke natou “pule i te fenua katoa.” ʼE toe feala foki ke tou fakaʼamu ʼe ina fili anai ʼihi tagata ʼafeā ia ʼaho nei moʼo takitaki ʼi te malama foʼou ohage ko ni “pule.”—Esa. 32:1.

¹⁸ Lolotoga tana ʼAfio Ia Taʼu ʼe Afe, ʼe liliu anai ia Kilisito ko he tamai maʼa ʼihi atu. ʼO feafeaʼi? Ko natou ʼae ʼe tui ki te sakilifisio faitotogi ʼa Sesu ʼe natou maʼuʼuli anai ʼi te kele ʼo talu ai. (Soa. 3:16) Pea ʼe liliu ai anai ia Kilisito ko tanatou “Tamai Heegata.”—Esa. 9:5, 6.

19, 20. ʼE malave feafeaʼi te ʼu aluʼaga fakaofoofo ʼae ʼe tuʼu ʼi te Pesalemo 45 ki te kau Kilisitiano moʼoni fuli ia ʼaho nei?

¹⁹ Lau ia Pesalemo 45:2, 18. ʼE tonu ki te kau Kilisitiano fuli ke natou ako te ʼu aluʼaga ʼae ʼe tuʼu ʼi te Pesalemo 45. Ko te kau fakanofo ʼae ʼe kei maʼuʼuli ʼi te kele ʼe natou fiafia ʼaupito ʼi tanatou iloʼi ʼae kua vave pe anai ia tonatou fakatahiʼi ki ʼonatou tehina pea mo te Tagata ʼOhoana, ia Sesu Kilisito. ʼE uga ai te tahi ʼu ovi ke natou fakalogo lelei ki tonatou Hau taulekaleka. ʼE natou toe lotofakafetaʼi foki ʼi tanatou fakakaumeʼa ʼae mo te tahi koga ʼo te fafine ʼohoana ʼi te kele. Pea ʼe mole anai hona fakatatau ʼo te ʼu tapuakina ʼae ka foaki e Kilisito mo te fafine ʼohoana ki te hahaʼi fuli hili te fai ʼohoana.—Apk. 7:17; 21:1-4.

²⁰ ʼI tatatou fakatalitali ʼae ki te fakahoko ʼo te ʼu lea fakapolofeta ʼo ʼuhiga mo te Hau Fakamesia, ʼe mahino papau ia ʼe uga ai tatou ke tou fakaʼilo tona huafa. Tou fakavikiviki ki te Hau “o heegata.”