ʼE Tou Tui Ki He ʼAtua ʼe Mole Lagi Tou ʼIloʼi
ʼE Tou Tui Ki He ʼAtua ʼe Mole Lagi Tou ʼIloʼi
KO TE toko lua ʼi te toko tolu hahaʼi Siamani ʼe nātou tui ki te ʼAtua. Kae ʼi te fehuʼi ʼaē ki te teitei toko afe hahaʼi ke nātou fakamatala te agaaga ʼo te ʼAtua ʼaē ʼe nātou tui kiai, tokolahi neʼe kehekehe tanatou tali kiai. ʼE ʼui fēnei e te nusipepa FOCUS: “Ko te manatu ʼa te hahaʼi Siamani ʼo ʼuhiga mo te ʼAtua ʼe hage pe tona kehekehe ko te kehekehe ʼo te hahaʼi fuli.” Logola ko te tui ki te ʼAtua ʼe ko he meʼa lelei, kae ʼe mole faikehe koa la hatatou tui kia te ia kae mole tou ʼiloʼi tona ʼulugaaga moʼoni?
Ko te mole ʼiloʼi lelei ʼo te ʼulugaaga ʼo te ʼAtua ʼe mole maʼu pe ʼi Siamani, kae ʼe maʼu ʼi te ʼu potu fuli pe ʼi Eulopa. Ko te sivisivi neʼe fai ʼi Otilisia, mo Pilitania, pea mo Holani neʼe fakahā ai te manatu tahi ʼa te hahaʼi ko te ʼAtua ʼe “ko te mālohi lahi tokotahi peʼe ko he meʼa fakalilo ʼe mole feala ke mahino kiai he tahi.” Tāfito ʼi te kau tūpulaga, māʼiape la ia nātou ʼaē ʼe tui kia te ia, ko te ʼAtua ʼe ko he misitelio.
ʼE Koutou ʼIloʼi Koa Te ʼUhiga Moʼoni ʼo Te ʼAtua?
ʼE kehekehe ʼaupito te ʼiloʼi ʼo he tahi pea mo te ʼiloʼi ʼo tona ʼuhiga moʼoni. Ko te ʼiloʼi ʼo he tahi, ohage la ko he hau maʼuhiga ʼaupito, peʼe ko he tagata faigaoʼi ʼe mālohi, peʼe ko he tagata peʼe ko he fafine ʼe ʼiloa ʼi te ʼu ʼata, ko tona faka ʼuhiga ko te ʼiloʼi pe ʼaē ʼe maʼuli. Kae ko te ʼiloʼi ʼo te ʼuhiga moʼoni ʼo he tahi, ʼe mole gata ʼaki pe te faʼahi ʼaia. ʼE faka ʼuhiga ke kita ʼiloʼi lelei tona ʼulugaaga, mo tana aga, te ʼu meʼa ʼaē ʼe ina logoʼi, te ʼu meʼa ʼaē ʼe ina leleiʼia pea mo fehiʼa kiai, pea mo tana ʼu fakatuʼutuʼu ki te ka haʼu. Ko te ʼiloʼi ʼo te ʼuhiga moʼoni ʼo he tahi ʼe ko te kamata ʼaia ʼo he ʼu felogoi lelei mo ia.
Neʼe mahino ki te ʼu lauʼi teau afe hahaʼi ʼe mole feʼauga pe hanatou ʼiloʼi feiā te ʼAtua, ʼaki tanatou ʼiloʼi pe ʼaē ʼe maʼuli moʼoni. Neʼe nātou haʼele ki muʼa ʼi tanatou ʼiloʼi te ʼuhiga moʼoni ʼo te ʼAtua. Neʼe ʼi ai koa hona ʼu fua lelei kia nātou? Ko te tagata ʼe higoa ko Paul, ʼe nofo ʼi Siamani pea neʼe mole loloto tana tui ki te ʼAtua, neʼe ina fakatotonu ke ina ʼiloʼi lelei age te ʼulugaaga ʼo te ʼAtua. ʼE fakamahino fēnei e Paul: “Ko te ʼiloʼi lelei ʼo te ʼuhiga moʼoni ʼo te ʼAtua ʼe fakamaʼua kiai he temi pea mo he faiga, kae ʼe iku ki he fakapale lahi. Ko te maʼu ʼo he ʼu felogoi lelei mo te Tupuʼaga ʼe ina fakaliliu te maʼuli ko he meʼa fakafiafia ʼi te ʼaho fuli.”
ʼE ʼaoga koa ke tou fakaʼaogaʼi he temi pea mo tou faiga lahi ke tou ʼiloʼi lelei te ʼAtua? Moʼo tali kiai, koutou lau te alatike ʼaē ʼe hoa mai.
[Talanoa/Paki ʼo te pasina 3]
ʼE lahi ʼaupito te kehekehe ʼo te ʼiloʼi ʼo he tahi pea mo te ʼiloʼi ʼo tona ʼuhiga moʼoni