ʼE Nātou Faka Mafola Te Logo Lelei Ki Te Kau Tuli

“ ʼE NĀTOU foaki atu te maʼuli fakalaumālie!” ʼE mole heʼeki faʼa fualoa, neʼe fai te ʼu palalau ʼaia e te tagata pule ʼo te fale ʼo te hahaʼi vaivavai ʼi Navalcarnero, ʼo Madrid ʼi Sepania, ʼo ʼuhiga mo te ʼu ʼaʼahi ʼa te kau Fakamoʼoni ʼa Sehova ki te fale ʼaia. Koteā ʼaē neʼe tupu ai tana palalau feiā?

Tokolahi ʼi te hahaʼi mātutuʼa ʼaē ʼe nonofo ʼi te fale ʼo Rosas del Camino ʼe nātou tuli. Kae mai te ʼaluʼaga ʼaē ʼe faigaʼi e te kau Fakamoʼoni, ke nātou ako te lea ʼaē ʼe fai ʼaki te ʼu nima ʼi te faka Sepania, neʼe feala ai tanatou felogoi mo te hahaʼi mātutuʼa ʼo te fale aia. Neʼe vikiʼi e te tagata pule ia te kau Fakamoʼoni, ʼi tanatou foaki tonatou temi kae mole totogi, moʼo akoʼi te ʼu meʼa ʼaē ʼe maʼuhiga ʼi te faʼahi fakalaumālie. Neʼe ina fakatokagaʼi ko te ako ʼo te logo lelei ʼo te Pule aga ki te hahaʼi mātutuʼa, ʼe ʼi ai tona ʼu fua lelei. Pea ko te hahaʼi mātutuʼa, tāfito ia te hahaʼi tuli pea mo te hahaʼi kivi, ʼe nātou toe leleiʼia foki te ʼaʼahi ʼa te kau Fakamoʼoni.

Ko te tagata matuʼa ko Eulogio ʼaē ʼe nofo ʼi te fale, ʼe kivi pea mo tuli, pea ʼe ina ako nei te Tohi-Tapu mo te kau Fakamoʼoni ʼa Sehova. ʼI te tahi ʼaho neʼe lolotoga fai tana ako, pea neʼe fakaōvi age te matuʼa ʼo foaki age ki te Fakamoʼoni, te pepa ʼe tuʼu ai te ʼu palalau fakatuketuke neʼe tohi e te hahaʼi mātutuʼa ʼo te fale moʼo fakahā tonatou loto fakafetaʼi. ʼE fēnei tona kupu tāfito “Te Maʼuli ʼa He Fakamoʼoni.” ʼE ʼui fēnei ʼi te tahi koga: “ ʼE nātou māʼuʼuli fiafia pea mo mulimuli lelei ki te ʼu pelesepeto ʼi tonatou māʼuli, pea ʼe foaki age e Sehova te poto ʼaē ʼe fakafiafia. ʼE nātou tau liliu ʼo ʼaʼahi te ʼu ʼapi, heʼe nātou tui kiā Sehova.”

ʼUhi ko tanatou tui ʼaia kiā Sehova, ko te tokolahi ʼi te kau Fakamoʼoni ʼi te malamanei kātoa, ʼe nātou ako ʼi tonatou ʼu fenua, te lea ʼaē ʼe fai ʼaki te ʼu nima moʼo palalau ki te hahaʼi tuli. ʼAki te faʼahiga fai ʼaia, ʼe nātou faka mafola ki te hahaʼi ʼaia, ia te logo fakaloto mālohi ʼo te ʼamanaki ʼaē ʼe tuʼu ʼi te Tohi-Tapu.