‘ ʼE Tuputupu Takotou Feʼofaniʼaki’

ʼI TE taʼu 2004, neʼe lahi te ʼu tuʼutāmaki faka natula neʼe hoko ʼi Saponia. Neʼe ʼi ai te ʼu ʼahiohio, te ʼu lōmaki pea mo te ʼu mafuike. Tokolahi, neʼe fua kovi ʼaupito ki tonatou maʼuli ia te ʼu tuʼutāmaki ʼaia, ʼo kau ai mo te kau Fakamoʼoni ʼa Sehova. (Tagata Tānaki 9:11) Kae ʼi te ʼu faigataʼaʼia ʼaia, neʼe maʼu ai te ʼu faigamālie ki te kau Fakamoʼoni ke nātou fefakahāʼaki ia te ʼofā fakatautehina.​—1 Petelo 1:⁠22.

Ohage la, ʼuhi ko te ʼu ʼua lalahi ʼi Sūlio, neʼe hake te vaitafe ʼi te lotomalie ʼo te fenua ʼo Saponia. Ko fale e 20 tupu ʼa te kau Fakamoʼoni ʼa Sehova, ʼaē neʼe maumauʼi e te lōfia ʼaia. ʼI te tahi Fale ʼo te Puleʼaga, neʼe meta tahi te hake ʼa te vai. Neʼe ʼōmai atu aipe ia te ʼu Fakamoʼoni mai te ʼu kokelekasio ʼi te ʼu tafaʼaki ʼo tokoni kiā nātou. Ko te toko lauʼi teau kau gāue neʼe nātou heu te pela ʼi te ʼu ʼapi, pea mo nātou fakamaʼa. Neʼe fakamaʼa kātoa te loto Fale ʼo te Puleʼaga, pea mo toe gaohi ke toe lelei ia vāhaʼa pe e lua.

ʼI te ʼaho 23 ʼo ʼOketopeli, ko he mafuike e 6,8 tona mālohi ʼi te meʼa fua ʼa Richter, neʼe toe tō ʼi te koga meʼa ʼaia neʼe hoko ai te lōmaki. Ko te teitei 40 hahaʼi neʼe mamate ʼi te tuʼutāmaki ʼaia, pea mo 100 000 tupu te hahaʼi ʼaē neʼe fakamavae ʼi tonatou ʼapi. Neʼe mole kei ʼi ai he vai, he penesini pea mo he hila. Logola ko te galulu tāfito ʼo te mafuike neʼe tō ia kilometa e 50 ʼi te kolo, kae neʼe mole maumau te Fale ʼo te Puleʼaga ʼaē neʼe toe gaohi ke toe lelei. Neʼe foimo fakaʼaogaʼi atu aipe moʼo hāofaki faka temi ia te hahaʼi. Neʼe ʼolo fakavilivili kiai te ʼu tagata taupau, ʼo vakaʼi peʼe neʼe hāo tonatou ʼu tēhina mo tuagaʼane, pea neʼe nātou logo fīmālie ʼi tanatou ʼiloʼi ʼaē neʼe mole ʼi ai he tahi neʼe lavea peʼe neʼe mate. ʼI te māfoatā uhu, neʼe tali lelei e te kau tagata Fakamoʼoni e ono, ʼaē neʼe kau ia nātou ʼaē neʼe tō kovia ʼi te lōmaki ʼo Sūlio, ke nātou ʼolo ʼo tufa te meʼa kai pea mo te vai ʼinu ki te koga meʼa ʼaē neʼe tuʼutāmaki. ʼI te ʼu hola ʼaē neʼe hoa mai ki te mafuike, neʼe maʼu e te ʼu tēhina te ʼu meʼa ʼaē neʼe ʼaoga kiā nātou.

ʼE ʼui fēnei e te tagata ʼāfea: “Maʼa nātou ʼaē neʼe kau ia nātou ʼaē neʼe tō kovia ʼi te lōmaki, ko te gāue ʼaē neʼe fai ki te ʼu tēhina ʼaē neʼe tō kiai te mafuike, ʼe ko he faigamālie ke nātou fakahā tonatou loto fakafetaʼi ki te tokoni ʼaē neʼe fai age kiā nātou. Neʼe nātou gāue kinakina mai te uhu ki te pōʼuli. Pea neʼe ʼiloga te fiafia ʼi tonatou ʼu fofoga!”

ʼE mole he ʼu lōmaki peʼe ko he ʼu mafuike, ʼe nātou lava maumauʼi te ʼu noʼo ʼo te ʼofa faka tautēhina ʼa te kau Kilisitiano, ʼaē ʼe maʼu e te kau Fakamoʼoni ʼa Sehova. Kailoa ia, kae ka hoko te ʼu faʼahiga tuʼutāmaki ʼaia, neʼe ʼui fēnei e te ʼapositolo ko Paulo ki tona ʼu tēhina Kilisitiano ʼo Tesalonika: “ ʼE tuputupu te feʼofaʼofani ʼo koutou takitokotahi pea mo koutou fuli.”​—2 Tesalonika 1:​3, MN.