ʼEi, ʼe ʼi ai te kau ʼaselo agakovi. ʼE natou ʼomai mai fea? ʼE tou manatuʼi neʼe fakatupu e te ʼAtua te kau ʼaselo mo te loto faʼitaliha. Hili he kiʼi temi ki te fakatupu ʼo te ʼuluaki tagata mo te ʼuluaki fafine, ia Atama mo Eva, neʼe ʼi ai leva he ʼaselo haohaoa. Neʼe ina fakaʼaogaʼi tona loto faʼitaliha ʼo ina filifili te meʼa ʼae neʼe loto ki ai ʼo hoko ai he fakafeagai ʼi te kele. Neʼe uga e te ʼaselo ʼaia ia Atama mo Eva ke nā fakafeagai ki te ʼAtua. (Senesi 3:1-7; Fakaha 12:9) ʼE mole fakaha ʼi te Tohi-Tapu pe neʼe ko ai te higoa totonu ʼo te ʼaselo ʼaia peʼe ko te tuʼulaga ʼae neʼe ina maʼu ʼi selo ʼi muʼa ʼo tana fakafeagai. Kaʼe hili tana agatuʼu, neʼe fakahigoaʼi ia ia ʼi te Tohi-Tapu ko Satana ko tona fakaʼuhiga ko “He Tahi ʼe Fakafeagai,” pea Tevolo ko tona fakaʼuhiga ʼe ko “He Tahi ʼe Faifasituʼu.”—Mateo 4:8-11.

Meʼa fakaʼofaʼofa foki, he neʼe mole gata pe ʼi te fakafeagai ʼaia. ʼI te temi ʼo Noe, neʼe tokolahi te kau ʼaselo neʼe natou “liakī tonatou nofoʼaga totonu” ʼi te famili ʼo te ʼAtua ʼae ʼe ʼi Selo. Neʼe natou hihifo mai ki te kele pea neʼe natou kofuʼi ia he ʼu sinoʼi tagata ʼo natou hoko atu tanatou fai te ʼu aga heʼe ʼaoga, ʼo natou maliu ai mai te fakatuʼutuʼu ʼa Sehova ʼo ʼuhiga mo natou.—Suta 6; Senesi 6:1-4; 1 Petelo 3:19, 20.

Kotea ʼae neʼe hoko ki te kau ʼaselo ʼaia? ʼI te temi ʼae neʼe fakato ai e te ʼAtua ia te tulivio ki te kele katoa, neʼe natou liakī ia te ʼu sinoʼi tagata pea natou toe liliu ki selo. Kaʼe neʼe mole fakagafua e te ʼAtua ki te kau ʼaselo agatuʼu ʼaia ke natou toe liliu ki “ ʼonatou tuʼulaga ʼi te kamata.” Kaʼe neʼe tuku natou ki he aluʼaga ʼe malalo ʼaupito, ʼe “fakapoʼuli gaogao” ʼi te faʼahi fakalaumalie, ʼae ko te Taletale. (Suta 6; 2 Petelo 2:4) Ko te kau temonio ʼaia ʼe takitaki e Satana “te pule ʼo te kau temonio,” ʼae ʼe ina fakaliliu pe ia ia totonu ko he ʼaselo ʼe lelei.—Mateo 12:24; 2 Kolonito 11:14.

ʼE akoʼi ʼi te Tohi-Tapu ko te Puleʼaga Fakamesia ʼo te ʼAtua ʼe ko he puleʼaga ʼi selo neʼe fakatuʼu ʼi te taʼu 1914. * Hili ia te aluʼaga maʼuhiga ʼaia ko Satana mo tana kau temonio neʼe kapu ifo natou mai te lagi ki te kele. Ko te lahi ʼo te agakovi pea mo te ʼu aga heʼe ʼaoga ʼae ʼi te temi nei ʼe ha ai tanatou iita pea mo tanatou fia matehi he tokolahi.—Fakaha 12:9-12.

ʼI te ʼaʼasili ʼo te agakovi pea mo te agamalohi ʼe fakamoʼoni ai te kua vave fakaʼosi ʼo te pule ʼa te kau temonio. Ko te kau ʼaselo agakovi ʼaia ʼe mole natou toe fakatupu mamahi anai. Hili anai te ʼafio ʼo te Puleʼaga ʼo te ʼAtua ʼi he palatiso fakakelekele lolotoga taʼu ʼe 1000, ko te kau ʼaselo agakovi ʼaia ʼe natou maʼu anai he kiʼi temi faigamalie moʼo ʼahiʼahiʼi fakaʼosi ia te hahaʼi. Pea hili ia, ʼe pulihi anai ia natou ʼo talu ai.—Mateo 25:41; Fakaha 20:1-3, 7-10.