Ko Te Kau Fai Faka Mafola ʼo Te Puleʼaga

ʼE Ava Te ʼu Fale ʼo Te Puleʼaga Ki Te Hahaʼi Fuli

ʼI TANA akoʼi tana ʼu tisipulo ki te gāue fai faka mafola, neʼe fakaloto mālohiʼi nātou e Sesu ke nātou “kalagai i te u fuga ato.” (Mateo 10:27) Ei neʼe tonu ke nātou fai fakahāhā tanatou minisitelio faka Kilisitiano ki te hahaʼi fuli. ʼO mulimuli ki te tokoni ʼaia, ʼe fai feiā e te kau Fakamoʼoni ʼa Sehova, ʼe nātou fai faka mafola fakahāhā ki te hahaʼi. Neʼe feala ai ki te kau Fakamoʼoni ke nātou lava tekeʼi te ʼu fakataga pea ke palalau lelei te hahaʼi ʼo ʼuhiga mo nātou.

Logola ʼe lava ʼolo te hahaʼi fuli ki te ʼu fono ʼa te kau Fakamoʼoni ʼa Sehova, kae ko ʼihi hahaʼi ʼe mole nātou fia ʼolo ki tonatou ʼu Fale ʼo te Puleʼaga, ʼuhi ko te ʼu meʼa ʼaē ʼe lau ʼo ʼuhiga mo te kau Fakamoʼoni ʼa Sehova. ʼE moʼoni te faʼahi ʼaia ʼo ʼuhiga mo te kokelekasio ʼi Finilani. Ko ʼihi ʼe mole ko hanatou agamāhani te ʼolo ki he ʼu koga meʼa foʼou. Ka laga he Fale foʼou ʼo Te Puleʼaga peʼe fakafoʼou he fale ʼāfea ʼo te Puleʼaga, ʼi te agamāhani ʼe nātou fakatuʼutuʼu te ʼaho ke ʼōmai te hahaʼi fuli ʼo ʼaʼahi te fale ʼaia. ʼE lagi fai anai te ʼu fakaafe ki te hahaʼi ke nātou ʼōmai ʼo ʼaʼahi te Fale ʼo Te Puleʼaga pea mo fakamahino age kia nātou ia te gāue ʼa te kau Fakamoʼoni ʼa Sehova.

ʼI te tahi koga meʼa, neʼe fakatuʼutuʼu e te kau Fakamoʼoni ke nātou fai he ʼu apone ki te ʼu nusipepa, ʼi te ʼaho tonu ʼaē neʼe nātou fakatuʼutuʼu ai te ʼaho ke ʼōmai te hahaʼi fuli ʼo ʼaʼahi tonatou Fale foʼou ʼo Te Puleʼaga. Neʼe felāveʼi te ʼu Fakamoʼoni e toko lua mo te matuʼa neʼe ina ʼui age kia nāua neʼe ina fia lau Te Tule Leʼo pea mo te Réveillez-vous ! Neʼe fakahā e te ʼu tēhina ʼe ʼi ai te ʼaho ʼe feala ki te hahaʼi fuli ke nātou ʼolo ʼo ʼaʼahi te Fale ʼo Te Puleʼaga, pea neʼe nā fakaafe ia ia ke nātou kaugā ʼolo. Neʼe ʼui age e te matuʼa ʼe fia ʼalu mo nāua. Ko tona ʼohoana, neʼe fakalogologo ki tanatou fai palalau pea neʼe ina kalaga fēnei age, “ ʼE ʼau fia ʼalu mo koe!”

ʼI tana hū ki te Fale ʼo Te Puleʼaga, neʼe sioʼi e te tagata te ʼu faʼahi fuli ʼo te fale pea ʼui maʼana: “ ʼE mole fakapōʼuli ʼi loto nei. ʼE mālama lelei ʼosi pe ia. Neʼe ʼui mai e te hahaʼi ʼe fakapōʼuli anai te Fale ʼaenī!” Neʼe fuafualoa te nofo ʼa te taumatuʼa pea neʼe nā kole age hanā ʼu tohi ʼi te ʼu tohi ʼaē neʼe fakahāhā.

Ko te tahi kokelekasio neʼe ina fia fakahā ʼi te sulunale ʼo te fenua te ʼaho ʼe feala ki te hahaʼi fuli ke nātou ʼōmai ki te avahi ʼo tonatou Fale ʼo Te Puleʼaga. ʼI tana maʼu te logo ʼo te ʼaho ʼaia, neʼe ʼui e te fafine pule ʼo te fale sulunale ʼe tonu ke tā he alatike moʼo fakamatala te ʼaho ʼaia. Neʼe tali e te ʼu tēhina, hili te kiʼi temi siʼisiʼi kiai, neʼe nātou tā te alatike ʼi te sulunale, ʼe talanoa ai ki te ʼaho ʼaia pea mo fakamahinohino ai te ʼu gāue ʼaē ʼe fai e te kau Fakamoʼoni ʼa Sehova ʼi te kolo.

ʼI te ʼosi tā ʼo te alatike ʼi te sulunale, neʼe felāveʼi te tuagaʼane finematuʼa mo te fafine ʼe nā vāhaʼa fale neʼe ina ʼui fēnei age ki ai: “Neʼe ʼi ai te alatike lelei ʼo ʼuhiga mo te kau Fakamoʼoni ʼa Sehova ʼi te sulunale ʼo te ʼaho nei!” Neʼe palalau age te tuagaʼane ki te moʼoni pea ki muli age neʼe ina tuku age te kaupepa Les Témoins de Jéhovah du XXe siècle.

Neʼe feala ki te ʼu taʼi fakatuʼutuʼu ʼaia ke nātou holoʼi te ʼu manatu hala ʼo ʼuhiga mo te kau Fakamoʼoni ʼa Sehova, pea ko te ʼu fakatuʼutuʼu ohage ko te ʼu ʼaho ʼaē ʼe feala ai ki te hahaʼi fuli ke nātou ʼaʼahi te ʼu Fale foʼou ʼo Te Puleʼaga pea mo te ʼu ʼaho ʼaē ʼe avahi ai te ʼu fale ʼaia, neʼe ina uga ai te kau fai faka mafola ke nātou lotomālohi ʼo fakaafe ni hahaʼi tokolahi ke nātou kau ki te ʼu fono ʼaia. Ei, ʼe lahi te ʼu fenua, ohage la ko Finilani, neʼe mahino ai ʼe ava te ʼu Fale ʼo Te Puleʼaga ʼo te kau Fakamoʼoni ʼa Sehova ki te hahaʼi fuli.